25 սեպտեմբերի 2015 թվականի N 1099-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2006 ԹՎԱԿԱՆԻ ՆՈՅԵՄԲԵՐԻ 2-Ի N 1911-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2006 թվականի նոյեմբերի 2-ի «Հայաստանի Հանրապետության մարզերի առողջապահության համակարգերի օպտիմալացման ծրագրերը հաստատելու մասին» N 1911-Ն որոշման մեջ կատարել հետևյալ փոփոխությունները՝

1) որոշման N 2 հավելվածի Հայաստանի Հանրապետության Արմավիրի մարզի առողջապահության համակարգի օպտիմալացման ծրագրի`

ա. Արմավիրի մարզի առողջապահական համակարգի օպտիմալացման պլանի «I. Արմավիրի տարածաշրջան» և «III. Բաղրամյանի տարածաշրջան» բաժիններում «Արմավիրի բժշկական կենտրոն» բառերը փոխարինել «Զարիշատ (Արամ) Մարտինի Մկրտչյանի անվան Արմավիրի բժշկական կենտրոն» բառերով,

բ. «I. Արմավիրի տարածաշրջան» բաժնում ներկայացված Մեծամոր քաղաքի 1-ին կետը շարադրել հետևյալ խմբագրությամբ.

 «1. «Մեծամորի հիվանդանոց» փակ բաժնետիրական ընկերությունը և «Մեծամորի պոլիկլինիկա» փակ բաժնետիրական ընկերությունը միաձուլման ձևով վերակազմակերպել` ստեղծելով «Մեծամորի բժշկական կենտրոն» փակ բաժնետիրական ընկերություն: Պոլիկլինիկայի նեղ մասնագիտական ծառայություններն ինտեգրել Մեծամորի հիվանդանոցին, իսկ ստացիոնար ծառայությունները ենթարկել ներքին օպտիմալացման` միավորելով մեծահասակների և մանկական թերապևտիկ բաժանմունքները մեկ թերապևտիկ ծառայության մեջ՝ 20 մահճակալով և կրճատելով մահճակալների թիվը` ըստ ստորև ներկայացված կառուցվածքի`

Մեծամորի բժշկական կենտրոն Մահճակալների ներկա թիվը Մահճակալների ներկա զբաղվածությունը Մահճակալների առաջարկվող թիվը Թերապևտիկ` ներառյալ մանկականը 20 (10 մեծերի և 10 մանկական) 81% 20 (10 մեծերի և 10 մանկական) Վիրաբուժական 15 44% 15 Մանկաբարձագինեկոլոգիական 15 26% 0 Էնդոկրինոլոգիական - - 31 Ինֆեկցիոն 10 78% 10 Ընդամենը 60 59% 76

».

գ. «II. Վաղարշապատի տարածաշրջան» բաժնի 6-րդ կետը շարադրել հետևյալ խմբագրությամբ.

«6. «Վաղարշապատի պոլիկլինիկա» պետական փակ բաժնետիրական ընկերության կազմում ստեղծել տուբերկուլյոզի դեմ պայքարի կաբինետ՝ վերապահելով նրան դիսպանսեր հսկողության գործառույթ: Կազմակերպել խորխի բակտերիոսկոպիկ հետազոտության գործառույթ` «Վաղարշապատի պոլիկլինիկա» պետական փակ բաժնետիրական ընկերության լաբորատորիայի կազմում: «Վաղարշապատի պոլիկլինիկա» պետական փակ բաժնետիրական ընկերության կազմում գործող տուբերկուլյոզի դեմ պայքարի կաբինետը և խորխի բակտերիոսկոպիկ հետազոտության ծառայությունը տեղակայել «Վաղարշապատի հիվանդանոց» պետական փակ բաժնետիրական ընկերության տարածքում` ծառայության համար անհրաժեշտ տարածքները տրամադրելով անհատույց օգտագործման հիմունքներով:»,

դ. «III. Բաղրամյանի տարածաշրջան» բաժնի 2-րդ կետի երկրորդ նախադասությունը հանել,

ե. «III. Բաղրամյանի տարածաշրջան» բաժնի 3-րդ կետի երրորդ պարբերությունը շարադրել հետևյալ խմբագրությամբ.

«Ընդհանուր մահճակալային ֆոնդը կկազմի 362 (131՝ «Զարիշատ (Արամ) Մարտինի Մկրտչյանի անվան Արմավիրի բժշկական կենտրոն» փակ բաժնետիրական ընկերություն (ներառյալ 6-ը` Բաղրամյանի մոր և մանկան առողջության կենտրոնում), 76՝ «Մեծամորի բժշկական կենտրոն» փակ բաժնետիրական ընկերություն, 100` «Վաղարշապատի հիվանդանոց» պետական փակ բաժնետիրական ընկերություն, 50` «Վաղարշապատի ծննդատուն» պետական փակ բաժնետիրական ընկերություն, 5` «Երվանդաշատի առողջության կենտրոն» փակ բաժնետիրական ընկերություն), կազատվի 6 մասնաշենք («Զարիշատ (Արամ) Մարտինի Մկրտչյանի անվան Արմավիրի բժշկական կենտրոն» փակ բաժնետիրական ընկերության մանկական բաժանմունքի, «Մեծամորի բժշկական կենտրոն» փակ բաժնետիրական ընկերության պոլիկլինիկական, ինֆեկցիոն և վարչական, «Վաղարշապատի հիվանդանոց» պետական փակ բաժնետիրական ընկերության ինֆեկցիոն մասնաշենքերը, ինչպես նաև «Վաղարշապատի հակատուբերկուլյոզային դիսպանսեր» փակ բաժնետիրական ընկերության շենքը)` շուրջ 3289 քառակուսի մետր տարածքով:».

2) որոշման N 6 հավելվածի Հայաստանի Հանրապետության Տավուշի մարզի առողջապահության համակարգի օպտիմալացման ծրագրի՝

ա. «I. Դիլիջանի տարածաշրջան» բաժնի 5-րդ կետը ճանաչել ուժը կորցրած,

բ. «IV. Բերդի տարածաշրջան» բաժնի 7-րդ կետը ճանաչել ուժը կորցրած,

գ. «IV. Բերդի տարածաշրջան» բաժնի 9-րդ կետի երրորդ պարբերությունը շարադրել հետևյալ խմբագրությամբ.

«Ընդհանուր մահճակալային ֆոնդը կկազմի 234 (40` Դիլիջան, 80` Իջևան, 55` Նոյեմբերյան, 30` Բերդ, 5` Աչաջուր, 20` Արծվաբերդ, 4` Այգեձոր), կազատվի 2 մասնաշենք («Իջևանի մոր և մանկան առողջության պահպանման կենտրոն» փակ բաժնետիրական ընկերության և «Նոյեմբերյանի պոլիկլինիկա» փակ բաժնետիրական ընկերության շենքերը):».

3) որոշման N 8 հավելվածի Հայաստանի Հանրապետության Սյունիքի մարզի առողջապահության համակարգի օպտիմալացման ծրագրի`

ա. «I. Կապանի տարածաշրջան» բաժնի 5-րդ կետը ճանաչել ուժը կորցրած,

բ. «IV. Մեղրու տարածաշրջան» բաժնի 9-րդ կետի երրորդ պարբերությունը շարադրել հետևյալ խմբագրությամբ.

«Ծրագրի արդյունքում ընդհանուր մահճակալային ֆոնդը կկազմի 410 մահճակալ, և կազատվի շուրջ 10907.5 քառակուսի մետր մակերեսով տարածք:».

4) որոշման N 9 հավելվածի Հայաստանի Հանրապետության Շիրակի մարզի առողջապահության համակարգի օպտիմալացման ծրագրի «II. Ախուրյանի տարածաշրջան» բաժնի 2-րդ կետը ճանաչել ուժը կորցրած.

5) որոշման N 10 հավելվածի Հայաստանի Հանրապետության Վայոց ձորի մարզի առողջապահության համակարգի օպտիմալացման ծրագրի`

ա. «II. Վայքի տարածաշրջան» բաժնի 2-րդ կետը ճանաչել ուժը կորցրած,

բ. «II. Վայքի տարածաշրջան» բաժնի 8-րդ կետի երրորդ պարբերությունը շարադրել հետևյալ խմբագրությամբ.

«Մահճակալային ֆոնդը կկրճատվի 105-ով և կկազմի 85 մահճակալ: Կազատվի շուրջ 12911.17 քառակուսի մետր մակերեսով տարածք (ներառյալ Ջերմուկի հիվանդանոցի նախկին՝ քաղաքապետարանի տնօրինությանը հանձնված շենքը):»:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Հ. Աբրահամյան
2015 թ. սեպտեմբերի 29 Երևան