Հ Ա Մ Ա Ձ Ա Յ Ն Ա Գ Ի Ր

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍՊՈՐՏԻ ԵՎ ԵՐԻՏԱՍԱՐԴՈՒԹՅԱՆ ՀԱՐՑԵՐԻ ՆԱԽԱՐԱՐՈՒԹՅԱՆ ԵՎ ԼԻՏՎԱՅԻ ՀԱՆՐԱՊԵՏՈՒԹՅԱՆ ՆԵՐՔԻՆ ԳՈՐԾԵՐԻ ՆԱԽԱՐԱՐՈՒԹՅԱՆ ՄԻՋԵՎ՝ ՖԻԶԻԿԱԿԱՆ ԿՐԹՈՒԹՅԱՆ ԵՎ ՍՊՈՐՏԻ ԲՆԱԳԱՎԱՌՆԵՐՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության սպորտի և երիտասարդության հարցերի նախարարությունը և Լիտվայի Հանրապետության ներքին գործերի նախարարությունը, այսուհետև՝ Կողմեր,

ցանկություն ունենալով պահպանելու և ամրապնդելու փոխադարձ համերաշխության և համագործակցության ոգին,

ձգտելով ամրապնդել ու զարգացնել ֆիզիկական կրթության և սպորտի բնագավառներում համագործակցությունը, նպաստել ֆիզիկապես և հոգեպես առողջ հասարակության կրթությանը և խրախուսել ֆիզիկական գործունեությունն ու ամրապնդել տարբեր մարզական կազմակերպությունների միջև համագործակցությունը,

համոզված լինելով, որ համագործակցությունը ֆիզիկական կրթության և սպորտի բնագավառներում կնպաստի Կողմերի միջև բարեկամությանը և փոխըմբռնմանը,

ընդունելով, որ սպորտը պետք է նպաստի հասարակության առողջությանը, բարոյական և ֆիզիկական կրթությանը,

գործելով Օլիմպիական խարտիայի սահմանած սկզբունքների և Եվրոպայի խորհրդի Նախարարների կոմիտեի խորհրդատվության (N R (92) 13 REV) համաձայն, որը հայտնի է նաև որպես Եվրոպական մարզական խարտիա,

համաձայն 1985 թվականի օգոստոսի 19-ին Ստրասբուրգում ընդունված՝ «Մարզական միջոցառումների, մասնավորապես ֆուտբոլային խաղերի ժամանակ հանդիսատեսի կողմից ցուցաբերված անկարգությունների մասին» կոնվենցիայի, 2005 թվականի հոկտեմբերի 19-ին Փարիզում ընդունված՝ «Սպորտում դոպինգի դեմ պայքարի մասին» միջազգային կոնվենցիայի, Եվրոպայի խորհրդի նախարարների պատվիրակների կողմից 2014 թվականի հուլիսի 9-ին հաստատված և սույն Համաձայնագրի Կողմերի կողմից 2014 թվականի սեպտեմբերի 18-ին Մագլինգենում ստորագրված՝ Եվրոպայի խորհրդի «Մարզական մրցումների շահարկման մասին» կոնվենցիայի,

համաձայնեցին հետևյալի մասին.

Հոդված 1

Սկզբունքները և համագործակցության բնագավառները

1. Կողմերը համաձայնեցին համագործակցել ֆիզիկական կրթության և սպորտի բնագավառներում սույն Համաձայնագրի հիման վրա՝ իրենց պետությունների օրենսդրությանը և միջազգային իրավունքի հանրաճանաչ սկզբունքներին և նորմերին համապատասխան:

2. Կողմերի միջև համագործակցությունը կընդգրկի փորձի փոխանակումը՝ հետևյալ բնագավառներում.

– ինստիտուցիոնալ համագործակցություն,

– սպորտային գիտություն և տեխնոլոգիաներ,

– սպորտային բժշկություն,

– հակադոպինգ և մարզական մրցումների շահարկում,

– մարզական հովանավորչություն և կառավարում,

– մարզական կառույցների պլանավորում և շինարարություն,

– մարզական միջոցառումների կազմակերպում՝ կենտրոնանալով, մասնավորապես, հասարակական կարգի և անվտանգության վրա,

– մարզաձևերի զարգացում,

– սպորտի մասնագետների և վարչական աշխատողների որակավորման բարձրացում,

– աջակցություն հաշմանդամային սպորտին և դրա զարգացմանը,

– ֆիզիկական գործունեության խթանում և բոլորի համար սպորտի զարգացում՝ մասնավորապես կենտրոնանալով ֆիզիկական

 ակտիվության և երեխաների ու երիտասարդների համար սպորտի վրա,

– կրթություն և սոցիալական ներգրավվածություն սպորտի միջոցով,

– ֆիզիկական կրթությանը և սպորտին առնչվող այլ բնագավառներ:

Հոդված 2

Կողմերի պարտավորությունները

1. Նպատակ ունենալով համագործակցել 1-ի հոդվածի 2-րդ կետում նշված բնագավառներում՝ Կողմերը համաձայնեցին.

– փոխանակել տեղեկություն և կարծիքներ, ինչպես նաև՝ հաջողված փորձը,

– փոխանակել սեմինարների, համաժողովների և այլ հանդիպումների

 վերաբերյալ տեղեկություն,

– փոխանակել ֆիզիկական կրթության և սպորտի մասին օրենսդրության մշակման վերաբերյալ փորձը,

– խրախուսել երկու երկրների ազգային մարզական ֆեդերացիաներին՝

 հաստատելու անմիջական հարաբերություններ և ամրապնդելու փոխադարձ համագործակցությունը,

– համագործակցել ֆիզիկական կրթության և սպորտի բնագավառներում այլ գործունեություն իրականացնելիս:

2. Սույն Համաձայնագրի շրջանակներում Կողմերն իրենց հնարավորության սահմաններում փոխադարձ ուսուցանման և փորձառության նպատակով կփոխանակեն մասնագետների, փորձագետների և այլ անձանց, կմասնակցեն Կողմերի պետություններում կազմակերպված դասընթացներին, սեմինարներին, գիտաժողովներին, համաժողովներին և այլ միջոցառումների:

3. Կողմերը նաև կաջակցեն իրենց մարզիկների մասնակցությանը մարզական մրցումներին և/կամ Հայաստանի Հանրապետությունում և Լիտվայի Հանրապետությունում կազմակերպված մարզումներին:

Հոդված 3

Պատասխանատու մարմիններ

1. Սույն Համաձայնագրի դրույթների կիրարկման համար պատասխանատու կլինեն հետևյալ մարմինները.

ա) Հայաստանի Հանրապետությունում՝

 - Սպորտի և երիտասարդության հարցերի նախարարություն

 Աբովյան 9, 0001, Երևան

 Հեռ.՝ (+374 11) 528601

Ֆաքս՝ (+374 11) 526529

Էլ. փոստ՝ msy@msy.am

բ) Լիտվայի Հանրապետությունում՝

- Ներքին գործերի նախարարություն

 Շվյանտարագիս փող. 2, LT-01510, Վիլնյուս

Հեռ.՝ (8 5) 271 71 30

Ֆաքս՝ (8 5) 271 85 51

Էլ. փոստ՝ bendrasisd@vrm.lt

- Լիտվայի Հանրապետության Կառավարությանն առընթեր ֆիզիկական կրթության և սպորտի վարչություն

 Ժյամայտե փող. 6, LT-03117, Վիլնյուս

Հեռ.՝ (8 5) 233 53 53

Ֆաքս՝ (8 5) 213 32 21

Էլ. փոստ՝ kksd@kksd.lt

 2. Յուրաքանչյուր Կողմ պետք է մյուս Կողմին գրավոր և փոստի կամ ֆաքսի միջոցով ծանուցի պատասխանատու մարմինների կամ նրանց անունների կամ գործառույթների ցանկացած փոփոխության մասին ոչ ուշ քան այդ փոփոխություններից առնվազն յոթ (7) օրվա ընթացքում:

Հոդված 4

Ծախսերը

Կողմերը համաձայնության կգան սույն Համաձայնագրի կիրարկումից բխող ծախսերի վերաբերյալ ամեն առանձին դեպքի համար:

Հոդված 5

Վեճերի կարգավորում

 Սույն Համաձայնագրի մեկնաբանման և կիրարկման ընթացքում ծագած ցանկացած տարաձայնություն կամ վեճ կլուծվի Կողմերի միջև՝ խորհրդակցությունների և բանակցությունների միջոցով:

Հոդված 6

Եզրափակիչ դրույթներ

1. Սույն Համաձայնագիրն ուժի մեջ է մտնում ուժի մեջ մտնելու համար անհրաժեշտ ներքին ընթացակարգերի կատարման մասին վերջին գրավոր ծանուցումը դիվանագիտական ուղիներով ստանալու օրվանից:

2. Սույն Համաձայնագրում փոփոխություններ և լրացումներ կարող են կատարվել փոխադարձ համաձայնությամբ։ Այդ փոփոխությունները և լրացումները կկազմեն սույն Համաձայնագրի անբաժանելի մասը և ուժի մեջ կմտնեն սույն հոդվածի դրույթների համաձայն:

3. Սույն Համաձայնագիրը կարող է դադարել Կողմերից մեկի գրավոր ծանուցմամբ: Համաձայնագիրը կդադարի դադարեցման մասին ծանուցագիրն ստանալու օրվանից 90 (իննսուն) օր հետո, սակայն ծանուցման պահին իրականացվող ծրագրերը չեն դադարեցվի:

Կատարված է Երևանում 2017 թվականի հոկտեմբերի 4-ին՝ հայերեն, լիտվերեն և անգլերեն. բոլոր տեքստերն էլ հավասարազոր են: Մեկնաբանման ժամանակ ցանկացած տարաձայնության դեպքում նախապատվությունը կտրվի անգլերեն տարբերակին: