ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

2 հունիսի 2011 թվականի N 855-Ն

«ՊԵՏԱԿԱՆ ԱՋԱԿՑՈՒԹՅՈՒՆ ՀԱՅԱՍՏԱՆԻ ԱԶԳԱՅԻՆ ՄՐՑՈՒՆԱԿՈՒԹՅԱՆ ՀԻՄՆԱԴՐԱՄԻ ԿԱՆՈՆԱԴՐԱԿԱՆ ԽՆԴԻՐՆԵՐԻ ԻՐԱԿԱՆԱՑՄԱՆԸ» 2011 ԹՎԱԿԱՆԻ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ

Համաձայն Հայաստանի Հանրապետության կառավարության 2010 թվականի դեկտեմբերի 23-ի N 1748-Ն որոշման 15-րդ կետի 4-րդ ենթակետի` Հայաստանի Հանրապետության կառավարությունը որոշում է.

1. Հաստատել`

1) «Պետական աջակցություն Հայաստանի ազգային մրցունակության հիմնադրամի կանոնադրական խնդիրների իրականացմանը» 2011 թվականի ծրագիրը` համաձայն N 1 հավելվածի.

2) Հայաստանի ազգային մրցունակության հիմնադրամի գործունեության իրականացման 2011 թվականի ծրագրի միջոցառումների ժամանակացույցը՝ համաձայն N 2 հավելվածի.

3) «Պետական աջակցություն Հայաստանի ազգային մրցունակության հիմնադրամի կանոնադրական խնդիրների իրականացմանը» 2011 թվականի ծրագրի ծախսերի նախահաշիվը` համաձայն N 3 հավելվածի:

 2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հավելված N 1  ՀՀ կառավարության 2011 թվականի հունիսի 2-ի N 855-Ն որոշման

2011  Թ Վ Ա Կ Ա Ն Ի  Ծ Ր Ա Գ Ի Ր

«ՊԵՏԱԿԱՆ ԱՋԱԿՑՈՒԹՅՈՒՆ ՀԱՅԱՍՏԱՆԻ ԱԶԳԱՅԻՆ ՄՐՑՈՒՆԱԿՈՒԹՅԱՆ

ՀԻՄՆԱԴՐԱՄԻ ԿԱՆՈՆԱԴՐԱԿԱՆ ԽՆԴԻՐՆԵՐԻ ԻՐԱԿԱՆԱՑՄԱՆԸ»

I. ՆԱԽԱԲԱՆ

1. Պետական աջակցություն Հայաստանի ազգային մրցունակության հիմնադրամի կանոնադրական խնդիրների իրականացման 2011 թվականի ծրագիրը, հանդիսանալով Հայաստանի ազգային մրցունակության հիմնադրամի (այսուհետ` հիմնադրամ) գործունեության իրականացման պետական աջակցության 2010 թվականի ծրագրի շարունակականության ապահովումը, մշակվել է` հիմք ընդունելով Հայաստանի Հանրապետության կառավարության ծրագրով որդեգրված քաղաքականությունն ու սահմանված ռազմավարական գերակայությունները, և ուղղված է Հայաստանում գերակա ծրագրերի մշակմանն ու մրցունակության բարձրացմանը:

2. Հայաստանի ազգային մրցունակության հիմնադրամի կողմից գերակա ընտրված զբոսաշրջության, առողջապահության և կրթության ոլորտների զարգացման տեսանկյունից կարևորվում են ներդրումային ակտիվության խթանումը, իրազեկվածության բարձրացումը, ենթակառուցվածքների գնահատումը, դրանց զարգացմանը խթանող միջոցառումների իրականացումը:

3. Հայաստանի ազգային մրցունակության հիմնադրամի գործունեության կազմակերպման և հետագա զարգացման արդյունավետության համար առաջարկվում է`

1) ակտիվացնել պետական կառավարման մարմինների աջակցությունը հիմնադրամի գործունեության ծավալման և հետագա զարգացման գործընթացում` միջազգային կապերի ընդլայնման նպատակով, պետական մարմինների կողմից իրականացվող/բարերարների կամ մասնավոր հատվածը ներկայացնող միջազգային գործարարների հետ հանդիպումների, համաժողովների և այլ միջոցառումների ժամանակ Հայաստանի ազգային մրցունակության հիմնադրամի ներկայացուցչին ներգրավելու և հիմնադրամի կողմից իրականացվող գործունեությունը ներկայացնելու միջոցով.

2) բարելավել Հայաստանի ազգային մրցունակության հիմնադրամի գործունեության իրականացման համար տրամադրվող աշխատանքային պայմանները:

4. Հայաստանի ազգային մրցունակության հիմնադրամի գործունեության իրականացման համար «Աջակցություն Հայաստանի ազգային մրցունակության հիմնադրամի կանոնադրական խնդիրների իրականացմանը» 2008, 2009, 2010 թվականների ծրագրով արդեն իսկ իրականացվել են մի շարք միջոցառումներ, մասնավորապես՝

1) ծրագրի ընդհանուր կառավարման համար ձևավորվել է թիմ, որի կազմում ներգրավվել են մասնագետներ ինչպես պետական հատվածից և այլ կազմակերպություններից, այնպես էլ` վճարովի խորհրդատուներ.

2) առողջապահության ծրագրի շրջանակներում 2010 թվականի միջուկային բժշկության ներդրման և ուռուցքաբանության գերազանցության կենտրոնի ստեղծման ուղղությամբ իրականացվեցին հիմնարար աշխատանքներ`

ա. Հայաստանի Հանրապետության կառավարությունը 2010 թվականի հոկտեմբերի 7-ին ընդունեց «Ուռուցքաբանության գերազանցության հայկական կենտրոն ստեղծելու ծրագրին հավանություն տալու, «Ռադիոիզոտոպների արտադրության կենտրոն» փակ բաժնետիրական ընկերություն ստեղծելու և Հայաստանի Հանրապետության կառավարության 2009 թվականի փետրվարի 19-ի N 310-Ն որոշման մեջ փոփոխություն կատարելու մասին» N 1424-Ն որոշումը,

բ. 2010 թվականի նոյեմբերի 8-ին Հայաստանի Հանրապետության կառավարությունում ստորագրվեցին բելգիական ՔեյԲիՍի բանկի և ԱյԲիԷյ ընկերության հետ համապատասխանաբար ցիկլոտրոն սարքի գնման վարկավորման ու այդ սարքի արտադրության պայմանագրերը,

գ. 2010 թվականի դեկտեմբերի 29-ին գրանցվեց «Ռադիոիզոտոպների արտադրության կենտրոն» փակ բաժնետիրական ընկերության կանոնադրությունը,

դ. նշվածի արդյունքում ձևավորվեցին միջուկային բժշկության և ուռուցքաբանության գերազանցության կենտրոնի կարևորագույն բաղադրիչներից հանդիսացող ռադիոիզոտոպների արտադրությունը կազմակերպելու իրավական ու ֆունկցիոնալ հիմքերը,

ե. ուռուցքաբանության գերազանցության հայկական կենտրոնին հողատարածք հատկացնելու նպատակով Հայաստանի Հանրապետության էկոնոմիկայի նախարարության կողմից մշակվել է «Հայաստանի Հանրապետության կառավարության 2010 թվականի հոկտեմբերի 7-ի N 1424-Ն որոշման մեջ փոփոխություն և լրացում կատարելու մասին» Հայաստանի Հանրապետության կառավարության որոշման նախագիծը,

զ. մշակվել է «Ռադիոիզոտոպների արտադրության կենտրոն» փակ բաժնետիրական ընկերությանը նախագծանախահաշվային աշխատանքների գնման նպատակով վարկ տրամադրելու մասին» Հայաստանի Հանրապետության կառավարության որոշման նախագիծը.

3) զբոսաշրջության ծրագրի շրջանակներում`

ա. Հայաստանի զբոսաշրջության զարգացման և խթանման ռազմավարության շրջանակներում Հայաստանի ազգային մրցունակության հիմնադրամը մշակել է զբոսաշրջության զարգացման միջանցքների հայեցակարգը, որը ներառում է Կենտրոնական, Սևանա լճի, Հյուսիսային և Հարավային առանցքները: Ներկայումս մշակվում են զբոսաշրջային արդյունքի զարգացման փաթեթներ և ներդրումային նախագծերի երկու առանցքները` Սևանա լճի տարածքի և Հարավային միջանցքի համար: Վերջինս ընդգրկում է Նորավանքը, Ջերմուկը և Տաթևի վանական համալիրը: Հայաստանի հարավային միջանցքի զբոսաշրջության զարգացման գլխավոր հատակագիծ ներկայացնելու նպատակով հիմնադրամը պայմանագիր է կնքել ամերիկյան հեղինակավոր «ԱԵԿՈՄ» ընկերության հետ: Հատակագիծը կներառի Վայոց ձորի և Սյունիքի մարզերը` ներկայացնելով մանրամասն վերլուծություններ և հետազոտություններ, յուրաքանչյուր քաղաքի և գյուղի համար` հատուկ մշակված ծրագիր և զարգացման ճիշտ ուղղություններ` հաշվի առնելով դրանց առանձնահատկություններն ու հնարավոր աճը: Հարավային առանցքի զբոսաշրջավայրերը զարգացնելու և խթանելու նպատակով հնարավոր կլինի զբոսաշրջիկների չորս ժամ տևող ուղևորությունը դեպի Հայաստանի հարավ վերածել չորսօրյա հետաքրքիր և բազմազան ճանապարհորդության,

բ. Մրցունակության հիմնադրամը նախաձեռնել է Հարավային առանցքի առաջնային ծրագրի իրագործում, որը կազմված է մի քանի բաղադրիչներից. համալիրի պահպանում, վանական կյանքի և գիտական ավանդույթների վերականգնում, համայնքային զբոսաշրջության զարգացումը հարակից վեց գյուղերում` ներառյալ իջևանատները, ինտերակտիվ թանգարաններ և զբոսաշրջության ենթակառուցվածքներ, աշխարհում ամենաերկար ճոպանուղին: Ծրագիրը ներառում է Տաթև, Հալիձոր, Տանձատափ, Սվարանց, Խոտ և Շինուհայր գյուղերը: Նախատեսվում է վերականգնել Տաթևի վանական համալիրը և շրջակա տարածքը, ինչպես նաև կառուցել հյուրանոց, զարգացնել ենթակառուցվածքները և մշակել զբոսաշրջային արդյունքի տեսակներ, ինչպիսիք են «խոհարարական զբոսաշրջության» և աշխարհի ամենաերկար հետադարձելի ճոպանուղին,

գ. 2010 թվականի հոկտեմբերի 16-ին Հայաստանի ազգային մրցունակության հիմնադրամը «ՏաԹևեր» ճոպանուղու շահագործմամբ ազդարարեց «Տաթևի վերածնունդ» ծրագրի մեկնարկը: Ճոպանուղին միացնում է Հալիձոր և Տաթև գյուղերը` ներկայանալով որպես տարածաշրջանի համար նոր զբոսաշրջային արդյունք: Ծրագրի շրջանակներում իրականացվել են մի շարք միջոցառումներ, այդ թվում` նաև «Այ-Բայ» առցանց նվիրատվությունների ծրագրի համար հանրային քարոզարշավի կազմակերպում, 18 տեղական լրատվամիջոցների և 28 միջազգային լրագրողների համար ճանաչողական այցի կազմակերպում դեպի Տաթև, մամլո ասուլիսների կազմակերպում, տեղեկատվական փաթեթների մշակում, Գինեսի համաշխարհային ռեկորդներում «ՏաԹևեր» ճոպանուղու գրանցում,

դ. վերականգնվել և շահագործման է հանձնվել Տաթևի վանական համալիրի ձեթի միջնադարյան արտադրամասը` Ձիթ-հանը, որն այցելուներին և զբոսաշրջիկներին ներկայացնում է հայկական միջնադարյան ձիթարտադրության տեխնոլոգիան,

ե. Տաթևի բացման ծրագրի շրջանակներում կատարվել է «Հայկական խոհանոցի վերածնունդ» ծրագրի մեկնարկը, որի նպատակն է վերականգնել և պահպանել հայկական խոհանոցային մշակույթը` ներգրավելով գյուղականը: Ծրագիրը հնարավորություն է տալիս զարգացնելու խոհանոցային նոր մշակույթ, որի շրջանակներում կարելի է առաջարկել յուրահատուկ զբոսաշրջային արդյունք մարզային, հանրապետական և միջազգային մակարդակներով,

զ. մշակվել է Ջերմուկում զբոսաշրջային վայրի կառավարման գրասենյակի հիմնման նախագիծը, ինչպես նաև մշակվել է ծրագրի ֆինանսավորումն ապահովելու համար անհրաժեշտ` Հայաստանի Հանրապետության կառավարության որոշման նախագիծը և որոշման հիմնավորումը,

է. հիմնադրամը 2010 թվականի ընթացքում կազմել է լուծարային գործընթացի միջոցառումների ծրագիր, որը հաջորդաբար ներառում է լուծարային գործընթացի գործողությունները, ժամանակացույցը և ընթացիկ վիճակը, այդ թվում` «Զբոսաշրջության զարգացման հայկական գործակալություն» փակ բաժնետիրական ընկերության լուծարման մասին հայտարարության պատրաստում և տպագրում, «Զբոսաշրջության զարգացման հայկական գործակալություն» փակ բաժնետիրական ընկերության նախկին աշխատողների հետ աշխատանքային պայմանագրերի կնքում, ընկերության ֆինանսատնտեսական իրավիճակի ուսումնասիրություն իրականացնելու նպատակով չորս անկախ փորձագիտական կազմակերպությունների առաջարկների ուսումնասիրում, «Զբոսաշրջության զարգացման հայկական գործակալություն» փակ բաժնետիրական ընկերության լուծարային միջանկյալ հաշվեկշռի կազմում և գույքագրում, կոմիսիոներների գույքի վերադարձի կազմակերպում, լուծարային գործընթացին անհրաժեշտ փաստաթղթերի պատրաստում,

ը. մշակվել է «Այցելուների տեղեկատվական կենտրոն» բիզնես-նախագծի երկու տարբերակ, համաձայն որի նոր կենտրոնը տեղակայված է լինելու կամ Հայաստանի պատմության թանգարանի առջևի սյունաշարի տարածքում կամ Հանրապետության հրապարակի շատրվանների մոտակայքում գտնվող կանաչապատ տարածքում: Նոր տեղեկատվական կենտրոնի նախագիծը կներկայացվի Հայաստանի Հանրապետության էկոնոմիկայի նախարարությանը 2011 թվականի առաջին եռամսյակում, որն էլ հաստատման դեպքում շահագործման կհանձնվի 2012 թվականի առաջին եռամսյակում.

4) 2010 թվականի ընթացքում Հայաստանի ազգային մրցունակության հիմնադրամը մշակեց Կրթության ծրագրի նախնական հայեցակարգը: Ծրագիրը կկենտրոնանա բարձրագույն կրթության ոլորտում համալսարանական հետազոտությունների գործառույթի հզորացման, ինչպես նաև համալսարանների ու գործարար համայնքի միջև կապի ամրապնդման վրա՝ հետազոտական գործունեության առևտրականացման միջոցով: Ծրագրի շրջանակներում կկառուցվի համագործակցություն մեկ կամ ավելի առաջատար համալսարանների ընտրված տեխնիկական ոլորտների ֆակուլտետների հետ՝ իրականացնելով մասնավոր-պետական գործընկերության վրա հիմնված ներդրումային ծրագիր, որի շնորհիվ համալսարանների համար կապահովվեն համատեղ ռեսուրսներ և դրամաշնորհներ, ինչպես նաև կստեղծվեն կապեր միջազգային գերազանցության կենտրոնների հետ.

5) սկսած 2009 թվականից` Հայաստանում մեկնարկել է ազգային լայնաշերտ հիմնացանցի ներդրման ուղղությամբ Տեխնոլոգիաների մրցունակության բարձրացման ծրագրի նախապատրաստման համար հայաստանյան հեռահաղորդակցության ոլորտի բազմակողմանի վերլուծության խորհրդատվական առաջադրանքը` համապատասխան իրականացնող ընկերության ընտրությունից հետո: Խորհրդատվական առաջադրանքի ընդհանուր արժեքն է 190.000 ԱՄՆ-ի դոլար: Ծրագրի իրականացման հիմնական կողմերից մեկն է հանդիսանալու մասնավոր հատվածի ներդրումների խթանման համար մեխանիզմի մշակումը` հանրային և մասնավոր հատվածների միջև գործընկերության կենսունակ մոդելի ստեղծման նպատակով: Այն կապահովի լայնաշերտ հեռահաղորդակցության ծառայությունների ծածկույթ և հասանելիություն Հայաստանի ամբողջ տարածքում` համապատասխան պահանջարկի դեպքում նպատակ ունենալով յուրաքանչյուր վերջնական սպառողին տրամադրել100 Մբիտ/վ մուտքի արագություն.

6) ֆոնդահայթայթման և իրազեկվածության բարձրացման շրջանակներում աշխատանքներ են իրականացվել հիմնադրամի և դրա գործունեության ոլորտների մասին տեղեկացվածության բարձրացման ուղղությամբ`

ա. 2009-2011 թվականների ընթացքում թողարկվել է երկու ինտերնետային կայք` www.cf.am և www.tatev.am, որոնք նպատակ ունեն տեղեկատվություն տարածելու հիմնադրամի հիմնական գործունեության և ոլորտների մասին, ինչպես նաև աջակցող գործունեություն իրականացնել ֆոնդահայթայթման և հիմնադրամի իմիջի ձևավորման առումով: Գործունեության ընթացքում Մրցունակության հիմնադրամը չորս անգամ իրականացրել է ճանաչողական այցեր տեղական լրատվամիջոցների համար դեպի Հայաստանի հարավ, ինչպես նաև մի շարք մամլո ասուլիսներ, միջոցառումներ` լրատվամիջոցների համար, պատրաստվել են տեղեկատվական փաթեթներ, իրականացվել են լրատվամիջոցների կոնտենտ վերլուծություն և այլն,

բ. 2010 թվականին մշակվեցին հատուկ նյութեր, և ստեղծվեցին հատուկ փաթեթներ պոտենցիալ ներդրողներին և բարերարներին «Տաթևի վերածնունդ» ծրագիրը ներկայացնելու և նրա իրականացման համար գումարներ հայթայթելու նպատակով: Արդյունքում` 2010 թվականի հոկտեմբերի 16-ին Տաթևի ճոպանուղու բացման արարողության շրջանակներում հավաքվեց 112.000 ԱՄՆ-ի դոլար: Ստեղծվեց պոտենցիալ ներդրողների և բարերարների մի խումբ, որը հնարավորություն է տալիս կոնկրետ մարդկանց դիմելու կոնկրետ ծրագրերի և դրանց բաղադրիչներին աջակցելու համար: «Տաթևի վերածնունդ» ծրագրի շրջանակներում ձևավորվեց ընդգրկուն միջոցների հայթայթման ծրագիր առաջիկա երեք տարիների համար,

գ. հիմնադրամի գործունեության ոլորտների շրջանակներում մշակվեցին կոնկրետ ծրագրային առաջարկներ, որոնք ներկայացնելու արդյունքում «Ջինիշն» հիմնադրամից ստացվեց 100.000 ԱՄՆ-ի դոլար տրամադրելու նախնական պայմանավորվածություն,

դ. Մրցունակության հիմնադրամի անձնակազմի կողմից ստեղծվեցին զբոսաշրջության, առողջապահության և ինովացիայի գծով աջակից խորհուրդների թեկնածուների ցուցակներ, որոնք ներառում են համապատասխան ոլորտների 10-15 ականավոր ներկայացուցիչների,

ե. 2010 թվականին մրցունակության հիմնադրամը ներկայացրեց իր գործունեությունը և հետագա ծրագրերը ԱՄՆ-ի մայրաքաղաք Վաշինգտոնի Ռից-Քարլտոն հյուրանոցում հավաքված հայկական համայնքի և այլ ազգերի ներկայացուցիչներից բաղկացած լսարանին: Ելույթներին հաջորդեցին հարցադրումների նստաշրջան և ընդունելություն, որոնք հնարավորություն ընձեռեցին քննարկելու Հայաստանի տնտեսության զարգացման հետ կապված բազմաթիվ հարցեր: 2010 թվականի հոկտեմբերի 7-ին տեղի ունեցավ նաև Մրցունակության հիմնադրամի գործադիր տնօրենի ելույթը Համաշխարհային բանկում` նվիրված սփյուռքի հետ համագործակցելու ռազմավարությանը և Մրցունակության հիմնադրամի կողմից ընտրված մոտեցումներին: Իրականացված միջոցառման արդյունքում Համաշխարհային բանկի նեկայացուցիչների կողմից բարձր գնահատվեցին Մրցունակության հիմնադրամի աշխատանքները: Նախատեսվում է կազմակերպել մի շարք նման միջոցառումներ Եվրոպայում և ԱՄՆ-ում: Սկսվել են աշխատանքներ Բրյուսելում, Մոսկվայում և ԱՄՆ-ի մի շարք քաղաքներում` ելույթների կազմակերպման ուղղությամբ,

զ. մշակվել է Ուռուցքաբանության գերազանցության տարածաշրջանային կենտրոնի` ներդրողների հետ հարաբերությունների կառավարման ծրագիր: Ծրագիրը հիմնված է ուսումնասիրությունների արդյունքում ընտրված ռազմավարության վրա և նկարագրում է ներդրողներ փնտրելու գործընթացը` չափորոշիչների մշակումից մինչև պայմանագրերի ստորագրումը: Փաստաթղթում ներկայացված են նաև ծրագրի բյուջեն, ժամկետները և հետագա քայլերը,

է. մշակվել է Մրցունակության հիմնադրամի հասարակայնության հետ կապերի համար նախատեսվող բրոշյուրի առաջին տարբերակը: Այն ներկայացնում է Հայաստանի զարգացման` Մրցունակության հիմնադրամի տեսլականը, ինչպես նաև կազմակերպության ընթացիկ և ապագա ծրագրերը: Աշխատանքներում ներգրավված է արտասահմանյան փորձագետ,

ը. իրականացվել է «ՄքՔինզի ընդ Քամփնի» խորհրդատվական ընկերության համաշխարհային տնօրենի այցը Հայաստան: Այցի շրջանակներում կազմակերպվեցին մի շարք միջոցառումներ, այդ թվում` նաև հանդիպում Հայաստանի առաջատար գործարարների և լրատվական միջոցների ներկայացուցիչների հետ:

II. ԾՐԱԳՐԻ ՄՇԱԿՄԱՆ ՀԻՄՔԵՐԸ

5. Ծրագրի մշակման և իրականացման հիմքը`

1) Հայաստանի Հանրապետության կառավարության 2008 թվականի փետրվարի 28-ի «Հայաստանի ազգային մրցունակության հիմնադրամ հիմնադրելու և գործադիր տնօրեն նշանակելու և Հայաստանի Հանրապետության առևտրի և տնտեսական զարգացման նախարարությանը գումար հատկացնելու մասին» N 204-Ա որոշում.

2) «Հիմնադրամների մասին» Հայաստանի Հանրապետության օրենք.

3) Հայաստանի Հանրապետության կառավարության 2009 թվականի հոկտեմբերի 8-ի «Զբոսաշրջության զարգացման հայկական գործակալություն» փակ բաժնետիրական ընկերությունը լուծարելու և Հայաստանի ազգային մրցունակության հիմնադրամին լիազորություններ վերապահելու մասին» N 1297-Ն որոշում.

4) Հայաստանի Հանրապետության կառավարության 2008 թվականի հոկտեմբերի 16-ի «Զբոսաշրջության զարգացման հայեցակարգից բխող 2008-2012 թվականների միջոցառումների ծրագիրը հաստատելու մասին» N 1322-Ն որոշում.

5) Հայաստանի Հանրապետության կառավարության 2009 թվականի փետրվարի 19-ի «Ա. Ի. Ալիխանյանի անվան ազգային գիտական լաբորատորիա» պետական ոչ առևտրային կազմակերպությունում «Ցիկլոն 18/18» իզոտոպների արտադրության համալիրի տեղադրման և Հայաստանի Հանրապետությունում միջուկային բժշկության կենտրոնի ստեղծմանն աջակցելու ծրագրին հավանություն տալու մասին» N 310-Ն որոշում.

6) Հայաստանի Հանրապետության կառավարության 2010 թվականի հոկտեմբերի 7-ի «Ուռուցքաբանության գերազանցության հայկական կենտրոն ստեղծելու ծրագրին հավանություն տալու, «Ռադիոիզոտոպների արտադրության կենտրոն» փակ բաժնետիրական ընկերություն ստեղծելու և Հայաստանի Հանրապետության կառավարության 2009 թվականի փետրվարի 19-ի N 310-Ն որոշման մեջ փոփոխություն կատարելու մասին» N 1424-Ն որոշում:

III. ԾՐԱԳՐԻ ՆՊԱՏԱԿՆԵՐԸ ԵՎ ԱԿՆԿԱԼՎՈՂ ԱՐԴՅՈՒՆՔՆԵՐԸ

6. Հայաստանի ազգային մրցունակության հիմնադրամի կանոնադրական խնդիրների իրականացմանն ուղղված պետական աջակցության ծրագրի հիմնական նպատակն է խթանել զարգացման համար թիրախային ընտրված ոլորտների զարգացումը և կայունացումը, խթանել ներդրումների հոսքը, իրագործել տվյալ ոլորտների զարգացման համար անհրաժեշտ միջոցառումները: Արդյունքում` ակնկալվում է Հայաստանի Հանրապետության տնտեսական զարգացմանը նպաստելը և վերջինիս բարեփոխումներին աջակցելը, ինչպես նաև որոշ ոլորտների մրցունակության բարձրացմանը խթանելը և Հայաստանի տնտեսության տարբեր ճյուղերը երկարաժամկետ մրցունակության առավելագույն աստիճանի հասցնելը:

7. Ծրագրի իրականացման արդյունքում ակնկալվում են`

1) պետական-մասնավոր համագործակցության խթանման և նախատեսվող միջոցառումների իրականացման միջոցով խթանել Հայաստանի տնտեսության զարգացումը.

2) գերակա ծրագրերի իրականացման միջոցով զարգացնել գերակա ընտրված ոլորտները և բարձրացնել գլոբալ մրցունակության աստիճանը.

3) բարձրացնել տեղական և միջազգային շուկայում Հայաստանում մրցունակության հիմնադրամի կողմից իրականացվող միջոցառումների վերաբերյալ իրազեկվածության աստիճանը:

IV. ԾՐԱԳՐԻ ԻՐԱԿԱՆԱՑՄԱՆ ՍԿԶԲՈՒՆՔԸ

8. Ծրագիրն իրականացվում է պետական և մասնավոր հատվածների սերտ համագործակցությամբ` որպես պետական աջակցություն հիմնադրամի կանոնադրական խնդիրների իրականացմանը:

V. ԾՐԱԳՐԱՅԻՆ ՄԻՋՈՑԱՌՈՒՄՆԵՐԻ ՀԱՄԱԿԱՐԳԸ

9. Հայաստանի ազգային մրցունակության հիմնադրամի գործունեության իրականացման համար նախատեսվում է իրականացնել մի շարք միջոցառումներ, մասնավորապես՝

1) հիմնադրամի գերակա ընտրված ոլորտներում ծրագրերի մշակում և իրագործում.

2) ներդրումների ներգրավման նպատակով նշված ծրագրերի իրականացման գործընթացում կառավարման գրասենյակի կողմից համապատասխան աշխատանքների իրականացում օտարերկրյա ներդրողների շրջանում.

3) հիմնադրամի գործունեության իրականացման համար սույն ծրագրի շրջանակներում նախատեսվում է ֆինանսավորում ծրագրի հետևյալ բաղադրիչին՝ հիմնադրամի գործունեության կառավարում: Այս միջոցառման շրջանակներում նախատեսվում է զարգացնել հիմնադրամի ձևավորված կառավարման գրասենյակը (գրասենյակի վարձակալություն, աշխատավարձեր և պահպանման ծախսեր):

VI. ԾՐԱԳՐԻ ՖԻՆԱՆՍԱԿԱՆ ԱՊԱՀՈՎՈՒՄԸ

10. Հայաստանի Հանրապետության 2011 թվականի պետական բյուջեով, որպես ծրագրի իրականացմանը պետական աջակցության կողմնորոշիչ չափաքանակ, սահմանվել է 264.000.00 հազ. դրամը:

11. «Պետական աջակցություն Հայաստանի ազգային մրցունակության հիմնադրամի կանոնադրական խնդիրների իրականացմանը» 2011 թվականի ծրագիրը կֆինանսավորվի Հայաստանի Հանրապետության պետական բյուջեից և Հայաստանի Հանրապետության օրենսդրությամբ չարգելված այլ միջոցների հաշվին:

Հայաստանի Հանրապետության կառավարության աշխատակազմի ղեկավար

Դ. Սարգսյան

Հավելված N 2  ՀՀ կառավարության 2011 թվականի հունիսի 2-ի N 855-Ն որոշման

Ժ Ա Մ Ա Ն Ա Կ Ա Ց ՈՒ Յ Ց

ՀԱՅԱՍՏԱՆԻ ԱԶԳԱՅԻՆ ՄՐՑՈՒՆԱԿՈՒԹՅԱՆ ՀԻՄՆԱԴՐԱՄԻ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆ 2011 ԹՎԱԿԱՆԻ ԾՐԱԳՐԻ ՄԻՋՈՑԱՌՈՒՄՆԵՐԻ

NN ը/կ	Միջոցառումը	Ակնկալվող արդյունքները	Կատարման ժամկետը
1.	Հայաստանի ազգային մրցունակության հիմնադրամի գործունեության կառավարում	Ծրագրերի արդյունավետ իրականացում	2011 թ. ընթացքում
2.	Զբոսաշրջության ծրագիր		2011 թ. ընթացքում
1)	Տաթևի Վերածնունդ ծրագիր	Տաթևի Վերածնունդ ծրագրի իրականացման համար անհրաժեշտ ֆինանսավորման ապահովում և ծրագրի իրականացում	2011 թ. ընթացքում
ա.	օրենսդրական փաթեթի/հենքի ստեղծում և հիմնադրամի, նվիրատուների, եկեղեցու ու կառավարության միջև ՏՎԾ-ի վերաբերյալ մտադրությունների նոր հուշագրի ստորագրում, ծրագրի ֆինանսավորման պարտավորությունների հստակեցում		2011 թ. 1 եռ.
բ.	ավարտին հասցնել ֆոնդահայթայթման պլանը և ապահովել այն իրականացնելու համար անհրաժեշտ բյուջե		2011 թ. 1 եռ.
գ.	ավարտել հիմնադրամի ներքո ՏՀԾ-ի նվիրյալ աշխատախմբի ձևավորումը և աշխատանքի ընդունել ծրագրի նոր ղեկավարի		2011 թ. 2 եռ.
դ.	զարգացնել և հաստատություններին, անհատներին ու հովանավորներին ներկայացնել ծրագրի ֆինանսավորման առաջարկներ: Ֆոնդահայթայթման նպատակով կազմակերպել երկու միջոցառում		2011 թ. ընթացքում
ե.	գումարել վերականգնման հարցերով աշխատանքային հանձնաժողովի նոր նիստ		2011 թ. 1 եռ.
զ.	հաստատել բյուջեն և ծախքերի գրաֆիկը		2011 թ. 1 եռ.
է.	ներգրավել «Պոլիտեկնիկո դե Միլանո» խմբին սկզբնական նախագծման փուլում և ընտրել պեղումներ կատարող պայմանագրային գործընկեր		2011 թ. 1 եռ.
ը.	ամփոփել սկզբնական նախագիծը, ստանալ եկեղեցու և մյուս շահառուների համաձայնությունը		2011 թ. 2 եռ.
թ.	անցկացնել ճարտարագիտական/երկրաբանական գնահատման փուլ		2011 թ. 2 եռ.
ժ.	կազմակերպել պեղումնային/արտափորման աշխատանքներ		2011 թ. 2-3 եռ. ընթացքում
ժա.	իրականացնել մանրակրկիտ նախագծման և վերականգնման աշխատանքներ` համապատասխան II փուլի աշխատանքային ծավալի		2011 թ. ընթացքում
ժբ.	եկեղեցուց ստանալ վանական կյանքի վերածննդի տեսլականի և նպատակների վերաբերյալ վերջնական դիրքորոշում		2011 թ. 1 եռ.
ժգ.	սեմինարիայի և Տաթևում վանական կյանքի վերածննդի կարիքների վերաբերյալ զեկույց կազմելու նպատակով ներգրավել խորհրդատու և ստանալ եկեղեցու համաձայնությունը		2011 թ. 2 եռ.
ժդ.	կազմել սեմինարիայի ճարտարապետական նախագիծը/պլանը և ընտրել համապատասխան տեղանք` որպես հիմք ֆոնդահայթայթման և շինարարության համար		2011 թ. 3 եռ.
ժե.	զարգացնել tatev.am կայքի II փուլը որպես ֆորում, և Տաթևի ու կրթաթոշակների վերաբերյալ տեղեկատվության հիմնական պահոց		2011 թ. 2/3 եռ. ընթացքում
ժզ.	իրականացնել tatev.am կայքի II փուլը		2011 թ. 3/4 եռ. ընթացքում
ժէ.	գործակցել այլ ֆինանսավորող հաստատությունների հետ` ապահովելու միկրովարկեր և (կամ) դրամաշնորհներ «իջևանատների» ծրագրի, հյուրատների և գյուղատների համար		2011 թ. 1 եռ.
ժը.	Տաթևում և շրջակայքում «իջևանատների» ու առնչվող ծրագրերի համար ստանալ ֆինանսավորում և ստեղծել բիզնես պլան		2011 թ. 1 եռ.
ժթ.	նախաձեռնել 10 իջևանատների ու դրան առնչվող հյուրընկալության ծառայությունների ծրագրեր		2011 թ. 2-4 եռ. ընթացքում
ի.	շրջակա գյուղերի համար մշակել սոցիալական ենթակառուցվածքի զարգացման` մինչև երեք նախագծային առաջարկ		2011 թ. 1-2 եռ. ընթացքում
իա.	գործակցել այլ ֆինանսավորող հաստատությունների հետ` ֆինանսավորելու սոցիալական ենթակառուցվածքի զարգացման նախագծերը		2011 թ. 2-4 եռ. ընթացքում
իբ.	կազմել համայնքային տեղեկացվածության գործողությունների ծրագիր և ներգրավել պայմանագրային կարգով գործընկեր այն իրականացնելու համար		2011 թ. 1 եռ.
իգ.	կանոնավոր կերպով իրականացնել ՏՎԾ-ի նախատեսված համայնքային միջոցառումները		2011 թ. 2-4 եռ.
իդ.	ավարտել/ամփոփել վանքի, քայլարշավների և խոհանոցի վերածննդի զբոսաշրջային արդյունքի ձևավորումը` տեղական և միջազգային զբոսաշրջային արդյունաբերության աջակցությամբ		2011 թ. 1 եռ.
իե.	իրականացնել և մեկնարկել երեք ծրագրերը` եկեղեցու, զբոսաշրջային օպերատորների և տեղական համայնքների հետ համագործակցելով		2011 թ. 2-4 եռ. ընթացքում
իզ.	հիմնվելով Զբոսաշրջության Հարավային միջանցքի շրջանակներում անցկացվող հետազոտության առաջարկությունների վրա` զարգացնել զբոսաշրջային 2 նոր ենթակառուցվածք` ներդնողներին ներկայացնելու նպատակով		2011 թ. 2-3 եռ. ընթացքում
իէ.	սկսել ներկայացնել նախագծերը պոտենցիալ ներդնողներին` նպատակ ունենալով նրանց ներգրավել նախնական բանակցություններում		2011 թ. 3-4 եռ. ընթացքում
իը.	Հայաստանի և Հարավային միջանցքի ենթատեքստում Տաթևը գովազդելու նպատակով կազմակերպել բարձրակարգ պրեզենտացիայի պատրաստում Բեռլինի միջազգային առևտրային ցուցահանդեսում ներկայացնելու նպատակով		2011 թ. 1 եռ.
իթ.	կատարելագործել պրեզենտացիան և եռամսյակը մեկ ներկայացնել առևտրային ցուցահանդեսներում		2011 թ. 2-4 եռ. ընթացքում
լ.	Տաթևի վերաբերյալ տեղեկացվածությունը բարձրացնելու և ավելի մեծ զբոսաշրջային հոսք ապահովելու նպատակով այնտեղ հրավիրել լրագրողների և զբոսաշրջային օպերատորների		2011 թ. 2-3 եռ. ընթացքում
2)	Զբոսաշրջության միջանցքի ստեղծում/զարգացում	Հարավային միջանցքի տարածաշրջանային ծրագիրը ներկայացնելը
ա.	վերանայել Զբոսաշրջության Հարավային միջանցքի նախաձեռնությունը (այսուհետ` նախաձեռնություն), ներկայացնել վերջնական նախագիծը
բ.	նախաձեռնության աշխատանքային խմբի ստեղծումը		2011 թ. 1 եռ.
գ.	խմբագրել և ամփոփել նախաձեռնություն ծրագիրը` հիմնվելով աշխատանքային խմբի և շահառուների առաջարկների վրա, ապահովել այն ներկայացնելը Հայաստանի Հանրապետության կառավարության հաստատմանը` որպես տարածաշրջանային ծրագիր		2011 թ. 2 եռ.
դ.	ներկայացված առաջարկությունների հիման վրա ապահովել նախաձեռնություն զարգացման մարմնի ստեղծումը		2011 թ. 2/3 եռ.
ե.	ամփոփել Սևանի բարձր լեռնային գոտում մարզաձևերի, վարժանքների ու զբոսաշրջային կենտրոնի բիզնես-պլանի կազմումը և ներառել այն ներդրումային նախագծերի փաթեթում		2011 թ. 1 եռ. ընթացքում
զ.	ձևավորել/կազմել և հիմնադրամի հոգաբարձուների խորհրդի հաստատմանը ներկայացնել կենտրոնական միջանցքի կամ Սևանի հանգույցի զբոսաշրջային շրջանի զարգացման առաջարկ		2011 թ. 3 եռ.
3)	Զբոսաշրջության խթանում	զբոսաշրջության խթանման նոր ռազմավարության մշակում և համապատասխան աշխատանքների իրականացում	2011 թ. 1 եռ.
ա.	Հայաստանի Հանրապետության էկոնոմիկայի նախարարության հետ զբոսաշրջության խթանման ծրագրի կատարման պայմանագրի կնքում		2011 թ. 1 եռ.
բ.	ստեղծել խթանման նոր ռազմավարություն, գովազդային նյութեր և մշակել տաղավարների նոր էսքիզներ: Մեծացնել զբոսաշրջային հոսքը դեպի հյուրանոցներ և արդյունաբերության այլ հարակից ճյուղեր		2011 թ. 1-2 եռ. ընթացքում
գ.	կազմակերպել Հայաստանի մասնակցությունը 4 միջազգային ցուցահանդեսների` ներառյալ Բեռլինում, Լոնդոնում և Փարիզում		2011 թ. ընթացքում
դ.	հիմնական զբոսաշրջային շուկաներում զանգվածային լրատվամիջոցներից և զբոսաշրջային կազմակերպութուններից հավաքել առաջարկների ստացում		2011 թ. 1-2 եռ. ընթացքում
ե.	հիմնական զբոսաշրջային շուկաներում զանգվածային լրատվամիջոցներից և զբոսաշրջային կազմակերպություններից հավաքել առաջարկներ		2011 թ.  1-2 եռ. ընթացքում
զ.	ամփոփել զբոսաշրջային նոր կայքի ստեղծման առաջարկը` կազմված զբոսաշրջության ոլորտում մասնագիտացված բարձրակարգ գործակալության կողմից		2011 թ. 2 եռ.
է.	ապահովել կայքի ստեղծման համար անհրաժեշտ ֆինանսավորում		2011 թ. 2/3 եռ. ընթացքում
ը.	կայքի փորձնական տարբերակի մեկնարկը		2011 թ. 4 եռ.
թ.	մշակել գինու տոնախմբության հայեցակարգ` համագործակցելով հետաքրքրված կազմակերպությունների հետ		2011 թ. 1 եռ.
ժ.	միջոցառումը համաձայնեցնել հիմնադրամի հոգաբարձուների խորհրդի և Հայաստանի Հանրապետության կառավարության հետ		2011 թ. 2 եռ.
ժա.	նախապատրաստել միջոցառումը և ապահովել ֆինանսավորումը		2011 թ. 2-4 եռ. ընթացքում
ժբ.	անցկացնել միջոցառումն աշնանը` համադրելով այն Արենիում անցկացվող գինու տարեկան փառատոնի ժամանակացույցին		2011 թ. 4 եռ.
4)	«Հարավային ուղղություն» զբոսաշրջային երթուղու հետ կապված խնդիրների լուծման միջոցառումների ծրագիր
ա.	Երևան-Մեղրի մայրուղուն հարող գինու, ավանդական ուտեստների, հուշանվերների և արհեստագործական արտադրանքի վաճառակետերի համար երեք միասնական նախագծերի և դրանց պատրաստման ու տեղադրման նախահաշիվների մշակում	տեղի պատմամշակութային ժառանգությանը, ճարտարապետական ու դիզայներական առանձնահատկություններին համահունչ երեք միասնական նախագծերի և դրանց պատրաստման ու տեղադրման նախահաշիվների տրամադրում տեղական կառավարման մարմիններին` համաձայնեցնելով Հայաստանի Հանրապետության վարչապետի 2008 թվականի նոյեմբերի 27-ի N 970-Ա որոշմամբ ստեղծված աշխատանքային խմբի հետ	2011թ. հուլիսի 1-ին տասնօրյակ
բ.	միասնական նախագծերի մշակման արդյունքում վաճառակետերի առաջին օրինակի կազմակերպում Արենի գյուղի մերձակայքում	Արենի գյուղի մերձակայքում կազմակերպված վաճառակետեր	2011 թ. դեկտեմբերի 1-ին տասնօրյակ
գ.	«Զորաց քարերը որպես զբոսաշրջային և պատմամշակութային վայր» հայեցակարգի մշակում	Զորաց քարերը որպես զբոսաշրջային և պատմամշակութային վայրի հայեցակարգային նպատակների և խնդիրների սահմանում	2011 թ. հուլիսի 3-րդ տասնօրյակ
դ.	Երևան-Մեղրի մայրուղու և Մեղրու սահմանային անցակետին հարակից մասում 1-ական զբոսաշրջային տեղեկատվական կենտրոնի ստեղծում և գործարկում: Տեղեկատվական կենտրոններում Հայաստանի զբոսաշրջային գրավչությունը ներկայացնող պարսկերենով գովազդատեղեկատվական նյութերի տարածում	Երևան-Մեղրի մայրուղու և Մեղրու սահմանային անցակետին հարակից մասում 1-ական զբոսաշրջային տեղեկատվական կենտրոնի առկայություն	2011 թ. նոյեմբերի 3-րդ տասնօրյակ
ե.	Իրանցի զբոսաշրջիկների համար Հայաստանի զբոսաշրջային գրավչությունը ներկայացնող պարսկերենով գովազդատեղեկատվական նյութերի պատրաստում և տպագրում	Հայաստանի զբոսաշրջային գրավչությունը ներկայացնող պարսկերենով գովազդատեղեկատվական նյութերի տպագրում և տարածում	2011 թ. հոկտեմբերի 3-րդ տասնօրյակ
5)	2011 թվականից սկսած` մեկ տարի տևողությամբ Հայաստան միջազգային այցելությունների վիճակագրական հետազոտության իրականացում	Հայաստան միջազգային այցելությունների վիճակագրական հետազոտություն	2011 թ. սեպտեմբերից սկսած
3.	Առողջապահության ծրագիր		2011 թ. ընթացքում
1)	Ռադիոիզոտոպների արտադրության կենտրոնի ծրագիր	ՌԱԿ-ի գործունեության ապահովում	2011 թ. ընթացքում
ա.	ստեղծել առևտրային նոր կառույց, կենտրոնը կառուցելու և գործարկելու նպատակով		2011 թ. ընթացքում
բ.	հայտարարել կենտրոնի շինության նախագծման մրցույթ		2011 թ. 1 եռ.
գ.	ապահովել կառավարության կողմից ֆինանսավորում` նախագծային և շինարարական փաստաթղթերն ու հիմնական վարչական ծախսերը հոգալու համար		2011 թ. 2 եռ.
դ.	ապահովել ռադիոիզոտոպների արտադրության կենտրոնի և ուռուցքաբանության գերազանցության հայկական կենտրոնի կառուցման համար անհրաժեշտ հողակտորի պետական հատկացումը		2011 թ. 2 եռ.
ե.	հայտարարել ռադիոիզոտոպների արտադրության կենտրոնի կառուցման մրցույթ		2011 թ. 2 եռ.
զ.	ստանալ կառավարության ֆինանսավորում ռադիոիզոտոպների արտադրության կենտրոնի շենքի կառուցման և հիմնական աշխատակազմի հավաքագրման համար		2011 թ. 3 եռ.
է.	սկսել ռադիոիզոտոպների արտադրության կենտրոնի շենքի կառուցումը		2011 թ. 3 եռ.
ը.	նախաձեռնել ռադիոիզոտոպների արտադրության կենտրոնի հիմնական աշխատակազմի հավաքագրում		2011 թ. 2 եռ.
թ.	հավաքագրել ռադիոիզոտոպների արտադրության կենտրոնի հիմնական աշխատակազմ		2011 թ. 4 եռ.
2)	Ուռուցքաբանության գերազանցության հայկական կենտրոն	ուռուցքաբանության գերազանցության հայկական կենտրոնի ստեղծման համար անհրաժեշտ ներդրումների ապահովում	2011 թ. 1 եռ.
ա.	հարաբերություններ հաստատել ներդրումային բանկի, Համահայկական բանկի կամ ներդրողների այլ կապուղիների հետ		2011 թ. 1 եռ.
բ.	հայտարարել կենտրոնի ճարտարապետական հայեցակարգի նախագծման միջազգային մրցույթ		2011 թ. 1 եռ.
գ.	ավարտել ծրագրի նախագիծը և փաստաթղթային փաթեթի կազմումը ներդրումային բանկի, Համահայկական բանկի կամ ներդրողների հետ կապի այլ մարմնի խորհրդատվությամբ		2011 թ. 2 եռ.
դ.	նվազագույնը 10 պոտենցիալ ներդրողի մասնակցությամբ նախաձեռնել բանակցությունների առաջին փուլը		2011 թ. 2 եռ.
ե.	ստեղծել ներդրողներ ներգրավելու համար անհրաժեշտ օրենսդրական փաթեթ		2011 թ. 3 եռ.
զ.	բանակցություններ սկսել նախնական փուլն անցած 2-3 ներդրողների հետ		2011 թ. 4 եռ.
է.	նախաձեռնել կենտրոնի ֆինանսական աջակցության համար պոտենցիալ աղբյուրների որոնում		2011 թ. 1 եռ.
ը.	ապահովել միջազգային դոնոր կազմակերպության, շահառուի կամ սփյուռքի կազմակերպության կողմից աջակցության խոստում		2011 թ. 4 եռ.
3)	Առողջապահական փաթեթի զարգացում	Հայաստանում սրտաբանության ոլորտի զարգացում	2011 թ. 1 եռ.
ա.	խորհրդատվություններ սկսել Հայաստանում և արտերկրում սրտաբանության ոլորտի խոշոր շահառուների հետ		2011 թ. 1 եռ.
բ.	զարգացնել 2 նախագծի հայեցակարգեր խորհրդի հանձնաժողովի և միջազգային խորհրդատուների հետ քննարկելու նպատակով		2011 թ. 2 եռ.
գ.	ստանալ խորհրդի և Հայաստանի Հանրապետության կառավարության համաձայնությունն ընտրված հայեցակարգի համար և ստեղծել հիմնադրույթներ ծրագրի իրագործելիության ուսումնասիրության համար		2011 թ. 3 եռ.
դ.	մրցակցային կարգով ընտրել ընկերություն` սրտաբանության հայեցակարգի ուսումնասիրություն անցկացնելու համար		2011 թ. 4 եռ.
ե.	Հայաստանում կազմակերպել համաժողով` նվիրված ուռուցքաբանությանը և սրտաբանությանը		2011 թ. 3 եռ.
զ.	կազմել մասնավոր ապահովագրության շուկայի վերլուծության հիմնադրույթներ և անցկացնել իրագործելիության ուսումնասիրություն		2011 թ. 3 եռ.
է.	վերհանել շուկայի վերլուծության և իրագործելիության ուսումնասիրության ֆինանսավորման պոտենցիալ աղբյուրներ		2011 թ. 4 եռ.
4.	Կրթության ծրագիր	իրագործելիության ուսումնասիրության հիման վրա կրթական ծրագրի մշակում և ֆինանսավորման ապահովում	2011 թ. ընթացքում
ա.	ամփոփել կրթական ծրագրի հայեցակարգը, ստեղծել հիմնադրույթները զարգացման ծրագրի/իրագործելիության ուսումնասիրության համար		2011 թ. 1 եռ.
բ.	մրցակցային կարգով ընտրել ընկերություն` իրականացնելու համար կրթական ծրագրի զարգացման պլանը/իրագործելիության ուսումնասիրությունը		2011 թ. 2 եռ.
գ.	ապահովել ֆինանսավորում և նախաձեռնել կրթական ծրագրի իրագործելիության ուսումնասիրությունը/զարգացման պլանը		2011 թ. 3/4 եռ.
դ.	աշխատանքի ընդունել կրթական ծրագրի ղեկավարի		2011 թ. 2 եռ.
ե.	աշխատանքի ընդունել կրթական ծրագրի լրացուցիչ աշխատողի		2011 թ. 3 եռ.
զ.	սկսել ակտիվ երկխոսություն տեղական և միջազգային կազմակերպությունների հետ 2012 թվականին ծրագրի մեկնարկի ֆինանսավորումն ապահովելու համար		2011 թ. 2 եռ.
5.	Զանգվածային լրատվամիջոցների և հասարակության հետ կապեր	զանգվածային լրատվամիջոցների միջոցով Հայաստանի ազգային մրցունակության հիմնադրամի ծրագրերի վերաբերյալ իրազեկվածության մակարդակի բարձրացում	2011 թ. ընթացքում
ա.	հիմնադրամի հասարակության հետ կապերի բաժնի առաջնորդությամբ Հայաստանում հաճախակի կազմակերպել մամուլի ասուլիսներ և միջոցառումներ, ավելացնել արտերկրում զանգվածային լրատվամիջոցներով տպագրությունները` համատեղելով դրանք գովազդային, աջակցող/խթանող և այլ այցերի հետ		2011 թ. 1-4 եռ. ընթացքում
բ.	(տես վերևում, խթանման այցերին առնչվող գործողությունները)		2011 թ. ընթացքում
գ.	կապել ուռուցքաբանության գերազանցության հայկական կենտրոնի ճարտարապետական մրցույթի, գինու տոնախմբության կամ միջազգային առևտրային ցուցահանդեսներին մասնակցության միջոցառումները` լրատվամիջոցներով լուսաբանման ծածկույթն ավելացնելու նպատակով		2011 թ. 2-4. ընթացքում
դ.	նշանակել կայքում ներկայություն ապահովող և սոցիալական մեդիայի մասնագետ-ստաժորի` սոցիալական ցանցերում գործունեության առավելագույն արդյունավետության նպատակով		2011 թ. 1-2 եռ. ընթացքում
ե.	կայքի բովանդակության մեջ փաստագրել հիմնադրամի գործունեությունը և ստեղծել կապատողեր կայքերի միջև (օրինակ` ներառել մարդկանց խմբերի վերհանում Ֆեյսբուքի միջոցով ուռուցքաբանության գերազանցության հայկական կենտրոնի ճարտարապետական մրցույթի ընտրական գործընթացում)		2011 թ. ընթացքում
6.	ՖՈՆԴԱՀԱՅԹԱՅԹՈՒՄ, ՀԱՍԱՐԱԿՈՒԹՅԱՆ ԵՎ ՆԵՐԴՐՈՂՆԵՐԻ ՀԵՏ ԿԱՊԵՐ	Հայաստանի ազգային մրցունակության հիմնադրամի ծրագրերի վերաբերյալ իրազեկվածության մակարդակի բարձրացում և պոտենցիալ ներդրողների և նվիրատուների հետ կապերի հաստատում	2011 թ. ընթացքում
ա.	հարաբերություններ հաստատել ներդրումային բանկի, համահայկական բանկի կամ այլ ներդրողների կապուղիների հետ		2011 թ. 1 եռ.
բ.	մասնակցել ներդրումային կոնֆերանսների և ապահովել հիմնադրամի նախագծերի ներկայացումը և գործադիր տնօրենի ներգրավումը պետական ու միջազգային ներդրողների հետ հանդիպումներում		2011 թ. 1-4 եռ.
գ.	ստանալ առաջարկներ ֆոնդահայթայթման խորհրդատվական գործակալությունից և ձեռք բերել խորհրդի համաձայնությունը նրանց ներգրավման վերաբերյալ		2011 թ. 2 եռ.
դ.	(տես Տաթևի Վերածնունդ ծրագրի, Հարավային միջանցքի, Ուռուցքաբանության գերազանցության հայկական կենտրոնի և նոր կրթական նախագծի շրջանակներում ստեղծված ներդրումային և ֆոնդահայթայթման թիրախները)		2011 թ. ընթացքում
ե.	կազմակերպել ծրագրի աջակցության այցելություններ/ միջոցառումներ նվազագույնը սփյուռքի 4 համայնքներւմ և գործադիր տնօրենի հանդիպումները հեղինակավոր անձանց հետ` ներառյալ, բայց ոչ սահմանափակված խորհրդի անդամների ներկայացրած անհատների հետ հանդիպումներ		2011 թ. ընթացքում
զ.	ամփոփել զբոսաշրջության, կրթության և առողջապահության ոլորտում աշխատանքային հանձնաժողովի թեկնածուների ներգրավման գործընթացը		2011 թ. 1 եռ.
է.	կապ հաստատել բոլոր ներգրավված թեկնածուների հետ և հանդիպել նրանց` փոխադարձ համապատասխանությունը գնահատելու և նրանց համաձայնությունն ստանալու համար. հնարավորության դեպքում ներգրավել խորհրդի անդամի` կապ հաստատելու և հանդիպմանը մասնակցելու նպատակով		2011 թ. 1-3 եռ. ընթացքում
ը.	ստեղծել ստանդարտ տեղեկատվական փաթեթ բոլոր թեկնածուներին ներկայացնելու «հրավերային» փուլում (տես հաջորդ գործողությունը)		2011 թ. 1 եռ.-2 եռ. ընթացքում
թ.	խնդրել, որ ՀՀ վարչապետը, որպես հիմնադրամի հոգաբարձուների խորհրդի նախագահ, պաշտոնական հրավեր ուղարկի նախնական համաձայնություն տված աշխատանքային խորհրդի անդամներին		2011 թ. 2-3 եռ. ընթացքում
ժ.	անցկացնել նվազագույնը երկու աշխատանքային խորհուրդների առաջին հանդիպումը և հրավիրել անդամներին մասնակցելու հիմնադրամի առնվազն մեկ խորհրդի նիստի		2011 թ. 3-4 եռ. ընթացքում
7.	ՈՒՆԱԿՈՒԹՅՈՒՆՆԵՐԻ ԶԱՐԳԱՑՈՒՄ ԵՎ ԽՈՐՀՐԴԻ ՀԵՏ ՀԱՐԱԲԵՐՈՒԹՅՈՒՆՆԵՐ	Հայաստանի ազգային մրցունակության հիմնադրամի աշխատանքների առավել արդյունավետ կազմակերպում և ռեսուրսների օպտիմալ օգտագործում	2011 թ. ընթացքում
ա.	ուղղորդել անձնակազմին և հաստատել ծրագրերով ֆինանսավորվող և հիմնադրամի հիմնական բյուջեով ֆինանսավորվող աշխատակազմի հստակ տարանջատում		2011 թ. 1-2 եռ. ընթացքում
բ.	ապահովել ծրագերի ղեկավարների ակտիվ մասնակցությունը հանձնաժողովների նիստերին/հեռահաղորդակցային հադիպումներին, ինչպես նաև, կախված օրակարգից` խորհրդի նիստերին		2011 թ. 2-4 եռ. ընթացքում
գ.	համալրել անձնակազմը` աշխատանքի ընդունելով տնօրենի առաջին տեղակալի		2011 թ. 2/3 եռ. ընթացքում
դ.	համալրել անձնակազմը` աշխատանքի ընդունելով կրթական ծրագրերի տնօրենի		2011 թ. 2/3 եռ. ընթացքում
ե.	պատրաստել, ներկայացնել ամենամսյա, եռամսյակային ֆինանսական զեկույցներ` ի լրումն կարևոր զարգացումների վերաբերյալ ներկայացվող հաճախակի թարմացվող տեղեկատվությանը		2011 թ. 1-4 եռ. ընթացքում
զ.	խորհրդի հանձնաժողովներին ընձեռել ավելի ակտիվ դեր և պատասխանատվություն նիստերի միջև և դրանց ընթացքում		2011 թ. ընթացքում

Հայաստանի Հանրապետության կառավարության աշխատակազմի ղեկավար

Դ. Սարգսյան

Հավելված N 3  ՀՀ կառավարության 2011 թվականի հունիսի 2-ի N 855-Ն որոշման

Ն Ա Խ Ա Հ Ա Շ Ի Վ

«ՊԵՏԱԿԱՆ ԱՋԱԿՑՈՒԹՅՈՒՆ ՀԱՅԱՍՏԱՆԻ ԱԶԳԱՅԻՆ ՄՐՑՈՒՆԱԿՈՒԹՅԱՆ ՀԻՄՆԱԴՐԱՄԻ ԿԱՆՈՆԱԴՐԱԿԱՆ ԽՆԴԻՐՆԵՐԻ ԻՐԱԿԱՆԱՑՄԱՆԸ» 2011 ԹՎԱԿԱՆԻ ԾՐԱԳՐԻ ԾԱԽՍԵՐԻ

NN ը/կ	ԾԱԽՍԵՐԻ ԱՆՎԱՆՈՒՄՆԵՐԸ	Քա-նակը	Շահա-ռուների թիվը	Միավորի գինը	ՀՀ պետական բյուջեից հատկացվելիք գումարները (հազ. դրամ)
1.	ՀԻՄՆԱԿԱՆ ԳՐԱՍԵՆՅԱԿ				120 616.8
1.1.	Աշխատավարձ և հավասարեցված վճարներ	12	12	786.75	113 293
1.2.	Պարտադիր սոցիալական ապահովագրության վճարներ	12	12	50.86	7 324
2.	ԶԲՈՍԱՇՐՋՈՒԹՅՈՒՆ				87 609
2.1.	ԾՐԱԳՐԱՅԻՆ ԳՐԱՍԵՆՅԱԿ				60 409
2.1.1.	Աշխատավարձ և հավասարեցված վճարներ	12	5	401.26	24 076
2.1.2.	Պարտադիր սոցիալական ապահովագրության վճարներ	12	5	32.58	1 955
2.1.3.	Զբոսաշրջության հարավային միջանցքի ծրագրի մշակում	7	1	4,911.14	34 377.97
2.2.	ՏԱԹԵՎԻ ՎԵՐԱԾՆՈՒՆԴ ԾՐԱԳԻՐ				20 888
2.2.1.	Աշխատավարձ և հավասարեցված վճարներ	12	4	401.40	19 267
2.2.2.	Պարտադիր սոցիալական ապահովագրության վճարներ	12	4	33.78	1 621
2.3.	ԶԲՈՍԱՇՐՋՈՒԹՅԱՆ ԽԹԱՆՄԱՆ ԾՐԱԳՐԵՐԻ				6 312
2.3.1.	Աշխատավարձ և հավասարեցված վճարներ	12	4	117.03	5 617
2.3.2.	Պարտադիր սոցիալական ապահովագրության վճարներ	12	4	14.47	694
3.	ԱՌՈՂՋԱՊԱՀՈՒԹՅՈՒՆ				23 704
3.1.1.	Աշխատավարձ և հավասարեցված վճարներ	12	4	461.60	22 156.7
3.1.2.	Պարտադիր սոցիալական ապահովագրության վճարներ	12	4	32.24	1 547.5
4.	ԿՐԹՈՒԹՅՈՒՆ				9 408
4.1.	Աշխատավարձ և հավասարեցված վճարներ	7	1	1,266.67	8 867
4.2.	Պարտադիր սոցիալական ապահովագրության վճարներ	7	1	77.33	541
5.	Հասարակայնության և ԶԼՄ-ների հետ կապեր				9 946
5.1.	Աշխատավարձ և հավասարեցված վճարներ	10	2	464.28	9 286
5.2.	Պարտադիր սոցիալական ապահովագրության վճարներ	10	2	33.01	660
6.	Ֆոնդահայթայթում և աշխատանքային հանձնաժողովներ				12 717
6.1.	Աշխատավարձ և հավասարեցված վճարներ	12	2	495.18	11 884
6.2.	Պարտադիր սոցիալական ապահովագրության վճարներ	12	2	34.68	832
	Ընդամենը				264 000

Հայաստանի Հանրապետության կառավարության աշխատակազմի ղեկավար

Դ. Սարգսյան