ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Օ Ր Ե Ն Ք Ը
Ընդունված է 2000 թվականի դեկտեմբերի 26-ին
«ԵԿԱՄՏԱՀԱՐԿԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հոդված 1. «Եկամտահարկի մասին» Հայաստանի Հանրապետության օրենքի 6 հոդվածում`
ա) առաջին մասում «հարկային տարում» բառերը փոխարինել «հաշվետու ժամանակաշրջանում» բառերով.
բ) երկրորդ մասում «ժդ» ենթակետը լրացնել «, բացառությամբ օրենքով սահմանված պարտադիր սոցիալական ապահովագրության վճարների» բառերով:
Հոդված 2. Օրենքի 9 հոդվածում`
ա) «դ» ենթակետը շարադրել հետևյալ խմբագրությամբ`
«դ) Հայաստանի Հանրապետության օրենսդրությամբ սահմանված կարգով գրանցված և հարկային մարմիններում հաշվառված ոչ առևտրային կազմակերպությունների միջոցներից կանոնադրական գործունեության շրջանակներում ֆիզիկական անձանց դրամական և բնամթերային ձևով ցույց տրվող օգնության գումարները.».
բ) ուժը կորցրած ճանաչել «ժբ» ենթակետը:
Հոդված 3. Օրենքի 10 հոդվածում`
ա) ուժը կորցրած ճանաչել 1-ին կետի «բ» և «գ» ենթակետերը.
բ) 1-ին կետի «ե» ենթակետում «պարտատոմսերի, փոխառության» բառերը փոխարինել «բաժնետոմսերի» բառով:
Հոդված 4. Օրենքի 11 հոդվածում`
ա) 2-րդ կետում «ձկնորսության» բառը փոխարինել «ձկնաբուծության» բառով.
բ) ուժը կորցրած ճանաչել 4-րդ կետը:
Հոդված 5. Օրենքի 14 հոդվածը շարադրել հետևյալ խմբագրությամբ`
«Հոդված 14. Համախառն եկամտից անձնական նվազեցումը
Համախառն եկամուտը նվազեցվում է եկամտի ստացման յուրաքանչյուր ամսվա համար 20 000 դրամի չափով: Ընդ որում, եկամտի ստացման յուրաքանչյուր ամսում հարկատուի համախառն եկամուտը որոշելիս ստացվող եկամտից հարկային գործակալը սույն նվազեցումն իրականացնում է անկախ տվյալ հարկատուի կողմից ստացվող եկամուտներից մյուս հարկային գործակալների կողմից նման նվազեցումների իրականացումից:»:
Հոդված 6. Օրենքի 15 հոդվածում ուժը կորցրած ճանաչել 3-րդ կետը:
Հոդված 7. Օրենքի 17 հոդվածում ուժը կորցրած ճանաչել «բ» ենթակետը:
Հոդված 8. Օրենքի 18 հոդվածը շարադրել հետևյալ խմբագրությամբ`
«Հոդված 18.
Եկամտահարկի դրույքաչափերը
1. Բացառությամբ սույն հոդվածի 3-րդ կետում նշված դեպքերի, հարկային գործակալը եկամտահարկը հաշվարկում է հետևյալ դրույքաչափերով.
| Ամսական հարկվող եկամտի չափը |
Հարկի գումարը |
| մինչև 80,000 դրամ | հարկվող եկամտի 10 տոկոսը |
| 80,000 դրամից ավելի | 8,000 դրամին գումարած 80,000 դրամը գերազանցող գումարի 20 տոկոսը |
2. Բացառությամբ սույն հոդվածի 3-րդ կետում նշված դեպքերի, հարկային գործակալի միջոցով չհարկված եկամուտներից եկամտահարկը հաշվարկվում է հետևյալ դրույքաչափերով.
| Տարեկան հարկվող եկամտի չափը |
Հարկի գումարը |
| մինչև 960,000 դրամ | հարկվող եկամտի 10 տոկոսը |
| 960,000 դրամից ավելի |
96,000 դրամին գումարած 960,000 դրամը գերազանցող գումարի 20 տոկոսը |
3. Ռոյալթիների և գույքը վարձակալության տալու եկամուտներից եկամտահարկը հաշվարկվում է 10 տոկոս դրույքաչափով` առանց հաշվի առնելու սույն օրենքով սահմանված նվազեցումները:»:
4. Տոկոսների համար եկամտահարկը հաշվարկվում է 10 տոկոս դրույքաչափով` առանց հաշվի առնելու սույն օրենքով սահմանված նվազեցումները:»:
Հոդված 9. Օրենքի 21 հոդվածում`
ա) 1-ին կետի «ա» ենթակետը շարադրել հետևյալ խմբագրությամբ`
«ա) սույն օրենքի 20 հոդվածի 2-րդ կետի «ա» և «բ» ենթակետերով նախատեսված գրավոր պայմանագիրը չկնքելու կամ պահանջվող տվյալներից որևէ մեկի բացակայության դեպքում առևտրային կազմակերպությունների և անհատ ձեռնարկատերերի համար` երեք տոկոս դրույքաչափով, և այլ կազմակերպությունների համար` տասնհինգ տոկոս դրույքաչափով, վճարվող եկամտի գումարից` առանց հաշվի առնելու սույն օրենքով սահմանված նվազեցումները.».
բ) 1-ին կետի «բ» ենթակետում «18 հոդվածով» բառակապակցությունը փոխարինել «18 հոդվածի 1-ին, 3-րդ և 4-րդ կետերով» բառերով.
գ) 2-րդ կետում «հարկային տարում» բառերը փոխարինել «ամսում» բառով:
Հոդված 10. Օրենքի 22 հոդվածում`
ա) 1-ին կետը «ռոյալթիներ» բառից հետո լրացնել «, տոկոսներ» բառով, իսկ «15» թիվը փոխարինել «10» թվով.
բ) 2-րդ կետում ««ժբ» և «ժգ» ենթակետերով» բառերը փոխարինել ««ժգ» ենթակետով» բառակապակցությամբ:
Հոդված 11. Օրենքի 23 հոդվածի տեքստը շարադրել հետևյալ խմբագրությամբ`
«Հարկային գործակալը պահված (գանձված) հարկը բյուջե է վճարում ֆիզիկական անձանց եկամուտների վճարմանը հաջորդող երկու աշխատանքային օրվա ընթացքում:»:
Հոդված 12. Ուժը կորցրած ճանաչել օրենքի 25 հոդվածը:
Հոդված 13. Օրենքի 26 հոդվածում ««ըստ վճարման (դրամարկղային)» մեթոդը» բառերը փոխարինել «հաշվեգրման եղանակը` իրավաբանական անձանց համար «Շահութահարկի մասին» Հայաստանի Հանրապետության օրենքով սահմանված կարգով» բառերով:
Հոդված 14. Օրենքի 27 հոդվածում`
ա) 1-ին կետի «ժգ» ենթակետը «բյուջեներ» բառից հետո լրացնել «, ինչպես նաև պարտադիր սոցիալական ապահովագրության վճարների գծով» բառերով.
բ) 3-րդ կետի «ինչպես նաև համախառն եկամտից ծախսերի նվազեցման իրականացման առումով» բառերը փոխարինել «համախառն եկամտից ծախսերի նվազեցման իրականացման, ինչպես նաև ձեռնարկատիրական գործունեությունից ստացված հաշվետու տարվա վնասների մասով» բառերով.
գ) ուժը կորցրած ճանաչել 4-րդ կետը:
Հոդված 15. Օրենքի 31 հոդվածում`
ա) 2-րդ կետի «բ» ենթակետը շարադրել հետևյալ խմբագրությամբ`
«բ) բացառապես այնպիսի եկամուտներ, որոնցից հարկը հաշվարկելու, պահելու (գանձելու) և բյուջե վճարելու պարտավորությունը դրված է հարկային գործակալի վրա` անկախ հարկային տարվա ընթացքում հարկվող եկամտի մեծությունից:».
բ) 2-րդ կետում ուժը կորցրած ճանաչել «գ» ենթակետը.
գ) 2-րդ կետի «դ» ենթակետը շարադրել հետևյալ խմբագրությամբ`
«դ) հարկային տարվա ընթացքում 250,000 դրամը չգերազանցող համախառն եկամուտ, որից հարկային գործակալի կողմից հարկի պահում չի իրականացվել.».
դ) 3-րդ կետում «սահմանված եկամուտների» բառերը փոխարինել «սահմանված, ինչպես նաև սույն հոդվածի 2-րդ կետի «բ» ենթակետում նշված եկամուտների» բառերով:
Հոդված 16. Օրենքի 32 հոդվածում ուժը կորցրած ճանաչել 2-րդ կետը:
Հոդված 17. Օրենքի 37 հոդվածում`
ա) 1-ին կետում «Հարկային գործակալները» բառերը փոխարինել «Կազմակերպությունները և անհատ ձեռնարկատերերը» բառերով.
բ) 2-րդ կետում «Հարկային գործակալների լուծարման (գործունեության դադարեցման)» բառերը փոխարինել «Կազմակերպության լուծարման, անհատ ձեռնարկատերերի գործունեության դադարեցման» բառերով.
գ) 3-րդ կետում «Հարկային գործակալը» բառերը փոխարինել «Կազմակերպությունները և անհատ ձեռնարկատերերը» բառերով:
Հոդված 18. Օրենքի 38 հոդվածի 4-րդ կետը շարադրել հետևյալ խմբագրությամբ`
«4. Սույն օրենքի 37 հոդվածի 1-ին կետի պահանջները խախտելու համար կազմակերպությունները և անհատ ձեռնարկատերերը վճարում են տուգանք` հարկային մարմիններ չներկայացրած յուրաքանչյուր տեղեկության համար 5000 դրամի չափով:»:
Հոդված 19. Սույն օրենքն ուժի մեջ է մտնում 2001 թվականի հունվարի 1-ից:
«Եկամտահարկի մասին» Հայաստանի Հանրապետության օրենքի 18 հոդվածի` սույն օրենքի 8 հոդվածով ընդունված 4-րդ կետը կիրառվում է 2001 թվականի հուլիսի 1-ից հետո ստացվող տոկոսների նկատմամբ: Ընդ որում, 2001 թվականի հուլիսի 1-ից մինչև 2002 թվականի հուլիսի 1-ն ընկած ժամանակահատվածում ստացվող տոկոսներից եկամտահարկը հաշվարկվում և վճարվում է 5 տոկոս դրույքաչափով:
Տոկոսների հարկումը հարկային մարմիններին չի տալիս այդպիսի եկամուտներ ստացող անձանց վերաբերյալ բանկային գաղտնիք համարվող տեղեկություններ ստանալու լրացուցիչ իրավասություն:
|
Հայաստանի Հանրապետության |
Ռ. Քոչարյան |
|
|