ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
21 հունիսի 2007 թվականի N 722-Ա
ՓԱԽՍՏԱԿԱՆՆԵՐԻ ՀԱՐՑԵՐՈՎ ՆՈՐՎԵԳԱԿԱՆ ԽՈՐՀՐԴԻ ԿՈՂՄԻՑ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆԸ ՋՐԱՅԻՆ ՀԱՄԱԿԱՐԳ ՆՎԻՐԱԲԵՐԵԼՈՒ ՄԱՍԻՆ
Ղեկավարվելով Հայաստանի Հանրապետության քաղաքացիական օրենսգրքի 605-րդ հոդվածով և հաշվի առնելով Փախստականների հարցերով նորվեգական խորհրդի առաջարկությունը` Հայաստանի Հանրապետության կառավարությունը որոշում է.
1. Փախստականների հարցերով նորվեգական խորհրդի միջոցներով Երևան քաղաքի Սիլիկյան թաղամասում կառուցված` 51 940 941 դրամ հաշվեկշռային արժեքով ջրամատակարարման և կոյուղագծերի ցանցերը (այսուհետ` գույք) ընդունել որպես նվիրաբերություն Հայաստանի Հանրապետությանը` 49 առանձնատան համապատասխան սպասարկումն ապահովելու պայմանով:
2. Սույն որոշման 1-ին կետում նշված գույքը, որպես պետական սեփականություն, ամրացնել «Հայաստանի Հանրապետության տարածքային կառավարման նախարարության ջրային տնտեսության պետական կոմիտեի աշխատակազմ» պետական կառավարչական հիմնարկին:
3. Հայաստանի Հանրապետության տարածքային կառավարման նախարարության ջրային տնտեսության պետական կոմիտեի նախագահին`
1) Փախստականների հարցերով նորվեգական խորհրդի հայկական մասնաճյուղի տնօրենի հետ համատեղ մեկամսյա ժամկետում` սահմանված կարգով ապահովել սույն որոշման 1-ին կետում նշված գույքի նվիրաբերության պայմանագրի կնքումը և գույքային իրավունքների պետական գրանցումը` այն իրականացնելով Հայաստանի Հանրապետության տարածքային կառավարման նախարարության ջրային տնտեսության պետական կոմիտեի միջոցների հաշվին.
2) երկամսյա ժամկետում սույն որոշման 1-ին կետում նշված գույքը վարձակալության իրավունքով տրամադրել «Երևան-Ջուր» փակ բաժնետիրական ընկերությանը և ապահովել վարձակալության պայմանագրի կնքումը, նոտարական վավերացումը և գույքային իրավունքների պետական գրանցումը` առաջարկելով «Երևան Ջուր» փակ բաժնետիրական ընկերությանը դրանց հետ կապված ծախսերն իրականացնել ընկերության միջոցների հաշվին:
|
Հայաստանի Հանրապետության |
Ս. Սարգսյան |
|
|