«Գրանցված է»

ՀՀ արդարադատության

նախարարության կողմից

23 փետրվարի 2015 թ.

Պետական գրանցման թիվ 10015061

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ 23 դեկտեմբերի 2014 թ. N 73-Ն ք. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԱՅԻՆ ԿԱՌԱՎԱՐՄԱՆ ԵՎ ԱՐՏԱԿԱՐԳ ԻՐԱՎԻՃԱԿՆԵՐԻ ՆԱԽԱՐԱՐ   2 փետրվարի 2015 թ. N 2-Ն ք. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐ   20 հունվարի 2015 թ. N 10-Ն ք. Երևան

Հ Ա Մ Ա Տ Ե Ղ  Հ Ր Ա Մ Ա Ն

ՎԱՐԺԱՆՔՆԵՐԻ ԻՐԱԿԱՆԱՑՄԱՆ ՎԵՐԱԲԵՐՅԱԼ ԶԵԿՈՒՅՑԻ ՁԵՎԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2011 թվականի դեկտեմբերի 29-ի N 1913-Ն որոշման N 2 հավելվածի 22-րդ կետի 3-րդ ենթակետի պահանջները, ինչպես նաև վարակիչ հիվանդությունների ուղղությամբ կազմակերպված և իրականացված վարժանքների փաստաթղթավորման նպատակով`

ՀՐԱՄԱՅՈՒՄ ԵՆՔ՝

Հաստատել` «Վարժանքների իրականացման վերաբերյալ զեկույցի ձևը»` համաձայն հավելվածի:

ՀՀ առողջապահության նախարար

ՀՀ տարածքային կառավարման և արտակարգ իրավիճակների նախարար

ՀՀ գյուղատնտեսության նախարար

Հավելված   Հաստատված է ՀՀ առողջապահության նախարարի 23 դեկտեմբերի 2014 թ. թիվ 73-Ն

ՀՀ տարածքային կառավարման և արտակարգ իրավիճակների նախարարի 2 փետրվարի 2015 թ. թիվ 2-Ն

ՀՀ գյուղատնտեսության նախարարի 20 հունվարի 2015 թ. թիվ 10-Ն համատեղ հրաման

Զ Ե Կ ՈՒ Յ Ց Ի   Ձ ԵՎ

ՎԱՐԺԱՆՔՆԵՐԻ ԻՐԱԿԱՆԱՑՄԱՆ ՎԵՐԱԲԵՐՅԱԼ

I. ԶԵԿՈՒՅՑԻ ՆՊԱՏԱԿԸ

1. Սույն զեկույցը ներկայացվում է քիմիական, ճառագայթային և կենսաբանական գործոններով պայմանավորված վնասվածքների, թունավորումների, հիվանդությունների, այդ թվում` վարակիչ և ախտաբանական վիճակների, անսովոր և անսպասելի դեպքերի, վարժանքների իրականացման վերաբերյալ:

2. Զեկույցի նպատակն է`

1) ներկայացնել տեղեկատվություն քիմիական, ճառագայթային և կենսաբանական գործոններով պայմանավորված վնասվածքների, թունավորումների, հիվանդությունների, այդ թվում` վարակիչ և ախտաբանական վիճակների, անսովոր և անսպասելի դեպքերի, վարժանքների իրականացման, դրա արդյունքների վերաբերյալ Հայաստանի Հանրապետության կառավարության 2009 թվականի հուլիսի 16-ի «Միջազգային առողջապահական (բժշկասանիտարական) կանոնների հարցերով ազգային համակարգող մարմին ճանաչելու և միջազգային առողջապահական (բժշկասանիտարական) կանոնների հարցերով ազգային համակարգող մարմնի լիազորությունները սահմանելու մասին» N 809-Ն որոշմամբ սահմանված Միջազգային Առողջապահական Կանոնների հարցերով Ազգային համակարգող մարմնին` Հայաստանի Հանրապետության առողջապահության նախարարությանը, շահագրգիռ կառույցներին, բուժկանխարգելիչ կազմակերպություններին,

2) բացահայտել երկրում առկա հանրային առողջապահության հիմնախնդիրները և իրականացնել կանխարգելման աշխատանքներ` հետագա բռնկումներից, համաճարակներից, ինչպես նաև առանձին հիվանդությունների հիվանդացության սեզոնային բարձրացումներից խուսափելու համար,

3) հետազոտության արդյունքները կիրառել օրենսդրական դաշտի և կրթական ծրագրերի բարելավման համար,

4) զարգացնել բռնկումների, համաճարակների, զանգվածային երևույթների բացահայտման կարողությունները,

5) առանձին հիվանդությունների համաճարակաբանական հսկողության համակարգերը զարգացնելու և կատարելագործելու համար,

6) շահագրգիռ կառույցեների միջև փոխտեղեկատվական մեխանիզմներն ապահովելու համար:

II. ԶԵԿՈՒՅՑԻ ԿԱՌՈՒՑՎԱԾՔԸ

3. Զեկույցն իր մեջ ներառում է հետևյալ հիմնական բաժինները`

1) Ներածություն, որը ներառում է`

ա. վարժանքի (կենսաբանական, քիմիական և ճառագայթային գործոններով պայմանավորված) տեսակի (թեմատիկ թե գործնական), թեմայի, ծավալների, վայրի մասին,

բ. վարժանքի մասնակիցների մասին,

գ. վարժանքի ընթացքում իրականացվող միջոցառումների մասին,

դ. վարժանքի ժամանակ ներկայացված խնդիրների, սցենարների, միջանկյալ խնդիրների մասին,

ե. վարժանքի առանձնահատկությունների (տվյալ հիվանդության, թունավորման, վթարի կամ ախտաբանական վիճակի, նախկինում արձանագրման, շարժի /բազմամյա/) մասին,

զ. վեր հանված բացերի մասին,

է. բացերի վերացման ուղղությամբ առաջարկությունների մասին,

ը. այլ ոլորտների աշխատանքների վրա ազդեցության մասին,

թ. զեկույցը ներկայացնող կազմակերպության վերաբերյալ տվյալներ (գերատեսչություն/կազմակերպություն, հեռախոսի համարներ, կապի հնարավոր միջոցներ և այլն):

2) Վարժանքների իրականացման ընթացք, ներառում է`

ա. վարժանքի սցենար,

բ. վարժանքի իրականացման ընթացքում միջանկյալ խնդիրների առկայություն և վերացում,

գ. վարժանքի ընթացքում առաջացած խոչընդոտներ,

դ. վարժանքի ընթացքում առաջացած բացառություններ, առանձնահատկություններ:

3) Վարժանքների արդյունքներ, ներառում է՝

ա. հաղորդման համապատասխանությունն իրականությանը,

բ. իրականացված միջոցառումների լիարժեքությունը, արդյունավետությունը,

գ. ակնկալվող արդյունքների հասանելիությունը,

դ. վարժանքի ակնկալվող և ստացված արդյունքների համապատասխանությունը:

4) Վարժանքների արդյունքների քննարկում/վերլուծություն, ներառում է`

ա. վարժանքի գնահատման վերլուծությունը (համակարգի թափանցիկությունը/պարզությունը, ճկունությունը, զգայունությունը, կանխատեսման դրական ցուցանիշը, պատեհաժամ լինելը),

բ. վարժանքի անհրաժեշտության հաստատումը,

գ. վարժանքի արդյունքների վերաբերյալ ստացված տվյալների վերլուծությունը:

5) Եզրակացություններ։

6) Առաջարկություններ։
      7) Քաղված դասեր: