ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՎՃՌԱԲԵԿ ԴԱՏԱՐԱՆԻ ՆԱԽԱԳԱՀ

25 մայիսի 2009 թ. ք. Երևան

N 03-Ն

Ո Ր Ո Շ ՈՒ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎՃՌԱԲԵԿ ԴԱՏԱՐԱՆԻ ՆԱԽԱԳԱՀԻ 2006 ԹՎԱԿԱՆԻ ՕԳՈՍՏՈՍԻ 30-Ի ԹԻՎ 01-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հիմք ընդունելով «ՀՀ դատական օրենսգրքում փոփոխություններ և լրացումներ կատարելու մասին» 05.02.2009 թվականի թիվ ՀՕ-46, 07.04.2009 թվականի թիվ ՀՕ-91 Հայաստանի Հանրապետության օրենքները և ղեկավարվելով «Դատական ծառայության մասին» Հայաստանի Հանրապետության օրենքի 3-րդ հոդվածի երրորդ մասով, «Իրավական ակտերի մասին» Հայաստանի Հանրապետության օրենքի 70-րդ հոդվածի հինգերորդ մասով և «Պետական կառավարչական հիմնարկների մասին» Հայաստանի Հանրապետության օրենքի 11-րդ հոդվածի առաջին մասի «բ» և «զ» ենթակետերով` որոշում եմ`

Հայաստանի Հանրապետության վճռաբեկ դատարանի նախագահի 2006 թվականի օգոստոսի 30-ի «Հայաստանի Հանրապետության դատական դեպարտամենտ» պետական կառավարչական հիմնարկ ստեղծելու, «Հայաստանի Հանրապետության դատական դեպարտամենտ» պետական կառավարչական հիմնարկի կանոնադրությունն ու կառուցվածքը հաստատելու մասին» թիվ 01-Ն որոշման հավելվածներում (այսուհետ` Հավելված) կատարել հետևյալ փոփոխությունները և լրացումները.

1. Հավելված 1-ի 16-րդ կետը շարադրել նոր խմբագրությամբ` հետևյալ բովանդակությամբ.

«16. Դեպարտամենտի առանձնացված ստորաբաժանումներն են դատարանների աշխատակազմերը, արդարադատության խորհրդի աշխատակազմը և դատական կարգադրիչների ծառայությունը:»:

2. Հավելված 1-ի 22-րդ կետի «գ» ենթակետում «փոփոխում է» բառից հետո ավելացնել «դատական կարգադրիչների ծառայության կառուցվածքը, առանձնացված ստորաբաժանումների ցանկը, դատական կարգադրիչների ծառայության պաշտոնների և» բառերը:

3. Ուժը կորցրած ճանաչել Հավելված 1-ի 27-րդ կետի «զ» ենթակետը:

4. Հավելված 1-ի 27-րդ կետի «թ» ենթակետից հանել «դատական կարգադրիչների կոչումներ,» բառերը:

5. Հավելված 1-ի 27-րդ կետի «ժ» ենթակետը շարադրել նոր խմբագրությամբ` հետևյալ բովանդակությամբ.

«ժ) տրամադրում է արձակուրդ Դեպարտամենտի կենտրոնական մարմնի աշխատողներին, առանձնացված ստորաբաժանումների ղեկավարներին և դատական կարգադրիչների ծառայության` իր կողմից պաշտոնում նշանակված ծառայողներին.»:

6. Հավելված 1-ի 27-րդ կետի «ժա» ենթակետը շարադրել նոր խմբագրությամբ` հետևյալ բովանդակությամբ.

«ժա) Դատարանների նախագահների խորհրդի հաստատմանն է ներկայացնում դատական ծառայության պաշտոնների և դատական կարգադրիչների ծառայության պաշտոնների անվանացանկը և հաստիքների քանակը, ինչպես նաև դատական ծառայության պաշտոնների անձնագրերի նկարագրերը.»:

7. Հավելված 1-ի 27-րդ կետը լրացնել.

ա) «իդ» ենթակետով` հետևյալ բովանդակությամբ.

«իդ) համակարգում և ընդհանուր վերահսկողություն է իրականացնում դատական կարգադրիչների ծառայության գործունեության նկատմամբ.»,

բ) «իե» ենթակետով` հետևյալ բովանդակությամբ.

«իե) ընդունում է դատական կարգադրիչների ծառայության գործունեության կազմակերպմանն ուղղված հրամաններ և տալիս է կարգադրություններ.»,

գ) «իզ» ենթակետով` հետևյալ բովանդակությամբ.

«իզ) նշանակում, ազատում և դատական կարգադրիչների կոչումներ է շնորհում դատական կարգադրիչների ծառայության` իր կողմից պաշտոնում նշանակված ծառայողներին.»,

դ) «իէ» ենթակետով` հետևյալ բովանդակությամբ.

«իէ) դատական կարգադրիչների վերաբերյալ նշանակում կամ դադարեցնում է ծառայողական քննություններ, փոփոխում է ծառայողական քննություն կատարողին.»,

ե) «իը» ենթակետով` հետևյալ բովանդակությամբ.

«իը) խրախուսում կամ կարգապահական տույժի է ենթարկում դատական կարգադրիչների ծառայության` իր կողմից պաշտոնում նշանակված ծառայողներին.»,

զ) «իթ» ենթակետով` հետևյալ բովանդակությամբ.

«իթ) սահմանում է դատական կարգադրիչների վերապատրաստման և հատուկ ուսուցման կարգը.»,

է) «լ» ենթակետով` հետևյալ բովանդակությամբ.

«լ) կազմավորում է դատական կարգադրիչների ատեստավորման հանձնաժողովը, սահմանում է ատեստավորման անցկացման կարգն ու պայմանները:»:

8. Հավելված 1-ի 29-րդ կետում «տեղակալները,» բառից հետո լրացնել «բացառությամբ դատական կարգադրիչների ծառայության պետի,» բառերը:

9. Հավելված 1-ի 30-րդ կետը լրացնել նոր նախադասությամբ` հետևյալ բովանդակությամբ.

«Դատական կարգադրիչների ծառայության պետի լիազորությունները սահմանվում են Հայաստանի Հանրապետության դատական օրենսգրքի 7-րդ բաժնի դրույթներով և դատական կարգադրիչների ծառայության կանոնադրությամբ:»:

10. Հավելված 1-ի 39-րդ կետի «բ» ենթակետը շարադրել նոր խմբագրությամբ` հետևյալ բովանդակությամբ.

«բ) վարում է դատական ծառայողների և դեպարտամենտի ղեկավարի կողմից նշանակված դատական կարգադրիչների անձնական գործերը.»:

11. Ուժը կորցրած ճանաչել Հավելված 1-ի 39-րդ կետի «թ» ենթակետը:

12. Հավելված 1-ի 39-րդ կետը լրացնել նոր «ժբ» ենթակետով` հետևյալ բովանդակությամբ.

«ժբ) Վարչությունն ունի իր անվամբ կլոր կնիք, դրոշմակնիքներ, ձևաթուղթ և իր գործառույթների շրջանակում իրականացնում է պաշտոնական գրագրություն»:

13. Հավելված 1-ի 49-րդ կետը շարադրել նոր խմբագրությամբ` հետևյալ բովանդակությամբ.

«49. Դատական կարգադրիչների ծառայությունը իրականացնում է Հայաստանի Հանրապետության դատական օրենսգրքով, օրենքներով, իրենց կանոնադրությամբ և իրավական այլ ակտերով նախատեսված գործառույթներ»:

14. Ուժը կորցրած ճանաչել որոշման Հավելված 1-ի 50-րդ կետը:

15. Ուժը կորցրած ճանաչել Հավելված 2-ի 1-ին բաժնի 2-րդ կետի «ա» ենթակետը։

16. Ուժը կորցրած ճանաչել Հավելված 2-ի 2-րդ բաժնի 4-րդ, 5-րդ, 6-րդ, 7-րդ, 8-րդ և 9-րդ կետերը։

17. Հավելված 2-ի 2-րդ բաժինը լրացնել «28-րդ» կետով` հետևյալ բովանդակությամբ.

«28. Դատական կարգադրիչների ծառայություն»:

Ա. Մկրտումյան