ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Օ Ր Ե Ն Ք Ը
Ընդունված է 2006 թվականի դեկտեմբերի 22-ին
«ԸՆԴԵՐՔՆ ՕԳՏԱԿԱՐ ՀԱՆԱԾՈՆԵՐԻ ՇԱՀԱԳՈՐԾՄԱՆ ՆՊԱՏԱԿՈՎ ՈՒՍՈՒՄՆԱՍԻՐՈՒԹՅԱՆ ԵՎ ԱՐԴՅՈՒՆԱՀԱՆՄԱՆ ՀԱՄԱՐ ՏՐԱՄԱԴՐԵԼՈՒ (ԿՈՆՑԵՍԻԱՅԻ) ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հոդված 1. «Ընդերքն օգտակար հանածոների շահագործման նպատակով ուսումնասիրության և արդյունահանման համար տրամադրելու (կոնցեսիայի) մասին» Հայաստանի Հանրապետության օրենքի (5 նոյեմբերի 2002 թվականի, ՀՕ-440-Ն) 3-րդ հոդվածի առաջին պարբերությունում`
ա) չորրորդ, հինգերորդ, յոթերորդ և ութերորդ թվարկումների առաջին նախադասությունները «լիցենզիա`» բառից հետո շարադրել հետևյալ խմբագրությամբ` «գրավոր թույլտվություն, որն իրավունք է վերապահում տնտեսավարող սուբյեկտին սկսել հանքային իրավունքի ձևավորման գործընթացը.».
բ) իններորդ թվարկումը շարադրել հետևյալ խմբագրությամբ`
«հանքային իրավունքներ` համապատասխան լիցենզիայով, նախագծով և լիցենզային պայմանագրով հավաստվող ընդերքի որոշակի տեղամասի ուսումնասիրության և (կամ) շահագործման բացառիկ իրավունքներ.».
գ) տասներորդ թվարկումը շարադրել հետևյալ խմբագրությամբ`
«լիցենզառու` դեռևս գործողության մեջ չմտած լիցենզիա ունեցող տնտեսավարող սուբյեկտ.».
դ) ավելացնել հետևյալ բովանդակությամբ նոր թվարկում`
«մրցույթով տրամադրվող լիցենզիաներ` սույն օրենքի համաձայն` մրցութային կամ աճուրդային կարգով տրամադրված լիցենզիաներ:»:
Հոդված 2. Օրենքի 5-րդ հոդվածի 1-ին կետը շարադրել հետևյալ խմբագրությամբ`
«1) բնական պաշարների (օգտակար հանածոների) ողջամիտ օգտագործման,»:
Հոդված 3. Օրենքի 10-րդ հոդվածի վեցերորդ մասում`
ա) «Հանքային իրավունք կրողի» բառերը փոխարինել «Լիցենզառուի» բառով.
բ) 4-րդ կետի «6 ամիսը» բառերը փոխարինել «7 ամիսը» բառերով:
Հոդված 4. Օրենքի 13-րդ հոդվածում`
ա) առաջին մասի 2-րդ կետը շարադրել հետևյալ խմբագրությամբ`
«2) ընդերքի տեղամասը չի պարունակում ռազմավարական նշանակություն ունեցող օգտակար հանածոներ.».
բ) չորրորդ մասը «դեպքում» բառից հետո լրացնել «, բացառությամբ մրցույթով տրամադրման դեպքերի» բառերով:
Հոդված 5. Օրենքի 14-րդ հոդվածը շարադրել հետևյալ խմբագրությամբ`
| «Հոդված 14. | Ռազմավարական նշանակություն ունեցող օգտակար հանածոների ուսումնասիրության և արդյունահանման լիցենզիաների տրամադրման կարգը |
1. Ռազմավարական նշանակություն ունեցող օգտակար հանածոների ուսումնասիրության և արդյունահանման լիցենզիաները տրամադրվում են աճուրդային կարգով, իսկ Հայաստանի Հանրապետության կառավարության որոշմամբ սահմանված դեպքերում` նաև մրցութային կարգով:
Ռազմավարական նշանակություն ունեցող օգտակար հանածոների ցանկը հաստատում է Հայաստանի Հանրապետության կառավարությունը:
2. Աճուրդներն ու մրցույթները կազմակերպվում և անցկացվում են Հայաստանի Հանրապետության քաղաքացիական օրենսգրքի, սույն օրենքի և «Հրապարակային սակարկությունների մասին» Հայաստանի Հանրապետության օրենքի պահանջների համաձայն:
3. Աճուրդով և մրցույթով տրամադրվող լիցենզիաներ ստացած լիցենզառուների հետ մինչև լիցենզային պայմանագրի կնքումն իրավահարաբերությունները կարգավորվում են նախնական պայմանագրում ամրագրված պայմաններով, իսկ լիցենզային պայմանագրի կնքման պահից` դրանում ամրագրված պայմաններով:»:
Հոդված 6. Օրենքը լրացնել հետևյալ բովանդակությամբ 14.1-րդ, 14.2-րդ և 14.3-րդ հոդվածներով`
| «Հոդված 14.1. | Աճուրդի և մրցույթի կազմակերպումն ու իրականացումը |
Աճուրդների և մրցույթների կազմակերպման ու անցկացման նպատակով ստեղծվում է միջգերատեսչական մրցութային հանձնաժողով, որի կազմը և գործունեության կարգը հաստատվում են Հայաստանի Հանրապետության կառավարության որոշմամբ:
| Հոդված 14.2. | Աճուրդի արդյունքների մասին արձանագրությունը և նախնական պայմանագիրը |
1. Միջգերատեսչական մրցութային հանձնաժողովի անունից` հանձնաժողովի նախագահի և աճուրդի կամ մրցույթի հաղթողի կողմից ստորագրվում է արձանագրություն, որից հետո` տասնօրյա ժամկետում, նրանց միջև կնքվում է նախնական պայմանագիր, որտեղ նշվում են աշխատանքների նախագծի կազմման և դրա օրենքով սահմանված` փորձաքննությունների իրականացման, լիցենզիայի տրամադրման, լիցենզային պայմանագրի քննարկման և կնքման ժամկետները, ինչպես նաև կողմերի կողմից իրականացվելիք այլ գործողությունները և պարտավորություններն ու դրանց կատարման ժամկետները:
2. Նախնական պայմանագրում չեն կարող ամրագրվել իրավունքներ և պարտականություններ, որոնց աճուրդի մասնակիցները նախապես տեղեկացված չեն եղել:
| Հոդված 14.3. | Նախնական պայմանագրի պայմանների խախտումը |
Աճուրդի կամ մրցույթի հաղթողի կողմից նախնական պայմանագրի պայմանների և դրանում նշված ժամկետների խախտումը հիմք է հանդիսանում աճուրդն անվավեր ճանաչելու և նոր աճուրդ հայտարարելու համար:»:
Հոդված 7. Օրենքի 17-րդ հոդվածում`
ա) «Ուսումնասիրության» բառը փոխարինել «Գործողության մեջ մտած ուսումնասիրության» բառերով.
բ) «լիցենզառուին» բառը փոխարինել «հանքային իրավունք կրողին» բառերով:
Հոդված 8. Օրենքի 30-րդ հոդվածի առաջին մասը շարադրել հետևյալ խմբագրությամբ`
«1. Հանքային իրավունք կրող տնտեսավարող սուբյեկտը, որը ցանկանում է հրաժարվել ընդերքի այն տեղամասից կամ դրա մի մասից, որի նկատմամբ տրվել է հանքային իրավունք, հրաժարումը հավաստելու նպատակով պետք է դիմի լիազոր մարմին` հրաժարումն ուժի մեջ մտնելու` իր համար ցանկալի օրվանից առնվազն 3 ամիս առաջ:
Սույն օրենքի համաձայն` լիազոր մարմինը 30-օրյա ժամկետում դիմումատուին տրամադրում է հրաժարման հավաստագիր` առանց պայմանների կամ հրաժարման ենթակա տարածքի նկատմամբ իր սահմանած պայմաններով:»:
Հոդված 9. Օրենքի 31-րդ հոդվածում`
ա) առաջին մասի մուտքի նախադասությունը շարադրել հետևյալ խմբագրությամբ`
«1. Լիազոր մարմինը կարող է հանքային իրավունք կրող տնտեսավարող սուբյեկտին տալ գրավոր զգուշացում, եթե նա`».
բ) առաջին մասի 2-րդ կետը շարադրել հետևյալ խմբագրությամբ`
«2) չի կատարում հանքային իրավունքի պայմանները, այդ թվում` լիցենզային պայմանագրով, նախագծով և լիցենզիայով նախատեսված իր պարտավորությունների իրականացմանն առնչվող պայմանները.».
գ) չորրորդ մասի «լիցենզառուն» բառը փոխարինել «հանքային իրավունք կրողը» բառերով.
դ) հինգերորդ մասի «լիցենզառուի» բառը փոխարինել «հանքային իրավունք կրողի» բառերով:
Հոդված 10. Օրենքի 38-րդ հոդվածի 6-րդ կետի «չեն բավարարում» բառերը փոխարինել «բավարարում են» բառերով:
Հոդված 11. Սույն օրենքն ուժի մեջ է մտնում պաշտոնական հրապարակմանը հաջորդող տասներորդ օրվանից:
|
Հայաստանի Հանրապետության |
Ռ. Քոչարյան |
|
|