ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
30 օգոստոսի 2007 թվականի N 1040-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻՈՒԹՅՈՒՆ ՍՏԱՑՈՂ ԱՆՁԱՆՑ ՀԱՄԱՐ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆ ԵՎ ՀԱՅՈՑ ԼԵԶՎԻ ԻՄԱՑՈՒԹՅԱՆ ՍՏՈՒԳՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
Ղեկավարվելով «Հայաստանի Հանրապետության քաղաքացիության մասին» Հայաստանի Հանրապետության օրենքի 13-րդ հոդվածի 1-ին մասի 2-րդ և 3-րդ կետերի պահանջներով` Հայաստանի Հանրապետության կառավարությունը որոշում է.
1. Սահմանել Հայաստանի Հանրապետության քաղաքացիություն ստացող անձանց համար Հայաստանի Հանրապետության Սահմանադրության և հայոց լեզվի իմացության ստուգման կարգը` համաձայն հավելվածի:
2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
|
Հայաստանի Հանրապետության |
Ս. Սարգսյան |
|
|
|
Հավելված |
Կ Ա Ր Գ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՑԻՈՒԹՅՈՒՆ ՍՏԱՑՈՂ ԱՆՁԱՆՑ ՀԱՄԱՐ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆ ԵՎ ՀԱՅՈՑ ԼԵԶՎԻ ԻՄԱՑՈՒԹՅԱՆ ՍՏՈՒԳՄԱՆ
1. Հայաստանի Հանրապետության քաղաքացիություն ստացող անձանց Հայաստանի Հանրապետության Սահմանադրության իմացությունն ստուգվում է թեստավորման միջոցով:
2. Հայաստանի Հանրապետության Սահմանադրության իմացության ստուգման թեստը (այսուհետ` թեստ)` համաձայն ձևի, կազմված է 30 հարցից: Թեստի յուրաքանչյուր հարց ունի երեք ենթադրյալ պատասխան, որոնցից միայն մեկն է միանշանակ ճիշտը:
3. Թեստը Հայաստանի Հանրապետության քաղաքացիություն ստանալու համար դիմած անձին է տրամադրվում այդ դիմումն ընդունելու լիազորություն ունեցող մարմնի կողմից:
4. Թեստը լրացվում է տեղում, որի համար տրամադրվում է մեկ ժամ ժամանակ:
5. Թեստը լրացվում է հարցի ճիշտ պատասխանի դիմաց նշում կատարելու միջոցով: Եթե նշանը դրվում է հարցի մեկից ավելի պատասխանների դիմաց, ապա քաղաքացիություն ստանալու համար դիմած անձը կարող է բանավոր նշել, իր կարծիքով, ճիշտ պատասխանը, և եթե այդ պատասխանը ճիշտ է, ապա այդ հարցը համարվում է ճիշտ պատասխանած:
6. Հայաստանի Հանրապետության Սահմանադրությանը ծանոթ է համարվում այն անձը, ով ճիշտ է պատասխանել թեստի կեսից ավելի հարցերին:
7. Թեստի հարցերի կեսից ավելիին ճիշտ չպատասխանելու դեպքում տվյալ անձը կարող է հաջորդ օրը կամ, տվյալ անձի ցանկությամբ, ցանկացած այլ աշխատանքային օր կրկին անգամ լրացնել թեստը: Հայաստանի Հանրապետության քաղաքացիություն ստանալու համար դիմած անձը կարող է այնքան անգամ լրացնել թեստը` մինչև ճիշտ պատասխանի թեստի կեսից ավելի հարցերին:
8. Հայաստանի Հանրապետության քաղաքացիություն ստանալու համար դիմած անձը համարվում է հայերենով բացատրվել կարողացող, եթե Հայաստանի Հանրապետության քաղաքացիություն ստանալու համար անձամբ լրացնում է իր դիմումը և ճիշտ է պատասխանում Հայաստանի Հանրապետության Սահմանադրության իմացության ստուգման թեստի կեսից ավելի հարցերին:
| Հայաստանի Հանրապետության կառավարության աշխատակազմի ղեկավար-նախարար |
Մ. Թոփուզյան |
Ձև
Թ Ե Ս Տ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆ ԻՄԱՑՈՒԹՅԱՆ ՍՏՈՒԳՄԱՆ
Հարց 1. Հայաստանի Հանրապետությունում իշխանությունը պատկանում է`
1) կուսակցություններին.
2) ժողովրդին.
3) անհատ ձեռնարկատերերին.
Հարց 2. Ինչպիսի՞ պետություն է Հայաստանի Հանրապետությունը`
1) ժողովրդավարական.
2) ավտորիտար.
3) տոտալիտար.
Հարց 3. Հայաստանի Հանրապետությունում ո՞րն է համարվում օրենսդիր մարմին`
1) դատարանները.
2) ՀՀ Ազգային ժողովը.
3) կուսակցությունները.
Հարց 4. Հայաստանի Հանրապետության պետական լեզուն`
1) արևմտահայերենն է.
2) գրական հայերենն է.
3) ռուսերենն է.
Հարց 5. Հայաստանի Հանրապետության դրոշը եռագույն է`
1) կարմիր, կապույտ, սպիտակ գույներով.
2) կարմիր, կանաչ, սպիտակ գույներով.
3) կարմիր, կապույտ, նարնջագույն գույներով.
Հարց 6. Հայաստանի Հանրապետության մայրաքաղաքը`
1) Գյումրին է.
2) Երևանն է.
3) Էրեբունին է.
Հարց 7. Ո՞վ է նշանակում նախարարին`
1) կուսակցությունները.
2) ՀՀ Նախագահը.
3) ՀՀ արդարադատության նախարարը.
Հարց 8. Բոլորը հավասար են`
1) միմյանց առջև.
2) օրենքի առջև.
3) ՀՀ Ազգային ժողովի առջև.
Հարց 9. Մարդը պարտավոր չէ ցուցմունք տալ`
1) հանցանք կատարած անձի դեմ.
2) իր ընկերների դեմ.
3) իր ամուսնու և մերձավոր ազգականների դեմ.
Հարց 10. Նշվածներից ո՞վ կարող է ընտրվել Հայաստանի Հանրապետության Նախագահ`
1) երեսունհինգ տարին լրացած, վերջին տասը տարում ՀՀ քաղաքացի հանդիսացող, վերջին տասը տարում հանրապետությունում մշտապես բնակվող և ընտրական իրավունք ունեցող յուրաքանչյուր ոք.
2) յուրաքանչյուր քաղաքացի.
3) ՀՀ վարչապետը և ՀՀ Ազգային ժողովի պատգամավորները.
Հարց 11. Նշվածներից ո՞վ կարող է ընտրվել պատգամավոր`
1) յուրաքանչյուր քաղաքացի.
2) քսանհինգ տարին լրացած, վերջին հինգ տարում ՀՀ քաղաքացի հանդիսացող, վերջին հինգ տարում հանրապետությունում մշտապես բնակվող և ընտրական իրավունք ունեցող յուրաքանչյուր ոք.
3) ձեռնարկատիրական գործունեությամբ զբաղվող յուրաքանչյուր ոք.
Հարց 12. Քանի՞ տարի ժամկետով է ընտրվում պատգամավորը`
1) 5 տարի ժամկետով.
2) ցմահ.
3) 8 տարի ժամկետով.
Հարց 13. Նշվածներից որո՞նք են համարվում ՀՀ վարչատարածքային միավորներ`
1) շրջանները և գավառները.
2) շրջանները.
3) մարզերը և համայնքները.
Հարց 14. Ո՞վ է իրականացնում Հայաստանի Հանրապետությունում ներքին քաղաքականությունը`
1) ՀՀ կառավարությունը.
2) ժողովուրդը.
3) դատարանը.
Հարց 15. Ո՞վ է ընդունում պատերազմ հայտարարելու և խաղաղություն հաստատելու մասին որոշումը`
1) ՀՀ Ազգային ժողովը.
2) ՀՀ վարչապետը.
3) ՀՀ Ազգային ժողովը` Հայաստանի Հանրապետության Նախագահի առաջարկությամբ.
Հարց 16. Նշվածներից ո՞վ ունի անձնական ազատության և անձեռնմխելիության իրավունք`
1) յուրաքանչյուր քաղաքացի.
2) յուրաքանչյուր ոք.
3) ոչ ոք.
Հարց 17. Նշվածներից ո՞վ ունի նամակագրության գաղտնիության իրավունք`
1) յուրաքանչյուր քաղաքացի.
2) յուրաքանչյուր ոք.
3) ոչ ոք.
Հարց 18. Ո՞վ ունի կրթություն ստանալու իրավունք`
1) յուրաքանչյուր ոք.
2) միայն ՀՀ քաղաքացիները.
3) միայն լավ սովորողները.
Հարց 19. Հայաստանի Հանրապետությունից դուրս գալու իրավունք ունեն`
1) յուրաքանչյուր ոք.
2) սփյուռքահայերը.
3) օտարերկրյա քաղաքացիները.
Հարց 20. Նշվածներից ո՞վ ունի իրավաբանական օգնություն ստանալու իրավունք`
1) յուրաքանչյուր քաղաքացի.
2) յուրաքանչյուր ոք.
3) ոչ ոք.
Հարց 21. Ընտրելու և հանրաքվեներին մասնակցելու իրավունք ունեն`
1) յուրաքանչյուր քաղաքացի.
2) օտարերկրացիները.
3) տասնութ տարին լրացած ՀՀ քաղաքացիները.
Հարց 22. Նշվածներից ո՞վ իրավունք ունի, որպեսզի հարգվի իր անձնական ու ընտանեկան կյանքը`
1) յուրաքանչյուր քաղաքացի.
2) յուրաքանչյուր ոք.
3) ոչ ոք.
Հարց 23. Նշվածներից ո՞վ ունի բնակարանի անձեռնմխելիության իրավունք`
1) յուրաքանչյուր քաղաքացի.
2) յուրաքանչյուր ոք.
3) ոչ ոք.
Հարց 24. Նշվածներից ո՞վ ունի խոսքի ազատության իրավունք`
1) յուրաքանչյուր քաղաքացի.
2) յուրաքանչյուր ոք.
3) ոչ ոք.
Հարց 25. Մտավոր սեփականությունը պաշտպանվում է`
1) ազգային անվտանգության մարմինների կողմից.
2) օրենքով.
3) կուսակցությունների կողմից.
Հարց 26. Նշվածներից ո՞վ է պարտավոր օրենքով սահմանված կարգով մասնակցել ՀՀ պաշտպանությանը`
1) յուրաքանչյուր քաղաքացի.
2. օտարերկրացիները.
3) պաշտոնատար անձինք.
Հարց 27. Հայաստանի Հանրապետության կառավարությունը կազմված է`
1) ՀՀ վարչապետից և նախարարներից.
2) նախարարներից.
3) ՀՀ վարչապետից և մարզպետներից.
Հարց 28. Ի՞նչ կարգով են Հայաստանի Հանրապետության քաղաքացիություն ձեռք բերում ազգությամբ հայերը`
1) պարզեցված.
2) բարդ.
3) առանց որևէ կարգի.
Հարց 29. Ո՞վ է հրավիրում և վարում Հայաստանի Հանրապետության կառավարության նիստերը`
1) ՀՀ Ազգային ժողովի նախագահը.
2) ՀՀ վճռաբեկ դատարանի նախագահը.
3) ՀՀ վարչապետը.
Հարց 30. Հայաստանի Հանրապետության Սահմանադրությունն ընդունվում է կամ դրանում փոփոխություններ են կատարվում`
1) ՀՀ կառավարության կողմից.
2) ՀՀ սահմանադրական դատարանի կողմից.
3) հանրաքվեի միջոցով:
|
ԴԻՄՈՂ |
_______________ | ________________________ |
| (ստորագրությունը) | (անունը, ազգանունը) |