«Վավերացնում եմ»
Հայաստանի Հանրապետության
Նախագահ Ռ. Քոչարյան
21 օգոստոսի 2006 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
18 օգոստոսի 2006 թվականի N 1131-Ա
«ՆԱԻՐԻՏ ԳՈՐԾԱՐԱՆ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ԲԱԺՆԵՏՈՄՍԵՐԸ ՎԱՃԱՌԵԼՈՒ ՄԱՍԻՆ
Հաշվի առնելով Հայաստանի Հանրապետության տնտեսության մեջ «Նաիրիտ գործարան» փակ բաժնետիրական ընկերության (այսուհետ` ընկերություն) առանձնահատուկ կարևորությունն ու ընկերության բաժնետոմսերը ձեռք բերելու և անհրաժեշտ ներդրումային ծրագիր (որը կհանգեցնի ընկերության արտադրանքի թողարկման և արտահանման ծավալների կտրուկ ավելացմանը, որակի բարձրացմանն ու ինքնարժեքի նվազեցմանը) իրականացնելու վերաբերյալ Մեծ Բրիտանիայի Միացյալ Թագավորության ու Հյուսիսային Իռլանդիայի «Ռայնովիլ Փրոփըրթի Լիմիթիդ» («Rhinoville Property Limited», UK) կազմակերպության (այսուհետ` գնորդ) առաջարկությունը, ինչպես նաև ղեկավարվելով «Բաժնետիրական ընկերությունների մասին» Հայաստանի Հանրապետության օրենքի 60-րդ հոդվածով` Հայաստանի Հանրապետության կառավարությունը որոշում է.
1. Հայաստանի Հանրապետության էներգետիկայի նախարարին` թույլատրել «Հայգազարդ» փակ բաժնետիրական ընկերությանը`
ա) սեփականության իրավունքով իրեն պատկանող ընկերության կանոնադրական կապիտալի 90 տոկոս բաժնեմասը` 40,0 մլն ԱՄՆ-ի դոլար ընդհանուր շուկայական արժեքով, ուղղակի եղանակով վաճառել գնորդին` նրա հետ կնքվող բաժնետոմսերի առուվաճառքի մասին պայմանագրում նախատեսելով դրույթներ այն մասին, որ գնորդը գնման գնից 20,0 մլն ԱՄՆ-ի դոլարը կվճարի անմիջապես` պայմանագրի կնքման պահին, իսկ մնացած 20,0 մլն ԱՄՆ-ի դոլարը` ընկերության փաստացի ունեցած ակտիվների, պասսիվների և նրա հարկային ու ֆինանսական պետական հաշվետվություններում արտացոլված ակտիվների, պասսիվների համապատասխանության ստուգման ակտի ստորագրումից հետո, իսկ մինչև այդ կներկայացնի «Հայգազարդ» փակ բաժնետիրական ընկերության պահանջները բավարարող երաշխավորագիր.
բ) ընկերության հետ կնքել պարտքի պահանջի իրավունքի զիջման և գույքի առուվաճառքի պայմանագրեր, համաձայն որոնց ընկերության «Նաիրիտ-2» փակ բաժնետիրական ընկերության հանդեպ ունեցած 4150,0 մլն դրամ գումարի դեբիտորական պարտքի պահանջի իրավունքը, Հայաստանի Հանրապետության քաղաքացիական օրենսգրքի 397-րդ հոդվածին համապատասխան, փոխանցվում է «Հայգազարդ» փակ բաժնետիրական ընկերությանը, և ընկերությանը սեփականության իրավունքով պատկանող «Նաիրիտ-2» փակ բաժնետիրական ընկերության 100 տոկոս բաժնեմասը (այսուհետ` գույք) օրենքով սահմանված կարգով գնահատված 9450,0 մլն դրամ շուկայական արժեքով օտարվում է «Հայգազարդ» փակ բաժնետիրական ընկերությանը: Ընդ որում, որպես ձեռք բերվող դեբիտորական պարտքի պահանջի իրավունքի և գույքի գնի դիմաց (ընդհանուր գումարը` 13600,0 մլն դրամ) վճարում «Հայգազարդ» փակ բաժնետիրական ընկերությունը`
ընկերության հաշվին է փոխանցում 2694,0 մլն դրամ գումար, վերջինս, իր հերթին, ստացված գումարն ուղղում է աշխատավարձի (1280,0 մլն դրամ), եկամտահարկի (179,0 մլն դրամ) և սոցիալական վճարների (1235,0 մլն դրամ) գծով առկա պարտավորությունների մարմանը,
պարտքի փոխանցման պայմանագրերի կնքմամբ ստանձնում է ընկերության հետևյալ կրեդիտորական պարտավորությունները`
| «Արարատ բանկ» փակ բաժնետիրական ընկերությունից ներգրավված վարկի պարտավորություն` |
500,0 մլն դրամ, |
| Հայաստանի Հանրապետության էներգետիկայի նախարարության ենթակայության բաժնետիրական ընկերությունների հանդեպ պարտավորություններ (ներառյալ` փոխառությունների գծով)` |
7544,7 մլն դրամ, |
| բնական գազի գծով «ՀայՌուսգազարդ» փակ բաժնետիրական ընկերության հանդեպ պարտավորություն` |
755,0 մլն դրամ, |
| «Պետպոլիմեր» սահմանափակ պատասխանատվությամբ ընկերությունից ներգրավված փոխառության գծով պարտավորություն` |
2106,3 մլն դրամ: |
«Հայգազարդ» փակ բաժնետիրական ընկերությունը նշված կրեդիտորական պարտավորությունները կմարի սույն կետի «ա» ենթակետում նշված ընկերության բաժնետոմսերի օտարման գործարքից ստացվող միջոցներով:
(1-ին կետը խմբ. 22.09.06 N 1335-Ա, խմբ., փոփ. 12.07.07 N 784-Ա)
2. Սահմանել, որ «Հայգազարդ» փակ բաժնետիրական ընկերությունը և Հայաստանի Հանրապետության կառավարությունը համապարտ պատասխանատվություն են ստանձնում գնորդի առջև սույն որոշման 1-ին կետի «ա» ենթակետում նշված բաժնետոմսերի առուվաճառքի պայմանագրի կնքման օրվան նախորդող ժամանակաշրջանում ընկերության գործունեության հետևանքով առաջացած այն հարկային պարտավորությունների համար (ներառյալ դրանց գծով հաշվարկված տույժերը և տուգանքները), որոնք ստուգում իրականացնող պետական լիազորված մարմինների կողմից կհայտնաբերվեն կամ կարձանագրվեն բաժնետոմսերի առուվաճառքի պայմանագրի կնքման պահից հետո:
3. Հավանություն տալ Հայաստանի Հանրապետության կառավարության և «Ռայնովիլ Փրոփըրթի Լիմիթիդ» («Rhinoville Property Limited», UK) կազմակերպության (գնորդի) միջև կնքվող համաձայնագրի (այսուհետ` համաձայնագիր) նախագծին` համաձայն հավելվածի:
4. Լիազորել Հայաստանի Հանրապետության էներգետիկայի նախարարին Հայաստանի Հանրապետության կառավարության անունից ստորագրել սույն որոշման 3-րդ կետում նշված համաձայնագիրը:
5. Հայաստանի Հանրապետության էներգետիկայի նախարարին` մինչև 2007 թվականի տարեվերջը` սույն որոշման 1-ին կետի «բ» ենթակետում նշված կրեդիտորական պարտավորությունների մարումներից (վճարումներից) հետո ընկերության մնացած առևտրային կրեդիտորական պարտավորությունների կառավարման նպատակով գնորդի հետ համատեղ իրականացնել անհրաժեշտ միջոցառումներ:
|
Հայաստանի Հանրապետության |
Ա. Մարգարյան |
|
|
Հավելվածը չի բերվում:
* - Ծանոթություն -