ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

11 փետրվարի 2016 թվականի N 105-Ն

ՎԱՐԿԱՅԻՆ ՊԱՅՄԱՆԱԳՐՈՒՄ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հիմք ընդունելով «Հայաստանի Հանրապետության բյուջետային համակարգի մասին» Հայաստանի Հանրապետության օրենքի 10-րդ հոդվածի 3-րդ կետը և Հայաստանի Հանրապետության կառավարության 1998 թվականի մարտի 9-ի N 168 որոշմամբ հաստատված կարգի 23-րդ կետը՝ Հայաստանի Հանրապետության կառավարությունը որոշում է.

1. Սահմանել, որ՝

1) Հայաստանի Հանրապետության ֆինանսների նախարարության և «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամի միջև 2013 թվականի հոկտեմբերի 25-ին կնքված N 6/2013 վարկային պայմանագրով տրամադրված վարկի հիմնական գումարի և հաշվարկված տոկոսագումարի, ինչպես նաև 2016 թվականի հունվարի 1-ին վճարման ենթակա գումարների մարումն իրականացվելու է՝ սկսած 2016 թվականի մարտի 1-ից՝ ամսական հավասարաչափ մարումներով, վեց ամսվա ընթացքում.

2) Հայաստանի Հանրապետության ֆինանսների նախարարության և «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամի միջև 2013 թվականի հոկտեմբերի 25-ին կնքված N 6/2013 վարկային պայմանագրով նախատեսված վճարման ժամկետների կետանցի համար 2016 թվականի հունվարի 1-ից մինչև սույն որոշման ընդունման օրը հաշվարկված տույժերով ձևավորված պարտավորությունները դադարեցվում են` պարտքը ներելու միջոցով:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Հ. Աբրահամյան
2016 թ. փետրվարի 15 Երևան