040.0098.18.02.98

«ՎԱՎԵՐԱՑՆՈՒՄ ԵՄ»

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՆԱԽԱԳԱՀԻ ՊԱՇՏՈՆԱԿԱՏԱՐ Ռ. ՔՈՉԱՐՅԱՆ

18 ՓԵՏՐՎԱՐԻ 1998 Թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

18 փետրվարի 1998 թվականի N 98
քաղ. Երևան

ԿԱԴԱՍՏՐԱՅԻՆ ՔԱՐՏԵԶՆԵՐԻ ԵՎ ԿԱԴԱՍՏՐԱՅԻՆ ՀԱՏԱԿԱԳԾԵՐԻ ՄԱՍՇՏԱԲՆԵՐՆ ՈՒ ՁԵՎԵՐԸ ՍԱՀՄԱՆԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Սահմանել, որ կադաստրային քարտեզագրման նյութերը (կադաստրային քարտեզներ և կադաստրային հատակագծեր) տեղանքի փոքրացված և ընդհանրացված արտապատկերումներն են համապատասխան մասշտաբով և պայմանական նշաններով, որոնց վրա արտահայտվում են անշարժ գույքի միավորները (անկախ սեփականության ձևից), դրանց տեղադրությունը, սահմանները, մակերեսը, տեսքերն ու տեսակները, վերգետնյա ու ստորգետնյա հաղորդակցուղիների ցանկը և անշարժ գույքի վերաբերյալ այլ տվյալներ:

(1-ին կետը փոփ. 20.11.99 N 693)

2. Կադաստրային քարտեզները և կադաստրային հատակագծերն ստեղծվում են գեոդեզիական ցանցի հիման վրա, որի համար հիմք է հանդիսանում պետական գեոդեզիական ցանցը:

3.Կադաստրային քարտեզագրման նյութերը բաժանվում են երկու խմբի`

ա) կադաստրային շրջանացման քարտեզներ,

բ) կադաստրային հատակագծեր:

4. Կադաստրային շրջանցման քարտեզների կազմման համար հիմք են հանդիսանում` 1:200000, 1:100000, 1:500000 և 1:25000 մասշտաբների տեղագրական քարտեզները, որոնց վրա ցույց են տրվում կադաստրային տարածքները, ենթատարածքները, սեկտորները և թաղամասերը:

5. Կադաստրային հատակագծերը կազմվում են կադաստրային հանույթների հիման վրա:

6. Կադաստրային հատակագծերը կազմվում են`

ա) բնակավայրերի համար` 1:500, 1:1000, 1:2000, 1:5000 մասշտաբների.

բ) բնակավայրերից դուրս գտնվող տարածքների համար` 1:2000, 1:5000, 1:10000 մասշտաբների:

(6-րդ կետը լրաց. 20.11.99 N 693)

7. Կադաստրային հանութային նյութերը կազմվում են 50x50 սմ և 40x40 սմ չափերով հիմքերի վրա:

8. Կադաստրային քարտեզները ներկայացվում են ավանդական ձևով` թղթի վրա, կամ թվային քարտեզների ձևով` էլեկտրոնային մագնիսական կրիչների վրա:

 (8-րդ կետը լրաց. 20.11.99 N 693)

9. Կադաստրային հատակագծերում անշարժ գույքի վերաբերյալ տվյալները պետք է համապատասխանեն անշարժ գույքի պետական գրանցման միասնական մատյանի գրառումներին:

10. Կադաստրային հատակագծերում յուրաքանչյուր սեփականության միավորի տրվում է առանձին կադաստրային համար (ծածկագիր):

 (10-րդ կետը փոփ. 20.11.99 N 693)

11. Հայաստանի Հանրապետության անշարժ գույքի պետական միասնական կադաստրի վարչությանը` երկամսյա ժամկետում սահմանել կադաստրային հատակագծերի ճշտության նկատմամբ առաջադրվող պահանջները, պայմանական նշանները և կադաստրային քարտեզագրման աշխատանքների իրականացման մասին հրահանգը:

12. Սույն որոշումն ուժի մեջ է մտնում հրապարակման պահից:

Հայաստանի Հանրապետության վարչապետ

Ռ. Քոչարյան