«Գրանցված է»
ՀՀ արդարադատության
նախարարության կողմից
16 մայիսի 2007 թ.
Պետական գրանցման թիվ 60007210

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ

30 մարտի 2007 թ. ք. Երևան

N 140-Ն

Ո Ր Ո Շ ՈՒ Մ

ՀԱՆՐԱՅԻՆ ՇԱՐԺԱԿԱՆ ԲՋՋԱՅԻՆ ԿԱՊԻ ԿԱՆԽԱՎՃԱՐԱՅԻՆ ՀԵՌԱԽՈՍԱՔԱՐՏԵՐԻ ՏՐԱՄԱԴՐՄԱՆ ՄԱՍԻՆ

Ելնելով հանրային շահի և ազգային անվտանգության շահերի պաշտպանության անհրաժեշտությունից և հիմք ընդունելով «Էլեկտրոնային հաղորդակցության մասին» Հայաստանի Հանրապետության օրենքի 5-րդ հոդվածի 1-ին մասի 2-րդ կետի ի) ենթակետը, 6-րդ հոդվածի 1-ին մասը, 2-րդ մասի 1-ին կետը` Հայաստանի Հանրապետության հանրային ծառայությունները կարգավորող հանձնաժողովը որոշում է.

1. Սահմանել, որ հանրային շարժական բջջային կապի ծառայություններ մատուցողները`

1) 2007 թվականի հուլիսի 1-ից հանրային շարժական բջջային կապի կանխավճարային հեռախոսաքարտերը հաճախորդներին (բաժանորդներին) տրամադրում են գրավոր պայմանագրի հիման վրա.

2) սույն կետի 1-ին ենթակետում նշված ժամկետից շուտ իրացված (շրջանառության մեջ գտնվող) հանրային շարժական բջջային կապի կանխավճարային հեռախոսաքարտեր ունեցող հաճախորդների (բաժանորդների) հետ մինչև 2008 թվականի հոկտեմբերի 1-ը վերակնքում են գրավոր պայմանագրեր.

3) ֆիզիկական անձանց հետ կնքվող (վերակնքվող) սույն կետում նշված գրավոր պայմանագրերին կցում են անձը հաստատող փաստաթղթի (անձնագիր կամ զինվորական գրքույկ, կամ Հայաստանի Հանրապետության օրենսդրությամբ նախատեսված անձը հաստատող այլ փաստաթուղթ) ընթեռնելի պատճենը և պայմանագրերը կնքում (վերակնքում) են ֆիզիկական անձի ներկայությամբ, իսկ այլ անձանց հետ պայմանագրերը կնքում (վերակնքում) են երկկողմ կնիքներով դրոշմված փաստաթուղթ կազմելու միջոցով.

4) վարում և պահպանում են հաճախորդների (բաժանորդների) տվյալների էլեկտրոնային և փաստաթղթային բազան:

(1-ին կետը փոփ. 30.10.07 N 486-Ն, 15.02.08 N 62-Ն, 23.06.08 N 326-Ն)

1.1. Սահմանել, որ մինչև 2008 թվականի հոկտեմբերի 1-ը սույն որոշման 1-ին կետում նշված գրավոր պայմանագիր չվերակնքվելու դեպքում հանրային շարժական բջջային կապի ծառայություններ մատուցողների կողմից հանրային շարժական բջջային կապի ծառայությունների մատուցումը կդադարեցվի` մինչև գրավոր պայմանագրի վերակնքումը:

(1.1 կետը լրաց. 23.06.08 N 326-Ն)

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀՀ հանրային ծառայությունները կարգավորող հանձնաժողովի նախագահ`

Ռ. Նազարյան