Հ Ա Մ Ա Ձ Ա Յ Ն Ա Գ Ի Ր

Հասարակության թվային զարգացման ոլորտում ԱՊՀ մասնակից պետությունների տեղեկատվական փոխգործակցության մասին

Անկախ Պետությունների Համագործակցության անդամ պետությունների կառավարությունները, այսուհետ՝ Կողմեր,

հաշվի առնելով ՄԱԿ-ի Գլխավոր ասամբլեայի կողմից 2015 թվականի դեկտեմբերի 16-ին ընդունված՝ «Տեղեկատվական հասարակության հարցերով բարձր մակարդակի համաշխարհային հանդիպման որոշումների իրականացման ընթացքի ընդհանուր ամփոփմանը նվիրված՝ Գլխավոր ասամբլեայի բարձր մակարդակի խորհրդակցության ամփոփիչ փաստաթուղթ» A/Res/70/125 բանաձևը,

օժանդակելով հասարակության թվային զարգացման, թվային տնտեսության համար բարենպաստ պայմանների ձևավորմանը,

ընդունելով ԱՊՀ տարածքում տեղեկատվական հաղորդակցական տեխնոլոգիաների արդյունավետ օգտագործման համար թվային զարգացման կարևորությունը,

հավանություն տալով ԱՊՀ մասնակից պետությունների միջև «թվային անհավասարությունը» կրճատելու անհրաժեշտությանը,

համաձայնեցին հետևյալի մասին.

Հոդված 1

Սույն համաձայնագրի առարկան պետական քաղաքականության մշակման նպատակով Կողմերի տեղեկատվական փոխգործակցության կազմակերպման և ԱՊՀ տարածքում հասարակության թվային զարգացման, թվային տնտեսության ոլորտում նորմատիվ իրավական կարգավորման համաձայնեցված մոտեցումների սահմանումն է:

Հոդված 2

Կողմերը հասարակության թվային զարգացման ոլորտում տեղեկատվական փոխգործակցությունը սահմանում են որպես սոցիալ-տնտեսական ոլորտի գործունեության արդյունավետության բարձրացման, տարածաշրջանային տեղեկատվական տիրույթի ձևավորման փոխշահավետ պայմանների ստեղծման կարևոր բաղկացուցիչներից մեկը։

Հոդված 3

Կողմերը որպես տեղեկատվական փոխգործակցության հիմնական ուղղություններ են սահմանում հետևյալ ոլորտներում իրականացվող գործունեությունը՝

նորմատիվ իրավական կարգավորման մասով փորձի փոխանակում.

տարածաշրջանային թվային տիրույթի զարգացում և տեղեկատվական անվտանգություն.

թվային տնտեսության շուկաների և ճյուղերի զարգացում.

տեղեկատվական ենթակառուցվածքի համատեղ զարգացում.

կրթություն, հետազոտական կարողությունների ձևավորում, կադրերի պատրաստում և վերապատրաստում.

տեղեկատվական հաղորդակցական տեխնոլոգիաների և գիտական համագործակցության զարգացման ապահովմանն ուղղված փոխգործակցություն.

հետազոտական գործունեության աջակցման համակարգերի ստեղծում, որոնք տեխնոլոգիական անկախություն են ապահովում մրցունակ թվային տեխնոլոգիաների ուղղություններից յուրաքանչյուրի մասով.

«Էլեկտրոնային կառավարություն» համակարգի զարգացում.

տեղեկատվական հաղորդակցական տեխնոլոգիաների հասանելիության ապահովում՝ սույն համաձայնագրի մասնակից պետությունների օրենսդրությանը համապատասխան.

թվային անջրպետի նվազեցման ապահովում.

թվային հմտությունների և թվային հարթակների ներդրման աշխատանքների մասով փորձի փոխանակում։

Հոդված 4

Կողմերի լիազորված (իրավասու) մարմինների միջև տեղեկատվական փոխգործակցությունն իրականացվում է սույն համաձայնագրի մասնակից պետությունների ազգային օրենսդրության, ինչպես նաև միջազգային պայմանագրերի պահպանմամբ։

Սույն համաձայնագրի գործողությունը չի տարածվում այն տեղեկատվության փոխանակման վրա, որը ենթակա է պաշտպանության՝ սույն համաձայնագրի մասնակից պետությունների օրենսդրության համաձայն։

Հոդված 5

Կողմերը, սույն համաձայնագրին համապատասխան, փոխգործակցություն են իրականացնում հասարակության թվային զարգացման և թվային տնտեսության ոլորտում պետական քաղաքականություն մշակելու և իրականացնելու համար պատասխանատու լիազորված (իրավասու) մարմինների միջոցով՝ պահպանելով սույն համաձայնագրի մասնակից պետությունների օրենսդրությունը և միջազգային պայմանագրերը։

Կողմերը սահմանում են իրենց լիազորված (իրավասու) մարմինների ցանկը և դրա մասին ավանդապահին տեղեկացնում են սույն համաձայնագիրն ուժի մեջ մտնելու համար անհրաժեշտ ներպետական ընթացակարգերի կատարման մասին ծանուցումը հանձնելու ժամանակ։ Կողմերից յուրաքանչյուրը լիազորված (իրավասու) մարմինների ցանկի փոփոխման մասին ավանդապահին ծանուցում է այդպիսի որոշում ընդունելու օրվանից մեկ ամսվա ընթացքում։

Հոդված 6

Կողմերի լիազորված (իրավասու) մարմինները փոխգործակցությունն իրականացնում են սույն համաձայնագրի 3-րդ հոդվածով նախատեսված ոլորտներում խորհրդակցությունների, բանակցությունների, փորձագիտական խորհրդատվության, ինչպես նաև տեղեկատվության փոխանակման միջոցով։

Հոդված 7

Սույն համաձայնագրի դրույթների իրագործման մասով Կողմերի փոխգործակցության համակարգողը Կապի տարածաշրջանային համագործակցությունն է։

Հոդված 8

Սույն համաձայնագրի իրագործման համար Կողմերի կողմից անցկացվող միջոցառումների ֆինանսավորումն իրականացվում է շահագրգիռ նախարարությունների և գերատեսչությունների կողմից այն միջոցների շրջանակներում, որոնք յուրաքանչյուր տարի սույն համաձայնագրի մասնակից պետությունների բյուջեներով նախատեսվում են իրենց գործառույթների ապահովման համար, ինչպես նաև արտաբյուջետային աղբյուրների հաշվին՝ ԱՊՀ մասնակից պետությունների օրենսդրությամբ սահմանված կարգով։

Հոդված 9

Կողմերի համաձայնությամբ սույն համաձայնագրում կարող են կատարվել դրա անբաժանելի մասը կազմող փոփոխություններ, որոնք ձևակերպվում են համապատասխան արձանագրությամբ։

Հոդված 10

Սույն համաձայնագրի կիրառման և մեկնաբանման ժամանակ Կողմերի միջև ծագող վիճելի հարցերը կարգավորվում են շահագրգիռ Կողմերի միջև խորհրդակցությունների և բանակցությունների միջոցով։

Հոդված 11

Սույն համաձայնագիրն ուժի մեջ է մտնում այն ստորագրած Կողմերի կողմից համաձայնագիրն ուժի մեջ մտնելու համար անհրաժեշտ ներպետական ընթացակարգերի կատարման մասին երրորդ ծանուցումն ավանդապահի կողմից ստանալու օրվանից 30 օրը լրանալուց հետո։

Ներպետական ընթացակարգերն ավելի ուշ կատարած Կողմերի համար սույն համաձայնագիրն ուժի մեջ է մտնում համապատասխան փաստաթղթերն ավանդապահի կողմից ստանալու օրվանից 30 օրը լրանալուց հետո։

Հոդված 12

Ուժի մեջ մտնելուց հետո սույն համաձայնագիրը բաց է ԱՊՀ մասնակից ցանկացած պետության կողմից դրան միանալու համար՝ միանալու մասին փաստաթուղթն ավանդապահին փոխանցելու միջոցով։

Միացող պետության համար սույն համաձայնագիրն ուժի մեջ է մտնում միանալու մասին փաստաթուղթն ավանդապահի կողմից ստանալու օրվանից 30 օրը լրանալուց հետո։

Հոդված 13

Սույն համաձայնագիրը կնքվում է անորոշ ժամկետով։ Յուրաքանչյուր Կողմ իրավունք ունի դուրս գալու սույն համաձայնագրից՝ իր այդպիսի մտադրության մասին գրավոր ծանուցում ուղարկելով ավանդապահին ոչ ուշ, քան դուրս գալուց վեց ամիս առաջ։

Կատարված է 2020 թվականի նոյեմբերի 6-ին, մեկ բնօրինակից՝ ռուսերենով։ Բնօրինակը պահվում է Անկախ Պետությունների Համագործակցության գործադիր կոմիտեում, որը սույն համաձայնագիրն ստորագրած յուրաքանչյուր պետություն կուղարկի դրա հաստատված պատճենը։

ՎԵՐԱՊԱՀՈՒՄ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«Հասարակության թվային զարգացման ոլորտում ԱՊՀ մասնակից պետությունների տեղեկատվական փոխգործակցության մասին» 2020 թվականի նոյեմբերի 6-ի համաձայնագրի

 Հայաստանի Հանրապետությունը հաստատում է սույն Համաձայնագիրը՝ պայմանով, որ Հայաստանի Հանրապետությունն իրեն իրավունք է վերապահում առանձին որոշում կայացնել «Հասարակության թվային զարգացման ոլորտում ԱՊՀ մասնակից պետությունների տեղեկատվական փոխգործակցության մասին» համաձայնագրի դրույթների տարածման վերաբերյալ այն պետությունների նկատմամբ, որոնք կմիանան սույն Համաձայնագրին 2020 թվականի նոյեմբերի 6-ից հետո: