«Վավերացնում եմ»
Հայաստանի Հանրապետության
Նախագահ Ռ. Քոչարյան
21 հոկտեմբերի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

26 սեպտեմբերի 2002 թվականի N 1620-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿԱՅԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅԱՆ ԵՐԿՐԱԲԱՆԱԿԱՆ ԳՈՐԾԱԿԱԼՈՒԹՅԱՆ ԿԱՆՈՆԱԴՐՈՒԹՅՈՒՆԸ ԵՎ ԿԱՌՈՒՑՎԱԾՔԸ ՀԱՍՏԱՏԵԼՈՒ ՄԱՍԻՆ

(վերնագիրը փոփ. 15.05.08 N 653-Ն)

Հիմք ընդունելով «Պետական կառավարչական հիմնարկների մասին» Հայաստանի Հանրապետության օրենքի 9-րդ հոդվածի 2-րդ և 3-րդ ու 11-րդ հոդվածի 1-ին կետերը, Հայաստանի Հանրապետության Նախագահի 2002 թվականի մարտի 16-ի ՆՀ-1064 հրամանագրով սահմանված Հայաստանի Հանրապետության կառավարության գործունեության կարգի 4-րդ կետին համապատասխան, ինչպես նաև ի կատարումն Հայաստանի Հանրապետության կառավարության 2002 թվականի մարտի 6-ի N 199 որոշման 4-րդ կետի՝ Հայաստանի Հանրապետության կառավարությունը որոշում է.

1. Հաստատել՝

ա) Հայաստանի Հանրապետության էներգետիկայի և բնական պաշարների նախարարության երկրաբանական գործակալության կանոնադրությունը՝ համաձայն N 1 հավելվածի.

բ) Հայաստանի Հանրապետության էներգետիկայի և բնական պաշարների նախարարության երկրաբանական գործակալության կառուցվածքը՝ համաձայն N 2 հավելվածի:

(1-ին կետը փոփ. 15.05.08 N 653-Ն)

2. Ուժը կորցրած ճանաչել Հայաստանի Հանրապետության կառավարության 1998 թվականի հունվարի 28-ի «Հայաստանի Հանրապետության բնապահպանության նախարարության բնության հատուկ պահպանվող տարածքների վարչություն և երկրաբանության վարչություն ստեղծելու մասին» N 36 որոշումը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ա. Մարգարյան
2002 թ. հոկտեմբերի 17 Երևան

Հավելված N 1 ՀՀ կառավարության 2002 թվականի սեպտեմբերի 26-ի N 1620-Ն որոշման

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿԱՅԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅԱՆ ԵՐԿՐԱԲԱՆԱԿԱՆ ԳՈՐԾԱԿԱԼՈՒԹՅԱՆ

(վերնագիրը փոփ. 15.05.08 N 653-Ն)

I. ԸՆԴՀԱՆՈՒՐ ԴՐՈՒՅԹՆԵՐ

1. Հայաստանի Հանրապետության էներգետիկայի և բնական պաշարների նախարարության երկրաբանական գործակալությունը (այսուհետ՝ գործակալություն) Հայաստանի Հանրապետության էներգետիկայի և բնական պաշարների նախարարության (այսուհետ՝ նախարարություն) կազմում գործող Հայաստանի Հանրապետության գործադիր իշխանության հանրապետական մարմին է, որն օրենքով, իսկ առանձին դեպքերում՝ նաև Հայաստանի Հանրապետության օրենսդրությամբ նախատեսված դեպքերում մատուցում է ծառայություններ հանրապետության տարածքի և դրա ընդերքի երկրաբանական ուսումնասիրության բնագավառում՝ հանդես գալով Հայաստանի Հանրապետության անունից:

(1-ին կետը փոփ. 15.05.08 N 653-Ն)

2. Գործակալությունն ստեղծվում, վերակազմակերպվում և նրա գործունեությունը դադարեցվում է Հայաստանի Հանրապետության կառավարության որոշմամբ: Գործակալությունը գործում է իր կանոնադրության համաձայն, որը, Հայաստանի Հանրապետության էներգետիկայի և բնական պաշարների նախարարի ներկայացմամբ, հաստատում է Հայաստանի Հանրապետության կառավարությունը:

(2-րդ կետը փոփ. 15.05.08 N 653-Ն)

3. Գործակալության լիազորությունները սահմանվում են օրենքով, Հայաստանի Հանրապետության Նախագահի հրամանագրերով, կարգադրություններով, Հայաստանի Հանրապետության կառավարության որոշումներով, ինչպես նաև Հայաստանի Հանրապետության միջազգային պայմանագրերով:

4. Գործակալությունն իր գործունեությունն իրականացնում է Հայաստանի Հանրապետության օրենսդրությանը և այլ իրավական ակտերին համապատասխան:

5. Գործակալությունն օրենքով կամ այլ իրավական ակտերով նախատեսված դեպքերում իրավունք ունի Հայաստանի Հանրապետության անունից ձեռք բերելու և իրականացնելու գույքային ու անձնական ոչ գույքային իրավունքներ, կրելու պարտականություններ, դատարանում հանդես գալու որպես հայցվոր կամ պատասխանող:

6. Գործակալությունն ունի Հայաստանի Հանրապետության զինանշանի պատկերով և գործակալության հայերեն անվանմամբ կլոր կնիք, ձևաթղթեր, խորհրդանիշ և անհատականացման այլ միջոցներ:

II. ԳՈՐԾԱԿԱԼՈՒԹՅԱՆ ՆՊԱՏԱԿՆԵՐԸ ԵՎ ԽՆԴԻՐՆԵՐԸ

7. Գործակալության նպատակներն ու խնդիրներն են՝

ա) Հայաստանի Հանրապետության տարածքում օգտակար հանածոների հայտնաբերման նպատակով երկրաբանական համալիր ուսումնասիրությունների՝ երկրաբանական, հիդրոերկրաբանական, ինժեներաերկրաբանական, երկրաքիմիական, երկրաֆիզիկական հանույթների, դրանց ուղեկցող ընդհանուր որոնումների, ինչպես նաև օգտակար հանածոների հայտնաբերման նպատակ չհետապնդող երկրաբանահետախուզական այլ աշխատանքների և ուսումնասիրության նպատակով ընդերքի տրամադրման ապահովումը.

բ) իր իրավասության սահմաններում Հայաստանի Հանրապետության տարածքում կատարվող երկրաբանահետախուզական աշխատանքների համակարգումը.

գ) Հայաստանի Հանրապետության տարածքում կատարվող երկրաբանահետախուզական աշխատանքների իրականացման մեթոդական ապահովումը.

դ) պետական նշանակության երկրաբանական, տեկտոնական, հիդրոերկրաբանական, ինժեներաերկրաբանական, երկրաֆիզիկական, երկրաքիմիական և այլ քարտեզների կազմման ու դրանց հրատարակման ապահովումը:

(7-րդ կետը լրաց. 30.07.09 N 868-Ն)

III. ԳՈՐԾԱԿԱԼՈՒԹՅԱՆ ԳՈՐԾԱՌՈՒՅԹՆԵՐԸ

8. Գործակալությունն իր նպատակների և խնդիրների իրականացման համար Հայաստանի Հանրապետության օրենսդրությամբ սահմանված կարգով իրականացնում է հետևյալ գործառույթները՝

ա) Հայաստանի Հանրապետության տարածքում տարածաշրջանային երկրաբանական, երկրաֆիզիկական, երկրաքիմիական, հիդրոերկրաբանական, ինժեներաերկրաբանական և այլ աշխատանքների կազմակերպումն ու իրականացումը.

բ) ընդերքի օգտագործման՝ ընդերքի երկրաբանական ուսումնասիրության, օգտակար հանածոների հանքավայրերի, այդ թվում՝ նաև լքված հանքավայրերի, հանքապոչերի և թափոնների շահագործման, օգտակար հանածոների արդյունահանման հետ չկապված, այլ նպատակներով ընդերքի շահագործման համար սահմանված կարգով ընդերքօգտագործման պայմանագրերի կազմմանը մասնակցելը.

գ) երկրաբանահետախուզական աշխատանքների նախագծերի և կատարված աշխատանքների մասին երկրաբանական հաշվետվությունների քննարկումն ու համապատասխան եզրակացությունների տրամադրումը.

դ) երկրաբանահետախուզական համալիր աշխատանքների նախագծման, իրականացման, ստացված նյութերի ամփոփման և վերջնական հաշվետվությունների կազմման վերաբերյալ մեթոդական ցուցումների, հրահանգների, կարգերի ու առաջադրանքների մշակմանը մասնակցելը.

ե) պետական նշանակության (Մ 1:200000, Մ 1:500000) երկրաբանական, սեյսմատեկտոնական, հիդրոերկրաբանական, ինժեներաերկրաբանական, երկրաֆիզիկական և այլ քարտեզների կազմումն ու դրանք հրատարակության ներկայացնելը.

զ) Հայաստանի Հանրապետության տնտեսական զարգացման ծրագրերին համապատասխան՝ հանրապետության հանքահումքային հենքի օգտագործման ռազմավարության, ինչպես նաև ընդերքի ուսումնասիրման, արդյունավետ օգտագործման և պահպանության միասնական գիտատեխնիկական քաղաքականության ու դրանք կարգավորող համապատասխան ակտերի մշակմանը մասնակցելը.

է) օգտակար հանածոների հանքավայրերի արդյունավետ շահագործման միջոցառումների իրականացմանը մասնակցելը.

ը) օգտակար հանածոների արդյունահանման հետ չկապված ընդերքի օգտագործման նպատակով տրամադրված տարածքների երկրաբանական և ինժեներաերկրաբանական կառուցվածքների, հիդրոերկրաբանական պայմանների, այդ տարածքների ընդերքում օգտակար հանածոների առկայության մասին Հայաստանի Հանրապետության օրենսդրությամբ սահմանված կարգով տեղեկատվության տրամադրումն ու երկրաբանական աշխատանքների ոլորտում ընդերքօգտագործողների հետ համագործակցությունը.

թ) մասնագիտական կադրերի պատրաստման, արտադրական պրակտիկայի կազմակերպման և համակարգը երիտասարդ մասնագետներով համալրելու նպատակով հանրապետության համապատասխան բուհերի հետ համագործակցությունը.

ժ) իր իրավասության սահմաններում երկրաբանության բնագավառում միջազգային համագործակցությանը մասնակցելը.

ժա) ընդերքի օգտակար հանածոների ուսումնասիրության հատուկ և ուսումնասիրության լիցենզիաներ ստանալու, ուսումնասիրության լիցենզային պայմանագրերի կնքման, լիցենզիայով և լիցենզային պայմանագրով տրամադրված ընդերքի տեղամասի ընդլայնման կամ լիցենզիայում փոփոխություն կատարելու, օրենքով նախատեսված հրաժարման մասին հավաստագրերի տրամադրման, հանքային իրավունքի փոխանցման համար ներկայացված դիմումների ու դրանց կից փաստաթղթերի ուսումնասիրումը և լիազոր մարմին դրանց վերաբերյալ առաջարկություններ ներկայացնելը` անհրաժեշտության դեպքում ապահովելով այդ աշխատանքներում համապատասխան մասնագետների ներգրավումը.

ժբ) ընդերքն օգտակար հանածոների շահագործման նպատակով ուսումնասիրության լիցենզային պայմանագրերի նախապատրաստումը և լիազոր մարմին կնքման ներկայացնելը.

ժգ) լիցենզառուի կողմից օրենքի և լիցենզիայի պայմանների, ինչպես նաև պայմանագրով ստանձնած պարտավորությունների կատարման, ուսումնասիրության հատուկ կամ ուսումնասիրության լիցենզառուին գրավոր զգուշացում տալու, ինչպես նաև ուսումնասիրության հատուկ և ուսումնասիրության լիցենզիայի գործողության դադարեցման վերաբերյալ լիազոր մարմին առաջարկություններ ներկայացնելը:

(8-րդ կետը լրաց. 30.07.09 N 868-Ն)

IV. ԳՈՐԾԱԿԱԼՈՒԹՅԱՆ ԿԱՌԱՎԱՐՈՒՄԸ

9. Գործակալությունը կառավարում է Հայաստանի Հանրապետության էներգետիկայի և բնական պաշարների  նախարարը (այսուհետ՝ նախարար): Գործակալության անմիջական ղեկավարումն իրականացնում է գործակալության պետը, որին, մինչև քաղաքացիական ծառայության պաշտոններ զբաղեցնելու համար մրցույթի անցկացման համապատասխան կարգը գործողության մեջ դնելը, պաշտոնի նշանակում և պաշտոնից ազատում է նախարարը՝ Հայաստանի Հանրապետության վարչապետի համաձայնությամբ:

Իր գործունեության ընթացքում գործակալության պետն առաջնորդվում է Հայաստանի Հանրապետության Սահմանադրությամբ, Հայաստանի Հանրապետության օրենքներով, նախարարության և սույն կանոնադրություններով, ինչպես նաև այլ իրավական ակտերով ու Հայաստանի Հանրապետության միջազգային պայմանագրերով:

(9-րդ կետը փոփ. 15.05.08 N 653-Ն)

10. Գործակալության պետը պատասխանատու է երկրաբանության բնագավառում մատուցվող ծառայությունների որակի, ինչպես նաև դրանց՝ օրենքներին և այլ իրավական ակտերին համապատասխանության համար:

11. Գործակալության պետը հաշվետու է Հայաստանի Հանրապետության վարչապետին, նախարարին, գործակալության գործունեությունը համակարգող նախարարի համապատասխան տեղակալին, իսկ քաղաքացիական ծառայության մասին Հայաստանի Հանրապետության օրենսդրությամբ նախատեսված դեպքերում նաև՝ նախարարության աշխատակազմի ղեկավարին:

12. Գործակալության պետը՝

ա) ղեկավարում է գործակալության ընթացիկ գործունեությունը, պատասխանատու է գործակալության առջև դրված խնդիրների ու գործառույթների իրականացման համար.

բ) նախարարին կամ նրա համապատասխան տեղակալին ներկայացնում է առաջարկություններ օրենքով, այլ իրավական ակտերով և սույն կանոնադրությամբ նախատեսված գործունեության բնագավառի, նպատակների ու խնդիրների վերաբերյալ.

գ) իր իրավասության սահմաններում արձակում է կարգադրություններ և տալիս պարտադիր կատարման համար ցուցումներ, առանց լիազորագրի հանդես է գալիս Հայաստանի Հանրապետության ու գործակալության անունից, ինչպես նաև տալիս է գործակալության անունից հանդես գալու լիազորագրեր, այդ թվում՝ նաև վերալիազորման իրավունքով լիազորագրեր.

դ) իր իրավասության սահմաններում գործակալության աշխատողներին պաշտոնի նշանակելու իրավասություն ունեցող պաշտոնատար անձին ներկայացնում է առաջարկություններ այդ աշխատողների նկատմամբ խրախուսանքի կամ կարգապահական տույժի միջոցներ կիրառելու վերաբերյալ.

ե) նախարարին պարբերաբար ներկայացնում է տեղեկատվություն գործակալության կողմից իրականացվող աշխատանքների ընթացքի մասին.

զ) ապահովում է նախարարի հրամանների և ցուցումների, ինչպես նաև նախարարի համապատասխան տեղակալի ցուցումների, հանձնարարականների ու առաջադրանքների կատարումը և արդյունքների մասին տեղեկացնում նախարարին կամ նրա համապատասխան տեղակալին.

է) նախարարության և սույն կանոնադրություններին համապատասխան սահմանում է գործակալության կառուցվածքային ստորաբաժանումների իրավասությունները.

ը) սահմանում է աշխատանքի բաշխումն իր տեղակալների միջև.

թ) օրենքով և սույն կանոնադրությամբ սահմանված իր լիազորությունների սահմաններում կասեցնում կամ ուժը կորցրած է ճանաչում գործակալության ենթակայությանը հանձնված պետական ոչ առևտրային կազմակերպությունների ղեկավարների՝ Հայաստանի Հանրապետության օրենսդրության պահանջներին հակասող հրամանները, հրահանգները, կարգադրությունները և ցուցումները.

ժ) լսում է գործակալության կառուցվածքային ստորաբաժանումների գործունեության մասին հաշվետվությունները, քննարկում դրանց գործունեության ստուգման արդյունքները.

ժա) իրականացնում է վերահսկողություն գործակալության կառուցվածքային ստորաբաժանումների օգտագործմանը հանձնված պետական սեփականության պահպանության նկատմամբ.

ժբ) նախարարին ներկայացնում է առաջարկություններ գործակալության կառուցվածքի և աշխատողների թվի, ինչպես նաև գործակալության խորհրդակցական մարմիններ ստեղծելու վերաբերյալ.

ժգ) իր իրավասության սահմաններում համագործակցում է պետական կառավարման, տեղական ինքնակառավարման և այլ մարմինների հետ.

ժդ) իրականացնում է օրենքով, այլ իրավական ակտերով և սույն կանոնադրությամբ նախատեսված այլ լիազորություններ:

13. Գործակալության պետի բացակայության դեպքում այդ պաշտոնը զբաղեցնում է քաղաքացիական ծառայության կադրերի ռեզերվում գտնվող՝ տվյալ պաշտոնի անձնագրի պահանջները բավարարող քաղաքացիական ծառայողը՝ ժամկետային աշխատանքային պայմանագրի կնքմամբ, իսկ դրա անհնարինության դեպքում՝ հավասարազոր պաշտոն զբաղեցնող մեկ այլ քաղաքացիական ծառայող՝ 6 ամսվանից ոչ ավելի ժամկետով պարտադիր գործուղմամբ:

V. ԳՈՐԾԱԿԱԼՈՒԹՅԱՆ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

14. Օրենքով, այլ իրավական ակտերով, նախարարության և սույն կանոնադրություններով գործակալությանը վերապահված լիազորությունների լիարժեք և արդյունավետ իրականացումը, ինչպես նաև քաղաքացիական իրավահարաբերություններին նրա մասնակցությունն ապահովում է նախարարության աշխատակազմը:

15. Գործակալությունն ունի կառուցվածքային ստորաբաժանումներ: Իր խնդիրների ու գործառույթների իրականացման ապահովման նպատակով կարող են Հայաստանի Հանրապետության օրենսդրությամբ սահմանված կարգով գործակալության ենթակայությանը հանձնվել պետական ոչ առևտրային կազմակերպություններ:

16. Գործակալության կառուցվածքային ստորաբաժանումների աշխատողները քաղաքացիական ծառայողներ են:

17. Գործակալության վերակազմակերպման և դրա գործունեության դադարեցման կարգն ու պայմանները սահմանվում են օրենքով և այլ իրավական ակտերով:

(հավելվածը փոփ. 15.05.08 N 653-Ն, լրաց. 30.07.09 N 868-Ն)

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 2 ՀՀ կառավարության 2002 թվականի սեպտեմբերի 26-ի N 1620-Ն որոշման

Կ Ա Ռ ՈՒ Ց Վ Ա Ծ Ք

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷՆԵՐԳԵՏԻԿԱՅԻ ԵՎ ԲՆԱԿԱՆ ՊԱՇԱՐՆԵՐԻ ՆԱԽԱՐԱՐՈՒԹՅԱՆ ԵՐԿՐԱԲԱՆԱԿԱՆ ԳՈՐԾԱԿԱԼՈՒԹՅԱՆ

(վերնագիրը փոփ. 15.05.08 N 653-Ն)

Օգտակար հանածոների բաժին

Տարածաշրջանային երկրաբանության բաժին

(հավելվածը փոփ. 15.05.08 N 653-Ն)

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան