ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ 

Ո Ր Ո Շ ՈՒ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԸՆՏՐԱԿԱՆ ՕՐԵՆՍԳՐՔԻ 13-ՐԴ ՀՈԴՎԱԾԻ 1-ԻՆ ԵՎ 40-ՐԴ ՀՈԴՎԱԾԻ 1-ԻՆ ԿԵՏԵՐԻ ՏԱՐԱԲՆՈՒՅԹ ԸՆԿԱԼՈՒՄԸ ԲԱՑԱՌԵԼՈՒ ՆՊԱՏԱԿՈՎ ՊԱՇՏՈՆԱԿԱՆ ՊԱՐԶԱԲԱՆՄԱՆ ՄԱՍԻՆ

Հայաստանի Հանրապետության ընտրական օրենսգրքի 13-րդ հոդվածի 1-ին և 40-րդ հոդվածի 1-ին կետերի դրույթների տարաբնույթ ընկալումը բացառելու նպատակով և հիմք ընդունելով այն, որ.

1. Հայաստանի Հանրապետության ընտրական օրենսգրքի 13-րդ հոդվածի 1-ին կետի համաձայն Հայաստանի Հանրապետության ընտրողների ցուցակը, բացառությամբ զինվորական մասերում, կալանքի տակ պահելու հիմնարկներում կազմվող և ընտրողների ստորագրած ցուցակների, ազատ է ծանոթության համար:

Ընտրողների կողմից ստորագրված ցուցակները հրապարակման ենթակա չեն, դրանցից պատճեններ չեն հանվում:

2. Հայաստանի Հանրապետության ընտրական օրենսգրքի 40-րդ հոդվածի 1-ին կետի համաձայն տեղամասային ընտրական հանձնաժողովի որոշումները, գործողությունները (անգործությունը) բողոքարկելու վերաբերյալ դիմումները, այդ թվում` քվեարկության արդյունքների վերահաշվարկի պահանջի մասին դիմումները, ներկայացվում են համապատասխան ընտրատարածքային ընտրական հանձնաժողով:

3. Հայաստանի Հանրապետության ընտրական օրենսգրքի 40.2-րդ հոդվածի 8-րդ կետի համաձայն ընտրատարածքային ընտրական հանձնաժողովը քվեարկության արդյունքների վերահաշվարկն իրականացնում է ընտրական տեղամասում քվեարկության արդյունքների ամփոփման համար Հայաստանի Հանրապետության ընտրական օրենսգրքով սահմանված պահանջներին համապատասխան, իսկ տեղամասային ընտրական հանձնաժողովը քվեարկության արդյունքներն ամփոփում է հանձնաժողովի նիստում:

Ընտրական հանձնաժողովի նիստերին կարող են ներկա գտնվել թեկնածուների վստահված անձինք, դիտորդներ, զանգվածային լրատվության միջոցների ներկայացուցիչներ:

4. Հայաստանի Հանրապետության ընտրական օրենսգրքի 40.1-րդ հոդվածի 4-րդ կետի համաձայն քվեարկության արդյունքները բողոքարկվելու դեպքում կողմն այլ փաստաթղթերի հետ միասին իրավունք ունի ծանոթանալու ընտրողների կողմից ստորագրված ցուցակներին: Դրանք բողոքարկող կողմը հրապարակելու և տպագրելու, քաղվածքներ կատարելու և պատճենահանելու իրավունք չունի:

Հայաստանի Հանրապետության կենտրոնական ընտրական հանձնաժողովը «Իրավական ակտերի մասին» Հայաստանի Հանրապետության օրենքի 87-րդ հոդվածի 2-րդ մասի «դ» կետի համաձայն պարզաբանում է.

Ընտրողների կողմից ստորագրված ցուցակները հրապարակման ենթակա չեն, դրանցից պատճեններ չեն հանվում և քվեարկությունից հետո այդ ցուցակներին կարելի է ծանոթանալ Հայաստանի Հանրապետության ընտրական օրենսգրքով սահմանված կարգով և ժամկետներում քվեարկության արդյունքների վերահաշվարկի մասին դիմում ներկայացնելու դեպքում:

ՀՀ կենտրոնական ընտրական հանձնաժողովի նախագահ՝

Գ. Ազարյան