ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
9 դեկտեմբերի 2021 թվականի N 1988-Ա
«ՀԱՅ-ԱԼՄԱՍՏ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆ ՀԻՄՆԱԴՐԵԼՈՒ ՄԱՍԻՆ
Հիմք ընդունելով «Բաժնետիրական ընկերությունների մասին» Հայաստանի Հանրապետության օրենքի 10-րդ և 12-րդ հոդվածները՝ Հայաստանի Հանրապետության կառավարությունը որոշում է.
1. Հայաստանի Հանրապետության տարածքում գործող ադամանդագործական ընկերությունների կոնսոլիդացված պահանջարկն սպասարկելու, այն է՝ նույն ընկերությունների կողմից իրականացված կանխավճարների հաշվին ալմաստի հումք արդյունահանող ընկերություններից միասնական (մեկ լոտով) գնումներ կատարելու և Հայաստանի Հանրապետության տարածքում գործող ադամանդագործական ընկերություններին մեկ լոտով փոխանցելու նպատակով հիմնադրել «Հայ-Ալմաստ» փակ բաժնետիրական ընկերություն (այսուհետ` ընկերություն):
2. Սահմանել, որ ընկերությունն ալմաստի հումք արդյունահանող ընկերություններից միասնական (մեկ լոտով) գնումներ է կատարելու բացառապես նույն ընկերություններից այդ նպատակով ստացած կանխավճարների հաշվին:
3. Սահմանել, որ ընկերությունն ալմաստի հումք արդյունահանող ընկերություններից գնում է կատարելու բացառապես այն խմբաքանակի և (կամ) լոտի, որն ընտրել են ընկերությանը կանխավճար (կանխավճարներ) փաստացի վճարած Հայաստանի Հանրապետության տարածքում գործող ադամանդագործական ընկերությունների լիազոր ներկայացուցիչները:
4. Սահմանել, որ ընկերությունը գնված խմբաքանակը և (կամ) լոտը՝ անկախ կազմից և պարունակությունից, պետք է հանձնի կանխավճար փաստացի վճարած ընկերությունների լիազոր ներկայացուցչին և անմիջապես հաշվանցի կանխավճարի գումարը՝ ստանալով միայն կոմիսիոն վարձատրություն գործարքի կազմակերպման համար:
5. Սահմանել, որ ընկերությանն իրավունք չի վերապահվում իր հաշվին և (կամ) իր ռիսկով գնել և (կամ) վաճառել ալմաստի որևէ խմբաքանակ և (կամ) լոտ:
6. Սահմանել ընկերության կանոնադրական կապիտալը` 50 մլն դրամ, որը համապատասխանում է 500 հատ հասարակ բաժնետոմսի, յուրաքանչյուրը` 100,000 դրամ։
7. Սահմանել, որ ընկերության գործունեության արդյունքում ընկերության զուտ ակտիվները չեն կարող նվազել քան կանոնադրական կապիտալի 70 տոկոսը։
8. Հայաստանի Հանրապետության էկոնոմիկայի նախարարին՝ «Հայ-Ալմաստ» փակ բաժնետիրական ընկերության կանոնադրական կապիտալում ներդրում կատարելու նպատակով սույն որոշումն ընդունվելուց հետո 15-օրյա ժամկետում ներկայացնել առաջարկություններ «Հայաստանի Հանրապետության 2021 թվականի պետական բյուջեի մասին» Հայաստանի Հանրապետության օրենքում վերաբաշխում ու լրացում և Հայաստանի Հանրապետության կառավարության 2020 թվականի դեկտեմբերի 30-ի «Հայաստանի Հանրապետության 2021 թվականի պետական բյուջեի կատարումն ապահովող միջոցառումների մասին» N 2215-Ն որոշման մեջ համապատասխան փոփոխություններ ու լրացումներ կատարելու մասին:
9. Ընկերության պետական սեփականություն հանդիսացող 100 տոկոս բաժնետոմսերի փաթեթի կառավարման լիազորությունը վերապահել Հայաստանի Հանրապետության էկոնոմիկայի նախարարությանը (այսուհետ՝ լիազոր մարմին):
10. Ընկերության հիմնադրման հետ կապված «Բաժնետիրական ընկերությունների մասին» Հայաստանի Հանրապետության օրենքով սահմանված մյուս լիազորությունները վերապահել լիազոր մարմնին։
|
Հայաստանի Հանրապետության |
Ն. ՓԱՇԻՆՅԱՆ |
|
Երևան |
|
09.12.2021 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ |