040.0901.27.09.01

«Վավերացնում եմ»
Հայաստանի Հանրապետության
Նախագահ Ռ. Քոչարյան
27 սեպտեմբերի 2001 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

27 սեպտեմբերի 2001 թվականի N 901
քաղ. Երևան

ԱՊԱՐԱՆԻ «ԱՐԱԳԱԾ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ՊԵՏԱԿԱՆ ՍԵՓԱԿԱՆՈՒԹՅՈՒՆ ՀԱՆԴԻՍԱՑՈՂ ԲԱԺՆԵՏՈՄՍԵՐԻ ՄԱՍՆԱՎՈՐԵՑՄԱՆ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2000 ԹՎԱԿԱՆԻ ԴԵԿՏԵՄԲԵՐԻ 31-Ի N 896 ՈՐՈՇՈՒՄԸ ՄԱՍՆԱԿԻՈՐԵՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ

(վերնագիրը լրաց. 15.04.02 N 411)

«Պետական գույքի մասնավորեցման (սեփականաշնորհման) մասին» Հայաստանի Հանրապետության օրենքի 18-րդ հոդվածին համապատասխան` Հայաստանի Հանրապետության կառավարությունը որոշում է.

1. Սահմանել Ապարանի «Արագած» փակ բաժնետիրական ընկերության կանոնադրական կապիտալը` 169579 հազ. դրամ, որը համապատասխանում է 169579 բաժնետոմսի` յուրաքանչյուրը 1000 դրամ անվանական արժեքով:

2. Մասնավորեցման ենթակա Ապարանի «Արագած» փակ բաժնետիրական ընկերության պետական սեփականություն հանդիսացող բաժնետոմսերի արժեքը 169579 հազ. դրամ է, որը համապատասխանում է 169579 բաժնետոմսի` յուրաքանչյուրը 1000 դրամ անվանական արժեքով:

(2-րդ կետը լրաց. 15.04.02 N 411)

3. Ապարանի «Արագած» փակ բաժնետիրական ընկերության պետական սեփականություն հանդիսացող բաժնետոմսերն ուղղակի վաճառքի ձևով մասնավորեցնել «Միջազգային բիզնես կենտրոն» փակ բաժնետիրական ընկերությանը (քաղ. Երևան, Սայաթ-Նովայի 25/13)` հայտնի գնորդին:

(3-րդ կետը լրաց. 15.04.02 N 411)

4. Սահմանել մասնավորեցման ենթակա Ապարանի «Արագած» փակ բաժնետիրական ընկերության պետական սեփականություն հանդիսացող բաժնետոմսերի գինը` 42400 հազ. դրամ, որը համապատասխանում է մասնավորեցման ենթակա պետական սեփականություն հանդիսացող բաժնետոմսերի 25 տոկոսին:

(4-րդ կետը լրաց. 15.04.02 N 411)

5. Բաժնետոմսերի վաճառքի գինը գնորդի կողմից վճարվում է մասնավորեցման պայմանագրի կնքման օրվանից մեկ տարի հետո` հաջորդ 5 ամսվա ընթացքում:

6. Հայաստանի Հանրապետության պետական գույքի կառավարման նախարարությանը` մեկամսյա ժամկետում գնորդի հետ Հայաստանի Հանրապետության օրենսդրությամբ սահմանված կարգով կնքել Ապարանի «Արագած» փակ բաժնետիրական ընկերության պետական սեփականություն հանդիսացող բաժնետոմսերի մասնավորեցման մասին պայմանագիր:

(6-րդ կետը լրաց. 15.04.02 N 411)

7. Մասնավորեցման պայմանագրում նախատեսել գնորդի կողմից ստանձնվող հետևյալ պարտավորությունները`

ա) մարել Ապարանի «Արագած» փակ բաժնետիրական ընկերության 2001 թվականի հուլիսի 1-ի դրությամբ հաշվապահական հաշվեկշռում արտացոլված Հայաստանի Հանրապետության պետական բյուջեին և Հայաստանի Հանրապետության սոցիալական ապահովագրության պետական հիմնադրամին վճարման ենթակա պարտավորությունների 50 տոկոսը (13920 հազ. դրամ)` պայմանագրի կնքման օրվանից մեկ ամսվա ընթացքում, իսկ մնացած մասը` մինչև 2002 թվականի սեպտեմբերի 1-ը:

բ) 2001-2004 թվականների ընթացքում հիմնական միջոցների (շենքեր, շինություններ, սարքավորումներ) ձեռքբերման և սոցիալական ծրագրերի իրականացման համար ներդնել 300000 ԱՄՆ-ի դոլարին համարժեք դրամ.

գ) ապահովել հետևյալ սոցիալական երաշխիքները`

մինչև 2001 թվականի ավարտը` 60 աշխատատեղ` 20 հազ. դրամ ամսական միջին աշխատավարձով.

մինչև 2002 թվականի ավարտը` 85 աշխատատեղ` 30 հազ. դրամ ամսական միջին աշխատավարձով.

մինչև 2003 թվականի ավարտը` 120 աշխատատեղ` առնվազն 40 հազ. դրամ ամսական միջին աշխատավարձով:

(7-րդ կետը լրաց. 15.04.02 N 411)

8. Ապարանի «Արագած» փակ բաժնետիրական ընկերությունը 1998-1999 թվականների տնտեսական գործունեության արդյունքներով վճարման ենթակա շահաբաժինների գծով պարտավորություններ չունի:

(8-րդ կետը լրաց. 15.04.02 N 411)

9. Հայաստանի Հանրապետության պետական եկամուտների նախարարությանը և Հայաստանի Հանրապետության սոցիալական ապահովագրության պետական հիմնադրամին` Ապարանի «Արագած» փակ բաժնետիրական ընկերության հետ կնքել հաշտության համաձայնություն` մեկ տարի ժամկետով:

(9-րդ կետը լրաց. 15.04.02 N 411)

10. Հայաստանի Հանրապետության Արագածոտնի մարզպետին` Ապարանի «Արագած» փակ բաժնետիրական ընկերության բաժնետոմսերի մասնավորեցումից հետո 20-օրյա ժամկետում, Հայաստանի Հանրապետության հողային օրենսգրքի 118-րդ հոդվածին համապատասխան, ապահովել ընկերության զբաղեցրած հողատարածքի վարձակալության պայմանագրի կնքումը:

(10-րդ կետը լրաց. 15.04.02 N 411)

11. Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեին` մեկամսյա ժամկետում` Հայաստանի Հանրապետության օրենսդրությամբ սահմանված կարգով գրանցել մասնավորեցված Ապարանի «Արագած» փակ բաժնետիրական ընկերության կողմից հողի օգտագործման, ինչպես նաև նրան սեփականության իրավունքով պատկանող անշարժ գույքի նկատմամբ սեփականության իրավունքը:

(11-րդ կետը լրաց. 15.04.02 N 411)

12. Հայաստանի Հանրապետության բնապահպանության նախարարությանը` Հայաստանի Հանրապետության օրենսդրությամբ սահմանված կարգով քննարկել և հաստատել Ապարանի «Արագած» փակ բաժնետիրական ընկերության ջրօգտագործման, ջրահեռացման, արտանետումների սահմանաքանակները և նրա հետ կնքել համապատասխան պայմանագիր:

(12-րդ կետը լրաց. 15.04.02 N 411)

13. Վճարումները կատարել Հայաստանի Հանրապետության արժույթով:

14. Ուժը կորցրած ճանաչել Հայաստանի Հանրապետության կառավարության 2000 թվականի դեկտեմբերի 31-ը «Պետական գույքը մասնավորեցնելու մասին» N 896 որոշման 2.1-2.7-րդ կետերը:

15. Սույն որոշումն ուժի մեջ է մտնում 2001 թվականի սեպտեմբերի 27-ից:

Հայաստանի Հանրապետության վարչապետ

Ա. Մարգարյան