Հ Ա Մ Ա Ձ Ա Յ Ն Ա Գ Ի Ր

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ՎՐԱՍՏԱՆԻ ԿԱՌԱՎԱՐՈՒԹՅԱՆ ՄԻՋԵՎ ՀԱՐԿԱՅԻՆ ՕՐԵՆՍԴՐՈՒԹՅԱՆ ԽԱԽՏՈՒՄՆԵՐԻ ԴԵՄ ՊԱՅՔԱՐԻ ՈԼՈՐՏՈՒՄ ՀԱՄԱԳՈՐԾԱԿՑՈՒԹՅԱՆ ԵՎ ՏԵՂԵԿՈՒԹՅՈՒՆՆԵՐԻ ՓՈԽԱՆԱԿՄԱՆ ՄԱՍԻՆ

Հայաստանի Հանրապետության կառավարությունը և Վրաստանի կառավարությունը, այսուհետ` Կողմեր,

ղեկավարվելով իրենց պետությունների գործող օրենսդրությամբ և միջազգային պարտավորություններով,

ելնելով հարկային հանցագործությունների և իրավախախտումների բացահայտման, նախազգուշացման և խափանման հետ կապված խնդիրների արդյունավետ լուծման գործում փոխադարձ շահագրգռվածությունից,

կարևոր նշանակություն տալով այդ նպատակներով բոլոր իրավական և այլ հնարավորությունների օգտագործմանը,

համաձայնեցին ներքոհիշյալի մասին.

Հոդված 1.

ՀԱՄԱՁԱՅՆԱԳՐԻ ԱՌԱՐԿԱՆ

1. Սույն Համաձայնագրի առարկան հանդիսանում է Կողմերի իրավասու մարմինների տնօրինությանը վերաբերող հարկային հանցագործությունների և իրավախախտումների բացահայտման, նախազգուշացման և խափանման ուղղությամբ արդյունավետ պայքարի կազմակերպման նպատակով Կողմերի իրավասու մարմինների համագործակցությունը:

2. Սույն Համաձայնագիրը չի շոշափում քաղաքացիական և քրեական գործերով իրավական օգնություն ցույց տալու մասին միջազգային պայմանագրերից բխող Կողմերի իրավունքներն ու պարտավորությունները:

Հոդված 2.

իՐԱՎԱՍՈՒ ՄԱՐՄԻՆՆԵՐԸ

1. Սույն Համաձայնագրի նպատակների համար իրավասու մարմիններն են`

հայկական Կողմից` Հայաստանի Հանրապետության հարկային տեսչությունը,

վրացական Կողմից` Վրաստանի հարկային պետական ծառայությունը:

2. Իրավասու մարմինների պաշտոնական անվանումը փոխվելու դեպքում Կողմերը անհապաղ ծանուցում են միմյանց այդ մասին:

Հոդված 3.

ՀԱՄԱԳՈՐԾԱԿՑՈՒԹՅԱՆ ՁևԵՐԸ

Սույն Համաձայնագրի շրջանակներում Կողմերը օգտագործում են համագործակցության հետևյալ ձևերը`

իրավաբանական և (կամ) ֆիզիկական անձանց կողմից կատարված հարկային հանցագործությունների և իրավախախտումների վերաբերյալ տեղեկատվության փոխանակում,

հարկային հանցագործությունների և իրավախախտումների բացահայտմանը, նախազգուշացմանը և խափանմանն ուղղված միջոցառումների անցկացման հարցերով փոխգործակցություն,

իրավաբանական և ֆիզիկական անձանց հարկման հետ կապված փաստաթղթերի համապատասխան ձևով վավերացված պատճենների ներկայացում,

ազգային հարկային համակարգերի, հարկային օրենսդրության փոփոխությունների և լրացումների, ինչպես նաև հարկային հանցագործությունների և իրավախախտումների դեմ պայքարի կազմակերպման հարցերով մեթոդական հանձնարարականների մասին տեղեկությունների փոխանակում,

հարկային հանցագործությունների և իրավախախտումների դեմ պայքարում օգտագործվող տեղեկատվական համակարգերի ստեղծման և գործարկման հարցերով փորձի փոխանակում,

համագործակցության ընթացքում ծագող հարցերով անհրաժեշտ օգնության մատուցում և գործունեության համակարգման իրականացում, ներառյալ` աշխատանքային խմբերի ստեղծում, ներկայացուցիչների փոխանակում և կադրերի ուսուցում, ինչպես նաև հարկային հանցագործությունների և իրավախախտումների դեմ պայքարի հիմնախնդիրների շուրջ գիտագործնական կոնֆերանսների և սեմինարների անցկացում:

Սույն Համաձայնագրի կատարման հետ կապված հարցերով Կողմերի իրավասու մարմինները հաղորդակցվում են անմիջականորեն:

Հոդված 4.

ՀԱՐԿԱՅԻՆ ՀԱՆՑԱԳՈՐԾՈՒԹՅՈՒՆՆԵՐԻ և ԻՐԱՎԱԽԱԽՏՈՒՄՆԵՐԻ ՄԱՍԻՆ ՏԵՂԵԿՈՒԹՅՈՒՆՆԵՐԻ ՓՈԽԱՆԱԿՈՒՄԸ

1. Հարկային հանցագործությունների և իրավախախտումների մասին տեղեկությունների փոխանակումը նախատեսում է հետևյալ տեղեկությունների տրամադրում`

իրավաբանական և (կամ) ֆիզիկական անձանց կողմից եկամուտները հարկումից թաքցնելու մասին` նշելով այն եղանակները, որոնք կիրառում են հարկային օրենսդրությունը խախտողները,

իրավաբանական և (կամ) ֆիզիկական անձանց կողմից պետական և առևտրային բանկերում հաշիվներ բացելու, ինչպես նաև այդ հաշիվների միջոցների շարժի մասին, եթե հիմքեր կան ենթադրելու, որ դրանցում գտնվում են հարկումից թաքցվող գումարներ,

իրավաբանական և (կամ) ֆիզիկական անձանց եկամուտների, գանձվող հարկերի գումարների և հարկման բազայի չափերի մասին, ինչպես նաև հարկային հանցագործությունների և իրավախախտումների բացահայտման, նախազգուշացման և խափանման նպատակով իրականացվող միջոցառումների մասին:

2. Սույն հոդվածի 1-ին կետով նախատեսված տեղեկությունները մի Կողմի իրավասու մարմնի կողմից տրամադրվում են մյուս Կողմի իրավասու մարմնին հարցման հիման վրա` պայմանով, որ տեղեկության տրամադրումը չի հակասում հարցվող Կողմի պետության շահերին և օրենսդրությանը:

Եթե Կողմերից մեկի իրավասու մարմինը գտնում է, որ իր տրամադրության տակ գտնվող տեղեկությունը հետաքրքրություն է ներկայացնում մյուս Կողմի իրավասու մարմնի համար, ապա նա կարող է այդ տեղեկությունը տրամադրել սեփական նախաձեռնությամբ:

Հոդված 5.

ՄԻՋՈՑԱՌՈՒՄՆԵՐԻ ԱՆՑԿԱՑՈՒՄԸ

Կողմերի իրավասու մարմինների փոխգործակցությունը հարկային հանցագործությունների և իրավախախտումների բացահայտման, նախազգուշացման և խափանման միջոցառումներ անցկացնելիս նման հանցագործություններ և իրավախախտումներ կատարած կամ դրանց կատարման մեջ կասկածվող անձանց նկատմամբ ներառում է ուժերի և միջոցների համատեղ պլանավորում, օգտագործում, այդ միջոցառումների անցկացման ընթացքի և արդյունքների մասին տեղեկությունների փոխանակում:

Հոդված 6.

ՓԱՍՏԱԹՂԹԵՐԻ ՊԱՏՃԵՆՆԵՐԻ ՆԵՐԿԱՅԱՑՈՒՄԸ

Կողմերի իրավասու մարմինները, ըստ հարցման, միմյանց ներկայացնում են իրավաբանական և (կամ) ֆիզիկական անձանց հարկմանը վերաբերող փաստաթղթերի (հաշիվներ, ապրանքագրեր, բեռնագրեր, պայմանագրեր, կոնտրակտներ, սերտիֆիկատներ, տեղեկանքներ և այլն), ինչպես նաև հարկային հանցագործություններին և իրավախախտումներին առնչվող հարցերի վերաբերյալ փաստաթղթերի պատճեններ: Պատճենները հավաստվում են լիազորված անձի ստորագրությամբ և կնիքով` օրենքով սահմանված կարգով:

Հոդված 7.

ԻՐԱՎԱԿԱՆ ԲՆՈՒՅԹԻ ՆՅՈՒԹԵՐԻ ՓՈԽԱՆԱԿՈՒՄԸ

Կողմերի իրավասու մարմինները կանոնավոր հիմքով իրականացնում են ազգային հարկային համակարգերի, հարկային օրենսդրության բնագավառում հանցագործությունների հետաքննությունների անցկացման և վարչական իրավախախտումների գործերի վարույթի իրավական հիմքերի մասին տեղեկությունների փոխանակում, ժամանակին տեղեկացնում են միմյանց հարկային օրենսդրության փոփոխությունների, ընդունված նոր նորմատիվ իրավական ակտերի, ինչպես նաև գործող նորմատիվ իրավական ակտերում կատարված փոփոխությունների մասին:

Հոդված 8.

ՀԱՄԱԳՈՐԾԱԿՑՈՒԹՅՈՒՆԸ ՏԵՂԵԿԱՏՎԱԿԱՆ ԱՊԱՀՈՎՄԱՆ ՀԱՐՑԵՐՈՒՄ

Կողմերի իրավասու մարմինները հարկային հանցագործությունների և իրավախախտումների դեմ պայքար կազմակերպելիս իրականացնում են տեղեկատվական համակարգերի ստեղծման և գործարկման հարցերով փորձի, մեթոդիկաների, ծրագրային ապահովման միջոցների և գիտական նյութերի փոխանակում:

Հոդված 9.

ՀԱՄԱԳՈՐԾԱԿՑՈՒԹՅՈՒՆԸ և ՓՈՐՁԻ ՓՈԽԱՆԱԿՈՒՄԸ ԿԱԴՐԵՐԻ ՊԱՏՐԱՍՏՄԱՆ ԲՆԱԳԱՎԱՌՈՒՄ

Կողմերի իրավասու մարմինները համագործակցում են իրենց ուսումնական հաստատությունների բազայի վրա կադրերի ուսուցման և վերապատրաստման, հարկային հանցագործությունների և իրավախախտումների դեմ պայքարի արդիական հարցերով համատեղ գիտական հետազոտությունների, գիտագործնական կոնֆերանսների և սեմինարների անցկացման բնագավառում:

Սույն հոդվածի շրջանակներում համագործակցության իրագործման կոնկրետ ձևերը և, մասնավորապես, դրա ֆինանսավորումը, սահմանվում են Կողմերի իրավասու մարմինների միջև կնքվող առանձին համաձայնագրերով:

Հոդված 10.

ՀԱՐՑՄԱՆ ՁևՆ ՈՒ ԲՈՎԱՆԴԱԿՈՒԹՅՈՒՆԸ

1. Տեղեկություն ստանալու հարցումը պետք է փոխանցվի գրավոր կամ հեռատիպային, ֆաքսիմիլային կամ համակարգչային կապի օգտագործման միջոցով:

Անհետաձգելի դեպքերում կարող է ընդունվել հեռախոսակապի միջոցով փոխանցվող բանավոր հարցում, սակայն այն պետք է անմիջապես գրավոր հաստատվի:

Հեռատիպային, ֆաքսիմիլային կամ համակարգչային կապը օգտագործելիս, ինչպես նաև բանավոր հարցման իսկության կամ բովանդակության առումով կասկածներ առաջանալիս հարցվող իրավասու մարմինը կարող է պահանջել գրավոր հաստատում:

2. Տեղեկություն ստանալու հարցումը պետք է պարունակի`

հարցում անող իրավասու մարմնի անվանումը,

հայցվող իրավասու մարմնի անվանումը,

հարցման էության շարադրանքը և դրա հիմնավորումը, ինչպես նաև այն կատարելու համար անհրաժեշտ այլ տեղեկություններ:

Քրեական գործերով տեղեկություն ստանալու հարցման մեջ թվարկվածից բացի նշվում են`

փաստացի հանգամանքների նկարագրումը,

հանցագործության որակավորումը,

հասցված վնասի չափը:

Հոդված 11.

ՀԱՐՑՄԱՆ ԿԱՏԱՐՈՒՄԸ

1. Հարցումը կատարման է ընդունվում անհապաղ: Հարցվող իրավասու մարմինը կարող է ճշգրտման կարգով լրացուցիչ տեղեկություն պահանջել, եթե դա անհրաժեշտ է հարցումը կատարելու համար:

2. Հարցումը կատարելու անհնարինության դեպքում հարցվող իրավասու մարմինը անհապաղ ծանուցում է այդ մասին հարցում անող իրավասու մարմնին:

Հարցման կատարումը մերժվում է, եթե դա կարող է վնաս հասցնել պետության ինքնիշխանությանը կամ անվտանգությանը կամ էլ հակասում է հարցվող իրավասու մարմնի պետության օրենսդրությանը:

Հարցում անող իրավասու մարմինը տեղեկացվում է հարցման կատարումը մերժելու պատճառների մասին:

Հոդված 12.

ՓՈԽԳՈՐԾԱԿՑՈՒԹՅՈՒՆԸ ՀԱՐՑՈՒՄԸ ԿԱՏԱՐԵԼԻՍ

Հարցվող իրավասու մարմինը կարող է թույլատրել հարցում անող իրավասու մարմնի լիազոր ներկայացուցիչներին` իր պետության տարածքում մասնակցել հարցման կատարմանը` ապահովելով նրանց աշխատանքի համար անհրաժեշտ պայմաններ, եթե դրանք չեն հակասում իր պետության օրենսդրությանը:

Հոդված 13.

ԼԵԶՈՒՆԵՐԸ

Տեղեկություն ստանալու հարցումը և դրա պատասխանը կազմվում են Կողմերի իրավասու մարմինների միջև համաձայնեցված լեզվով:

Հոդված 14.

ՏԵՂԵԿՈՒԹՅԱՆ ՕԳՏԱԳՈՐԾՈՒՄԸ

Մի Կողմի իրավասու մարմինը մյուս Կողմի իրավասու մարմնի խնդրանքով երաշխավորում է հարկային հանցագործությունների և իրավախախտումների բացահայտման, նախազգուշացման և խափանման հետ կապված հարցերի տեղեկության գաղտնիությունը:

Սույն Համաձայնագրի շրջանակներում ստացված տեղեկությունը չի կարող փոխանցվել երրորդ կողմին` առանց այդ տեղեկությունը տրամադրող իրավասու մարմնի գրավոր համաձայնության:

Հոդված 15.

ԾԱԽՍԵՐԸ

Կողմերի իրավասու մարմինները կրում են իրենց պետության տարածքում սույն Համաձայնագրի կատարման հետ կապված ծախսերը: Լրացուցիչ ծախսեր պահանջող հարցումներ ստանալու դեպքում Կողմերի իրավասու մարմինները քննարկում են դրանց ֆինանսավորման հարցը փոխադարձ պայմանավորվածությամբ:

Կողմերի իրավասու մարմինները միմյանց կհատուցեն թարգմանիչների ծառայությունների ծախսերը, որոնք կարող են պահանջվել հարցումը կատարելիս, եթե նրանց միջև այլ բան համաձայնեցված չէ:

Համաձայնեցված հանդիպումների ժամանակ, եթե չկա այլ գրավոր պայմանավորվածություն, ընդունող իրավասու մարմինը ապահովում և վճարում է իր պետության տարածքում մյուս Կողմի իրավասու մարմնի պատվիրակության ընդունման հետ կապված ծախսերը, իսկ ուղարկող իրավասու մարմինը կրում է ճանապարհածախսը:

Հոդված 16.

ՀԱՄԱՁԱՅՆԱԳՐԻ ԿԱՏԱՐՄԱՆ ՀԵՏԱԳԱ ՄԻՋՈՑՆԵՐԸ

Կողմերի իրավասու մարմինների ներկայացուցիչները անհրաժեշտության դեպքում հանդիպումներ են անցկացնում սույն Համաձայնագրի կատարման հետ կապված հարցերի քննարկման համար:

Հոդված 17.

ՀԱՄԱՁԱՅՆԱԳՐԻ ՈՒԺԻ ՄԵՋ ՄՏՆԵԼՆ ՈՒ ԳՈՐԾՈՂՈՒԹՅՈՒՆԸ ԴԱԴԱՐԵՑՆԵԼԸ

Սույն Համաձայնագիրն ուժի մեջ է մտնում դրա ուժի մեջ մտնելու համար անհրաժեշտ ներպետական ընթացակարգերը Կողմերի կողմից կատարվելու մասին վերջին գրավոր ծանուցման օրվանից և դադարեցնում է իր գործողությունը այն օրվանից վեց ամիս լրանալուց հետո, երբ Կողմերից մեկը մյուս Կողմին գրավոր կհայտնի դրա գործողությունը դադարեցնելու իր մտադրության մասին:

Կատարված է Երևան քաղաքում 1997 թվականի հունվարի 14-ին, երկու օրինակով, յուրաքանչյուրը` հայերեն, վրացերեն և ռուսերեն, ընդ որում երեք տեքստերն էլ հավասարազոր են: Սույն Համաձայնագրի հայերեն և վրացերեն տեքստերի վերաբերյալ Կողմերի մոտ տարաձայնություններ առաջանալու դեպքում նախապատվությունը կտրվի սույն Համաձայնագրի ռուսերեն տեքստին:

Համաձայնագիրն ուժի մեջ է մտել 2001 թվականի հուլիսի 5-ից: