1. Գրականության և արվեստի բնագավառում Հայաստանի Հանրապետության պետական մրցանակները (այսուհետ` մրցանակ) շնորհվում են բացառիկ արժեքավոր ստեղծագործությունների հեղինակներին:

2. Մրցանակը շնորհվում է երկու տարին մեկ անգամ և որպես կանոն հանձնվում է մրցանակաբաշխության տարվա դեկտեմբեր ամսվա վերջին 10 օրվա ընթացքում:

3. Գրականության և արվեստի բնագավառում Հայաստանի Հանրապետության պետական մրցանակների հանձնախմբերը (այսուհետ` հանձնախումբ) մրցանակների յուրաքանչյուր շնորհումից հետո ապրիլի 1-ից մինչև 15-ն ընկած ժամանակահատվածում (2002 թվականի համար` սեպտեմբերի 1-ից մինչև 15-ն ընկած ժամանակահատվածում)` միևնույն օրը, մամուլի և զանգվածային լրատվության միևնույն միջոցներով տեղեկացնում են մրցանակաբաշխության անցկացման, ինչպես նաև մրցանակի հայցման առաջարկությունների ներկայացման մասին:

4. Ստեղծագործությունները մրցանակի հայցման կարող են ներկայացվել հեղինակների, ստեղծագործական միավորումների, ինչպես նաև գրականության և արվեստի բնագավառի այլ կազմակերպությունների կողմից:

5. Մրցանակաբաշխության կարող են ներկայացվել միայն այն ստեղծագործությունները, որոնք առաջին անգամ իրագործվել (հրատարակվել, հրապարակվել, կատարվել, ցուցադրվել, կառուցվել-ավարտվել, բեմադրվել) են մրցանակի հայցման առաջարկությունների ներկայացման ժամկետն ավարտվելու օրվան նախորդած երկու տարվա ընթացքում:

6. Ստեղծագործությունները մրցանակի հայցման են ներկայացվում հանձնախմբերին մրցանակաբաշխության տարվա մարտի 1-ից մինչև սեպտեմբերի 1-ը:

7. Ստեղծագործությունը մրցանակի հայցման ներկայացվելիս դրան կցվում են այդ ոլորտի երեք մասնագետների` ստեղծագործության վերաբերյալ գրավոր դրական կարծիքներ, որոնցում պետք է փաստարկված ներկայացվի ստեղծագործության` մրցանակի արժանի լինելու հանգամանքը:

8. Մրցանակի հայցման ներկայացվելիս ստեղծագործության հեղինակի (հեղինակների) և այդ ոլորտում նրա (նրանց) գործունեության վերաբերյալ ներկայացվում է նաև հակիրճ տեղեկատվություն:

9. Մրցանակի հայցման ներկայացված ստեղծագործությունները քննարկում, մրցանակի հավակնորդների ընտրությունը կազմակերպում և անցկացնում են հանձնախմբերը:

10. Հանձնախմբերի կազմերը, սույն հրամանագրի 1-ին կետում նշված ոլորտներին համապատասխան, հաստատվում և փոփոխվում են Հայաստանի Հանրապետության Նախագահի կարգադրությամբ:

11. Հանձնախումբը բաղկացած է ինն անդամից:

(11-րդ կետը խմբ. 14.03.05 ՆՀ-52-Ն)

12. Հանձնախմբերում անդամներն ընդգրկվում են իրենց համաձայնությամբ և իրենց պարտականությունները կատարում են հասարակական հիմունքներով:

13. Հանձնախմբի ընթացիկ աշխատանքը կազմակերպելու նպատակով հանձնախումբն իր անդամների ընդհանուր թվի ձայների մեծամասնությամբ ընդունում է իր աշխատակարգը:

14. Հանձնախումբն ունի նախագահ, որին իր անդամներից ընտրում է հանձնախումբը:

15. Հանձնախմբերի անդամները գրականության և արվեստի բնագավառում իրենց ստեղծագործությունների համար չեն կարող հավակնել հրամանագրի 1-ին կետում նշված պետական մրցանակներ ստանալուն:

16. Հանձնախումբը, սույն կարգին և իր աշխատակարգին համապատասխան, աշխատանքը կազմակերպում է նիստերի միջոցով, որոնք գումարվում են ոչ պակաս, քան երկու ամիսը մեկ անգամ, ինչպես նաև արտահերթ նիստերի միջոցով, որոնք կարող են գումարվել հանձնախմբի նախագահի կամ հանձնախմբի անդամների առնվազն մեկ երրորդի կողմից:

17. Հանձնախմբի նիստն իրավազոր է, եթե դրան մասնակցում է հանձնախմբի անդամների կեսից ավելին:

18. Հանձնախմբի նախագահի կողմից իր պարտականությունների կատարման ժամանակավոր անհնարինության կամ նրա բացակայության դեպքում նախագահի պարտականությունների կատարումը ժամանակավորապես դրվում է հանձնախմբի անդամներից որևէ մեկի վրա` հանձնախմբի որոշմամբ:

19. Հանձնախմբի նախագահը`

ա) հրավիրում և վարում է հանձնախմբի նիստը.

բ) նշանակում է հանձնախմբի նիստի անցկացման վայրը, օրը և ժամը.

գ) ստորագրում է հանձնախմբի որոշումները.

դ) իրականացնում է հանձնախմբի գործառույթներից բխող այլ կազմակերպական աշխատանքներ:

20. Հանձնախմբի անդամը`

ա) մասնակցում է հանձնախմբի աշխատանքներին.

բ) կատարում է հանձնախմբի հանձնարարականները.

գ) առաջարկություններ է ներկայացնում հանձնախմբի գործունեությանն առնչվող հարցերի վերաբերյալ.

դ) իրականացնում է հանձնախմբի գործառույթներից բխող այլ աշխատանքներ:

21. (21-րդ կետն ուժը կորցրել է 12.09.07, ՆՀ-205-Ն):

22. Հանձնախումբն է որոշում մրցանակի հավակնորդների ընտրության չափանիշները:

23. Մրցանակի դափնեկրի թեկնածուին ընտրելու որոշումը հանձնախումբն ընդունում է գաղտնի քվեարկությամբ, հանձնախմբի անդամների ընդհանուր թվի ձայների մեծամասնությամբ:

24. Մրցանակների շնորհման մասին առաջարկությունները հանձնախմբերը Հայաստանի Հանրապետության Նախագահին են ներկայացնում ոչ շուտ, քան մրցանակաբաշխության տարվա դեկտեմբերի 1-ը և ոչ ուշ, քան դեկտեմբերի 15-ը:

25. Մրցանակների շնորհման մասին հանձնախմբերի առաջարկությունների հիման վրա մրցանակները շնորհում է Հայաստանի Հանրապետության Նախագահը` համապատասխան հրամանագրով:

26. Մրցանակը ստեղծագործության համահեղինակների շնորհվելու դեպքում մրցանակի մաս կազմող դրամական պարգևը հավասար բաշխվում է համահեղինակների միջև, յուրաքանչյուրին հանձնվում է նաև կրծքանշան և վկայագիր:

27. Մահացած դափնեկրի կրծքանշանը և վկայագիրը հանձնվում են նրա ընտանիքին, իսկ դրամական պարգևը փոխանցվում է նրա ժառանգներին` Հայաստանի Հանրապետության օրենսդրությամբ սահմանված կարգով:

28. Հանձնախմբերի նյութատեխնիկական ապահովումն իրականացնում է Հայաստանի Հանրապետության Նախագահի աշխատակազմը:

29. Մրցանակի արժանացած անձանց մրցանակները հանձնում է Հայաստանի Հանրապետության Նախագահը կամ նրա կողմից լիազորված անձը` հանդիսավոր պայմաններում: