ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 նոյեմբերի 2022 թվականի N 1673-Լ

«ՀԱՆՐԱԿՐԹՈՒԹՅԱՆ ՄԱՍԻՆ» ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՌԱՋԱՐԿՈՒԹՅԱՆ ՄԱՍԻՆ

Հիմք ընդունելով «Ազգային ժողովի կանոնակարգ» Հայաստանի Հանրապետության սահմանադրական օրենքի 77-րդ հոդվածի 1-ին մասը՝ Հայաստանի Հանրապետության կառավարությունը որոշում է.

1. Հավանություն տալ «Հանրակրթության մասին» օրենքում փոփոխություններ և լրացումներ կատարելու մասին» Հայաստանի Հանրապետության օրենքի նախագծի (Պ-391-04.10.2022-ԳԿ-011/0) վերաբերյալ Հայաստանի Հանրապետության կառավարության առաջարկությանը:

2. Հայաստանի Հանրապետության կառավարության առաջարկությունը սահմանված կարգով ներկայացնել Հայաստանի Հանրապետության Ազգային ժողովի աշխատակազմ:

Հայաստանի Հանրապետության վարչապետ	Ն. Փաշինյան
Երևան

03.11.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

«ՀԱՆՐԱԿՐԹՈՒԹՅԱՆ ՄԱՍԻՆ» ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ (Պ-391-04.10.2022-ԳԿ-011/0) ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՌԱՋԱՐԿՈՒԹՅՈՒՆԸ

«Հանրակրթության մասին» օրենքում փոփոխություններ և լրացումներ կատարելու մասին» Հայաստանի Հանրապետության օրենքի նախագծի (այսուհետ՝ նախագիծ) վերաբերյալ Հայաստանի Հանրապետության կառավարությունը ներկայացնում է հետևյալ դիտարկումները.

1. Նկատի ունենալով այն հանգամանքը, որ նախագծով նախատեսվում է «Հանրակրթության մասին» օրենքում կատարել միայն փոփոխություններ, անհրաժեշտ է նախագծի վերնագիրը խմբագրել՝ հանելով «և լրացումներ» բառը:

2. Նախագծով առաջարկվում է 25-րդ հոդվածի 5-րդ մասը շարադրել հետևյալ խմբագրությամբ՝

«5. Սույն հոդվածի 4-րդ մասով սահմանված դեպքերում վարչական աշխատողը կարող է դասավանդել միայն այն դեպքում, երբ տվյալ առարկայի ուսուցիչները ապահովված են առնվազն մեկ դրույք ծանրաբեռնվածությամբ, իսկ թափուր մնացած ժամերի համար առնվազն երկու անգամ հայտարարվել է մրցույթ, և համապատասխան առարկայի ուսուցչի թափուր տեղը չի համալրվել սույն օրենքի 26-րդ հոդվածի 1-ին և 2-րդ մասերի պահանջներին համապատասխան։ Առավելագույնը մեկ ուսումնական տարի ժամկետով կնքված աշխատանքային պայմանագրի հիման վրա մինչև 100 սովորող ունեցող հանրակրթական ուսումնական հաստատության վարչական աշխատողը կարող է դասավանդել այլ հանրակրթական ուսումնական հաստատությունում։»:

Ստացվում է, որ եթե աշխատողը մինչև 100 սովորող ունեցող հանրակրթական ուսումնական հաստատության վարչական աշխատող է և մեկ այլ հանրակրթական ուսումնական հաստատությունում դասավանդելու է, ապա որպես երկրորդ ուսումնական հաստատության դասավանդող իր հետ պետք է կնքվի որոշակի ժամկետով աշխատանքային պայմանագիր՝ պայմանավորված այն հանգամանքով, որ վերջինս մինչև 100 սովորող ունեցող հանրակրթական ուսումնական հաստատության վարչական աշխատող է։

Այս մասով հարկ է նկատել, որ Աշխատանքային օրենսգրքի (այսուհետ՝ օրենսգիրք) 94-րդ հոդվածի համաձայն՝ աշխատանքային պայմանագիրը կնքվում է անորոշ ժամկետով, բացառությամբ օրենսգրքի 95-րդ հոդվածով նախատեսված դեպքերի:

Օրենսգրքի 95-րդ հոդվածի 1-ին մասի համաձայն՝ որոշակի ժամկետով աշխատանքային պայմանագիր է կնքվում, եթե աշխատանքային հարաբերությունները չեն կարող որոշվել անորոշ ժամկետով` հաշվի առնելով կատարվելիք աշխատանքի բնույթը կամ կատարման պայմանները, եթե օրենսգրքով կամ օրենքներով այլ բան նախատեսված չէ:

Միաժամանակ նույն հոդվածի 3-րդ մասով էլ սահմանված է, թե որոշակի ժամկետով պայմանագրեր որ դեպքերում են նաև կնքվում, մասնավորապես՝

1) ընտրովի պաշտոններում աշխատողների հետ` ընտրված ժամանակահատվածով.

2) օրենքով սահմանված ժամկետով նշանակված աշխատողների հետ.

3) սեզոնային աշխատանքներ կատարողների հետ.

4) ժամանակավոր (մինչև երկու ամիս ժամկետով) աշխատանքներ կատարողների հետ.

5) ժամանակավորապես բացակայող աշխատողին փոխարինող աշխատողի հետ.

6) օտարերկրացիների հետ՝ կացության իրավունքի վավերականության ժամկետով, եթե Հայաստանի Հանրապետությունում աշխատելու համար օտարերկրացուց պահանջվում է ունենալ կացության կարգավիճակ.

7) տարիքային կենսաթոշակի իրավունք ունեցող և վաթսուներեք տարին լրացած կամ տարիքային կենսաթոշակի իրավունք չունեցող և վաթսունհինգ տարին լրացած անձանց հետ՝ գործատուի կողմից առաջարկվող պաշտոնում կամ աշխատանքում անձի մասնագիտական ունակությունների գնահատման հիման վրա:

Հաշվի առնելով վերոգրյալը՝ գտնում ենք, որ նախագծի 25-րդ հոդվածի նոր շարադրվող 5-րդ մասի 2-րդ նախադասության դրույթը հիմնավորման և հստակեցման կարիք ունի, այլապես ներկայացված խմբագրությամբ այն հակասում է օրենսգրքին։

3. Նախագծի 4-րդ հոդվածը շարադրել հետևյալ խմբագրությամբ՝

«Հոդված 4. Օրենքի 29-րդ հոդվածի 1-ին մասի 6.2-րդ կետը շարադրել հետևյալ խմբագրությամբ՝

«6.2. հաստատում է պետական ուսումնական հաստատության համակարգողի նշանակման կարգը.»:

4. Հաշվի առնելով նախագծի 6-րդ և 7-րդ հոդվածներով նախատեսվող կարգավորումների բովանդակությունը՝ առաջարկում ենք հիշյալ հոդվածներով սահմանվող դրույթները նախատեսել նոր շարադրվող խմբագրությամբ: