«Գրանցված է»

ՀՀ արդարադատության

նախարարության կողմից

13 օգոստոսի 2010 թ.

Պետական գրանցման թիվ 05010309

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

20 հուլիսի 2010 թ.

թիվ 163-Ն

Ո Ր Ո Շ ՈՒ Մ

2010-2011 ԹՎԱԿԱՆՆԵՐԻ ՀՈՒՇԱԴՐԱՄՆԵՐԻ ԹՈՂԱՐԿՄԱՆ ԾՐԱԳՐՈՎ ՆԱԽԱՏԵՍՎԱԾ ՀՈՒՇԱԴՐԱՄՆԵՐԸ ՇՐՋԱՆԱՌՈՒԹՅԱՆ ՄԵՋ ԴՆԵԼՈՒ ԵՎ ԴՐԱՆՑ ՆԿԱՐԱԳՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «է» կետը՝ Հայաստանի Հանրապետության կենտրոնական բանկի խորհուրդը որոշում է.

1. 2010 թվականի օգոստոսի 30-ից շրջանառության մեջ դնել «Ֆուտբոլի արքաները» հուշադրամների շարքից «Մարիո Կեմպես» արծաթե հուշադրամը:

2. 2010 թվականի սեպտեմբերի 27-ից շրջանառության մեջ դնել «Աշխարհի նկարիչները» հուշադրամների շարքից «Թեոդոր Աքսենտովիչ» արծաթե հուշադրամը:

3. Հաստատել սույն որոշման 1-ին և 2-րդ կետերով սահմանված հուշադրամների նկարագրությունը, որը հուշադրամների ուրվագծերի հետ մեկտեղ ներկայացված է Հավելվածում (կցվում է):

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀՀ կենտրոնական բանկի նախագահ	Ա. Ջավադյան
2010 թ. հուլիսի 22 ք. Երևան

Ն Կ Ա Ր Ա Գ Ր ՈՒ Թ Յ ՈՒ Ն

1. «Մարիո Կեմպես» հուշադրամի նկարագրությունը

Հայաստանի Հանրապետության կենտրոնական բանկը «Ֆուտբոլի արքաները» միջազգային դրամագիտական ծրագրի շրջանակում թողարկել է 100 դրամ անվանական արժեքով «Մարիո Կեմպես» արծաթե հուշադրամը:

Հուշադրամի դիմերեսի վերևի կիսաշրջանում պատկերված է KINGS OF FOOTBALL մակագրությամբ եզրապատված արքայի թագ, որը պահպանվում է երկու առյուծների կողմից, իսկ ներքևի կիսաշրջանում` ֆուտբոլի գնդակ և հուշադրամի անվանական արժեքը` «100 ԴՐԱՄ»: Դիմերեսի եզրաշուրթով տեղադրված են «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» և «REPՍBLIC OF ARMENIA» մակագրությունները: Անվանական արժեքի և «REPՍBLIC OF ARMENIA» մակագրության միջև ՀՀ զինանշանն է և հուշադրամի թողարկման տարեթիվը «2010»:

Հուշադրամի դարձերեսին Արգենտինայի ազգային դրոշի գույների ֆոնի վրա, որը ֆուտբոլի գնդակի հետ միասին ստեղծում է գիսաստղի պատկեր, տեղադրված է Մարիո Կեմպեսի լուսանկարը: Լուսանկարի ներքևի մասում Մարիո Կեմպեսի ստորագրությունն է, իսկ վերևի մասում` «MARIO KEMPES» գրառումը:

Հուշադրամը` թափանցիկ պատիճով և իսկության հավաստագրով, տեղադրված է տուփի մեջ:

Հուշադրամի ուրվագծերի հեղինակն է Ռոբերտ Կոտովիչը:

Հուշադրամը հատվել է Լեհաստանի դրամահատարանում:

Հուշադրամի բնութագիրը

Անվանական արժեքը	100 դրամ
Մետաղը և հարգը	արծաթ, 9250 ± 50
Զանգվածը	28,28 ± 0,25 գ
Տրամագիծը	38,61 + 0,15 մմ
Ձևը	կլոր
Որակը	պրուֆ` տամպոտպագրությամբ
Դրամաշուրթը	հարթ
Տպաքանակը	մինչև 20000 հատ

1.1 «Մարիո Կեմպես» հուշադրամի դիմերեսի և դարձերեսի ուրվագծերը

2. «Թեոդոր Աքսենտովիչ» հուշադրամի նկարագրությունը

Հայաստանի Հանրապետության կենտրոնական բանկը «Աշխարհի նկարիչները» միջազգային դրամագիտական ծրագրի շրջանակում թողարկել է 100 դրամ անվանական արժեքով «Թեոդոր Աքսենտովիչ» արծաթե հուշադրամը:

Հուշադրամի դիմերեսի վերևի հատվածում «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ», իսկ ձախ հատվածում` «REPՍBLIC OF ARMENIA» մակագրություններն են: ՀՀ զինանշանն ու հուշադրամի թողարկման տարեթիվը` «2010», աջ կողմում են, իսկ ներքևում հուշադրամի անվանական արժեքն է` «DRAM 100 ԴՐԱՄ»: Կենտրոնում պատկերված է կնոջ դիմանկար:

Հուշադրամի դարձերեսին Աքսենտովիչի դիմանկարն է և նրա կտավից մի հատված` Աքսենտովիչի ստորագրությամբ: Վերևի և ներքևի հատվածներում «TEODOR AXENTOWICZ» մակագրությունն է և նրա ծննդյան և մահվան տարեթվերը:

Հուշադրամը` թափանցիկ պատիճով և իսկության հավաստագրով, տեղադրված է տուփի մեջ:

Հուշադրամի ուրվագծերի հեղինակն է Ուրսուլա Վալեժակը:

Հուշադրամը հատվել է Լեհաստանի դրամահատարանում:

Հուշադրամի բնութագիրը

Անվանական արժեքը	100 դրամ
Մետաղը և հարգը	արծաթ, 9250 ± 50
Զանգվածը	28,28 ± 0,25 գ
Չափերը	40,0 x 28,0 մմ
Ձևը	ուղղանկյուն
Որակը	պրուֆ` տամպոտպագրությամբ
Դրամաշուրթը	հարթ
Տպաքանակը	մինչև 4000 հատ

2.1 «Թեոդոր Աքսենտովիչ» հուշադրամի դիմերեսի և դարձերեսի ուրվագծերը