ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՎՃՌԱԲԵԿ ԴԱՏԱՐԱՆ

ՀՀ տնտեսական դատարանի վճիռ Քաղաքացիական գործ թիվ Տ1-43/2007թ.

Քաղաքացիական գործ թիվ 3-1461 (ՏԴ) 2007 թ.

Նախագահող դատավոր՝

Էդ. Նահապետյան

Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀՀ վճռաբեկ դատարանի քաղաքացիական պալատը (այսուհետ` Վճռաբեկ դատարան)

	նախագահությամբ`	Հ. Մանուկյանի
	մասնակցությամբ դատավորներ`	Ս. Գյուրջյանի
		Վ. Աբելյանի
		Ս. Անտոնյանի
		Ս. Սարգսյանի

2007 թվականի հոկտեմբերի 10-ին

դռնբաց դատական նիստում քննելով Մարալիկի քաղաքապետի և «Շիրակ-Ջրմուղկոյուղի» ՓԲԸ-ի վճռաբեկ բողոքը ՀՀ տնտեսական դատարանի (այսուհետ՝ Տնտեսական դատարան) թիվ Տ1-43/2007թ. քաղաքացիական գործով 06.03.2007 թվականին կայացված վճռի դեմ ըստ «Հայավտոկայարան» ՓԲԸ-ի (այսուհետ` Ընկերություն) դիմումի ընդդեմ Մարալիկի քաղաքապետարանի՝ պաշտոնատար անձի գործողությունը վիճարկելու պահանջի մասին,

ՊԱՐԶԵՑ

1. Գործի դատավարական նախապատմությունը.

Դիմելով դատարան՝ Ընկերությունը պահանջել է պարտադրել Մարալիկի քաղաքապետարանին տրամադրել Ընկերությանը ՀՀ հողային օրենսգրքի 60-րդ հոդվածի սահմանափակումների վերաբերյալ տեղեկանք՝ անշարժ գույքի սեփականության իրավունքի գրանցման վկայականում համապատասխան փոփոխություն կատարելու նպատակով:

Տնտեսական դատարանի 06.03.2007 թվականի վճռով դիմումը բավարարվել է:

Սույն գործով վճռաբեկ բողոք են ներկայացրել Մարալիկի քաղաքապետը և «Շիրակ-Ջրմուղկոյուղի» ՓԲԸ-ն:

Ընկերությունը ներկայացրել է վճռաբեկ բողոքի պատասխան:

Կողմերը Վճռաբեկ դատարան են ներկայացրել 2007 թվականի հոկտեմբերի 8-ին գրավոր ձևակերպված հաշտության համաձայնությունը և պահանջել են այն հաստատել:

Վճռաբեկ դատարանի կողմից կողմերին պարզաբանվել է ՀՀ քաղաքացիական դատավարության օրենսգրքի 110-րդ հոդվածով սահմանված հաշտության համաձայնությամբ գործի վարույթը կարճելու դատավարական հետևանքները:

2. Վճռաբեկ դատարանի պատճառաբանությունները և եզրահանգումը.

Ուսումնասիրելով 2007 թվականի հոկտեմբերի 8-ին կազմված և գործին մասնակցող անձանց կողմից հաշտության համաձայնությունը՝ Վճռաբեկ դատարանը գտնում է, որ այն չի հակասում օրենքին և չի խախտում այլ անձանց իրավունքներն ու օրինական շահերը:

ՀՀ քաղաքացիական դատավարության օրենսգրքի 33-րդ հոդվածի համաձայն՝ կողմերը դատավարության ցանկացած փուլում կարող են գործն ավարտել հաշտության համաձայնությամբ:

Կողմերի միջև կայացված հաշտության համաձայնությունը ձևակերպվում է գրավոր:

Այսպիսով, Վճռաբեկ դատարանը գտնում է, որ կողմերի ներկայացրած հաշտության համաձայնությունը պետք է հաստատել, քանի որ այն չի խախտում այլ անձանց իրավունքներն ու օրինական շահերը:

Ելնելով վերոգրյալից և ղեկավարվելով ՀՀ քաղաքացիական դատավարության օրենսգրքի 33-րդ, 133-րդ, 236-239-րդ հոդվածներով՝ Վճռաբեկ դատարանը

ՈՐՈՇԵՑ

Հաստատել «Հայավտոկայարան» ՓԲԸ-ի, Մարալիկի քաղաքապետարանի և «Շիրակ-Ջրմուղկոյուղի» ՓԲԸ-ի միջև 2007 թվականի հոկտեմբերի 8-ին կնքված հաշտության համաձայնությունը հետևյալ բովանդակությամբ.

«ՀԱՇՏՈՒԹՅԱՆ ՀԱՄԱՁԱՅՆՈՒԹՅՈՒՆ»

ք. Երևան

8 հոկտեմբերի 2007թ.

ՀՀ վճռաբեկ դատարանի քաղաքացիական պալատի վարույթում գտնվող քաղաքացիական գործով ըստ հայցի «Հայավտոկայարան» ՓԲԸ-ի ընդդեմ Մարալիկի քաղաքապետարանի և «Շիրակ-Ջրմուղկոյուղի» ՓԲԸ-ի` պաշտոնատար անձի գործողությունները վիճարկելու պահանջի մասին, կողմերով` «Հայավտոկայարան» ՓԲԸ-ն, որի անունից հանդես է գալիս տնօրեն Ազիզ Նիկողոսյանը մի կողմից, Մարալիկի քաղաքապետարանը, որի անունից հանդես է գալիս քաղաքապետ Արտակ Գևորգյանը մյուս կողմից և «Շիրակ-Ջրմուղկոյուղի» ՓԲԸ-ն, որի անունից հանդես է գալիս տնօրեն Վարդան Հովսեփյանը, կնքեցին սույն հաշտության համաձայնությունը հետևյալի մասին.

1. Մարալիկի քաղաքապետարանը «Հայավտոկայարան» ՓԲԸ-ին սեփականության իրավունքով թողնում է 591 քմ մակերեսով հողամասը պայմանով, որ «Հայավտոկայարան» ՓԲԸ-ն կատարի իր տարածքով անցնող ջրատար խողովակների տեղափոխում և տարածքի բարեկարգում:

2. «Հայավտոկայարան» ՓԲԸ-ն պարտավորվում է 10-ամսյա ժամկետում իր միջոցներով կատարել խողովակների տեղափոխման և տարածքի բարեկարգման աշխատանքները:

3. «Շիրակ-Ջրմուղկոյուղի» ՓԲԸ-ն համաձայն է, որ «Հայավտոկայարան» ՓԲԸ-ն 10-ամսյա ժամկետում իրականացնի խողովակների տեղափոխման և տարածքի բարեկարգման աշխատանքները:

4. Սույն հաշտության համաձայնությունը կողմերիս կողմից չկատարվելու կամ ոչ պատշաճ կատարվելու դեպքում համաձայն ենք, որ այն կատարվի ՀՀ արդարադատության նախարարության դատական ակտերի հարկադիր կատարումն ապահովող ծառայության միջոցով:

5. Կողմերիս հայտնի է հաշտության համաձայնությամբ գործի վարույթը կարճելու հետևանքները:

6. ՀՀ վճռաբեկ դատարանի քաղաքացիական պալատին խնդրում ենք բեկանել ՀՀ տնտեսական դատարանի քաղաքացիական գործ Տ1-43, 06.03.2007 թվականի վճիռը, հաստատել սույն հաշտության համաձայնությունը և կարճել գործի վարույթը:

«Հայավտոկայարան» ՓԲԸ

տնօրեն Ա.Նիկողոսյան

հասցեն` ք.Երևան, Ծովակալ Իսակովի 6

Հ/Հ 282471

ստորագրություն

     Մարալիկի քաղաքապետարան

քաղաքապետ Ա.Գևորգյան

հասցեն` Շիրակի մարզ, ք. Մարալիկ,

Մադաթյան 1ա

ստորագրություն

«Շիրակ-Ջրմուղկոյուղի» ՓԲԸ

տնօրեն Վ.Հովսեփյան

հասցեն` Շիրակի մարզ,

ք. Գյումրի, Դուդկոյի 1

ստորագրություն

2. ՀՀ տնտեսական դատարանի 06.03.2007 թվականի վճիռը բեկանել և քաղաքացիական գործի վարույթը կարճել:

3. Սույն որոշումն օրինական ուժի մեջ է մտնում հրապարակման պահից և ենթակա չէ բողոքարկման:

Նախագահող՝	Հ. Մանուկյան
Դատավորներ՝	Ս. Գյուրջյան
	Վ. Աբելյան
	Ս. Անտոնյան
	Ս. Սարգսյան