ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

21 նոյեմբերի 2019 թվականի N 1640-Լ

«ԴԵՂԵՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ (Պ-329-28.10.2019-ԱՍ-011/0) ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՌԱՋԱՐԿՈՒԹՅԱՆ ՄԱՍԻՆ

Հիմք ընդունելով «Ազգային ժողովի կանոնակարգ» Հայաստանի Հանրապետության սահմանադրական օրենքի 77-րդ հոդվածի 1-ին մասը՝ Հայաստանի Հանրապետության կառավարությունը որոշում է.

1. Հավանություն տալ «Դեղերի մասին» Հայաստանի Հանրապետության օրենքում փոփոխություններ և լրացումներ կատարելու մասին» Հայաստանի Հանրապետության օրենքի նախագծի (Պ-329-28.10.2019-ԱՍ-011/0) վերաբերյալ Հայաստանի Հանրապետության կառավարության առաջարկությանը:

2. Հայաստանի Հանրապետության կառավարության առաջարկությունը սահմանված կարգով ներկայացնել Հայաստանի Հանրապետության Ազգային ժողովի աշխատակազմ:

Հայաստանի Հանրապետության վարչապետ	Ն. Փաշինյան
2019 թ. նոյեմբերի 26 Երևան

«ԴԵՂԵՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ (Պ-329-28.10.2019-ԱՍ-011/0) ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՌԱՋԱՐԿՈՒԹՅՈՒՆԸ

Հայաստանի Հանրապետության կառավարությունը «Դեղերի մասին» Հայաստանի Հանրապետության օրենքում փոփոխություններ և լրացումներ կատարելու մասին» Հայաստանի Հանրապետության օրենքի նախագծի (Պ-329-28.10.2019-ԱՍ-011/0) (այսուհետ՝ նախագիծ) վերաբերյալ ներկայացնում է հետևյալ դիտարկումները՝

1. Նախագծի 1-ին հոդվածի համաձայն նախատեսվում է «Դեղերի մասին» Հայաստանի Հանրապետության օրենքի (այսուհետ՝ օրենք) 16-րդ հոդվածի 23-րդ մասը լրացնել 7-րդ կետով, որի համաձայն բուժման կուրսի կամ անձնական օգտագործման նպատակով ֆիզիկական անձանց անունով ներմուծված դեղերի համար գրանցում չի պահանջվում: Այդ առումով անհրաժեշտ է նկատի ունենալ այն, որ նախագծի 1-ին հոդվածով առաջարկվող կարգավորումներն արդեն իսկ ամրագրված են օրենքի 21-րդ հոդվածի 7-րդ մասի 1-ին կետով, որի համաձայն՝ ներմուծման կամ արտահանման հավաստագիր չի պահանջվում ֆիզիկական անձանց անունով ներմուծվող դեղերի համար: Ուստի, գտնում ենք, որ նշված լրացման անհրաժեշտությունը չկա, քանի որ նախագծի 1-ին հոդվածով նախատեսված դրույթներն օրենքի 16-րդ հոդվածի 23-րդ մասի կարգավորման առարկան չեն՝ նկատի ունենալով այն, որ նշված հարաբերությունները չեն վերաբերում ներմուծվող դեղերի գրանցմանը:

2. Նախագծի 2-րդ հոդվածում հստակեցվում է «ֆիզիկական անձինք» հասկացության բովանդակությունը, այն է՝ «Ֆիզիկական անձինք, սույն օրենքի 21-րդ հոդվածի 7-րդ մասի 1-ին կետին համապատասխան», իսկ նախագծի 3-րդ հոդվածում նշվում է «օտարերկրյա պետություն մեկնող և օտարերկրյա պետությունից ժամանող ֆիզիկական անձանց» մասին: Այդ առումով պարզ չէ՝ նախագծով առաջարկվող կարգավորումը վերաբերում է «օտարերկրյա պետություն մեկնող և օտարերկրյա պետությունից ժամանող ֆիզիկական անձանց», թե ընդհանրապես «ֆիզիկական անձանց»: Նշված դիտողությունը բխում է «Նորմատիվ իրավական ակտերի մասին» Հայաստանի Հանրապետության օրենքի 15-րդ հոդվածի պահանջներից:

3. Համաձայն նախագծի 3-րդ հոդվածի՝ օտարերկրյա պետություն մեկնող և օտարերկրյա պետությունից ժամանող ֆիզիկական անձի բուժման կուրսի կամ անձնական օգտագործման դեղերի, ինչպես նաև՝ փոխադրողի կողմից կամ միջազգային փոստային փոխադրումներով մեկ ամսվա ընթացքում մեկ անգամից ոչ ավելի հաճախականությամբ ֆիզիկական անձի անունով ներմուծվող անձնական օգտագործման դեղերի համար ներմուծման կամ արտահանման հավաստագիր չի պահանջվում: Իսկ, համաձայն նախագծի 4-րդ հոդվածի, նախատեսված դեղերի ներմուծման կարգն ու քանակները սահմանում է Հայաստանի Հանրապետության կառավարությունը: Նախագծի հիմնավորման մեջ նշված է, որ նախատեսված փոփոխությունների նպատակը ԵԱՏՄ և Հայաստանի Հանրապետության օրենսդրությամբ սահմանված կարգավորումներում փոստային առաքանիներով ֆիզիկական անձանց անունով ներմուծվող անձնական օգտագործման դեղերի ներմուծման հետ կապված առկա որոշակի հակասությունները և անհամապատասխանությունները վերացնելն է, քանի որ ֆիզիկական անձը, օտարերկրյա պետություն մեկնելիս և օտարերկրյա պետությունից ժամանելիս, կարող է ներմուծել դեղեր՝ բուժման կուրսի կամ անձնական օգտագործման նպատակով, այնինչ հնարավորություն չունի փոխադրողի կամ միջազգային փոստային առաքումների միջոցով այդ դեղերը ներմուծել: Այդ կապակցությամբ հայտնում ենք, որ, «Դեղերի մասին» Հայաստանի Հանրապետության օրենքի 21-րդ հոդվածի 7-րդ մասի 1-ին կետի համաձայն, օտարերկրյա պետություն մեկնող և օտարերկրյա պետությունից ժամանող ֆիզիկական անձի բուժման կուրսի կամ անձնական օգտագործման համար առանց հավաստագրի գրանցված կամ չգրանցված դեղերի ներմուծման կամ արտահանման թույլատվության կարգն ընդունվել է Հայաստանի Հանրապետության կառավարության 2019 թվականի փետրվարի 22-ի «Հայաստանի Հանրապետության տարածք դեղեր, դեղանյութեր, դեղաբուսական հումք և հետազոտվող դեղագործական արտադրանք ներմուծելու և Հայաստանի Հանրապետության տարածքից արտահանելու, ներմուծման կամ արտահանման նպատակով փորձաքննության իրականացման կարգերը և անհրաժեշտ փաստաթղթերի ցանկը սահմանելու, ինչպես նաև Հայաստանի Հանրապետության կառավարության 2000 թվականի սեպտեմբերի 20-ի N 581 որոշումն ուժը կորցրած ճանաչելու մասին» N 202-Ն որոշմամբ, որով արդեն իսկ կարգավորված են փոստային առաքանիների միջոցով ֆիզիկական անձանց կողմից դեղեր ձեռք բերելու հետ կապված հարաբերությունները:

Ամփոփելով շարադրվածը՝ Հայաստանի Հանրապետության կառավարությունը գտնում է, որ ներկայացված նախագծով առաջարկվող հարաբերություններն արդեն իսկ կարգավորված են «Դեղերի մասին» Հայաստանի Հանրապետության օրենքով և Հայաստանի Հանրապետության կառավարության 2019 թվականի փետրվարի 22-ի N 202-Ն որոշմամբ, ուստի, առաջարկում ենք նախագծով քննարկվող գործող օրենքի հոդվածները թողնել անփոփոխ:

Միաժամանակ հարկ ենք համարում տեղեկացնել, որ Հայաստանի Հանրապետության առողջապահության նախարարությունում մշակվում է «Դեղերի մասին» Հայաստանի Հանրապետության օրենքում փոփոխությունների նախագիծ, որը Հայաստանի Հանրապետության կառավարության հավանությանն արժանանալուց հետո կներկայացվի Հայաստանի Հանրապետության Ազգային ժողով: Նախագծի հեղինակն իր կողմից բարձրացված հարցերին կարող է անդրադառնալ Հայաստանի Հանրապետության կառավարության կողմից օրենսդրական նախաձեռնության կարգով ներկայացվելիք «Դեղերի մասին» Հայաստանի Հանրապետության օրենքում փոփոխություններ կատարելու մասին» Հայաստանի Հանրապետության օրենքի նախագծի քննարկումների շրջանակներում: