Հ Ա Մ Ա Ձ Ա Յ Ն Ա Գ Ի Ր
Էլեկտրաէներգետիկայի բնագավառում Անկախ Պետությունների Համագործակցության միջպետական հարաբերությունների համակարգման մասին
Ադրբեջանի Հանրապետության, Հայաստանի Հանրապետության, Բելառուսի Հանրապետության, Ղազախստանի Հանրապետության, Ղրղզստանի Հանրապետության, Մոլդովայի Հանրապետության, Ռուսաստանի Դաշնության, Տաջիկստանի Հանրապետության, Թուրքմենստանի, Ուզբեկստանի Հանրապետության և Ուկրաինայի կառավարությունները, հիմնվելով պետությունների կառավարությունների ղեկավարների 1992 թվականի փետրվարի 8-ի որոշման վրա,
հաշվի առնելով պետությունների տնտեսության և սոցիալական զարգացման մեջ էլեկտրաէներգետիկայի հատուկ դերը,
գիտակցելով մասնակից պետությունների միավորված էներգահամակարգերի և էլեկտրական կայանների զուգահեռ աշխատանքի առավելությունը, համոզված լինելով էներգամատակարարման, էներգետիկ անվտանգության, հատկապես միջուկային օբյեկտների և շրջակա միջավայրի պահպանման հիմնախնդիրների արդյունավետ լուծման համատեղ շահագրգռվածության առկայությունը,
գիտակցելով միջպետական համաձայնագրերով պարտավորությունները և ձգտելով աջակցել պետությունների պատրաստակամությունը համագործակցությանը, հիմնված փոխադարձ հարգանքի և վստահության վրա, գտնում են, որ էլեկտրաէներգետիկայի բնագավառում միջպետական հարաբերությունների համակարգման հիմքն է հանդիսանում Պայմանավորվող կողմերի էներգետիկ համակարգերի ներքին կառավարման հարցերին չմիջամտելու և փոխադարձ շահի, իրավահավասարության սկզբունքների վրա խարսխված զուգահեռ աշխատանքի համաձայնությունը,
կնքեցին սույն Համաձայնագիրը ներքոհիշյալի մասին.
Հ ո դ վ ա ծ 1
Էլեկտրաէներգետիկ խորհուրդ
Համատեղ և համակարգված գործողությունների անցկացման նպատակով, ուղղված միավորված էներգետիկ համակարգերի արդյունավետ գործունեության հիման վրա պետությունների բնակչության և ժողովրդական տնտեսության կայուն և հուսալի էներգամատակարարման ապահովմանը, պետությունները կազմավորում են Անկախ Պետությունների Համագործակցության էլեկտրաէներգետիկ խորհուրդ, այսուհետ` Էլեկտրաէներգետիկ խորհուրդ։
Էլեկտրաէներգետիկ խորհրդի կազմի մեջ մտնում են ի պաշտոնե Խորհրդի անդամ պետությունների լիազոր ներկայացուցիչները՝ էլեկտրաէներգետիկայի կառավարման մարմինների առաջին ղեկավարները։
Հ ո դ վ ա ծ 2
Էլեկտրաէներգետիկ խորհրդի գործառույթները
2.1 Միավորված էներգետիկ համակարգերի կազմում աշխատանքի ընդունելի սկզբունքների որոշումը։
2.2 Էներգիայի փոխանցումների և հզորության միջպետական շուկայի իրավիճակի հաշվառմամբ, էներգիայի, հզորությունների և վառելիքի հեռանկարային հաշվեկշիռների հիման վրա էլեկտրակայանների համար էլեկտրաէներգիայի և վառելիքի փոխադարձ մատակարարման վերաբերյալ միջպետական, համակարգված Համաձայնագրերի նախապատրաստման մասնակցությունը։
2.3 Սպառողների փոխօգնության կազմակերպումը էներգամատակարարումներում, և միավորված էներգետիկ համակարգերի կայունության ապահովումը արտակարգ իրադրություններում ու ծայրահեղ պայմաններում։
2.4 Միավորված էներգետիկ համակարգերի հեռանկարային զարգացման ծրագրերի և վառելիքաէներգետիկ համալիրի կազմում էլեկտրաէներգետիկայի զարգացման ռազմավարության մշակման և իրագործման համակարգումը` պետությունների կառավարությունների հետ միասին։
2.5 Նոր տեխնիկայի և տեխնոլոգիաների, էլեկտրամատակարարման և ջերմամատակարարման բնագավառում միջպետական գիտական ծրագրերի և փորձարարական-կոնստրուկտորական մշակումների համակարգումը։
2.6 Համաձայնագրի մասնակիցներին աջակցության և օգնության ցուցաբերումը նոր էներգետիկ աղբյուրների շինարարության և գործող էներգետիկ օբյեկտների շահագործման և վերանորոգման կարիքների և շինարարական կոնստրուկցիաների, հարմարությունների, պաշտպանության միջոցների, պահեստամասերի, էներգասարքավորումների, նյութատեխնիկական պաշարների միջպետական մատակարարումների կազմակերպման համար։
2.7 Էլեկտրաէներգիայի և հզորությունների միջպետական մատակարարումների սակագների ձևավորման նորմատիվ-մեթոդական հանձնարարականների համաձայնեցումը։
2.8 Էլեկտրաէներգետիկ օբյեկտների շինարարության և շահագործման նորմերի ու կանոնների համաձայնեցումը։
2.9 Էլեկտրաէներգետիկայի և էներգաշինարարության բնագավառում միասնական միջազգային չափորոշիչներով միացյալ միջազգային տարածքի համաձայնեցումը։
Միջազգային էներգետիկ կազմակերպություններին և միջազգային խորհրդակցություններին համատեղ մասնակցության կազմակերպումը։
2.10 Նոր էներգետիկ սարքավորում արտադրող ձեռնարկությունների հետ համատեղ, ինչպես նաև գործող սարքավորումների այժմեականացման, ջերմային և էլեկտրական ցանցերի ու կառավարման և կապի հսկողության համակարգերի միջպետական ծրագրերի մշակման համակարգումը։
2.11 Էլեկտրաէներգետիկայի բնագավառում բնապահպանության համատեղ ծրագրերի ստեղծումը։
2.12 Էլեկտրաէներգետիկայում հաշվառման և հաշվետվությունների միասնական ձևերի համաձայնեցումը՝ անհրաժեշտ համատեղ որոշումների ընդունման համար։
2.13 Էլեկտրաէներգետիկայում էներգախնայումներով հանձնարարականների մշակումը և էներգիայի ոչ ավանդական աղբյուրների ներդրումը։
Հ ո դ վ ա ծ 3
Էլեկտրաէներգետիկ խորհրդի ղեկավարման մարմինները
Էլեկտրաէներգետիկ խորհուրդը գլխավորում են նախագահը և փոխնախագահը, որոնք նշանակվում են Խորհրդի կողմից՝ Անկախ Պետությունների Համագործակցության էլեկտրաէներգետիկ ճյուղերի առաջին ղեկավարների թվից` ռոտացիայի կարգով, համաձայնեցված հերթականությամբ մեկ տարի ժամկետով։
Էլեկտրաէներգետիկ խորհրդի նախագահի գտնվելու վայրը այն պետության մայրաքաղաքն է, որի ներկայացուցիչն է նա հանդիսանում։
Հ ո դ վ ա ծ 4
Էլեկտրաէներգետիկ խորհրդի աշխատանքի կազմակերպումը
Էլեկտրաէներգետիկ խորհուրդը հավաքվում է ոչ պակաս, քան տարին երկու անգամ։
Էլեկտրաէներգետիկ խորհրդի արտահերթ նիստը կարող է գումարվել կամ նախագահի որոշմամբ, կամ խորհրդի ոչ պակաս, քան երեք անդամի առաջարկությամբ։
Էլեկտրաէներգետիկ խորհրդի նիստերի անցկացման վայրը այն պետության մայրաքաղաքն է, որի էլեկտրաէներգետիկայի ղեկավարը գլխավորում է Էլեկտրաէներգետիկ խորհուրդը։
Հ ո դ վ ա ծ 5
Էլեկտրաէներգետիկ խորհրդի աշխատանքային մարմինն ու նրա գործառույթները
Էլեկտրաէներգետիկ խորհրդի աշխատանքային մարմինն է հանդիսանում Գործադիր կոմիտեն։
Գործադիր կոմիտեն գլխավորում է Էլեկտրաէներգետիկ խորհրդի կողմից նշանակված նախագահը։
Գործադիր կոմիտեն հաշվետու է Էլեկտրաէներգետիկ խորհրդին։
Գործադիր կոմիտեի նախագահը պատասխանատու է Էլեկտրաէներգետիկ խորհրդի նիստի անհրաժեշտ նյութերի պատրաստման համար և մասնակցում է այդ նիստերին։
Գործադիր կոմիտեի անդամների և սպասարկող անձնակազմի կառուցվածքը, քանակությունը, աշխատանքի վարձատրման նախահաշիվն ու ձևը հաստատում է Էլեկտրաէներգետիկ խորհուրդը։
Գործադիր կոմիտեի անձնակազմը որոշվում է նախագահի կողմից` Էլեկտրաէներգետիկ խորհրդի կողմից հաստատված կառուցվածքի և ծախսերի նախահաշվի սահմաններում։
Էլեկտրաէներգետիկ խորհրդի գործադիր մարմնի աշխատանքը կենտրոնանում է Էլեկտրաէներգետիկ խորհրդի գործունեությունն ապահովող փաստաթղթերի պատրաստման հարցերի վրա և իրականացվում է նախագահի կողմից հաստատված հատուկ ծրագրով։
Գործադիր կոմիտեի գտնվելու վայրը Մոսկվա քաղաքն է։
Հ ո դ վ ա ծ 6
Էլեկտրաէներգետիկ խորհրդի գործունեության ֆինանսավորումը
Էլեկտրաէներգետիկ խորհրդի և դրա աշխատանքային մարմինների գործունեության ֆինանսավորումն իրականացվում է պետությունների էներգահամակարգերի, Էլեկտրաէներգետիկ միավորումների (ընկերությունների) հատկացումների հաշվին՝ հավասար չափով։
Էլեկտրաէներգետիկ խորհրդին կից կարող են ձևավորվել կոլեկտիվ ֆոնդեր։
Ֆոնդերի ձևավորման և օգտագործման կարգը հաստատվում է Էլեկտրաէներգետիկ խորհրդի կողմից։
Հ ո դ վ ա ծ 7
Կարգավարական վարչություն
Պետությունների էներգահամակարգերի հարաբերությունը կենտրոնական կարգավարական վարչության հետ կարգավորվում է հատուկ պայմանագրերով՝ կնքված ըստ օպերատիվ կարգավարական վարչության կազմակերպման մասին Համաձայնագրի։
Հ ո դ վ ա ծ 8
Պայմանավորվող կողմերի պատասխանատվությունը
Պետությունները փոխադարձ պատասխանատվություն են կրում սույն Համաձայնագրով պայմանավորված պարտավորությունների խախտման համար։
Էլեկտրաէներգետիկ խորհուրդը յուրաքանչյուր պետության առջև սույն Համաձայնագրի 2-րդ հոդվածում շարադրված գործառույթների կատարման համար կրում է պատասխանատվություն։
Հ ո դ վ ա ծ 9
Համաձայնագրի ուժի մեջ մտնելը
Սույն Համաձայնագիրն ուժի մեջ է մտնում դրա ստորագրման օրվանից և գործում է անորոշ ժամկետով։ Համաձայնագիրը կարող է լրացվել կամ փոփոխվել այն ստորագրած բոլոր Կողմերի համաձայնությամբ։
Հ ո դ վ ա ծ 10
Համաձայնագրի չեղյալ հայտարարումը
Սույն Համաձայնագրով հարաբերությունների դադարեցման շահագրգռվածության առաջացման դեպքում, պետություններից ցանկացածը այդ մասին ծանուցում է Էլեկտրաէներգետիկ խորհրդին։
Մեկ տարի անց դիմող Կողմն այլևս չի կրում սույն Համաձայնագրով պայմանավորված որևէ պարտավորություն։
Հ ո դ վ ա ծ 11
Համաձայնագրին այլ պետությունների միանալը
Այլ պետություններ Էլեկտրաէներգետիկ խորհուրդ համապատասխան դիմում ներկայացնելու միջոցով կարող են միանալ սույն Համաձայնագրին, որն ուժի մեջ է մտնում սույն Համաձայնագիրը ստորագրած բոլոր Կողմերի՝ դրա համար համաձայնությունը ստանալուց հետո։
Հ ո դ վ ա ծ 12
Էլեկտրաէներգետիկ խորհրդի պաշտոնական աշխատանքային լեզուները
Էլեկտրաէներգետիկ խորհրդում պաշտոնական լեզուներն են պետությունների լեզուները։
Էլեկտրաէներգետիկ խորհրդի աշխատանքային լեզուն ռուսերենն է։
Կատարված է Մինսկ քաղաքում 1992 թվականի փետրվարի 14-ին, մեկ բնօրինակով, ռուսերեն։
Բնօրինակը պահվում է Բելառուսի Հանրապետության կսառավարության արխիվում, որը Պայմանավորվող կողմերին կուղարկի Համաձայնագրի հավաստված պատճենը։
* Համաձայնագիրը Հայաստանի Հանրապետության համար ուժի մեջ է մտել 1992 թվականի փետրվարի 14-ից:
Փոփոխող ակտ | Համապատասխան ինկորպորացիան |
---|
Փոփոխող ակտ | Համապատասխան ինկորպորացիան |
---|