«Գրանցված է»

ՀՀ արդարադատության

նախարարության կողմից

6 հուլիսի 2017 թ.

Պետական գրանցման թիվ 60217264

ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ԱԶԳԱՅԻՆ ՀԱՆՁՆԱԺՈՂՈՎ

Ո Ր Ո Շ ՈՒ Մ

ԹՎԱՅԻՆ ՀԵՌԱՐՁԱԿՄԱՆ ՑԱՆՑԻ ՄԻՋՈՑՈՎ ՌԱԴԻՈԾՐԱԳՐԵՐԻ ՀԵՌԱՐՁԱԿՄԱՆ ԼԻՑԵՆԶԱՎՈՐՄԱՆ ՄՐՑՈՒՅԹԻ ԱՆՑԿԱՑՄԱՆ ԿԱՐԳԸ ԵՎ ԼԻՑԵՆԶԻԱՅԻ ՁԵՎԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Հեռուստատեսության և ռադիոյի մասին» ՀՀ օրենքի 36-րդ հոդվածի 1-ին մասի 4-րդ կետի, 46-րդ հոդվածի 2-րդ մասի և «Լիցենզավորման մասին» ՀՀ օրենքի 10-րդ հոդվածի 7-րդ մասի դրույթներով` Հեռուստատեսության և ռադիոյի ազգային հանձնաժողովը որոշեց.

1. Հաստատել թվային հեռարձակման ցանցի միջոցով ռադիոծրագրերի հեռարձակման լիցենզավորման մրցույթի անցկացման կարգը` համաձայն N 1 հավելվածի։

2. Հաստատել ռադիոծրագրերի հեռարձակման լիցենզիայի ձևը` համաձայն N 2 հավելվածի:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հեռուստատեսության և ռադիոյի ազգային հանձնաժողովի նախագահ

Գ. Բունիաթյան

Հավելված N 1 Հաստատված է Հեռուստատեսության և ռադիոյի ազգային հանձնաժողովի 2017 թվականի հունիսի 28-ի թիվ 28-Ն որոշմամբ

Կ Ա Ր Գ

ԹՎԱՅԻՆ ՀԵՌԱՐՁԱԿՄԱՆ ՑԱՆՑԻ ՄԻՋՈՑՈՎ ՌԱԴԻՈԾՐԱԳՐԵՐԻ ՀԵՌԱՐՁԱԿՄԱՆ ԼԻՑԵՆԶԱՎՈՐՄԱՆ ՄՐՑՈՒՅԹԻ ԱՆՑԿԱՑՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է թվային հեռարձակման ցանցի միջոցով ռադիոծրագրերի հեռարձակման լիցենզավորման նպատակով կազմակերպվող և անցկացվող մրցույթի իրականացման ընթացակարգը:

2. Թվային հեռարձակման ցանցի միջոցով ռադիոծրագրերի հեռարձակման լիցենզավորման մրցույթն (այսուհետ` մրցույթ) անցկացնում է Հեռուստատեսության և ռադիոյի ազգային հանձնաժողովը (այսուհետ` Հանձնաժողով)` Հայաստանի Հանրապետության օրենսդրության և սույն կարգի համաձայն:

3. Ռադիոծրագրերի հեռարձակման լիցենզիայի գործողության ժամկետը լրանալուց վեց ամիս առաջ Հանձնաժողովը հայտարարում է լիցենզավորման մրցույթ, բացառությամբ օրենքով սահմանված դեպքերի:

4. Մրցույթին մասնակցում են միայն իրավաբանական անձինք:

5. Մրցույթն անցկացվում է հրապարակային կարգով:

II. ՄՐՑՈՒՅԹԻ ՄԱՍԻՆ ՏԵՂԵԿԱՏՎՈՒԹՅԱՆ ՀՐԱՊԱՐԱԿՈՒՄԸ

6. Հանձնաժողովն իր որոշմամբ հայտարարում է մրցույթ:

7. Մրցույթի մասին տեղեկատվությունը Հանձնաժողովը հրապարակում է www.azdarar.am Հայաստանի Հանրապետության հրապարակային ծանուցումների պաշտոնական ինտերնետային կայքում և իր՝ www.tvradio.am պաշտոնական ինտերնետային կայքում:

8. Մրցույթի մասին տեղեկատվությունը պետք է ներառի հետևյալը՝

1) լիցենզավորման ենթակա գործունեության տեսակը,

2) ռադիոծրագրի թեմատիկ ուղղվածությունը,

3) սփռման տարածքը,

4) անհրաժեշտ փաստաթղթերի ցանկը,

5) հայտերի ընդունման ժամանակահատվածը և վայրը,

6) լրացուցիչ տեղեկություններ ստանալու աղբյուրը՝ հեռախոս, էլ. փոստ,

7) հայտի ձևը:

III. ՀԱՅՏԵՐԻ ԸՆԴՈՒՆՈՒՄԸ

9. Մրցույթին մասնակցելու համար ներկայացվում է թվային հեռարձակման ցանցի միջոցով ռադիոծրագրի հեռարձակման լիցենզավորման մրցույթին մասնակցելու հայտ (այսուհետ` հայտ)՝ համաձայն N 1 ձևի և անհրաժեշտ փաստաթղթեր:

 10. Հայտում պետք է նշվեն հետևյալ տեղեկությունները`

 1) հայտ ներկայացնողի անվանումը,

 2) գտնվելու վայրը,

 3) ռադիոծրագրի թեմատիկ ուղղվածությունը,

 4) սփռման տարածքը,

 5) տեղեկություններ հայտ ներկայացնողի` այլ հեռուստառադիոընկերությունների հիմնադիր և լիցենզավորված անձ կամ զանգվածային լրատվության այլ միջոցների հիմնադիր լինելու, ինչպես նաև դրանց արտադրությամբ և տարածմամբ զբաղվելու մասին,

 6) սեփական և հայրենական արտադրության հաղորդումների ծավալը,

 7) հայտի ներկայացման ամիսը, ամսաթիվը, տարեթիվը:

11. Հայտին կցվում են ընկերության հիմնադիր փաստաթղթերի և իրավաբանական անձի կարգավիճակը հաստատող փաստաթղթերի պատճենները, ռադիոընկերության բիզնես ծրագիրը, տվյալներ օգտագործվելիք տեխնիկական միջոցների և սարքավորումների մասին, ֆինանսական աղբյուրները հիմնավորող փաստաթղթեր, տեղեկություններ աշխատակազմի թվաքանակի, նրանց կրթության և մասնագիտական պատրաստվածության մասին, ինչպես նաև մրցույթին մասնակցելու համար «Պետական տուրքի մասին» Հայաստանի Հանրապետության օրենքով սահմանված չափով վճարված պետական տուրքի անդորրագիրը:

12. Հայտը և անհրաժեշտ փաստաթղթերը Հանձնաժողով է ներկայացվում մրցույթի մասին տեղեկատվությունը հրապարակելու օրվանից հետո՝ 40-օրյա ժամկետում, առձեռն կամ փոստով: Ռադիոընկերության բիզնես ծրագիրը, օգտագործվելիք տեխնիկական միջոցների և սարքավորումների մասին տվյալները, ֆինանսական աղբյուրները հիմնավորող փաստաթղթերը, աշխատակազմի թվաքանակի, նրանց կրթության և մասնագիտական պատրաստվածության մասին տեղեկությունները ներկայացվում են երկու փաթեթով՝ թելակարված, համարակալված, «Բաղկացած է … թերթից» գրառմամբ, ստորագրված և կնքված (կնիքի առկայության դեպքում): Հայտին կից փաստաթղթերը ներկայացվում են փակ ծրարով ` ստորագրված և կնքված (կնիքի առկայության դեպքում):

IV. ՀԱՅՏԵՐԻ ՔՆՆԱՐԿՈՒՄԸ ԵՎ ՈՐՈՇՄԱՆ ԸՆԴՈՒՆՈՒՄԸ

13. Հանձնաժողովը մրցույթին մասնակցելու համար հայտերի ընդունման ժամկետի ավարտից հետո եռօրյա ժամկետում www.tvradio.am պաշտոնական ինտերնետային կայքում հրապարակում է մրցույթի մասնակիցների ցանկը:

14. Մրցույթի մասնակիցների հայտերը և կից փաստաթղթերը հրապարակվում են հանձնաժողովի դռնբաց նիստում` ըստ հայտերի գրանցման հերթականության, հայտերի ընդունման ժամկետի ավարտից հետո՝ 10-օրյա ժամկետում:

15. Հանձնաժողովը մասնակցին է տրամադրում հայտը և կից փաստաթղթերը՝ փակ ծրարով: Հայտի բովանդակությունը ներկայացնելու համար մասնակցին տրվում է 30 րոպե:

16. Հայտը քննության չի առնվում, եթե մասնակիցը չի ներկայացել Հանձնաժողովի նիստին և սույն կարգի 15-րդ կետի համաձայն չի ներկայացրել իր հայտի բովանդակությունը:

17. Հայտերի հրապարակումից հետո` դրանց ուսումնասիրման համար, Հանձնաժողովն ընդհատում է նիստը 10 օր տևողությամբ:

18. Հայտերի հրապարակումից հետո՝ 11-րդ օրը վերսկսվում է նիստը, որտեղ Հանձնաժողովը բաց վարկանիշային քվեարկությամբ կատարում է մրցույթում հաղթող մասնակցի ընտրությունը:

19. Վարկանիշային քվեարկությունից առաջ հանձնաժողովի անդամները հայտերի և կից փաստաթղթերի քննարկում չեն իրականացնում և չեն հրապարակում իրենց դիրքորոշումները դրանց վերաբերյալ, սակայն կարող են հանդես գալ հայտարարությամբ, միջնորդությամբ:

20. Վարկանիշային քվեարկությունն իրականացվում է ըստ մասնակիցների հայտերի գրանցման հերթականության: Քվեարկությունը կազմակերպվում է մասնակիցներից յուրաքանչյուրի համար առանձին, Հանձնաժողովի անդամների համաժամանակյա քվեարկությամբ: Համեմատելով տվյալ մրցույթի մասնակիցների կողմից ներկայացված փաստաթղթերը, Հանձնաժողովի անդամը 0-10 ամբողջ թվերով գնահատում է մրցույթի յուրաքանչյուր մասնակցին: Վարկանիշային քվեարկության արդյունքում հաղթող է ճանաչվում գումարային առավելագույն միավոր ստացած մասնակիցը:

21. Հանձնաժողովը մասնակցին գնահատելիս հաշվի է առնում`

1) սեփական արտադրության հաղորդումների գերակայությունը,

2) հայրենական արտադրության հաղորդումների գերակայությունը,

3) բիզնես ծրագրի հիմնավորվածությունը,

4) բազմակարծությունը խթանելու կարողությունը,

5) տեխնիկական և ֆինանսական հնարավորությունները,

6) աշխատակազմի մասնագիտական պատրաստվածությունը:

22. Մրցույթի ժամանակ այլ հավասար պայմանների առկայության դեպքում նախապատվությունը տրվում է`

1) գործող այն ռադիոընկերություններին, որոնք իրենց գործունեության ընթացքում օրենսդրության խախտումներ թույլ չեն տվել.

2) գործող այն ռադիոընկերություններին, որոնք ռադիոհաղորդումների արտադրության և հեռարձակման բնագավառում ունեն առնվազն երեք տարվա փորձ:

23. Քվեարկության արդյունքում առավելագույն հավասար միավորներ ստացած և սույն կարգի 22-րդ կետի 1-ին և 2-րդ ենթակետերի պահանջները բավարարած մասնակիցների միջև Հանձնաժողովը անցկացնում է վարկանիշային կրկնակի քվեարկություն:

24. Հանձնաժողովը մրցույթում հաղթող ճանաչելու և ռադիոծրագրի հեռարձակման լիցենզիա տալու որոշումը կայացնում է վարկանիշային քվեարկության արդյունքների հիման վրա` քվեարկությամբ:

25. Մրցույթում հաղթող ճանաչելու և ռադիոծրագրի հեռարձակման լիցենզիա տալու մասին Հանձնաժողովի որոշումը հրապարակվում է ընդունելուց անմիջապես հետո:

26. Հանձնաժողովի որոշումն ընդունելուց հետո երեք օրվա ընթացքում ուղարկվում է մրցույթի մասնակիցներին:

27. Մրցույթի մասին ամբողջական տեղեկատվությունը Հանձնաժողովը հրապարակում է իր պաշտոնական ինտերնետային կայքում՝ որոշումն ընդունելուց հետո 10-օրյա ժամկետում:

V. ՄՐՑՈՒՅԹԸ ՉԿԱՅԱՑԱԾ ՀԱՅՏԱՐԱՐԵԼԸ

28. Հանձնաժողովն իր որոշմամբ մրցույթը հայտարարում է չկայացած, եթե`

1) սահմանված ժամկետում ոչ մի հայտ չի ներկայացվել.

2) մասնակիցներից ոչ մեկը չի ներկայացել Հանձնաժողովի նիստին և սույն կարգի 15-րդ կետի համաձայն չի ներկայացրել իր հայտի բովանդակությունը.

3) ներկայացված հայտերից ոչ մեկը չի համապատասխանում ՀՀ օրենսդրության և սույն կարգի պահանջներին:

Ձև N 1

Թվային հեռարձակման ցանցի միջոցով

 ռադիոծրագրերի հեռարձակման լիցենզավորման

մրցույթի անցկացման կարգի

Հեռուստատեսության և ռադիոյի

ազգային հանձնաժողովի նախագահ

 ______________________________-ին

(անուն, ազգանուն)

Հ Ա Յ Տ

Թվային հեռարձակման ցանցի միջոցով ռադիոծրագրի հեռարձակման լիցենզավորման մրցույթին մասնակցելու

Հայտատուի անվանումը __________________________________________________________________

Գտնվելու վայրը _________________________________________________________________________

Հեռախոսահամարը, էլ. հասցեն ___________________________________________________________

Ռադիոծրագրի թեմատիկ ուղղվածությունը _________________________________________________

Սփռման տարածքը ______________________________________________________________________

Տեղեկություններ հայտատուի` այլ հեռուստառադիոընկերությունների հիմնադիր և լիցենզավորված անձ կամ զանգվածային լրատվության այլ միջոցների հիմնադիր լինելու, ինչպես նաև դրանց արտադրությամբ և տարածմամբ զբաղվելու մասին

________________________________________________________________

Սեփական արտադրության հաղորդումների ծավալը _________________________________________

Հայրենական արտադրության հաղորդումների ծավալը ______________________________________

Կից փաստաթղթեր՝ ________ թերթ:

Տնօրեն	_______________________________  (անուն, ազգանուն)	________________ (ստորագրություն)
	__ _________ __________ (օրը, ամիսը, տարեթիվը)	Կ.Տ. (կնիքի առկայության դեպքում)

Հավելված N 2 Հաստատված է Հեռուստատեսության և ռադիոյի ազգային հանձնաժողովի 2017 թվականի հունիսի 28-ի  թիվ 28-Ն որոշմամբ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ԱԶԳԱՅԻՆ ՀԱՆՁՆԱԺՈՂՈՎ

ԼԻՑԵՆԶԻԱ _______

ք. __________

___ __________ _______ (լիցենզիան տալու օրը, ամիսը, տարեթիվը)

ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ԱԶԳԱՅԻՆ ՀԱՆՁՆԱԺՈՂՈՎԻ ՆԱԽԱԳԱՀ

_______________ (ստորագրություն)

Կ.Տ.

___________________ (անուն, ազգանուն)