ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԴԱՏԱՐԱՆՆԵՐԻ ՆԱԽԱԳԱՀՆԵՐԻ ԽՈՐՀՐԴԻ

Ո Ր Ո Շ ՈՒ Մ

10 հուլիսի 2007 թվականի  N 05-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴԱՏԱԿԱՆ ԴՊՐՈՑ ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության դատական օրենսգրքի 174-րդ հոդվածի պահանջները և ղեկավարվելով «Իրավական ակտերի մասին» ՀՀ օրենքի 6-րդ հոդվածի 1-ին մասի 5-րդ կետով և 22.1-րդ հոդվածի 1-ին մասով` Հայաստանի Հանրապետության դատարանների նախագահների խորհուրդը որոշում է.

1. Հաստատել Հայաստանի Հանրապետության դատական դպրոցի կանոնադրությունը` համաձայն հավելվածի:

2. Սույն որոշումն ուժի մեջ է մտնում 2008 թվականի հունվարի 1-ից:

(2-րդ կետը փոփ. 09.08.07 N 08-Ն)

Հայաստանի Հանրապետության վճռաբեկ դատարանի նախագահ

Հ. Մանուկյան

Հավելված Հայաստանի Հանրապետության դատարանների նախագահների խորհրդի 2007 թ. հուլիսի 10-ի թիվ 05-Ն որոշման

Կ Ա Ն Ո Ն Ա Դ Ր ՈՒ Թ Յ ՈՒ Ն

«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԴԱՏԱԿԱՆ ԴՊՐՈՑ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. «Հայաստանի Հանրապետության դատական դպրոց» պետական ոչ առևտրային կազմակերպությունը (այսուհետ` Դատական դպրոց) շահույթ ստանալու նպատակ չհետապնդող, իրավաբանական անձի կարգավիճակ ունեցող ոչ առևտրային կազմակերպություն է:

2. Դատական դպրոցի գործունեության կարգը սահմանվում է օրենքներով, Հայաստանի Հանրապետության դատարանների նախագահների խորհրդի որոշումներով, սույն կանոնադրությամբ և իրավական այլ ակտերով:

3. Դատական դպրոցն ունի ինքնուրույն հաշվեկշիռ, բանկային հաշիվ: Դպրոցը կարող է իր անունից ձեռք բերել և իրականացնել գույքային ու անձնական ոչ գույքային իրավունքներ, կրել պարտականություններ, դատարանում հանդես գալ որպես հայցվոր կամ պատասխանող:

4. Դատական դպրոցն այլ կազմակերպությունների հիմնադիր կամ մասնակից կարող է հանդիսանալ միայն հիմնադրի որոշմամբ:

5. Դատական դպրոցն ունի Հայաստանի Հանրապետության զինանշանի պատկերով և իր անվանմամբ կլոր կնիք, ձևաթղթեր, խորհրդանիշ և անհատականացման այլ միջոցներ:

6. Դատական դպրոցի անվանումն է` «Հայաստանի Հանրապետության դատական դպրոց» պետական ոչ առևտրային կազմակերպություն, կրճատ` «Դատական դպրոց» ՊՈԱԿ:

7. Դատական դպրոցի գտնվելու վայրն է` Հայաստանի Հանրապետություն, 0091, Թբիլիսյան խճուղի 3:

II. ԴԱՏԱԿԱՆ ԴՊՐՈՑԻ ԳՈՐԾՈՒՆԵՈՒԹՅԱՆ ԱՌԱՐԿԱՆ ԵՎ ՆՊԱՏԱԿՆԵՐԸ

8. Դատական դպրոցի գործունեության առարկան և նպատակներն են`

ա) դատավորների թեկնածությունների ցուցակի կազմման նպատակով անցկացվող որակավորման ստուգումը, որակավորման ստուգման արդյունքներով դատավորների թեկնածությունների ցուցակում ընդգրկված անձանց մասնագիտական պատրաստումը, Դատական դպրոցն ավարտածների, պաշտոնեական պիտանիության և առաջխաղացման ցուցակում ընդգրկված անձանց վերապատրաստումը, վերապատրաստման անհատական դասընթացների անցկացումը, դատական ծառայողների մասնագիտական վերապատրաստումը և դատական կարգադրիչների վերապատրաստումն ու հատուկ ուսուցումը.

բ) գիտատեսական և կիրառական հետազոտությունները, փորձագիտական գնահատումները.

գ) մասնակցությունը միջազգային գիտակրթական համագործակցությանը.

դ) տեղեկատվական-վերլուծական նյութերի պատրաստումը:

9. Դատական դպրոցն իր առջև դրված նպատակներին համապատասխան`

ա) կազմակերպում է դատավորների թեկնածությունների ցուցակի կազմման նպատակով անցկացվող որակավորման ստուգում.

բ) կազմակերպում է որակավորման ստուգման արդյունքներով դատավորների թեկնածությունների ցուցակում ընդգրկված անձանց մասնագիտական պատրաստում.

գ) կազմակերպում և անցկացնում է Դատական դպրոցն ավարտածների, պաշտոնեական պիտանիության և առաջխաղացման ցուցակում ընդգրկված անձանց վերապատրաստում.

դ) կազմակերպում և անցկացնում է դատավորների թեկնածությունների ցուցակում Հայաստանի Հանրապետության դատական օրենսգրքի 118-րդ հոդվածի 2-րդ մասով ընդգրկված անձանց վերապատրաստման անհատական դասընթացներ.

ե) կազմակերպում և անցկացնում է դատական ծառայողների մասնագիտական վերապատրաստում.

զ) կազմակերպում և անցկացնում է դատական կարգադրիչների վերապատրաստումն ու հատուկ ուսուցումը.

է) կազմակերպում և անցկացնում է սեմինարներ, գիտաժողովներ, հրատարակում է ուսումնական և այլ գրականություն, կարող է ունենալ մամուլի միջոց.

ը) մշակում է Դատական դպրոցի ուսումնական ծրագրեր.

թ) սահմանված կարգով ստեղծում է գիտական խորհուրդներ կամ համագործակցում է իր իրավական գործառույթներին համապատասխան այլ գիտական խորհուրդների հետ.

ժ) կազմակերպում է իրավաբանական գրադարանային ֆոնդի, ուսումնամեթոդական, ձայնատեսադարանների, ֆիլմադարանների հիմնադրում և կատարում դրանց պահպանման աշխատանքներ.

ժա) կնքում է պայմանագրեր Հայաստանի Հանրապետության և օտարերկրյա իրավաբանական և ֆիզիկական անձանց հետ, համագործակցում օտարերկրյա կազմակերպությունների հետ, անդամակցում միջազգային կազմակերպություններին և ցանցերին.

ժբ) իր գործունեության նպատակներին համապատասխան կարող է զբաղվել հիմնադրի կողմից թույլատրված ձեռնարկատիրական գործունեության տեսակներով.

ժգ) իրականացնում է օրենքներով, սույն կանոնադրությամբ, ՀՀ դատարանների նախագահների խորհրդի որոշումներով և իրավական այլ ակտերով իրեն վերապահված այլ գործառույթներ:

10. Դատական դպրոցը որպես ձեռնարկատիրական գործունեության տեսակներ կարող է իրականացնել`

ա) հետազոտություններ և մշակումներ հասարակական և հումանիտար գիտությունների բնագավառում.

բ) հրատարակչական գործ:

(10-րդ կետը փոփ. 09.08.07 N 08-Ն)

11. Դատական դպրոցը կարող է լիցենզավորման ենթակա գործունեության տեսակներով զբաղվել միայն լիցենզիայի հիման վրա:

12. Դատական դպրոցը ձեռնարկատիրական գործունեություն կարող է իրականացնել անձամբ կամ այդ նպատակով, հիմնադրի որոշման հիման վրա, հանդիսանալ այլ կազմակերպության հիմնադիր կամ մասնակից:

III. ԴԱՏԱԿԱՆ ԴՊՐՈՑԻ ԿԱՌԱՎԱՐՈՒՄՆ ՈՒ ՂԵԿԱՎԱՐՈՒՄԸ

13. Դատական դպրոցի կառավարումն ու ղեկավարումն իրականացվում է Հայաստանի Հանրապետության օրենսդրությանը և սույն կանոնադրությանը համապատասխան, հիմնադրի, կառավարման խորհրդի և տնօրենի գործառույթների իրականացմամբ:

14. Հիմնադրի` Հայաստանի Հանրապետության դատարանների նախագահների խորհրդի բացառիկ լիազորություններն են`

ա) Դատական դպրոցի հիմնադրումը.

բ) Դատական դպրոցի կանոնադրության հաստատումը ու դրա մեջ փոփոխությունների և լրացումների կատարումը.

գ) Դատական դպրոցի վերակազմակերպումը և լուծարումը.

դ) Դատական դպրոցի լուծարման հանձնաժողովի նշանակումը և լուծարման հաշվեկշռի հաստատումը.

ե) օրենքով նախատեսված այլ հարցերի լուծումը:

15. Դատական դպրոցի ընդհանուր կառավարումը և ընթացիկ գործունեության վերահսկումն իրականացնում է Դատական դպրոցի կառավարման խորհուրդը:

16. Դատական դպրոցի կառավարման խորհուրդը`

ա) հաստատում է Դատական դպրոցի ռազմավարական և ուսումնական ծրագրերը.

բ) (ենթակետն ուժը կորցրել է 09.08.07 N 08-Ն).

գ) սահմանում է մրցութային հիմունքներով դատական դպրոցի տնօրենին նշանակելու կարգը, նշանակում և ազատում է Դատական դպրոցի տնօրենին, հաստատում տնօրենի հետ կնքվող աշխատանքային պայմանագրի պայմանները, սահմանում տնօրենի վարձատրության կարգը և պայմանները.

դ) տարեկան մեկ անգամ լսում է Դատական դպրոցի տնօրենի հաշվետվությունը.

ե) վերահսկողություն է իրականացնում Դատական դպրոցին ամրացված պետական սեփականության օգտագործման և պահպանության նկատմամբ.

զ) տնօրենի ներկայացմամբ համաձայնություն է տալիս Դատական դպրոցի սեփական գույքի օտարման կամ վարձակալության հանձնման համար.

է) սահմանում է Դատական դպրոցի կողմից իրականացվող ձեռնարկատիրական գործունեության կարգը, որոշում կայացնում Դատական դպրոցի շահույթի օգտագործման վերաբերյալ.

ը) հաստատում է իր աշխատակարգը, Դատական դպրոցի գործունեությունը կանոնակարգող ներքին փաստաթղթերը, դատավորների թեկնածությունների ցուցակի կազմման նպատակով անցկացվող որակավորման ստուգմանը մասնակցող անձանց երաշխավորագիր-նամակների ձևերը, ինչպես նաև Դատական դպրոցի հիմնարկների, մասնաճյուղերի և ներկայացուցչությունների կանոնադրությունները.

թ) սահմանում է Դատական դպրոցի ունկնդիրների տարեկետման, ունկնդիրների նկատմամբ կարգապահական տույժերի կիրառման հիմքերը և կարգը, տնօրենի ներկայացմամբ կիրառում է կարգապահական տույժեր.

ժ) հաստատում է Դատական դպրոցում դասավանդող դասախոսների թվային և անհատական կազմը.

ժա) սահմանում է Դատական դպրոցում քննությունների անցկացման կարգը և պայմանները, ունկնդիրների գիտելիքների գնահատման ու քննական միավորների հաշվարկման, քննությունների վերահանձնման կարգը.

ժբ) սահմանում է դատավորների թեկնածությունների ցուցակում Հայաստանի Հանրապետության դատական օրենսգրքի 118-րդ հոդվածի 2-րդ մասով ընդգրկված անձանց վերապատրաստման անհատական դասընթացներ անցկացնելու կարգը և պայմանները.

ժգ) դատարանների նախագահների խորհրդի ուսումնական հարցերով հանձնաժողովի մշակված ուղենիշերին համապատասխան հաստատում է դատավորների թեկնածուների և առաջխաղացման ցուցակներում ընդգրկված անձանց վերապատրաստման ծրագրերը և դրանց անցկացման ժամանակացույցը.

ժդ) սահմանում է դատավորների և պաշտոնեական պիտանիության ցուցակներում ընգրկված անձանց վերապատրաստման ծրագրերի իրականացման կարգը, ժամանակացույցը, դրանց մասին ծանուցման կարգը, վերապատրաստում իրականացնող դասախոսների վարձատրության կարգը.

ժե) քննարկում և հիմնադրի հաստատմանն է ներկայացնում սույն կանոնադրության մեջ փոփոխություններ և լրացումներ կատարելու վերաբերյալ առաջարկությունները.

ժզ) իրականացնում է օրենքով և սույն կանոնադրությամբ իրեն վերապահված այլ լիազորություններ:

Դատական դպրոցի կառավարման խորհրդի իրավասությանը վերապահված հարցերը չեն կարող փոխանցվել այլ մարմնի:

(16-րդ կետը փոփ. 09.08.07 N 08-Ն)

17. Դատական դպրոցի ընթացիկ գործունեության ղեկավարումն իրականացնում է Դատական դպրոցի տնօրենը:

18. Դատական դպրոցի տնօրենն օրենքով, հիմնադրի և կառավարման խորհրդի որոշումներով, սույն կանոնադրությամբ իրեն վերապահված լիազորությունների սահմաններում ղեկավարում է Դատական դպրոցի գործունեությունը:

19. Դատական դպրոցի տնօրենը`

ա) առանց լիազորագրի հանդես է գալիս Դատական դպրոցի անունից և ներկայացնում նրա շահերը, կնքում գործարքներ.

բ) Հայաստանի Հանրապետության օրենսդրությամբ, հիմնադրի ու կառավարման խորհրդի որոշումներով և սույն կանոնադրությամբ սահմանված կարգով տնօրինում է Դատական դպրոցի գույքը, այդ թվում` ֆինանսական միջոցները.

գ) տալիս է Դատական դպրոցի անունից հանդես գալու լիազորագրեր, այդ թվում նաև` վերալիազորման իրավունքով լիազորագրեր.

դ) նշանակում և աշխատանքից ազատում է Դատական դպրոցի աշխատակիցներին, նրանց նկատմամբ կիրառում խրախուսանքի և կարգապահական տույժի միջոցներ.

ե) բանկերում բացում է հաշվարկային հաշիվներ.

զ) օրենքով և սույն կանոնադրությամբ սահմանված իր լիազորությունների սահմաններում արձակում է հրամաններ, հրահանգներ, տալիս կատարման համար պարտադիր ցուցումներ և վերահսկում դրանց կատարումը.

է) իրականացնում է Հայաստանի Հանրապետության օրենսդրությանը չհակասող և Դատական դպրոցի կառավարման մյուս մարմիններին չվերապահված այլ լիազորություններ:

ը) սահմանում է Դատական դպրոցի կառուցվածքային ստորաբաժանումները և դրանց գործառույթները:

(19-րդ կետը լրաց. 09.08.07 N 08-Ն)

IV. ԴԱՏԱԿԱՆ ԴՊՐՈՑԻ ԳՈՒՅՔԸ ԵՎ ՖԻՆԱՆՍԱԿԱՆ ԳՈՐԾՈՒՆԵՈՒԹՅՈՒՆԸ

20. Դատական դպրոցի սեփականությունը ձևավորվում է Դատական դպրոցի հիմնադրման ժամանակ հիմնադրման մասին հիմնադրի որոշմամբ սահմանված չափով հանձնված գույքից, հետագայում հիմնադրի կողմից սեփականության իրավունքով նրան հանձնվող, ինչպես նաև Դատական դպրոցի գործունեության ընթացքում ձևավորված և ձեռք բերված գույքից: Դատական դպրոցի գույքի ձևավորման աղբյուր կարող են լինել նաև`

ա) պետական բյուջեից ստացվող միջոցները.

բ) ձեռնարկատիրական գործունեության արդյունքները.

գ) դրամաշնորհները.

դ) օրենքով չարգելված այլ միջոցները:

Դատական դպրոցն իր գործունեության ընթացքում առաջացած շահույթն օգտագործում է ինքնուրույն` իր առջև դրված նպատակների իրականացման համար:

21. Դատական դպրոցն օրենքին, հիմնադրի որոշումներին կամ սույն կանոնադրությանը համապատասխան տիրապետում, տնօրինում և օգտագործում է Դատական դպրոցի գույքը:

22. Հիմնադիրը կարող է Դատական դպրոցին անժամկետ և անհատույց օգտագործման իրավունքով ամրացնել ցանկացած գույք: Հիմնադիրն իրավունք ունի հետ վերցնել իր կողմից ամրացված գույքը:

V. ԴԱՏԱԿԱՆ ԴՊՐՈՑԻ ՈՒՍՈՒՄՆԱԳԻՏԱԿԱՆ ԳՈՐԾԸՆԹԱՑԻ ԿԱԶՄԱԿԵՐՊՈՒՄԸ

23. Դատական դպրոցում ուսուցումն իրականացվում է Հայաստանի Հանրապետության Դատական օրենսգրքով, Հայաստանի Հանրապետության դատարանների նախագահների խորհրդի որոշումներով սահմանված ձևերով, ինչպես նաև առկա, հեռակա և դրսեկության ձևերով:

24. Դատական դպրոցի ունկնդիրներին տրվում է համապատասխան որակավորում և սահմանված կարգի ավարտական վկայական կամ դիպլոմ:

25. Ուսումնամեթոդական աշխատանքները և գործընթացները մշակվում և համակարգվում են Հայաստանի Հանրապետության դատական օրենսգրքով, Հայաստանի Հանրապետության դատարանների նախագահների խորհրդի որոշումներով և սույն կանոնադրությամբ սահմանված կարգով:

VI. ԴԱՏԱԿԱՆ ԴՊՐՈՑԻ ՎԵՐԱԿԱԶՄԱԿԵՐՊՈՒՄԸ ԵՎ  ԳՈՐԾՈՒՆԵՈՒԹՅԱՆ ԴԱԴԱՐՈՒՄԸ

26. Դատական դպրոցի վերակազմակերպումը և գործունեության դադարումն իրականացվում են օրենքով սահմանված կարգով:

27. Դատական դպրոցի լուծարման դեպքում պարտատերերի պահանջները բավարարելուց հետո մնացած միջոցներն ուղղվում են Հայաստանի Հանրապետության պետական բյուջե:

(27-րդ կետը լրաց. 09.08.07 N 08-Ն)

(հավելվածը փոփ., լրաց. 09.08.07 N 08-Ն)