«Գրանցված է»
ՀՀ արդարադատության
նախարարության կողմից
18 ապրիլի 2007 թ.
Պետական գրանցման թիվ 60007183

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ

18 դեկտեմբերի 2006 թ. ք. Երևան

N 337-Ն

Ո Ր Ո Շ ՈՒ Մ

ՀԱՆՐԱՅԻՆ ԷԼԵԿՏՐՈՆԱՅԻՆ ՀԱՂՈՐԴԱԿՑՈՒԹՅԱՆ ԾԱՌԱՅՈՒԹՅՈՒՆՆԵՐ ՄԱՏՈՒՑՈՂ ՕՊԵՐԱՏՈՐՆԵՐԻ ԿՈՂՄԻՑ ԴԵՊԻ ՏԵՂԵԿԱՏՈՒ ՀԱՍԱՆԵԼԻՈՒԹՅԱՆ ԱՊԱՀՈՎՄԱՆ ԵՎ ԲԱԺԱՆՈՐԴՆԵՐԻ ՏԵՂԵԿԱՏՈՒՆԵՐԻ ՀՐԱՊԱՐԱԿՄԱՆ ԿԱՆՈՆՆԵՐԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Էլեկտրոնային հաղորդակցության մասին» Հայաստանի Հանրապետության օրենքի 53-րդ հոդվածը` Հայաստանի Հանրապետության հանրային ծառայությունները կարգավորող հանձնաժողովը որոշում է.

1. Հաստատել հանրային էլեկտրոնային հաղորդակցության ծառայություններ մատուցող օպերատորների կողմից դեպի տեղեկատու հասանելիության ապահովման և բաժանորդների տեղեկատուների հրապարակման կանոնները (հավելված):

2. Սույն որոշումն ուժի մեջ է մտնում պաշտոնական հրապարակմանը հաջորդող տասներորդ օրը։

ՀՀ հանրային ծառայությունները կարգավորող հանձնաժողովի նախագահ`

Ռ. Նազարյան

Հավելված Հաստատված է ՀՀ հանրային ծառայությունները կարգավորող հանձնաժողովի 2006 թվականի դեկտեմբերի 18-ի N 337-Ն որոշմամբ

Կ Ա Ն Ո Ն Ն Ե Ր

Սույն կանոններով սահմանվում են հանրային էլեկտրոնային հաղորդակցության ամրակցված ցանցերով հեռախոսային (ձայնային) ծառայություններ մատուցող օպերատորների կողմից հանրությանը դեպի տեղեկատու հասանելիության (տեղեկատվական ծառայություն) ապահովման և այդ ցանցերի բաժանորդների տեղեկատուների հրապարակման պայմանները:

I. ՍՈՒՅՆ ԿԱՆՈՆՆԵՐՈՒՄ ՕԳՏԱԳՈՐԾՎԱԾ ՀԻՄՆԱԿԱՆ ՀԱՍԿԱՑՈՒԹՅՈՒՆՆԵՐ

Հանձնաժողով՝ Հայաստանի Հանրապետության հանրային ծառայությունները կարգավորող հանձնաժողով.

տեղեկատու՝ հանրային էլեկտրոնային հաղորդակցության ամրակցված ցանցի բաժանորդների անհատական տվյալների և հեռախոսահամարների տպագիր և(կամ) էլեկտրոնային ձևերով կազմված ամբողջություն.

տեղեկատվական ծառայություն` էլեկտրոնային հաղորդակցության միջոցներով տեղեկատվություն ստեղծելու, ձեռք բերելու, պահեստավորելու, ձևափոխելու, մշակելու և վերհանելու, օգտագործելու կամ մատչելի դարձնելու հնարավորություն ընձեռելը.

բաժանորդ կամ հաճախորդ (այսուհետև` բաժանորդ)` ցանկացած անձ, որն օգտագործում է հեռախոսային ծառայություններ կամ դիմում է դրանց օգտագործման համար.

հասանելիություն` հանրության` էլեկտրոնային հաղորդակցության միջոցներով տեղեկատուից (տեղեկատվական ծառայությունից) օգտվելու հնարավորություն.

Գործարար բաժանորդ`

1) իրավաբանական անձինք՝ անկախ սեփականության և կազմակերպական իրավական ձևերից.

2) օտարերկրյա իրավաբանական անձինք, նրանց ներկայացուցչությունները և մասնաճյուղերը.

3) Հայաստանի Հանրապետության օրենսդիր, գործադիր և դատական իշխանության մարմինները, Հայաստանի Հանրապետության կենտրոնական բանկը, ինչպես նաև բյուջետային հիմնարկները.

բնակիչ-բաժանորդ` բոլոր բաժանորդները, որոնք գործարար բաժանորդներ չեն:

II. ԸՆԴՀԱՆՈՒՐ ԴՐՈՒՅԹՆԵՐ

1. Տեղեկատուներում բաժանորդների անհատական տվյալների ներառումը կատարվում է բացառապես նրանց համաձայնությամբ:

2. Տեղեկատուները կազմվում են Հայաստանի Հանրապետության համարագրման պլանի համաձայն:

3. Տեղեկատուները բաժանորդների վերաբերյալ նվազագույնը պետք է ներառեն.

1) բնակիչ-բաժանորդների համար` ազգանուն, անուն, հայրանուն, հեռախոսահամար, բնակության վայր.

2) գործարար բաժանորդների համար` անվանում, հեռախոսահամար, գտնվելու վայր:

4. Տեղեկատուները պարտադիր պետք է ներառեն նաև.

1) Հայաստանի Հանրապետության տարածքային կոդերը,

2) շարժական կապի ցանցերի կոդերը,

3) միջազգային կոդերը,

4) համարահավաքման պլանը:

5. Առանձին վճարի դիմաց գործարար բաժանորդները տեղեկատուներում կարող են տեղադրել իրենց գործունեությունն արտացոլող գովազդային բնույթի տեղեկատվություն` ներառյալ շարժական կապի ցանցի իրենց հեռախոսահամարները:

6. Տպագիր տեղեկատուները պետք է գտնվեն ամրակցված ցանցերով հեռախոսային ծառայությունների մատուցման մեջ գերիշխող օպերատորների (այսուհետև` Օպերատոր) բոլոր գործառնական գրասենյակներում և հասանելի լինեն հանրությանը:

7. Օպերատորը պարտավոր է ապահովել հեռախոսային տեղեկատվության շուրջօրյա հասանելիությունը հանրությանը:

8. Օպերատորը պարտավոր է այնպես կազմակերպել տեղեկատվական ծառայությունը, որպեսզի հնարավորինս բացառվի զանգի անպատասխան մնալը կամ տեղեկատու ծառայության հեռախոսահամարի զբաղված լինելը:

9. Տեղեկատուները մշակվում, տպագրվում և հրապարակվում են Հանձնաժողովի կողմից սույն կանոնները հաստատվելու օրվանից մեկ տարվա ընթացքում:

Օպերատորը պարտավոր է տեղեկատուները անվճար տրամադրել.

1) Հայաստանի Հանրապետության տարածքում գործող բոլոր փոստային բաժանմունքներին,

2) Հայաստանի Հանրապետության պետական և տեղական ինքնակառավարման մարմիններին:

Տպագիր տեղեկատուների տպաքանակը որոշվում է Հանձնաժողովի կողմից` Օպերատորի հետ քննարկումներից հետո:

Հրապարակված տեղեկատուները պետք է տեղադրվեն նաև Օպերատորի ինտերնետային կայքում և պետք է կազմված լինեն տեղեկատվությունը փնտրելու հնարավորությամբ:

10. Օպերատորը պարտավոր է համագործակցել Հայաստանի Հանրապետության օրենսդրությամբ սահմանված կարգով ստեղծված տեղեկատավական ծառայությունների հետ` անվճար նրանց տրամադրելով բոլոր տեղեկատուների և դրանց համալրումների էլեկտրոնային տարբերակները:

11. Բաժանորդներն իրենց ցանկությամբ, ողջամիտ վճարի դիմաց, Օպերատորից կարող են ստանալ տեղեկատուների էլեկտրոնային տարբերակները մագնիսական, լազերային կամ այլ կրիչներով:

12. Օպերատորը պարտավոր է անվճար ապահովել բաժանորդների վերաբերյալ տեղեկատուում ընդգրկված տեղեկատվության տրամադրումը հեռախոսով կատարվող հարցումների դեպքում` ներառյալ մետաղադրամներով, հեռախոսային քարտերով, դեբետային և կրեդիտային քարտերով աշխատող հեռախոսներով:

13. Տեղեկատուի տպագրությունն իրականացվում է Օպերատորի միջոցներով և նրա պատասխանատվությամբ:

14. Տեղեկատուի տպագիր տարբերակը պետք է համալրվի (տեղեկատուին կից լրացումների ձևով) առնվազն երեք տարին մեկ անգամ և անվճար տրամադրվի սույն կանոնների 9-րդ կետում նշված անձանց:

15. Տեղեկատուի տպագրությունը, ինչպես նաև դրա էլեկտրոնային տարբերակի պատրաստումը, պայմանագրային հիմունքներով կարող են իրականացնել նաև այլ անձինք: