Հայաստանի Հանրապետության սահմանադրական դատարանը՝ կազմով. Գ. Հարությունյանի (նախագահող), Կ. Բալայանի, Ֆ. Թոխյանի, Ա. Թունյանի (զեկուցող), Ա. Խաչատրյանի, Վ. Հովհաննիսյանի, Հ. Նազարյանի, Ա. Պետրոսյանի,

մասնակցությամբ (գրավոր ընթացակարգի շրջանակներում)` Հանրապետության Նախագահի պաշտոնական ներկայացուցիչ` ՀՀ արդարադատության նախարարի տեղակալ Վ. Քոչարյանի,

համաձայն Հայաստանի Հանրապետության Սահմանադրության (2005 թվականի փոփոխություններով) 100-րդ հոդվածի 2-րդ կետի, 101-րդ հոդվածի 1-ին մասի 1-ին կետի, «Սահմանադրական դատարանի մասին» Հայաստանի Հանրապետության օրենքի 25, 38 և 72-րդ հոդվածների,

դռնբաց նիստում գրավոր ընթացակարգով քննեց «2016 թվականի սեպտեմբերի 16-ին Բիշկեկում ստորագրված` Քրեական դատավարության մասնակիցների պաշտպանության մասին 2006 թվականի նոյեմբերի 28-ի համաձայնագիրը՝ պաշտպանության միջոցների իրականացման հետ կապված ծախսերի փոխհատուցման հարցերով իրագործելու վերաբերյալ արձանագրության մեջ ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:

Գործի քննության առիթը Հանրապետության Նախագահի` Հայաստանի Հանրապետության սահմանադրական դատարան 19.04.2017թ. մուտքագրված դիմումն է:

Ուսումնասիրելով սույն գործով զեկուցողի գրավոր հաղորդումը, Հանրապետության Նախագահի պաշտոնական ներկայացուցչի գրավոր բացատրությունը, հետազոտելով արձանագրությունը և գործում առկա մյուս փաստաթղթերը, Հայաստանի Հանրապետության սահմանադրական դատարանը պարզեց.

1. Քրեական դատավարության մասնակիցների պաշտպանության մասին 2006 թվականի նոյեմբերի 28-ի համաձայնագիրը՝ պաշտպանության միջոցների իրականացման հետ կապված ծախսերի փոխհատուցման հարցերով իրագործելու վերաբերյալ արձանագրությունը (այսուհետ` Արձանագրություն) ստորագրվել է 2016 թվականի սեպտեմբերի 16-ին Բիշկեկում՝ 2006 թվականի նոյեմբերի 28-ին Մինսկում ստորագրված՝ Քրեական դատավարության մասնակիցների պաշտպանության մասին համաձայնագրի (այսուհետ՝ Համաձայնագիր) 28-րդ հոդվածի 1-ին կետի դրույթների իրագործման կարգը սահմանելու և պաշտպանության միջոցների իրականացման հետ կապված ծախսերի փոխհատուցման հարցերն առավել լիարժեք կարգավորելու նպատակով:

Արձանագրությունն ունի 3 հավելված՝ Հավելված 1. «Ծախսերի նախահաշիվ», Հավելված 2. «Ակտ» և Հավելված 3. «Ծախսերի մասին տեղեկություններ» վերտառությամբ:

2. Արձանագրությամբ սահմանվում է Համաձայնագրի 4-րդ հոդվածով նախատեսված պաշտպանության միջոցների իրականացման հետ կապված ծախսերի ծրագրման, հարցում կատարող Կողմի իրավասու մարմնի կողմից դրանց փոխհատուցման, ինչպես նաև կատարված ֆինանսական և նյութական ծախսերի վերաբերյալ հաշվետու փաստաթղթերը ներկայացնելու կարգը, և այն չի վերաբերում Համաձայնագրի 11-րդ հոդվածի դրույթներն իրագործելիս օպերատիվ-հետախուզական միջոցառումների անցկացման հետ կապված ծախսերի փոխհատուցման հարցերին:

3. Արձանագրությամբ Հայաստանի Հանրապետությունն ստանձնում է, մասնավորապես, հետևյալ պարտավորությունները.

● ապահովել, որպեսզի ՀՀ իրավասու մարմինները մյուս Կողմերի իրավասու մարմինների հետ փոխանակեն Համաձայնագրի իրագործման համար անհրաժեշտ՝ պաշտպանության միջոցների կազմակերպման և իրականացման ոլորտում ՀՀ համապատասխան իրավական ակտեր, իրավակիրառ պրակտիկայի վերաբերյալ նյութեր, վիճակագրական տվյալներ և մեթոդական ուղեցույցներ,

● ապահովել, որպեսզի նախքան պաշտպանության միջոցներ իրականացնելու վերաբերյալ հարցում ուղարկելը (այսուհետև՝ Հարցում) ՀՀ իրավասու մարմինները Կողմերի իրավասու մարմինների հետ համաձայնեցնեն նախահաշվի նախագիծը՝ հաշվի առնելով հարցվող Կողմի տարածքում գործող գները (սակագները) և հարցվող Կողմի կողմից ազգային օրենսդրությանը համապատասխան կիրառվող նորմատիվները,

● որպես հարցվող Կողմ՝ ապահովել, որպեսզի ՀՀ իրավասու մարմինը եռամսյակի ավարտից հետո՝ 45 օրացուցային օրվանից ոչ ուշ, Հարցում ներկայացնող Կողմի իրավասու մարմնին ուղարկի գրություն՝ նշելով փոխհատուցման ենթակա գումարը և այն հաշվի վավերապայմանները, որին պետք է փոխանցվեն դրամական միջոցները, ինչպես նաև գրությանը կցի ծախսերի վերաբերյալ տեղեկությունները,

● որպես հարցվող Կողմ՝ դրամական միջոցների և նյութական արժեքների օգտագործման վերաբերյալ առաջնային փաստաթղթերը, նախահաշիվը և ծախսերի վերաբերյալ տեղեկությունները, ինչպես նաև, անհրաժեշտության դեպքում, արժույթների պաշտոնական փոխարժեքը հաստատող փաստաթղթերը պահել հինգ տարի՝ Արձանագրության 13-րդ հոդվածով նախատեսված միջոցառումների ավարտի պահից սկսած,

● որպես Հարցում կատարող Կողմ՝ կրել Պաշտպանվող անձի այլ վայր տեղափոխվելու, այդ թվում՝ ուղևորության և անձնական գույքի փոխադրման հետ կապված ծախսերը՝ ներառյալ փաթեթավորման, բեռնման (բեռնաթափման) արժեքը, մինչև հարցվող Կողմի տարածքում պաշտպանվող անձին հանձնելու վայրը և հակառակը, որոնք չեն ներառվում նախահաշվի մեջ,

● որպես Հարցում կատարող Կողմ՝ ապահովել, որպեսզի ՀՀ իրավասու մարմինն Արձանագրության 8-րդ հոդվածում նշված փաստաթղթերն ստանալու օրվանից 45 օրացուցային օրվա ընթացքում իրականացնի դրանց ուսումնասիրությունը և դրամական միջոցները փոխանցի հարցվող Կողմի իրավասու մարմնի հաշվին,

● որպես Հարցում կատարող Կողմ՝ փոխադարձ հաշվարկների համեմատման ակտը կազմել երկու օրինակով և հարցվող Կողմին ուղարկել դրամական միջոցների փոխանցման հետ միաժամանակ՝ հարցվող Կողմի նկատմամբ ունեցած պարտքը պաշտպանության միջոցի դադարեցման օրվա դրությամբ մարելու նպատակով,

● ապահովել, որպեսզի Համաձայնագրի 28-րդ հոդվածի իրագործման հետ կապված՝ ՀՀ իրավասու մարմնի և Կողմերի իրավասու մարմինների միջև հաշվարկները կատարվեն հարցվող Կողմի ազգային արժույթով, եթե այդ Կողմի հետ առանձին միջազգային պայմանագրերով այլ բան սահմանված չէ,

● որպես հարցվող Կողմ՝ անցկացված ստուգումների արդյունքում համատեղ ուսումնասիրություն պահանջող հարցեր առաջանալու դեպքում (նյութերից քաղվածքները) Հարցում կատարող Կողմին ուղարկել նյութերն այն մասով, որը նրան է վերաբերում:

4. Սույն Արձանագրությամբ ստանձնված պարտավորությունները համահունչ են ՀՀ Սահմանադրության 13-րդ հոդվածով նախատեսված պահանջներին:

Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության (2005 թվականի փոփոխություններով) 100-րդ հոդվածի 2-րդ կետով, 102-րդ հոդվածի առաջին և չորրորդ մասերով, «Սահմանադրական դատարանի մասին» Հայաստանի Հանրապետության օրենքի 63, 64 և 72-րդ հոդվածներով, Հայաստանի Հանրապետության սահմանադրական դատարանը որոշեց.

1. 2016 թվականի սեպտեմբերի 16-ին Բիշկեկում ստորագրված` Քրեական դատավարության մասնակիցների պաշտպանության մասին 2006 թվականի նոյեմբերի 28-ի համաձայնագիրը՝ պաշտպանության միջոցների իրականացման հետ կապված ծախսերի փոխհատուցման հարցերով իրագործելու վերաբերյալ արձանագրության մեջ ամրագրված պարտավորությունները համապատասխանում են Հայաստանի Հանրապետության Սահմանադրությանը։

2. Հայաստանի Հանրապետության Սահմանադրության 102-րդ հոդվածի երկրորդ մասի համաձայն սույն որոշումը վերջնական է և ուժի մեջ է մտնում հրապարակման պահից։

Նախագահող	Գ. Հարությունյան
25 մայիսի 2017 թվականի ՍԴՈ-1368