ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
8 հուլիսի 2010 թվականի N 856-Ա
«ԵՐԵՎԱՆԻ ՊԵՏԱԿԱՆ ՀԱՄԱԼՍԱՐԱՆԻ ՇՐՋԱՆԱՎԱՐՏՆԵՐԻ ՄԻԱՎՈՐՈՒՄ» ՀԱՍԱՐԱԿԱԿԱՆ ԿԱԶՄԱԿԵՐՊՈՒԹՅԱՆԸ ԳՈՒՅՔ ՆՎԻՐԱԲԵՐԵԼՈՒ ՄԱՍԻՆ
Համաձայն Հայաստանի Հանրապետության քաղաքացիական օրենսգրքի 605-րդ հոդվածի և «Պետական ոչ առևտրային կազմակերպությունների մասին» Հայաստանի Հանրապետության օրենքի 5-րդ հոդվածի 2-րդ մասի դրույթների, ինչպես նաև հիմք ընդունելով «Հայաստանի Հանրապետության գիտությունների ազգային ակադեմիա» պետական ոչ առևտրային կազմակերպության գրությունը և «Երևանի պետական համալսարանի շրջանավարտների միավորում» հասարակական կազմակերպության համաձայնությունը` Հայաստանի Հանրապետության կառավարությունը որոշում է.
1. Երևան քաղաքի Ազատության պողոտայի N 26 հասցեում գտնվող` «Հայաստանի Հանրապետության գիտությունների ազգային ակադեմիայի Ա. Լ. Մնջոյանի անվան նուրբ օրգանական քիմիայի ինստիտուտ» պետական ոչ առևտրային կազմակերպությանն ամրացված շենքերի ու շինությունների մի մասը` դրանցով զբաղեցված և սպասարկման համար անհրաժեշտ 9800,0 քառ. մետր մակերես հողամասով (այսուհետ` գույք), հետ վերցնել և նվիրաբերել «Երևանի պետական համալսարանի շրջանավարտների միավորում» հասարակական կազմակերպությանը` «Մատչելի բնակարաններ` երիտասարդ գիտնականներին և ստեղծագործական միությունների անդամներին» ծրագրի շրջանակներում բազմաբնակարան-բազմաֆունկցիոնալ շենք կառուցելու նպատակով:
2. Առաջարկել Երևանի քաղաքապետին սույն որոշումն ուժի մեջ մտնելուց հետո 20-օրյա ժամկետում` սահմանված կարգով ապահովել սույն որոշմամբ հատկացվող հողամասի սահմանների ճշտման, համապատասխան քաղաքաշինական փաստաթղթերի հաստատման, համաձայնեցման և անհրաժեշտ թույլտվությունների տրամադրման աշխատանքները:
3. Հայաստանի Հանրապետության կառավարությանն առընթեր պետական գույքի կառավարման վարչության պետին` սույն որոշումն ուժի մեջ մտնելուց հետո 20-օրյա ժամկետում ապահովել սույն որոշմամբ հատկացվող գույքի հանձնման-ընդունման աշխատանքների կատարումը, նվիրաբերության պայմանագրի կնքումը` դրանում նախատեսելով, որ գույքային իրավունքների պետական գրանցումն իրականացվելու է «Երևանի պետական համալսարանի շրջանավարտների միավորում» հասարակական կազմակերպության միջոցների հաշվին:
|
Հայաստանի Հանրապետության |
Տ. Սարգսյան |
|
|