«Վավերացնում եմ»
Հայաստանի Հանրապետության
Նախագահ Ռ. Քոչարյան
2 մայիսի 2007 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

5 ապրիլի 2007 թվականի N 484-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԹԱՆԿԱՐԺԵՔ ՄԵՏԱՂՆԵՐԻ ՈՒ ԹԱՆԿԱՐԺԵՔ ՔԱՐԵՐԻ ՊԵՏԱԿԱՆ ՊԱՀՈՒՍՏՆԵՐԻ ԵՎ ԴՐԱ ԲԱՂԿԱՑՈՒՑԻՉ ՄԱՍ ԿԱԶՄՈՂ ԹԱՆԿԱՐԺԵՔ ՄԵՏԱՂՆԵՐԻ ԵՎ ԹԱՆԿԱՐԺԵՔ ՔԱՐԵՐԻ ԱԶԳԱՅԻՆ ՊԱՀՈՒՍՏԻ ՀԱՄԱԼՐՄԱՆ, ՊԱՀՊԱՆՈՒԹՅԱՆ, ՕԳՏԱԳՈՐԾՄԱՆ, ԾԱԽՍՄԱՆ, ՀԱՇՎԱՌՄԱՆ, ԻՆՉՊԵՍ ՆԱԵՎ ԴՐԱՆՑ ՏԵՂԱԲԱՇԽՄԱՆ ԵՎ ԳՏՆՎԵԼՈՒ ՎԱՅՐԵՐԸ ՈՐՈՇԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Թանկարժեք մետաղների մասին» Հայաստանի Հանրապետության օրենքի 17-րդ հոդվածի 4-րդ մասը` Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության թանկարժեք մետաղների ու թանկարժեք քարերի պետական պահուստների և դրա բաղկացուցիչ մաս կազմող թանկարժեք մետաղների և թանկարժեք քարերի ազգային պահուստի համալրման, պահպանության, օգտագործման, ծախսման, հաշվառման, ինչպես նաև դրանց տեղաբաշխման և գտնվելու վայրերը որոշելու կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ս. Սարգսյան
2007 թ. ապրիլի 25 Երևան

Հավելված ՀՀ կառավարության 2007 թվականի ապրիլի 5-ի N 484-Ն որոշման

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԹԱՆԿԱՐԺԵՔ ՄԵՏԱՂՆԵՐԻ ՈՒ ԹԱՆԿԱՐԺԵՔ ՔԱՐԵՐԻ ՊԵՏԱԿԱՆ ՊԱՀՈՒՍՏՆԵՐԻ ԵՎ ԴՐԱ ԲԱՂԿԱՑՈՒՑԻՉ ՄԱՍ ԿԱԶՄՈՂ ԹԱՆԿԱՐԺԵՔ ՄԵՏԱՂՆԵՐԻ ԵՎ ԹԱՆԿԱՐԺԵՔ ՔԱՐԵՐԻ ԱԶԳԱՅԻՆ ՊԱՀՈՒՍՏԻ ՀԱՄԱԼՐՄԱՆ, ՊԱՀՊԱՆՈՒԹՅԱՆ, ՕԳՏԱԳՈՐԾՄԱՆ, ԾԱԽՍՄԱՆ, ՀԱՇՎԱՌՄԱՆ, ԻՆՉՊԵՍ ՆԱԵՎ ԴՐԱՆՑ ՏԵՂԱԲԱՇԽՄԱՆ ԵՎ ԳՏՆՎԵԼՈՒ ՎԱՅՐԵՐԸ ՈՐՈՇԵԼՈՒ

1. Սույն կարգով կարգավորվում են Հայաստանի Հանրապետության թանկարժեք մետաղների ու թանկարժեք քարերի պետական պահուստների և դրան բաղկացուցիչ մաս կազմող թանկարժեք մետաղների և թանկարժեք քարերի ազգային պահուստի համալրման, պահպանության, օգտագործման, ծախսման, հաշվառման, ինչպես նաև դրանց տեղաբաշխման և գտնվելու վայրերը որոշելու հետ կապված հարաբերությունները:

2. Հայաստանի Հանրապետության թանկարժեք մետաղների ու թանկարժեք քարերի պետական պահուստը (այսուհետ` պետական պահուստ) և դրա բաղկացուցիչ մասը կազմող թանկարժեք մետաղների ու թանկարժեք քարերի ազգային պահուստը (այսուհետ` ազգային պահուստ) կարող են համալրվել «Թանկարժեք մետաղների մասին» Հայաստանի Հանրապետության օրենքով նախատեսված միջոցների և աղբյուրների հաշվին, Հայաստանի Հանրապետության ֆինանսների և էկոնոմիկայի նախարարության միջոցով` Հայաստանի Հանրապետության վարչապետի համաձայնությամբ:

3. Պետական պահուստի և դրա բաղկացուցիչ մասը կազմող ազգային պահուստի արժեքները ենթակա են պարտադիր հաշվառման և կառավարման` Հայաստանի Հանրապետության ֆինանսների և էկոնոմիկայի նախարարության աշխատակազմի «Թանկարժեք մետաղների և թանկարժեք քարերի պետական գանձարան» գործակալության (այսուհետ` գանձարան) կողմից:

4. Պետական մարմիններում, պետական հիմնարկների և կազմակերպությունների հաշվեկշիռներում հաշվառված պետական պահուստի արժեքների հաշվառումն իրականացվում է տվյալ պետական մարմնի, հիմնարկի և կազմակերպության կողմից` Հայաստանի Հանրապետության օրենսդրությամբ սահմանված կարգով գույքագրման տվյալների հիման վրա, վարելով համապատասխան գրանցամատյան:

Պետական մարմինը, հիմնարկը և կազմակերպությունը գրանցամատյանում կատարվող փոփոխությունների մասին 15 օրվա ընթացքում` պատվիրված նամակով տեղեկացնում է գանձարանին:

5. Պետական մարմիններում, պետական հիմնարկներում ու կազմակերպություններում` բացառությամբ սույն կարգի 5.1-ին կետով նախատեսված դեպքի, գտնվող թանկարժեք մետաղների, թանկարժեք քարերի և դրանցից պատրաստված իրերի (այսուհետ` իրեր) հաշվառումն իրականացնում են համապատասխան պետական մարմինը, պետական հիմնարկը և կազմակերպությունը` խիստ հաշվառման ձևերով (հաշվառման քարտերի և գրքերի միջոցով), որոնց ձևը հաստատում է Հայաստանի Հանրապետության ֆինանսների և էկոնոմիկայի նախարարությունը` գանձարանի ներկայացմամբ: Գրքերը կարվում, էջակալվում են, վերջին էջում գրվում են էջերի թիվը, տալու օրը, ամիսը և ստորագրվում են համապատասխան մարմնի ղեկավարի կողմից:

(5-րդ կետը լրաց. 31.05.12 N 705-Ն)

5.1. Պետական և համայնքային թանգարաններում գտնվող՝ թանկարժեք մետաղներից և թանկարժեք քարերից պատրաստված թանգարանային առարկաների հաշվառումն ու պահպանությունն իրականացնում են թանգարանները` Հայաստանի Հանրապետության կառավարության սահմանած կարգով:

(5.1 կետը լրաց. 31.05.12 N 705-Ն)

6. Մուտքագրվող յուրաքանչյուր իրի համար նախատեսված քարտում և (կամ) գրքում յուրաքանչյուր իրի համար բացվում է անհատական համար: Քարտում և (կամ) գրքում նշվում են սույն կետի «ա», «բ», «գ» և «դ» ենթակետերով սահմանված` դրանք բնութագրող վավերապայմանները (ռեկվիզիտները) և մանրամասն նկարագրությունը, իսկ գանձարան մուտքագրվող իրի համար բնութագրող վավերապայմանները և մանրամասն նկարագրությունը լրացվում են ըստ փորձաքննություն իրականցնող մարմնի կողմից տրված մասնագիտական եզրակացության:

Իրերը գանձարան ընդունվում և մուտքագրվում են համապատասխան մասնագիտական եզրակացության հիման վրա, որի մեջ պետք է նշված լինեն`

1) թանկարժեք մետաղների համար` անվանումը, հարգը, քաշը, եթե թանկարժեք մետաղը լարի տեսքով է` նաև տրամագիծը, եթե թանկարժեք մետաղը թիթեղի տեսքով է` նաև հաստությունը.

2) թանկարժեք քարերի համար` անվանումը, քանակը, կշիռը (կարատ), որակը և նիստավորման ձևը.

3) թանկարժեք մետաղներից պատրաստված իրերի համար` իրի նկարագիրը, մետաղի տեսակը, հարգը և կշիռը.

4) թանկարժեք մետաղներից պատրաստված իրերի վրա թանկարժեք քարերի առկայության դեպքում` քարերի անվանումը, քանակը, կշիռը (կարատ), որակը և նիստավորման ձևը, այլ քարերի դեպքում` դրանց նկարագրությունը (անվանումը, քանակը, չափերը և այլ որակական հատկանիշներ):

7. Յուրաքանչյուր իր գանձարան մուտքագրվելուց առաջ ներկայացվում է փորձաքննություն իրականացնող մարմին, որի համար կազմվում է հանձնման և ընդունման ակտ, որին կից ներկայացվում են իրը բնութագրող անհրաժեշտ փաստաթղթերը:

Յուրաքանչյուր իր փորձաքննության արդյունքների հիման վրա փորձաքննություն իրականացնող մարմնի կողմից պիտակավորվում և կապարակնքվում է: Պիտակի վրա մանրամասն նշվում են իրը բնութագրող վավերապայմանները (ռեկվիզիտները) և մանրամասն նկարագրությունն ու փորձաքննություն իրականացնող մարմնի կողմից մասնագիտական եզրակացության կայացման ամսաթիվը և համարը: Իրը գանձարան մուտքագրելու ժամանակ այն կապարակնքվում է նաև գանձարանի կողմից:

Թանկարժեք քարեր պարունակող իրերը հանձնվում են փակ` փորձաքննություն իրականացնող մարմնի և գանձարանի կողմից կապարակնքված տուփերում: Տուփը պետք է պատրաստված լինի ցանկացած թափանցիկ նյութից` այնպես, որպեսզի հնարավոր չլինի այն բացել` առանց տուփը կամ կապարակնիքը վնասելու: Տուփի վրա փակցվում է սույն կետի առաջին պարբերությամբ սահմանված պիտակի կրկնօրինակը:

8. Սույն կարգի 7-րդ կետով սահմանված իրերի կապարակնիքների կամ թանկարժեք քարեր պարունակող իրերի տուփերի կամ կապարակնիքների վնասված չլինելու պարագայում իրերի կամ տուփերում պարունակվող թանկարժեք քարեր պարունակող իրերի պիտակների վրա նշված` իրը բնութագրող վավերապայմաններին անհամապատասխանության դեպքում փորձաքննություն իրականացնող մարմինն օրենքով սահմանված կարգով և չափով կրում է պատասխանատվություն:

9. Սույն կարգի 7-րդ կետով սահմանված իրերի կապարակնիքների կամ թանկարժեք քարեր պարունակող իրերի տուփերի կամ կապարակնիքների վնասված լինելու դեպքում` նյութական պատասխանատու անձն անմիջապես տեղյակ է պահում Հայաստանի Հանրապետության ֆինանսների և էկոնոմիկայի նախարարին, որից հետո 15-օրյա ժամկետում` փորձաքննություն իրականացնող մարմնի կողմից կազմակերպվում է տուփերում պարունակվող իրերի փորձաքննություն:

10. Սույն կարգի 7-րդ կետով սահմանված իրերի կապարակնիքների կամ թանկարժեք քարեր պարունակող իրերի տուփերի կամ կապարակնիքների վնասված լինելու պարագայում իրերի կամ տուփերում պարունակվող` թանկարժեք քարեր պարունակող իրերի պիտակների վրա նշված` իրը բնութագրող վավերապայմաններին անհամապատասխանության դեպքում նյութական պատասխանատու անձն օրենքով և պայմանագրով սահմանված կարգով ու չափով կրում է գույքային պատասխանատվություն:

11. Հաշվառման քարտերում և գրքերում իրերի մուտքն ու ելքը գրանցվում են ձևակերպված փաստաթղթերի` մուտքագրման և ելքագրման ակտերի, պահանջագրերի, հանձնման-ընդունման ակտերի, սկզբնական փաստաթղթերի հիման վրա` ըստ իրերի տեսակի, որակական բնութագրերի, հարգի, քաշի, ձեռքբերման, գնահատման արժեքի, իսկ գանձարան մուտքագրվող և ելքագրվող իրերի համար` նաև փորձաքննության եզրակացության հիման վրա:

12. Թանկարժեք մետաղները գնահատվում են գանձարանի կողմից` տվյալ պահին միջազգային շուկայում գործող գներին համապատասխան, որն էլ ընդունվում է որպես տվյալ պահին այդ իրի գին, և սահմանված կարգով կատարվում է հաշվառում:

Թանկարժեք մետաղների գնահատման կարգը սահմանում է Հայաստանի Հանրապետության ֆինանսների և էկոնոմիկայի նախարարը:

13. Թանկարժեք մետաղներից պատրաստված իրերն ու թանկարժեք քարերը գնահատվում են թանկարժեք մետաղների և թանկարժեք քարերի ազգային պահուստի արժեքների փորձաքննության փորձագիտական հանձնաժողովի կողմից` տվյալ պահին միջազգային շուկայում գործող գներին համապատասխան: Այդ գինն ընդունվում է որպես տվյալ պահին այդ իրի գին, և սահմանված կարգով կատարվում է հաշվառում:

Թանկարժեք մետաղների և թանկարժեք քարերի ազգային պահուստի արժեքների փորձաքննության փորձագիտական հանձնաժողովը պետք է կազմված լինի առնվազն 7 անդամից` ներգրավելով իրավասու պետական մարմինների, հիմնարկների և պետական ոչ առևտրային կազմակերպությունների մասնագետների:

Փորձագիտական հանձնաժողովի կազմը և աշխատակարգը հաստատում է Հայաստանի Հանրապետության ֆինանսների և էկոնոմիկայի նախարարը: Փորձագիտական հանձնաժողովի անդամներն իրենց պարտականությունները կատարում են հասարակական հիմունքներով:

(13-րդ կետը փոփ., լրաց. 13.05.10 N 531-Ն)

14. Իրերի հանձնումն ու ընդունումը կատարվում են գանձարանի կողմից` համաձայն հանձնման-ընդունման ակտի:

15. Իրի փորձաքննության մասին եզրակացությունն ստորագրվելուց հետո մեկ օրվա ընթացքում կազմվում է հանձնման-ընդունման ակտ` 3 օրինակից, որոնք ստորագրվում են հանձնող (ընդունող) կազմակերպության և գանձարանի կողմից: Հանձնման-ընդունման ակտի 2 օրինակը մնում է գանձարանում, իսկ մեկ օրինակը տրվում է իրերը հանձնող (ընդունող) անձին: Հանձնման-ընդունման ակտին կցվում է փորձաքննություն իրականացնող մարմնի կամ փորձագետի կողմից տրված եզրակացությունը, որը հաստատում է յուրաքանչյուր իրի իսկությունը:

16. Հանձնման-ընդունման փաստաթղթերում նյութական պատասխանատու անձի կողմից պետք է կատարվի նշում` «Բոլոր թանկարժեք մետաղները և թանկարժեք քարերը, ինչպես նաև թանկարժեք մետաղներից ու թանկարժեք քարերից պատրաստված իրերն ստուգված, պիտակավորված և կապարակնքված են փորձաքննություն իրականացնող մարմնի և գանձարանի կողմից, որոնք իմ կողմից ընդունվում են պատասխանատու պահպանության»: Նյութական պատասխանատու անձի ստորագրությունից հետո գանձարանի պետի կողմից ստեղծված հանձնաժողովի անդամներն իրենց ստորագրությամբ վավերացնում են նյութական պատասխանատու անձի կողմից իրերի ընդունումը, որից հետո գանձարանի պետն իր ստորագրությամբ հաստատում է իրերի ընդունման փաստը:

Նյութական պատասխանատու անձն ակտի մեկ օրինակը հանձնում է հաշվառման բաժին, մյուս օրինակը հաշվառման բաժնի պետի ստորագրությամբ վավերացվելուց հետո պահվում է իր մոտ:

Նյութական պատասխանատու անձ է համարվում գանձարանում իրերի պահպանության համար քաղաքացիական ծառայողի պաշտոնի անձնագրով պատասխանատու պաշտոնատար անձը, որի հետ կնքվում է լրիվ նյութական պատասխանատվության մասին պայմանագիր:

17. Իրերը հաշվառվում են ըստ մետաղների տեսակների, քարերի տեսակների, դրանց կշռի, քանակի, մետաղի դեպքում` հարգի, մաքուր և խառնուրդային (լիգատուրային) կշիռների, քարերի դեպքում` նաև ըստ որակական բնութագրերի: Իրերը հաշվառվում են նաև արժեքային արտահայտությամբ: Հաշվապահական սկզբնական փաստաթղթերը դրանց կազմվելուց հետո 5-օրյա ժամկետում ներկայացվում են Հայաստանի Հանրապետության ֆինանսների և էկոնոմիկայի նախարարության աշխատակազմի հաշվապահական հաշվառման ստորաբաժանում` Հայաստանի Հանրապետության ֆինանսների և էկոնոմիկայի նախարարության աշխատակազմի հաշվեկշռում արտացոլման համար:

18. Իրերի հանձնում-ընդունումը մի նյութական պատասխանատու անձից մյուսին կատարվում է դրանց պահպանման վայրում և ձևակերպվում հանձնման-ընդունման ակտով` գանձարանի պետի կողմից ստեղծված հանձնաժողովի մասնակցությամբ:

19. Պատասխանատու պահպանություն իրականացնող կազմակերպություններում իրերը պահպանվում են չհրկիզվող պահարաններում, մետաղյա արկղերում կամ համապատասխան պահուստներում, որոնք պետք է նյութական պատասխանատու անձի և գանձարանի պետի կողմից զմռսակնքված կամ կապարակնքված լինեն:

Չհրկիզվող պահարանները, մետաղյա արկղերը կամ համապատասխան պահուստները բացվում և փակվում են գանձարանի ներկայացուցչի ներկայությամբ:

Գանձարանում պահեստավորված իրերը պահպանվում են հատուկ պահոցներում, որոնք պետք է բավարարեն Հայաստանի Հանրապետության կենտրոնական բանկի խորհրդի 2005 թվականի ապրիլի 12-ի N 145-Ն որոշմամբ հաստատված` «Բանկերի և օտարերկրյա բանկերի մասնաճյուղերի գրանցումն ու լիցենզավորումը, բանկերի մասնաճյուղերի և ներկայացուցչությունների գրանցումը, բանկերի և օտարերկրյա բանկերի մասնաճյուղերի ղեկավարների որակավորումը և գրանցումը» N 1 կանոնակարգով նախատեսված` դրամապահոցին ներկայացվող պահանջները:

20. Պետական պահուստի և ազգային պահուստի արժեքները գույքագրվում են Հայաստանի Հանրապետության ֆինանսների և էկոնոմիկայի նախարարության կողմից սահմանված կարգով:

21. Պետական պահուստի և ազգային պահուստի արժեքները Հայաստանի Հանրապետության տարածքում մեկ վայրից մյուս վայր փոխադրվում են նյութական պատասխանատու անձի միջոցով` «Ինկասացիայի մասին» Հայաստանի Հանրապետության օրենքին համապատասխան:

Հայաստանի Հանրապետության տարածքից դուրս իրերը տեղափոխվում են հատուկ կապի միջոցով` դրանց պարտադիր ապահովագրմամբ:

22. Պետական պահուստի և ազգային պահուստի արժեքների տեղաբաշխումը դրանց պատասխանատու պահպանումն իրականացնող կազմակերպություններում կատարում է գանձարանը` Հայաստանի Հանրապետության ֆինանսների և էկոնոմիկայի նախարարի համաձայնությամբ:

23. Պատասխանատու պահպանման հանձնվող արժեքների անվանացանկը, ծավալը, քաշը, որակը, գինը, պահպանման ժամկետները և պատասխանատու պահպանման ծառայության դիմաց վճարման կարգը սահմանվում են պայմանագրով:

24. Պատասխանատու պահպանումն իրականացնող կազմակերպությունները`

1) իրավունք ունեն գանձարանից պահանջելու պատասխանատու պահպանման հանձնվող արժեքները բնութագրող փաստաթղթերի պատճենները.

2) իրավունք չունեն երրորդ անձի հետ ինքնուրույն կնքելու պատասխանատու պահպանման հանձնված արժեքների օտարման, փոխանակման կամ որևէ այլ գործարք.

3) պատասխանատվություն են կրում պատասխանատու պահպանման հանձնված արժեքների անձեռնմխելիության, դրանց քանակական և որակական պահպանության, հաշվառման և հաշվետվության կազմակերպման համար.

4) իրավունք ունեն ստանալու գանձարանի կողմից իրերին առնչվելու իրավունք ունեցող անձանց մասին տեղեկատվություն (անուն, ազգանուն, իրերի զննության կամ այլ գործողություն կատարելու իրավասությունը հավաստող` գանձարանի կողմից տրված լիազորագիր և համապատասխան պայմանագրով նախատեսված այլ տեղեկատվություն): Նշված անձանց ցանկը հաստատում է Հայաստանի Հանրապետության ֆինանսների և էկոնոմիկայի նախարարը.

5) ունեն թանկարժեք մետաղների և թանկարժեք քարերի բնագավառը կարգավորող օրենսդրությանը չհակասող համապատասխան պայմանագրերով կնքված այլ իրավունքներ ու պարտականություններ:

25. Պետական պահուստի իրերը, որոնք գտնվում են գանձարանում, պետության արտադրական, ֆինանսական, գիտական, մշակութային, ներդրումային և այլ կարիքները հոգալու համար կարող են օտարվել գանձարանի կողմից, իսկ «Մետաղափորձական պալատ» պետական ոչ առևտրային կազմակերպությունը` «Հրապարակային սակարկությունների մասին» Հայաստանի Հանրապետության օրենքին համապատասխան աճուրդների կազմակերպման միջոցով, եթե դա նախատեսված է այդ իրը կամ իրերն օտարելու վերաբերյալ Հայաստանի Հանրապետության կառավարության որոշմամբ:

26. Պետական պահուստի իրերը կարող են օգտագործվել պետության արտադրական, ֆինանսական, գիտական, մշակութային, ներդրումային և այլ կարիքները հոգալու համար` Հայաստանի Հանրապետության կառավարության որոշումներին համապատասխան:

Ազգային պահուստի արժեքները կարող են օգտագործվել միայն ցուցադրման կամ գիտական հետազոտությունների նպատակով` Հայաստանի Հանրապետության տարածքում կամ նրա տարածքից դուրս` Հայաստանի Հանրապետության կառավարության որոշմամբ:

(Հավելվածը փոփ., լրաց. 13.05.10 N 531-Ն, լրաց. 31.05.12 N 705-Ն)

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան