ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՍԱՀՄԱՆԱԴՐԱԿԱՆ ԴԱՏԱՐԱՆԻ

Ո Ր Ո Շ ՈՒ Մ Ը

2006 ԹՎԱԿԱՆԻ ՆՈՅԵՄԲԵՐԻ 28-ԻՆ ՄԻՆՍԿՈՒՄ ՍՏՈՐԱԳՐՎԱԾ` ԱՆԿԱԽ ՊԵՏՈՒԹՅՈՒՆՆԵՐԻ ՀԱՄԱԳՈՐԾԱԿՑՈՒԹՅԱՆ ՄԱՍՆԱԿԻՑ ՊԵՏՈՒԹՅՈՒՆՆԵՐԻ ՀՈՒՄԱՆԻՏԱՐ ՀԱՄԱԳՈՐԾԱԿՑՈՒԹՅԱՆ ԽՈՐՀՐԴԻ ՄԱՍԻՆ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ՝ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ

Հայաստանի Հանրապետության սահմանադրական դատարանը` կազմով. Գ.Հարությունյանի (նախագահող), Կ. Բալայանի, Հ. Դանիելյանի, Ֆ. Թոխյանի, Զ. Ղուկասյանի, Հ. Նազարյանի (զեկուցող), Ռ. Պապայանի, Վ. Պողոսյանի,

համաձայն Հայաստանի Հանրապետության Սահմանադրության 100 հոդվածի 2-րդ կետի, 101 հոդվածի 1-ին կետի, «Սահմանադրական դատարանի մասին» Հայաստանի Հանրապետության օրենքի 25, 38 և 72 հոդվածների,

դռնբաց նիստում գրավոր ընթացակարգով քննեց «2006 թվականի նոյեմբերի 28-ին Մինսկում ստորագրված` Անկախ պետությունների համագործակցության մասնակից պետությունների հումանիտար համագործակցության խորհրդի մասին համաձայնագրում ամրագրված պարտավորությունների՝ Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը։

Գործի քննության առիթ է հանդիսացել Հանրապետության Նախագահի դիմումը սահմանադրական դատարան։

Ուսումնասիրելով սույն գործով զեկուցողի գրավոր հաղորդումը, Հանրապետության Նախագահի ներկայացուցիչ` ՀՀ արտաքին գործերի նախարարի տեղակալ Գ. Ղարիբջանյանի գրավոր բացատրությունները, հետազոտելով համաձայնագիրը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.

1. Անկախ պետությունների համագործակցության մասնակից պետությունների հումանիտար համագործակցության խորհրդի մասին համաձայնագիրն ստորագրվել է 2006 թ. նոյեմբերի 28-ին Մինսկում՝ Հայաստանի Հանրապետության, Բելառուսի Հանրապետության, Ադրբեջանի Հանրապետության, Ղազախստանի Հանրապետության, Ղրղզստանի Հանրապետության, Ռուսաստանի Դաշնության, Տաջիկստանի Հանրապետության, Ուզբեկստանի Հանրապետության կողմից:

Համաձայնագրի նպատակն է զարգացնել փոխադարձ հումանիտար համագործակցությունը: Այն կնքվել է 2005 թ. օգոստոսի 26-ի` ԱՊՀ մասնակից պետությունների հումանիտար համագործակցության մասին համաձայնագրի հիման վրա (Հայաստանի Հանրապետության համար ուժի մեջ է մտել 2006 թ. ապրիլի 17-ին), որի 10-րդ հոդվածը նախատեսում է ստեղծել անկախ պետությունների համագործակցության մասնակից պետությունների հումանիտար համագործակցության խորհուրդ (այսուհետ՝ Խորհուրդ)` հումանիտար ոլորտում աշխատանքները համակարգելու նպատակով:

2. Խորհրդի գործունեությունը կարգավորվում է համաձայնագրի բաղկացուցիչ մասը հանդիսացող Կանոնադրությամբ:

Խորհրդի անդամներ են համաձայնագրի մասնակից պետությունների լիազոր ներկայացուցիչները՝ Խորհրդում հերթով մեկ տարի ժամկետով նախագահելու իրավունքով:

Խորհրդի հիմնական խնդիրներն են մշակույթի, կրթության, գիտության, արխիվային գործի, տեղեկատվության և զանգվածային հաղորդակցության, սպորտի, զբոսաշրջության և երիտասարդության հետ աշխատանքի բնագավառներում համագործակցության կատարելագործումը, զարգացումը և անհատի շնորհների ու ընդունակությունների իրագործման համար ներդաշնակ պայմանների ապահովումը:

Խորհուրդն իրականացնում է հետևյալ գործառույթները.

- համաձայնագրի մասնակից պետությունների հումանիտար համագործակցության հայեցակարգային և գործնական հարցերի քննարկում,

- հումանիտար ոլորտում համագործակցության առաջնային ուղղությունների և ձևերի որոշում, հումանիտար համագործակցության հիմնական ուղղություններով համատեղ գործողությունների համակարգման և փոխհամագործակցության ուղղությամբ առաջարկությունների մշակում,

- համաձայնագրի մասնակից պետությունների հումանիտար համագործակցության ոլորտում առաջնային միջպետական միջոցառումների երկամյա ծրագրերի նախապատրաստում,

- հումանիտար համագործակցության ոլորտում միջազգային իրավական փաստաթղթերի նախագծերի մշակում,

- համագործակցություն ՅՈՒՆԵՍԿՕ-ի և այլ միջազգային կազմակերպությունների հետ՝ համատեղ միջազգային ծրագրերի, նախագծերի ու միջոցառումների մշակման և իրականացման բնագավառներում,

- փոխհամագործակցություն Անկախ պետությունների համագործակցության մասնակից պետությունների հումանիտար համագործակցության միջպետական հիմնադրամի հետ.

- ԱՊՀ պետությունների ղեկավարների խորհրդի և կառավարությունների ղեկավարների խորհրդի նիստերին հումանիտար համագործակցության հետագա ամրապնդման և զարգացման մասին առաջարկությունների նախապատրաստում:

3. Խորհրդի մասին կանոնադրությամբ մանրամասնված են նաև այդ մարմնի աշխատանքների կազմակերպման կարգին ու ֆինանսավորմանը վերաբերող հարաբերությունները:

4. Համաձայնագրով Հայաստանի Հանրապետությունն ստանձնում է հետևյալ հիմնական պարտավորությունները.

- Խորհրդի իրավասության մեջ մտնող հարցերով վերջինիս տրամադրել տեղեկատվություն՝ այդպիսի պահանջի առկայության դեպքում,

- հոգալ Խորհրդի նիստերի անցկացման ծախսերը, եթե դրանք անցկացվում են ՀՀ տարածքում:

5. Համաձայնագրով Հայաստանի Հանրապետության ստանձնած պարտավորությունները բխում են միջազգային փոխշահավետ համագործակցության հաստատման վերաբերյալ ՀՀ Սահմանադրության 9 հոդվածում ամրագրված սկզբունքից։

Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2-րդ կետով, 102 հոդվածի առաջին և չորրորդ մասերով, «Սահմանադրական դատարանի մասին» Հայաստանի Հանրապետության օրենքի 63, 64 և 72 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.

1. 2006 թվականի նոյեմբերի 28-ին Մինսկում ստորագրված` Անկախ պետությունների համագործակցության մասնակից պետությունների հումանիտար համագործակցության խորհրդի մասին համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը։

2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է և ուժի մեջ է մտնում հրապարակման պահից։

Նախագահող	Գ. ՀԱՐՈՒԹՅՈՒՆՅԱՆ
13 նոյեմբերի 2007 թ. ՍԴՈ-717