Հ Ա Մ Ա Ձ Ա Յ Ն Ա Գ Ի Ր

Ստուգաչափային և չափագիտական վկայագրման նպատակով նորմատիվ փաստաթղթերի, չափանմուշների, չափման միջոցների և ստանդարտ նմուշների փոխադրման համար հատուկ թույլտվություն տալու և մաքսային տուրքերից ու հարկերից ազատելու մասին

Սույն Համաձայնագրի մասնակից պետությունների Կառավարությունները, այսուհետ՝ Կողմեր,

հիմնվելով 1992 թվականի մարտի 13-ի՝ «Ստանդարտացման, չափագիտության և սերտիֆիկացման բնագավառում համաձայնեցված քաղաքականություն վարելու մասին» Համաձայնագրի վրա,

հաշվի առնելով Համաձայնագրի մասնակից պետությունների տարածքներում ստեղծված չափագիտական հիմքը և չափման միջոցներ ու ստանդարտ նմուշներ արտադրող, ստուգաչափում և չափագիտական վկայագրում իրականացնող ձեռնարկությունների մասնագիտացումը,

գիտակցելով չափումների միասնականության ապահովման համաձայնեցված մեթոդաբանության և չափանմուշների, ստանդարտ նմուշների, հաստատված տեսակի չափման միջոցների և գործող նորմատիվ փաստաթղթերի մասին գիտատեխնիկական տեղեկատվության պատրաստման և փոխանակման տեխնոլոգիայի պահպանման, ինչպես նաև Օրենսդրական չափագիտության միջազգային կազմակերպության (ՄՕԶՄ) և Ստանդարտացման միջազգային կազմակերպության (ԻՍՕ) շրջանակներում համապատասխան միջազգային պարտավորությունների կատարման անհրաժեշտությունը,

համաձայնեցին ներքոհիշյալի մասին.

Հ ո դ վ ա ծ  1

Սույն Համաձայնագրի օբյեկտ են հանդիսանում ստանդարտացման, չափագիտության և սերտիֆիկացման համակարգում կիրառվող նորմատիվ փաստաթղթերը, չափանմուշները, չափման միջոցները և ստանդարտ նմուշները, այսուհետ՝ ապրանքներ:

Հ ո դ վ ա ծ  2

Ստուգաչափային և չափագիտական վկայագրման նպատակով փոխադրվող ապրանքները ազատվում են մաքսային տուրքերի, հարկերի վճարումից և հատուկ թույլտվություն ստանալուց:

Հ ո դ վ ա ծ  3

Փոխադրման ենթակա ապրանքների ցանկը (անվանացանկը) սահմանում են ստանդարտացման, չափագիտության և սերտիֆիկացման ազգային մարմինները:

Հ ո դ վ ա ծ  4

Սույն Համաձայնագրի մեկնաբանման կամ կիրառման հետ կապված վեճերը և տարաձայնությունները շահագրգիռ Կողմերի միջև լուծվում են խորհրդակցությունների (բանակցությունների) միջոցով:

Հ ո դ վ ա ծ  5

Սույն Համաձայնագիրը բաց է նրա նպատակները և սկզբունքները լիովին ընդունող այլ պետությունների կողմից միանալու համար՝ ավանդապահին՝ Բելառուսի Հանրապետության կառավարությանը, միանալու վերաբերյալ փաստաթղթերը հանձնելու միջոցով:

Հ ո դ վ ա ծ  6

Սույն Համաձայնագիրը կնքվում է անսահմանափակ ժամկետով:

Յուրաքանչյուր Կողմ իրավունք ունի դուրս գալ սույն Համաձայնագրից՝ իր որոշման մասին ոչ ուշ, քան դուրս գալուց 12 ամիս առաջ գրավոր ծանուցելով ավանդապահին:

Հ ո դ վ ած  7

Սույն Համաձայնագիրն ուժի մեջ է մտնում պետությունների կողմից Համաձայնագիրն ուժի մեջ մտնելու համար անհրաժեշտ ներպետական ընթացակարգերը կատարելու մասին երրորդ ծանուցումը ավանդապահին հանձնելու օրվանից:

Կատարված է Ալմաթի քաղաքում 1995 թվականի փետրվարի 10-ին՝ մեկ բնօրինակով, ռուսերեն: Բնօրինակը պահվում է Բելառուսի Հանրապետության կառավարության արխիվում, որը սույն Համաձայնագիրը ստորագրած յուրաքանչյուր պետության կուղարկի Համաձայնագրի հաստատված պատճենը:

*Համաձայնագիրը Հայաստանի Հանրապետության համար ուժի մեջ է մտել 2002 թվականի հոկտեմբերի 31-ից: