ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՎՃՌԱԲԵԿ ԴԱՏԱՐԱՆ

ՀՀ վերաքննիչ քաղաքացիական դատարանի որոշում  Քաղաքացիական գործ թիվ ԱՎԴ/0052/02/09	Քաղաքացիական գործ  թիվ ԱՎԴ/0052/02/09 2010թ.
Նախագահող դատավոր՝ Գ. Մատինյան
Դատավորներ՝ Լ. Գրիգորյան                        Ա. Թումանյան

Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Հայաստանի Հանրապետության վճռաբեկ դատարանի քաղաքացիական և վարչական պալատը (այսուհետ՝ Վճռաբեկ դատարան)

	նախագահությամբ	Ս. Սարգսյանի
	մասնակցությամբ դատավորներ	Ս. Անտոնյանի
		Վ. Աբելյանի
		Վ. Ավանեսյանի
		Ա. Բարսեղյանի
		Մ. ԴՐՄԵՅԱՆԻ
		Ե. Խունդկարյանի
		Է. Հայրիյանի
		Տ. Պետրոսյանի
		Ե. Սողոմոնյանի

2010 թվականի փետրվարի 5-ին

դռնբաց դատական նիստում, քննելով Գեղեցիկ Ռուստամյանի և Սևակ Ռոստամյանի վճռաբեկ բողոքը ՀՀ վերաքննիչ քաղաքացիական դատարանի 30.09.2009 թվականի որոշման դեմ` ըստ հայցի Սպարտակ, Սոնա, Աննա, Հովիկ, Հովսեփ և Քնարիկ Ռուստամյանների ընդդեմ Գեղեցիկ Ռուստամյանի և Սևակ Ռոստամյանի` բնակելի տնից և տնամերձ հողամասից վտարելու պահանջի մասին և հակընդդեմ հայցի Գեղեցիկ, Սյուզաննա և Սաթենիկ Ռուստամյանների և Սևակ Ռոստամյանի ընդդեմ Սպարտակ, Սոնա, Աննա, Հովիկ և Քնարիկ Ռուստամյանների` առանձնացված բաժնի նկատմամբ սեփականության իրավունքը ճանաչելու պահանջի մասին,

ՊԱՐԶԵՑ

1. Գործի դատավարական նախապատմությունը.

Դիմելով դատարան` Սպարտակ, Սոնա, Աննա, Հովիկ, Հովսեփ և Քնարիկ Ռուստամյանները պահանջել են Գեղեցիկ Ռուստամյանին և Սևակ Ռոստամյանին վտարել ՀՀ Արարատի մարզի Այգեստան գյուղում գտնվող իրենց սեփականությունը հանդիսացող բնակելի տնից և տնամերձ հողամասից:

Հակընդդեմ հայցով դիմելով դատարան՝ Գեղեցիկ, Սյուզաննա և Սաթենիկ Ռուստամյանները և Սևակ Ռոստամյանը պահանջել են ճանաչել սեփականության իրավունքը ՀՀ Արարատի մարզի Այգեստան գյուղում գտնվող բնակելի տան իրենց կողմից առանձնացված և օգտագործվող բաժնի նկատմամբ:

ՀՀ Արարատի և Վայոց ձորի մարզերի ընդհանուր իրավասության դատարանի (այսուհետ` Դատարան) 18.05.2009 թվականի վճռով հայցը բավարարվել է, իսկ հակընդդեմ հայցը` մերժվել:

ՀՀ վերաքննիչ քաղաքացիական դատարանի (այուհետ՝ Վերաքննիչ դատարան) 30.09.2009 թվականի որոշմամբ Դատարանի 18.05.2009 թվականի վճիռը թողնվել է օրինական ուժի մեջ:

Սույն գործով վճռաբեկ բողոք են ներկայացրել Գեղեցիկ Ռուստամյանը և Սևակ Ռոստամյանը:

Վճռաբեկ բողոքի պատասխան չի ներկայացվել:

Կողմերը 22.12.2009 թվականին Վճռաբեկ դատարան են ներկայացրել հաշտության համաձայնություն և խնդրել են այն հաստատել:

Վճռաբեկ դատարանի կողմից կողմերին պարզաբանվել է ՀՀ քաղաքացիական դատավարության օրենսգրքի 110-րդ հոդվածով սահմանված հաշտության համաձայնությամբ գործի վարույթը կարճելու դատավարական հետևանքները:

2. Վճռաբեկ դատարանի պատճառաբանությունները և եզրահանգումը.

ՀՀ քաղաքացիական դատավարության օրենսգրքի 33-րդ հոդվածի համաձայն՝ կողմերը դատավարության ցանկացած փուլում կարող են գործն ավարտել հաշտության համաձայնությամբ:

Կողմերի միջև կայացված հաշտության համաձայնությունը ձևակերպվում է գրավոր:

 ՀՀ քաղաքացիական դատավարության օրենսգրքի 109-րդ հոդվածի 7-րդ կետի համաձայն՝ դատարանը կարճում է գործի վարույթը, եթե դատարանը հաստատել է կնքված հաշտության համաձայնությունը:

Ուսումնասիրելով 22.12.2009 թվականի հաշտության համաձայնությունը` Վճռաբեկ դատարանը գտնում է, որ այն չի հակասում օրենքին և չի խախտում այլ անձանց իրավունքներն ու օրինական շահերը:

Այսպիսով, Վճռաբեկ դատարանը գտնում է, որ կողմերի ներկայացրած հաշտության համաձայնությունը պետք է հաստատել:

Ելնելով վերոգրյալից և ղեկավարվելով ՀՀ քաղաքացիական դատավարության օրենսգրքի 33-րդ, 133-րդ, 240-241²-րդ հոդվածներով՝ Վճռաբեկ դատարանը

ՈՐՈՇԵՑ

1. Հաստատել կողմերի միջև 22.12.2009 թվականին կնքված հաշտության համաձայնությունը հետևյալ բովանդակությամբ.

«ՀԱՇՏՈՒԹՅԱՆ ՀԱՄԱՁԱՅՆՈՒԹՅՈՒՆ

ԱՎԴ/0052/02/09 քաղաքացիական գործով

30.09.2009 թ. վերաքննիչ քաղաքացիական դատարանը քննության է առել քաղաքացիական գործն ըստ հայցի Սպարտակ Կառլենի Ռուստամյանի, Սոնա Սպարտակի Ռուստամյանի, Քնարիկ Սպարտակի Ռուստամյանի, Աննա Սպարտակի Ռուստամյանի, Հովիկ Սպարտակի Ռուստամյանի և Հովսեփ Սպարտակի Ռուստամյանի ընդդեմ Գեղեցիկ Ավետիքի Ռուստամյանի, Սյուզաննա Ստյոպայի Ռուստամյանի, Սաթենիկ Ստյոպայի Ռուստամյանի և Սևակ Ստյոպայի Ռոստամյանի` «բնակելի տնից տնամերձ հողամասից վտարելու պահանջի մասին» և Գեղեցիկ Ռուստամյանի, Սևակ Ռոստամյանի, Սյուզաննա Ռուստամյանի, Սաթենիկ Ռուստամյանի հակընդդեմ հայցն ընդդեմ Սպարտակ Ռուստամյանի, Սոնա Ռուստամյանի, Աննա Ռուստամյանի, Քնարիկ Ռուստամյանի, Հովիկ Ռուստամյանի և Հովսեփ Ռուստամյանի` «առանձնացված բաժնեմասի նկատմամբ սեփականության իրավունքը ճանաչելու պահանջի մասին»: ՀՀ Արարատի և Վայոց ձորի ընդհանուր իրավասության դատարանը հայցը բավարարել է, իսկ հակընդդեմ հայցը մերժել է:

Հակընդդեմ հայցվորները բողոքել են ՀՀ վերաքննիչ դատարան: ՀՀ վերաքննիչ դատարանը 18.05.2009 թ. թիվ ԱՎԴ/0052/02/09 քաղաքացիական գործը գտնվում է վճռաբեկ դատարանում:

Նշված քաղաքացիական գործով կողմերը կնքեցին սույն հաշտության համաձայնությունը հետևյալի մասին` մեր ազատ կամքով, առանց հարկադրանքի, պարզ գիտակցելով, հասկանալով և ընդունելով սույն հաշտության էությունը, պահանջները, դրանցից բխող իրավունքները և պարտավորությունները:

Սկզբնական հայցով հայցվորները և հակընդդեմ հայցով պատասխանողները` Սպարտակ Ռուստամյանը, Սոնա Ռուստամյանը, Աննա Ռուստամյանը, Հովիկ Ռուստամյանը, Հովսեփ Ռուստամյանը և Քնարիկ Ռուստամյանը, պարտավորվում են սկզբնական հայցով պատասխանողներ, հակընդդեմ հայցով հայցվորներ Գեղեցիկ Ռուստամյանի, Սևակ Ռոստամյանի, Սյուզաննա Ռուստամյանի և Սաթենիկ Ռուստամյանի համար նրանց իսկ պատկանող 1000 քմ տնամերձ հողակտորի վրա կառուցելու երկսենյականոց բնակարան, որի ընդհանուր մակերեսը բնակարանի ներսից պետք է ունենա 9 մ երկարություն, 4 մ լայնություն և 3 մ բարձրություն:

Բնակարանի հիմքը պետք է ունենա 50 սմ խորություն, 30 սմ լայնություն, պատի քարը չպետք է դրվի անմիջապես հողի վրա, այն պետք է ունենա որոշակի բարձրություն (25-30սմ): Պատերը պետք է շարվեն տուֆ քարով, պատերը պետք է շարվեն մեկ տակ քարով, հոսանքի գծեր չեն անցկացվելու, պատերի ներսը և դուրսը չի գաջվելու և չի սվաղվելու: Ներսի պատը` սենյակները կիսելու համար պետք է շարվի մեկ տակ տուֆ քարով: Շինությունը պետք է ունենա 4 հատ պատուհան` երկփեղկանի (մոսկովյան) փայտյա նորմալ վիճակում, 2 հատ դուռ` փականների հետ ևս նորմալ վիճակում: Դռները ևս պետք է լինեն փայտյա: Սկզբնական հայցով հայցվորները պարտավորվում են երկսենյականոց բնակարանը հանձնել պատուհանները ապակիների հետ միասին տեղադրած, դռները տեղադրած, հատակը ցեմենտ-բետոնով հարթեցված, տան վերևը բետոնապատվելու կամ պանելապատվելու է, այն պետք է լինի հարթ, սակայն չի թիթեղապատվելու և փայտյա կամ երկաթյա ծածկ չի արվելու: Շինությունը պետք է լինի ամուր կառույց: Հակընդդեմ հայցով հայցվորները, սկզբնական հայցով պատասխանողները` Գեղեցիկ Ռուստամյանը, Սևակ Ռոստամյանը, Սյուզաննա Ռուստամյանը և Սաթենիկ Ռուստամյանը պարտավորվում են նշված պայմանների պահպանմամբ երկսենյականոց բնակարանը կառուցելուց հետո սկզբնական հայցով հայցվորներին սեփականության իրավունքով պատկանող բնակելի տունը երկամսյա ժամկետում ազատելու և տեղափոխվելու կառուցած բնակարանը ու վեճի առարկայի նկատմամբ որևէ իրավունքի ճանաչման պահանջ այլևս չներկայացնելու: Տան շինարարությունը պետք է ավարտվի 2010 թվականի մայիսի 15-ին, իսկ երկամսյա ժամկետում, այսինքն մինչև հուլիսի 15-ը պետք է դուրս գան հակընդդեմ հայցով հայցվորներ Գեղեցիկ Ռուստամյանը, Սաթենիկ Ռուստամյանը, Սյուզաննա Ռուստամյանը և Սևակ Ռոստամյանը: Կողմերը նշված հաշտության համաձայնության կետերից դուրս այլևս պարտք ու պահանջ մեկը մյուսի նկատմամբ չունեն:

Կողմերիս պարզաբանվել է ՀՀ քաղաքացիական դատավարության օրենսգրքի 33, 109, 110, 133 հոդվածների պահանջները:

ՀՀ քաղ. դատ. օր-ի 133 հոդվածի և 109 հոդվածի 7-րդ կետի համաձայն վճռաբեկ դատարանի քաղաքացիական պալատին

Խնդրում ենք

հաստատել մեր հաշտության համաձայնությունը և գործի վարույթը կարճել:

Սկզբնական հայցով հայցվորներ
1. Սպարտակ Կառլենի Ռուստամյան	ստորագրություն
2. Քնարիկ Վահրիճի Ռուստամյան	ստորագրություն
3. Սոնա Սպարտակի Ռուստամյան	ստորագրություն
4. Աննա Սպարտակի Ռուստամյան	ստորագրություն
5. Հովիկ Սպարտակի Ռուստամյան	ստորագրություն
6. Հովսեփ Սպարտակի Ռուստամյան	ստորագրություն
Հակընդդեմ հայցով պատասխանողներ
1. Գեղեցիկ Ավետիքի Ռուստամյան	ստորագրություն
2. Սաթենիկ Ստյոպայի Ռուստամյան	ստորագրություն
3. Սևակ Ստյոպայի Ռոստամյան	ստորագրություն
4. Սյուզաննա Ստյոպայի Ռուստամյան	ստորագրություն»:

2. ՀՀ վերաքննիչ քաղաքացիական դատարանի 30.09.2009 թվականի որոշումը բեկանել և քաղաքացիական գործի վարույթը կարճել:

3. Որոշումն օրինական ուժի մեջ է մտնում հրապարակման պահից, վերջնական է և ենթակա չէ բողոքարկման:

Նախագահող`		Ս. Սարգսյան
Դատավորներ`		Ս. Անտոնյան
		Վ. Աբելյան
		Վ. Ավանեսյան
		Ա. Բարսեղյան
		Մ. ԴՐՄԵՅԱՆ
		Ե. Խունդկարյան
		Է. Հայրիյան
		Տ. Պետրոսյան
		Ե. Սողոմոնյան