ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

Հ Ր Ա Մ Ա Ն Ա Գ Ի Ր Ը

Հայաստանի Հանրապետության ներքին գործերի նախարարության ներքին զորքերի ավանդույթների զարգացման, ինչպես նաև ծառայողական պարտքի կատարման հանդեպ ներքին զորքերի զինծառայողների պատասխանատվությունն ավելի բարձրացնելու նպատակով` որոշում եմ.

1. Հիմնել Հայաստանի Հանրապետության ներքին գործերի նախարարության ներքին զորքերի դրոշ:

2. Հաստատել Հայաստանի Հանրապետության ներքին գործերի նախարարության ներքին զորքերի դրոշի մասին կանոնադրությունը և դրոշի նկարագրությունը (կցվում են):

3. Սույն հրամանագիրն ուժի մեջ է մտնում պաշտոնական հրապարակման պահից:

Հանրապետության նախագահ
2002 թ. հունիսի 17 Երևան ՆՀ-1114-Ն

Հաստատված է Հայաստանի Հանրապետության Նախագահի 2002 թվականի հունիսի 17-ի ՆՀ-1114-Ն հրամանագրով

1. Հայաստանի Հանրապետության ներքին գործերի նախարարության ներքին զորքերի դրոշը (այսուհետ` դրոշ) պատվի, փառքի և արիության խորհրդանիշ է: Դրոշը ներքին զորքերի յուրաքանչյուր զինծառայողի սրբազան պարտքի հիշեցումն է` Հայրենիքին անձնուրաց ծառայելու, հասարակական կարգը պահպանելու և հասարակական անվտանգությունն ապահովելու մասին:

2. Դրոշը Հայաստանի Հանրապետության ներքին գործերի նախարարության ներքին զորքերին հանձնում է Հայաստանի Հանրապետության Նախագահը կամ նրա կողմից լիազորված անձը:

3. Դրոշի հետ հանձնվում է նաև Հայաստանի Հանրապետության Նախագահի ստորագրությամբ վկայագիր:

4. Դրոշը մշտապես պահվում է Հայաստանի Հանրապետության ներքին գործերի նախարարության ներքին զորքերում:

5. Դրոշի պահման, պահպանման և օգտագործման կարգը սահմանում է Հայաստանի Հանրապետության ներքին գործերի նախարարության ներքին զորքերի հրամանատարը:

6. Հայաստանի Հանրապետության ներքին գործերի նախարարության ներքին զորքերի յուրաքանչյուր զինծառայող պարտավոր է պահպանել և պաշտպանել դրոշը:

Հաստատված է Հայաստանի Հանրապետության Նախագահի 2002 թվականի հունիսի 17-ի ՆՀ-1114-Ն հրամանագրով

Հայաստանի Հանրապետության ներքին գործերի նախարարության ներքին զորքերի դրոշը բաղկացած է երկդեմ պաստառից և ծոպափնջերով քուղերից:

Դրոշի պաստառն ուղղանկյունաձև է, երկարությունը 1450 մմ է, լայնությունը` 1150 մմ:

Կարված է երկտակ մետաքսե մուգ բալերանգ (գույնի համակարգչային հարաբերությունն է` M=100%, Y=20%, K=50%) կտորից` երեք կողմից երիզված ոսկեգույն ծոպերով: Պաստառի երեսի կողմի կենտրոնական մասում` 650 մմ բարձրության վրա ոսկեգույն մետաքսաթելով ասեղնագործված են «Ներքին զորքեր» բառերը, տառերի բարձրությունը 70 մմ է, լայնությունը` 50 մմ:

Պաստառի հակառակ կողմում` 500 մմ բարձրության և 710 մմ լայնության վրա պատկերված է Հայաստանի Հանրապետության զինանշանը` 300x300 մմ չափերով: Զինանշանի վերին մասում ոսկեգույն մետաքսաթելով կամարաձև ասեղնագործված են «Հանուն Հայրենիքի» բառերը, տառերի բարձրությունը 60 մմ է, լայնությունը` 40 մմ: