ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

16 հունվարի 2012 թվականի N 12-Ա

ԳԻՏԱՏԵԽՆԻԿԱԿԱՆ ԽՈՐՀՈՒՐԴ ՍՏԵՂԾԵԼՈՒ ԵՎ ԳԻՏԱՏԵԽՆԻԿԱԿԱՆ ԽՈՐՀՐԴԻ ԱՇԽԱՏԱԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն Հայաստանի Հանրապետության Նախագահի 2007 թվականի հուլիսի 18-ի ՆՀ-174-Ն հրամանագրի 1-ին կետով սահմանված կարգի 121-րդ կետի 2-րդ ենթակետի`

1. Հայաստանի Հանրապետությունում բնածին և տեխնածին աղետների (սեյսմիկ, տեխնիկական և հրդեհային անվտանգություն, սողանք, փլուզումներ, պտտահողմեր, ձնահոսքեր, ջրհեղեղներ, քարահոսքեր և այլն) կանխարգելման նպատակով իրականացվող աշխատանքներին նպաստելու, տվյալ բնագավառի ավելի արդիականացման, գիտական նորարարության ներմուծման, նոր ծրագրերի մշակման հիմնարար չափանիշների ձևավորման, ինչպես նաև այդ բնագավառում ընդունվող իրավական ակտերի արդյունավետության բարձրացման նպատակով`

1) ստեղծել գիտատեխնիկական խորհուրդ և հաստատել դրա անհատական կազմը` համաձայն N 1 հավելվածի.

2) հաստատել գիտատեխնիկական խորհրդի աշխատակարգը` համաձայն N 2 հավելվածի:

Հայաստանի Հանրապետության վարչապետ	Տ. Սարգսյան
2012 թ. հունվարի 16 Երևան

Հավելված N 1 ՀՀ վարչապետի 2012 թ. հունվարի 16-ի N 12-Ա որոշման

Ա Ն Հ Ա Տ Ա Կ Ա Ն  Կ Ա Զ Մ

ԳԻՏԱՏԵԽՆԻԿԱԿԱՆ ԽՈՐՀՐԴԻ

Ա. Երիցյան	-	ՀՀ արտակարգ իրավիճակների նախարար, իրավաբանական գիտությունների դոկտոր, պրոֆեսոր (խորհրդի նախագահ)
Լ. Հախվերդյան	-	ՀՀ գիտությունների ազգային ակադեմիայի Գառնիի երկրաֆիզիկական դիտարանի վարիչ, երկրաբանական գիտությունների դոկտոր, պրոֆեսոր   (խորհրդի նախագահի տեղակալ, համաձայնությամբ)
Ռ. Գևորգյան	-	ԵՊՀ-ի երկրաքիմիայի ամբիոնի պրոֆեսոր, երկրաբանահանքաբանական գիտությունների դոկտոր, պրոֆեսոր (խորհրդի քարտուղար, համաձայնությամբ)
Լ. Աղալովյան	-	ՀՀ գիտությունների ազգային ակադեմիայի մեխանիկայի ինստիտուտի բաժնի վարիչ, ՀՀ գիտությունների ազգային ակադեմիայի ակադեմիկոս, ֆիզմաթ գիտությունների դոկտոր, պրոֆեսոր (համաձայնությամբ)
Ս. Գրիգորյան	-	ԵՊՀ-ի լաբորատորիայի վարիչ, ՀՀ գիտությունների ազգային ակադեմիայի ակադեմիկոս, երկրաբանահանքաբանական գիտությունների դոկտոր, պրոֆեսոր (համաձայնությամբ)
Ս. Հովհաննիսյան	-	ՀՀ գիտությունների ազգային ակադեմիայի երկրաֆիզիկայի և ինժեներային սեյսմաբանության ինստիտուտի տնօրեն, ՀՀ գիտությունների ազգային ակադեմիայի թղթակից անդամ, ֆիզմաթ գիտությունների դոկտոր, պրոֆեսոր (համաձայնությամբ)
Ս. Նազարեթյան	-	ՀՀ արտակարգ իրավիճակների նախարարության «Սեյսմիկ պաշտպանության հյուսիսային ծառայություն» ՊՈԱԿ-ի գործադիր տնօրեն, երկրաբանահանքաբանական գիտությունների դոկտոր, պրոֆեսոր
Ռ. Աթաբեկյան	-	ՀՀ արտակարգ իրավիճակների նախարարության «Սեյսմիկ պաշտպանության հյուսիսային ծառայություն» ՊՈԱԿ-ի Լոռու տարածքային կենտրոնի ղեկավար, տեխնիկական գիտությունների դոկտոր, պրոֆեսոր
Ս. Դարբինյան	-	Երևանի ճարտարապետաշինարարական պետական համալսարանի պրոֆեսոր, ֆիզմաթ գիտությունների դոկտոր, պրոֆեսոր (համաձայնությամբ)
Վ. Հակոբյան	-	ՀՀ գիտությունների ազգային ակադեմիայի մեխանիկայի ինստիտուտի տնօրեն, ֆիզմաթ գիտությունների դոկտոր, պրոֆեսոր (համաձայնությամբ)
Ռ. Մինասյան	-	ԵՊՀ-ի երկրաֆիզիկայի ամբիոնի վարիչ, երկրաբանահանքաբանական գիտությունների դոկտոր, պրոֆեսոր (համաձայնությամբ)
Գ. Փիրումյան	-	ԵՊՀ-ի էկոքիմիայի ամբիոնի վարիչ, տեխնիկական գիտությունների դոկտոր, պրոֆեսոր (համաձայնությամբ)
Ա. Դավթյան	-	ՀՀ գիտությունների ազգային ակադեմիայի Գառնիի երկրաֆիզիկական դիտարանի ավագ գիտաշխատող, ֆիզմաթ գիտությունների թեկնածու (համաձայնությամբ)
Է. Գյոդակյան	-	ՀՀ գիտությունների ազգային ակադեմիայի երկրաֆիզիկայի և սեյսմաբանության ինստիտուտի լաբորատորիայի վարիչ, ֆիզմաթ գիտությունների թեկնածու (համաձայնությամբ)
Վ. Սահակյան	-	ՀՀ գիտությունների ազգային ակադեմիայի ինֆորմատիկայի և ավտոմատացման պրոբլեմների ինստիտուտի տնօրեն, ֆիզմաթ գիտությունների թեկնածու, դոցենտ (համաձայնությամբ)
Հ. Հարությունյան	-	ՀՀ գիտությունների ազգային ակադեմիայի Բյուրականի աստղադիտարանի տնօրեն, ֆիզմաթ գիտությունների թեկնածու, դոցենտ (համաձայնությամբ)
Մ. Գրիգորյան	-	ԵՊՀ-ի աշխարհագրության և երկրաբանության ֆակուլտետի դեկան, երկրաբանական գիտությունների թեկնածու, դոցենտ (համաձայնությամբ)
Հ. Պետրոսյան	-	ՀՀ արտակարգ իրավիճակների նախարարության աշխատակազմի «Սեյսմիկ պաշտպանության ազգային ծառայություն» գործակալության պետ, երկրաբանական գիտությունների թեկնածու
Վ. Արզումանյան	-	ՀՀ արտակարգ իրավիճակների նախարարության աշխատակազմի «Սեյսմիկ պաշտպանության ազգային ծառայություն» գործակալության դիտացանցերի և տեղեկատվության վերլուծության բաժնի գլխավոր մասնագետ, տեխնիկական գիտությունների թեկնածու
Լ. Վարդանյան	-	ՀՀ արտակարգ իրավիճակների նախարարության «Հայաստանի հիդրոօդերևութաբանության և մոնիթորինգի պետական ծառայություն» ՊՈԱԿ-ի գործադիր տնօրեն, տեխնիկական գիտությունների թեկնածու
Ս. Թամոյան	-	ՀՀ արտակարգ իրավիճակների նախարարության «Ճգնաժամային կառավարման պետական ակադեմիա» ՊՈԱԿ-ի դոցենտ, գյուղատնտեսական գիտությունների թեկնածու

Հայաստանի Հանրապետության կառավարության աշխատակազմի ղեկավար

Դ. Սարգսյան

Հավելված N 2 ՀՀ վարչապետի 2012 թ. հունվարի 16-ի N 12-Ա որոշման

Ա Շ Խ Ա Տ Ա Կ Ա Ր Գ

ԳԻՏԱՏԵԽՆԻԿԱԿԱՆ ԽՈՐՀՐԴԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն աշխատակարգով կանոնակարգվում են գիտատեխնիկական խորհրդի (այսուհետ` խորհուրդ) աշխատանքների կազմակերպումն ու իրականացումը:

2. Խորհրդի գործունեության նպատակը Հայաստանի Հանրապետությունում բնածին և տեխնածին աղետների կանխարգելման նպատակով իրականացվող աշխատանքներին, տվյալ բնագավառի ավելի արդիականացմանը, գիտական նորարարության ներմուծմանը, նոր ծրագրերի մշակման հիմնարար չափանիշների ձևավորմանը, ինչպես նաև այդ բնագավառում ընդունվող իրավական ակտերի արդյունավետության բարձրացմանը նպաստելն է:

3. Խորհուրդն իր գործունեության ընթացքում ղեկավարվում է Հայաստանի Հանրապետության օրենսդրությամբ և սույն աշխատակարգով:

4. Խորհուրդը գործում է հասարակական հիմունքներով:

 II. ԽՈՐՀՐԴԻ ՁԵՎԱՎՈՐՈՒՄԸ ԵՎ ԳՈՐԾՈՒՆԵՈՒԹՅԱՆ ԿԱՐԳԸ

 5. Խորհրդի անհատական կազմը հաստատում է Հայաստանի Հանրապետության վարչապետը:

 6. Խորհուրդն իր աշխատանքներն իրականացնում է նիստերի միջոցով, որոնք գումարվում են առնվազն յուրաքանչյուր երեք ամիսը մեկ անգամ, ինչպես նաև արտահերթ նիստերի միջոցով` սույն աշխատակարգի 10-րդ կետին համապատասխան:

 7. Խորհրդի նիստերը հրավիրում և վարում է խորհրդի նախագահը:

 8. Խորհրդի նախագահի բացակայության դեպքում խորհրդի նիստը կարող է վարել խորհրդի անդամներից մեկը՝ խորհրդի նախագահի հանձնարարությամբ:

 9. Խորհրդի նիստն սկսվում է նիստի օրակարգի հաստատմամբ և նախորդ նիստում ընդունված որոշումների կատարման ընթացքի վերաբերյալ խորհրդի նախագահի զեկուցմամբ:

 10. Խորհուրդն իր արտահերթ նիստերը գումարում է խորհրդի նախագահի նախաձեռնությամբ կամ խորհրդի անդամների առնվազն մեկ երրորդի առաջարկությամբ:

 11. Խորհրդի նիստն իրավազոր է, եթե դրան մասնակցում է խորհրդի կազմի առնվազն երկու երրորդը:

 12. Խորհրդի որոշումներն ընդունվում են ձայների պարզ մեծամասնությամբ: Ձայների հավասարության դեպքում նիստը վարողի ձայնը վճռորոշ է:

 13. Խորհրդի այն անդամը, ով համաձայն չէ խորհրդի ընդունած որոշմանը, ներկայացնում է իր գրավոր հատուկ կարծիքը, որը կցվում է որոշմանը:

 14. Խորհրդի անդամները խորհրդի նիստի անցկացման վայրի, օրվա, ժամի և նիստի օրակարգի մասին տեղեկացվում են նիստի անցկացման օրվանից առնվազն 3 օր առաջ:

 15. Խորհրդի նիստերին կարող են մասնակցել հրավիրված պետական պաշտոնյաներ, փորձագետներ, զանգվածային լրատվության միջոցների և այլ շահագրգիռ կազմակերպությունների ներկայացուցիչներ:

III. ԽՈՐՀՐԴԻ ՆԱԽԱԳԱՀԸ ԵՎ ԱՆԴԱՄՆԵՐԸ

16. Խորհրդի նախագահը`

1) վարում է խորհրդի նիստերը.

2) ստորագրում է խորհրդի որոշումները և նիստերի արձանագրությունները, խորհրդի գործունեության հետ կապված մյուս փաստաթղթերն ու գրագրությունները.

3) իր բացակայության դեպքում խորհրդի անդամներից մեկին հանձնարարում է վարել խորհրդի նիստը.

4) խորհրդի հաստատմանն է ներկայացնում խորհրդի նիստի օրակարգը.

5) իրականացնում է վերահսկողություն խորհրդի ընդունած որոշումների կատարման նկատմամբ.

6) իրականացնում է սույն աշխատակարգով իրեն վերապահված այլ լիազորություններ:

17. Խորհրդի անդամն իրավունք ունի՝

1) խորհրդի նիստից առնվազն 5 օր առաջ ներկայացնելու գրավոր հարցեր` խորհրդի նիստի օրակարգում ընդգրկելու համար.

2) ներկայացնելու առաջարկություններ խորհրդի գործունեության, նիստի օրակարգում ընդգրկված հարցերի վերաբերյալ.

3) ծանոթանալու խորհրդի նիստերի արձանագրություններին:

18. Խորհրդի անդամը պարտավոր է՝

1) մասնակցել խորհրդի աշխատանքներին.

2) իրականացնել սույն աշխատակարգով իրեն վերապահված այլ լիազորություններ:

19. Խորհրդի անդամն իր պաշտոնից ազատվելու պահից կորցնում է անդամակցությունը խորհրդին: Նրա փոխարեն խորհրդին անդամակցում է նույն պաշտոնն ստանձնած անձը՝ բացառությամբ հասարակական հիմունքներով խորհրդի կազմում ընդգրկված ներկայացուցիչների:

IV. ԽՈՐՀՐԴԻ ՔԱՐՏՈՒՂԱՐՈՒԹՅՈՒՆԸ

20. Խորհրդի քարտուղարության գործառույթներն իրականացնում է Հայաստանի Հանրապետության արտակարգ իրավիճակների նախարարության աշխատակազմը:

21. Խորհրդի քարտուղարությունը խորհրդի բնականոն գործունեության ապահովմանն աջակցելու նպատակով՝

1) նախապատրաստում է նիստի օրակարգին վերաբերող համապատասխան նյութերն ու դրանք տրամադրում խորհրդի անդամներին.

2) կազմում է խորհրդի նիստերի արձանագրությունները.

3) ապահովում է խորհրդի նիստի որոշումների նախագծերի կազմումը.

4) վարում է խորհրդի աշխատանքների հետ կապված գործավարությունը.

5) գրանցում է խորհրդի անդամների ներկայացրած գրավոր հատուկ կարծիքները.

6) կազմակերպում է խորհրդի որոշումների տրամադրումը խորհրդի անդամներին և համապատասխան կազմակերպություններին:

Հայաստանի Հանրապետության կառավարության աշխատակազմի ղեկավար

Դ. Սարգսյան