ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

Հ Ր Ա Մ Ա Ն Ա Գ Ի Ր Ը

ՄԻՋԱԶԳԱՅԻՆ ԱՐԺՈՒԹԱՅԻՆ ՀԻՄՆԱԴՐԱՄԻ ՊԱՅՄԱՆԱԳՐԻ ԴՐՈՒՅԹՆԵՐԻ ԸՆԴՈՒՆՄԱՆ ՎԱՎԵՐԱԳԻՐԸ ՆԵՐԿԱՅԱՑՆԵԼՈՒ ԵՎ ԴՐԱՆՑ ԲՆԱԳՐԵՐԸ ՍՏՈՐԱԳՐԵԼՈՒ ԼԻԱԶՈՐՈՒԹՅԱՆ ՄԱՍԻՆ

«Միջազգային արժութային հիմնադրամին, Վերակառուցման և զարգացման միջազգային բանկին, Միջազգային ֆինանսական կորպորացիային, Զարգացման միջազգային ասոցիացիային, Կապիտալ ներդրումների բազմակողմանի երաշխիքների գործակալությանը և Կապիտալ ներդրումների վերաբերյալ տարաձայնությունների կարգավորման միջազգային կենտրոնին Հայաստանի Հանրապետության անդամակցության մասին» Հայաստանի Հանրապետության օրենքին համապատասխան, որոշում եմ.

1. Լիազորել Հյուսիսային Ամերիկայում Հայաստանի Հանրապետության ներկայացուցիչ Ալեքսանդր Ռոբերտի Արզումանյանին Հայաստանի Հանրապետության անունից`

ա) Ամերիկայի Միացյալ Նահանգների կառավարությանը ներկայացնել Միջազգային արժութային հիմնադրամի պայմանագրի դրույթների ընդունման վավերագիր, որում հաստատվում է, որ «Միջազգային արժութային հիմնադրամին, Վերակառուցման և զարգացման միջազգային բանկին, Միջազգային ֆինանսական կորպորացիային, Զարգացման միջազգային ասոցիացիային, Կապիտալ ներդրումների բազմակողմանի երաշխիքների գործակալությանը և Կապիտալ ներդրումների վերաբերյալ տարաձայնությունների կարգավորման միջազգային կենտրոնին Հայաստանի Հանրապետության անդամակցության մասին» Հայաստանի Հանրապետության օրենքին համապատասխան Հայաստանի Հանրապետությունը ընդունել է Միջազգային արժութային հիմնադրամի պայմանագրի դրույթները` ուղղումներով հանդերձ, ինչպես նաև այն ժամկետներն ու պայմանները, որոնք սահմանված են Միջազգային արժութային հիմնադրամի կառավարիչների խորհրդի` Հիմնադրամին Հայաստանի Հանրապետության անդամակցության մասին 1992 թվականի ապրիլի 27-ի հ.47-8 բանաձևով, հայտարարվում է, որ Հայաստանի Հանրապետությունը արել է բոլոր անհրաժեշտ քայլերը` սահմանված ժամկետներին ու պայմաններին համապատասխան իր բոլոր պարտավորությունների կատարումը հնարավոր դարձնելու համար.

բ) ստորագրել Միջազգային արժութային հիմնադրամի պայմանագրի դրույթների բնագրերը, որոնք պահվում են Ամերիկայի Միացյալ Նահանգների կառավարության արխիվներում:

2. Սույն հրամանագիրը ուժի մեջ է մտնում ստորագրման պահից:

Հայաստանի Հանրապետության Նախագահ	Լ. Տեր-Պետրոսյան
Երևան 1 մայիսի 1992 թ. ՆՀ-98