ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

15 նոյեմբերի 2018 թվականի N 1272-Լ

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՐԿԱՅԻՆ ՕՐԵՆՍԳՐՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ ՎԵՐԱԲԵՐՅԱԼ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԱՌԱՋԱՐԿՈՒԹՅԱՆ ՄԱՍԻՆ

Հիմք ընդունելով «Ազգային ժողովի կանոնակարգ» սահմանադրական օրենքի 77-րդ հոդվածի 1-ին մասը՝ Հայաստանի Հանրապետության կառավարությունը որոշում է.

1. Հավանություն տալ «Հայաստանի Հանրապետության հարկային օրենսգրքում լրացում կատարելու մասին» Հայաստանի Հանրապետության օրենքի նախագծի (Պ-394-16.10.2018-ՏՀ-011/0) վերաբերյալ Հայաստանի Հանրապետության կառավարության առաջարկությանը:

2. Հայաստանի Հանրապետության կառավարության առաջարկությունը սահմանված կարգով ներկայացնել Հայաստանի Հանրապետության Ազգային ժողովի աշխատակազմ:

Հայաստանի Հանրապետության վարչապետի պաշտոնակատար	Ն. Փաշինյան
2018 թ. նոյեմբերի 16 Երևան

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՐԿԱՅԻՆ ՕՐԵՆՍԳՐՔՈՒՄ ԼՐԱՑՈՒՄ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ (Պ-394-16.10.2018-ՏՀ-011/0) վերաբերյալ Հայաստանի Հանրապետության կառավարության առաջարկությՈՒՆԸ

Հայաստանի Հանրապետության կառավարությունն առաջարկում է ներկայացված օրենքի նախագծով լրացվող գործող օրենքի հոդվածը թողնել անփոփոխ՝ նկատի ունենալով հետևյալ հանգամանքները՝

1. Հայաստանի Հանրապետության կառավարությունն առաջիկայում նախատեսում է հանդես գալ օրենսդրական նախաձեռնությամբ, որի նպատակն է եկամտային հարկի սանդղակավորված դրույքաչափերից անցնել եկամտային հարկի միասնական դրույքաչափի: Նշված օրենսդրական առաջարկության ընդունման պարագայում այլևս էական չի լինի մայրության նպաստի, որպես եկամուտ, հաշվառելու եղանակը:

2. Մայրության նպաստները դրամարկղային սկզբունքով հաշվառելու և հարկելու հիմնավորման վերաբերյալ պետք է նկատել, որ հարկային հաշվառման և հարկային վարչարարության տեսանկյունից հարկային պարտավորությունների հաշվարկման դրամարկղային մեթոդն ավելի դյուրին է՝ հաշվի առնելով այն հանգամանքը, որ այն ենթադրում է հարկի հաշվարկման պարտավորության առաջացում այն պահին, երբ եկամուտը փաստացի վճարվում է: Մինչդեռ, հարկի հաշվարկման հաշվեգրման մեթոդն այս դեպքում ավելի բարդ է, քանի որ այն ենթադրում է, որ հարկային գործակալները պարտավորված կլինեն հաշվարկել մայրության նպաստի՝ յուրաքանչյուր ամսվան հասանելիք մասը և դրան համապատասխան հարկի գումարը, ինչը հարկային պարտավորությունները ճիշտ հաշվարկելու առումով լրացուցիչ ռիսկեր կարող է ստեղծել: