«ԳՐԱՆՑՎԱԾ է»
ՀՀ ԱՐԴԱՐԱԴԱՏՈՒԹՅԱՆ
ՆԱԽԱՐԱՐՈՒԹՅԱՆ ԿՈՂՄԻՑ
9 սեպտեմբերի 2002 թ.
ՊԵՏԱԿԱՆ ԳՐԱՆՑՄԱՆ թիվ 05002166

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ

 

22 օգոստոսի 2002 թ. ք. Երևան

N 9/8-Ն

 

Ո Ր Ո Շ ՈՒ Մ

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

 

Ղեկավարվելով Հայաստանի Հանրապետության Ընտրական օրենսգրքի 41-րդ հոդվածի 1-ին մասով, Հայաստանի Հանրապետության կենտրոնական ընտրական հանձնաժողովը  որոշում է.

1. Հաստատել Կենտրոնական ընտրական հանձնաժողովի կանոնակարգը (կցվում է):

2. Սույն որոշումն ուժի մեջ մտնելու պահից ուժը կորցրած ճանաչել ԿԸՀ-ի 1999թ. ապրիլի 20-ի թիվ արձ. 17 կետ 2 «Կենտրոնական ընտրական հանձնաժողովի կանոնակարգը հաստատելու մասին» որոշումը:

 

Հայաստանի Հանրապետության կենտրոնական ընտրական հանձնաժողովի նախագահ`

Ա. Սահրադյան

 

Հավելված ՀՀ ԿԸՀ-ի 2002 թ. օգոստոսի 22-ի թիվ 9/8-Ն որոշման

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ

Կ Ա Ն Ո Ն Ա Կ Ա Ր Գ

 

Գ Լ ՈՒ Խ  1

 

ԸՆԴՀԱՆՈՒՐ ԴՐՈՒՅԹՆԵՐ

 

Կետ 1.

 

1. Կենտրոնական ընտրական հանձնաժողովն (այսուհետ` Հանձնաժողով) ընտրությունները կազմակերպող և ընտրությունների օրինականության նկատմամբ վերահսկողություն իրականացնող մարմին է:

2. Հայաստանի Հանրապետության ընտրական օրենսգրքով սահմանված կարգով Կենտրոնական ընտրական հանձնաժողովն իր լիազորությունների շրջանակում ընդունում է որոշումներ:

 

Կետ 2.

 

1. Կենտրոնական ընտրական հանձնաժողովը գործում է մշտական հիմունքներով` ՀՀ Սահմանադրությանը, ՀՀ ընտրական օրենսգրքին և սույն կանոնակարգին համապատասխան:

2. Կենտրոնական ընտրական հանձնաժողովի կանոնակարգը հաստատվում է հանձնաժողովի որոշմամբ:

3. Կենտրոնական ընտրական հանձնաժողովի գործունեությունն իրականացվում է կոլեգիալության սկզբունքով:

 

Կետ 3.

 

1. Կենտրոնական ընտրական հանձնաժողովն ունի իրավաբանական անձի կարգավիճակ:

Կենտրոնական ընտրական հանձնաժողովն ունի իրավաբանական անձի համար ՀՀ քաղաքացիական օրենսդրությամբ նախատեսված իրավունքներ և կրում է պարտականություններ, դատարանում կարող է հանդես գալ որպես հայցվոր կամ պատասխանող:

2. Կենտրոնական ընտրական հանձնաժողովն ունի ինքնուրույն հաշվեկշիռ:

 

Կետ 4.

 

1. Կենտրոնական ընտրական հանձնաժողովի նիստերը գումարվում են Երևան քաղաքում, Կենտրոնական ընտրական հանձնաժողովի նստավայրում` Գրիգոր Քոչար 21ա:

2. Այլ վայրում նիստ կարող է գումարվել հանձնաժողովի որոշմամբ կամ սույն կանոնակարգի 14 հոդվածի 2-րդ կետով նախատեսված դեպքում:

 

Գ Լ ՈՒ Խ  2

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ԿԱԶՄԱՎՈՐՈՒՄԸ

 

Կետ 5.

 

1. Կենտրոնական ընտրական հանձնաժողովը կազմված է ինն անդամից:

2. Կենտրոնական ընտրական հանձնաժողովը կազմավորվում է`

1) գործող կամ արձակված Ազգային ժողովում խմբակցություն ունեցող յուրաքանչյուր կուսակցության (դաշինքի անդամ կուսակցությունների) մշտապես գործող մարմնի (մարմինների) վավերացրած որոշմամբ նշանակած մեկական անդամից.

2) Հանրապետության Նախագահի նշանակած 3 անդամից:

3. ՀՀ ընտրական օրենսգրքի 35 հոդվածի 1-ին կետի 1-ին ենթակետի պահանջներին համապատասխան` եթե մինչև Կենտրոնական ընտրական հանձնաժողովի ձևավորման վերջին օրը որևէ կուսակցություն (դաշինք) թեկնածու չի առաջադրում, ապա հանձնաժողովի թափուր տեղը լրացնում է համապատասխան խմբակցությունը:

 

Կետ 6.

 

1. Նոր Կենտրոնական ընտրական հանձնաժողովը կազմավորվում և իր լիազորությունները ստանձնում է Ազգային ժողովի կազմավորումից հետո` քառասուներորդ օրը:

2. Նոր Կենտրոնական ընտրական հանձնաժողովի կազմը հրապարակում է նախկին Կենտրոնական ընտրական հանձնաժողովի նախագահը:

 

Կետ 7.

 

1. Կենտրոնական ընտրական հանձնաժողովի առաջին նիստը սկսվում է Կենտրոնական ընտրական հանձնաժողովի կազմավորման օրը` ժամը 12⁰⁰-ին և կարող է ընթանալ մինչև ժամը 24⁰⁰-ն, Կենտրոնական ընտրական հանձնաժողովի վարչական շենքում:

2. Առաջին նիստը վարում է նախկին Կենտրոնական ընտրական հանձնաժողովի նախագահը:

3. Կենտրոնական ընտրական հանձնաժողովն իր առաջին նիստում ընտրում է Կենտրոնական ընտրական հանձնաժողովի նախագահ, նախագահի տեղակալ և քարտուղար:

 

Գ Լ ՈՒ Խ  3

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ՆԱԽԱԳԱՀԻ, ՆԱԽԱԳԱՀԻ ՏԵՂԱԿԱԼԻ ԵՎ ՀԱՆՁՆԱԺՈՂՈՎԻ ՔԱՐՏՈՒՂԱՐԻ ԸՆՏՐՈՒԹՅԱՆ ԿԱՐԳԸ

 

Կետ 8.

 

1. Կենտրոնական ընտրական հանձնաժողովն իր կազմից ընտրում է հանձնաժողովի նախագահ, նախագահի տեղակալ և հանձնաժողովի քարտուղար:

2. Կենտրոնական ընտրական հանձնաժողովի նախագահի, նախագահի տեղակալի և հանձնաժողովի քարտուղարի թեկնածուների առաջադրման իրավունքը պատկանում է Կենտրոնական ընտրական հանձնաժողովի անդամներին:

3. Նիստը վարողը գրանցում է նոր հանձնաժողովի նախագահ առաջադրված թեկնածուների ազգանուն, անունը:

4. Գրանցված թեկնածուները կարող են ելույթ ունենալ և պատասխանել հանձնաժողովի անդամների հարցերին:

 

Կետ 9.

 

Նախքան Կենտրոնական ընտրական հանձնաժողովի նախագահի թեկնածուներ առաջադրելը որոշվում է քվեարկության անցկացման կարգը: Քվեարկության անցկացման կարգի վերաբերյալ հանձնաժողովը ընդունում է որոշում:

 

Կետ 10.

 

1. Կենտրոնական ընտրական հանձնաժողովի նախագահի, նախագահի տեղակալի և հանձնաժողովի քարտուղարի ընտրությունը կարող է կատարվել բաց կամ գաղտնի քվեարկությամբ:

2. Բաց քվեարկությունն իրականացվում է նիստը վարողի հայտարարությամբ: Հանձնաժողովի անդամը քվեարկում է անձամբ` կողմ, դեմ, ձեռնպահ կամ հրաժարվում է քվեարկությանը մասնակցելուց:

Քվեարկության ավարտից հետո նիստը վարողը հրապարակում է քվեարկության արդյունքները:

3. Գաղտնի քվեարկությունը կազմակերպում է հաշվիչ հանձնաժողովը: Հաշվիչ հանձնաժողովը ձևավորվում է Կենտրոնական ընտրական հանձնաժողովի անդամներից` նիստը վարողի ղեկավարությամբ: Գաղտնի քվեարկություն կազմակերպելու համար նիստը վարողը հայտարարում է մեկ ժամ ընդմիջում:

Գաղտնի քվեարկության քվեաթերթիկները պատրաստվում են հաշվիչ հանձնաժողովի կողմից:

Քվեաթերթիկներում այբբենական կարգով ընդգրկվում են առաջադրված և ինքնաբացարկ չհայտնած թեկնածուների ազգանուններն ու անունները:

Քվեաթերթիկում մեկ թեկնածության դեպքում նշվում են «կողմ» և «դեմ» բառերը:

Հանձնաժողովի անդամները քվեաթերթիկը լրացնում են գաղտնի` քվեարկության խցիկում /կամ սենյակում/, թողնելով այն թեկնածուի ազգանունը և անունը, որի օգտին նա քվեարկում է, ջնջելով մյուս ազգանունները և անունները:

Մեկ թեկնածու քվեարկելու դեպքում, եթե հանձնաժողովի անդամը քվեարկում է թեկնածուի օգտին ջնջում է «դեմ» բառը, իսկ եթե քվեարկում է թեկնածուին դեմ` ջնջում է «կողմ» բառը:

Քվեարկության ավարտից հետո հաշվիչ հանձնաժողովը բացում է քվեարկության տուփը և հաշվում ձայները:

4. Գաղտնի քվեարկության արդյունքների մասին կազմվում է արձանագրություն, որը ստորագրում են Հաշվիչ հանձնաժողովի անդամները:

5. Հաշվիչ հանձնաժողովի ներկայացրած արդյունքների հիման վրա նիստը վարողը հայտարարում է թեկնածուի ընտրության մասին:

 

Կետ 11.

 

1. Եթե Կենտրոնական ընտրական հանձնաժողովի նախագահի պաշտոնի համար քվեարկվել է մեկ թեկնածու, ապա նա ընտրված է համարվում, եթե ստացել է քվեարկության մասնակիցների ձայների կեսից ավելին:

2. Եթե Կենտրոնական ընտրական հանձնաժողովի նախագահի պաշտոնի համար քվեարկվել է երկու թեկնածու, ապա ընտրված է համարվում քվեարկության մասնակիցների առավել ձայներ ստացած թեկնածուն:

3. Եթե Կենտրոնական ընտրական հանձնաժողովի նախագահի պաշտոնի համար քվեարկվել է երկուսից ավելի թեկնածու, և նրանցից ոչ մեկը չի ստացել քվեարկության մասնակիցների ձայների կեսից ավելին, ապա առավել ձայներ ստացած թեկնածուների միջև անցկացվում է կրկնական քվեարկություն, սույն հոդվածի 2-րդ կետով սահմանված կարգով:

 

Կետ 12.

 

Կենտրոնական ընտրական հանձնաժողովի նախագահն առաջին նիստում սահմանված կարգով չընտրվելու դեպքում, եռօրյա ժամկետում, Կենտրոնական ընտրական հանձնաժողովի նախագահին նշանակում է կառավարությունը` Կենտրոնական ընտրական հանձնաժողովի անդամներից ՀՀ ընտրական օրենսգրքի 35-րդ հոդվածի 11-րդ կետի համաձայն:

 

Կետ 13.

 

Կենտրոնական ընտրական հանձնաժողովի նախագահի տեղակալն ու քարտուղարն ընտրվում են նոր կազմավորված հանձնաժողովի առաջին նիստում` հանձնաժողովի նախագահի ընտրությունից հետո:

 

Գ Լ ՈՒ Խ  4

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ՆԻՍՏԵՐԸ

 

Կետ 14.

 

1. Կենտրոնական ընտրական հանձնաժողովի հերթական նիստերը անցկացվում են հանձնաժողովի նախագահի կողմից սահմանված ժամանակացույցով:

2. Նիստերն անցկացվում են հանձնաժողովի վարչական շենքի նիստերի դահլիճում, իսկ անհաղթահարելի խոչընդոտների առկայության դեպքում, երբ անհնար է նիստի օրն ու ժամը հետաձգելը, հանձնաժողովի նախագահը ստանալով հանձնաժողովի անդամների կեսից ավելիի համաձայնությունը, նիստն անցկացնում է այլ վայրում:

3. Նիստերին հանձնաժողովի անդամների մասնակցությունը նշվում է նիստերի գործավարության մատյանում, որտեղ յուրաքանչյուրն իր ազգանվան դիմաց ստորագրում է:

4. Կենտրոնական ընտրական հանձնաժողովի նիստերը սղագրվում են:

 

Կետ 15.

 

1. Կենտրոնական ընտրական հանձնաժողովի արտահերթ նիստ հրավիրվում է`

ա) հանձնաժողովի նախագահի նախաձեռնությամբ,

բ) հանձնաժողովի անդամների առնվազն մեկ երրորդի գրավոր պահանջով` նրանց նշած ժամկետում և օրակարգով:

2. Արտահերթ նիստ հրավիրելու ժամկետի և օրակարգի մասին հանձնաժողովի նախագահը գրավոր տեղյակ է պահում հանձնաժողովի անդամներին ոչ ուշ, քան արտահերթ նիստից երկու ժամ առաջ:

 

Կետ 16.

 

1. Կենտրոնական ընտրական հանձնաժողովի նիստերը դռնբաց են:

2. Հանձնաժողովի նիստերին մասնակցում են ԿԸՀ-ի աշխատակազմի ստորաբաժանումների ղեկավարները:

3. Հանձնաժողովի նիստերին կարող են ներկա գտնվել`

- զանգվածային լրատվության միջոցների հավատարմագրված ներկայացուցիչները,

- հանձնաժողովի կողմից հրավիրված անձինք,

- դիտորդական առաքելություն իրականացնող կազմակերպությունների ներկայացուցիչները,

- Հանրապետության Նախագահի թեկնածուները կամ նրա լիազոր ներկայացուցիչները, վստահված անձինք,

- Ազգային ժողովի` համամասնական ընտրակարգով ընտրություններին մասնակցող կուսակցությունների (կուսակցությունների դաշինքի) լիազոր ներկայացուցիչները կամ թեկնածուների վստահված անձինք,

- Ազգային ժողովի` մեծամասնական ընտրակարգով պատգամավորության թեկնածուն կամ լիազոր ներկայացուցիչը, ինչպես նաև նրա վստահված անձը` իր բողոքի քննարկման ժամանակ:

Հանձնաժողովի նիստում ներկա գտնվող վերոհիշյալ անձինք կարող են մասնակցել հարցի քննարկմանը միայն նիստը վարողի թույլտվությամբ:

 

Կետ 17.

 

1. Կենտրոնական ընտրական հանձնաժողովի նիստն իրավազոր է, եթե նիստին ներկա են հանձնաժողովի անդամների կեսից ավելին:

Հանձնաժողովի նիստը վարում է հանձնաժողովի նախագահը կամ նրա հանձնարարությամբ նախագահի տեղակալը:

2. Քվորումի բացակայության դեպքում նիստը վարողը որոշում է կայացնում նիստի տեղափոխման մասին:

3. Կենտրոնական ընտրական հանձնաժողովի նիստը սկսվում է օրակարգի հաստատումով: Նիստը վարողը ընթերցում է օրակարգի հարցերը և անհրաժեշտության դեպքում տալիս է պարզաբանումներ:

4. Նիստը վարողը, ելնելով աշխատանքի արդյունավետությունից, կարող է փոխել օրակարգի հարցերի քննարկման հերթականությունը, եթե չկա առարկություն:

Օրակարգի հարցերի վերաբերյալ առարկությունների դեպքում առաջարկությունը դրվում է քվեարկության:

5. Մինչև օրակարգի հաստատումն այլ հարցեր չեն քննարկվում:

 

Կետ 18.

 

1. Հանձնաժողովի նիստի օրակարգը կազմվում է հանձնաժողովի անդամների առաջարկությունների հիման վրա:

2. Նիստերի օրակարգը կազմում է հանձնաժողովի քարտուղարը` հանձնաժողովի նախագահի հանձնարարությամբ:

3. Հանձնաժողովի նիստի օրակարգում ընդգրկված հարցերի որոշման նախագծերը սույն կանոնակարգի 20-րդ հոդվածով սահմանված կարգով հանձնաժողովի անդամները հանձնում են հանձնաժողովի քարտուղարին:

 

Կետ 19.

 

1. Հերթական նիստի օրակարգում առաջարկություններն ընդգրկելու համար դրանք որոշման նախագծերի տեսքով հանձնաժողովի անդամների կողմից ներկայացվում են քարտուղարին` ոչ ուշ, քան նիստից 2 օր առաջ:

2. Հրատապ հարցերը ընդգրկվում են օրակարգ հանձնաժողովի նախագահի կողմից կամ հանձնաժողովի անդամների առնվազն մեկ երրորդի պահանջով, ոչ ուշ, քան նիստի սկսվելուց երկու ժամ առաջ: Հրատապ հարցերը կարող են ընդգրկվել օրակարգ նաև հանձնաժողովի որոշմամբ` նիստի սկզբում:

 

Կետ 20.

 

1. Որոշման նախագծերը նիստի քննարկմանը ներկայացնելիս դրան կցվում են իրավական ակտի ընդունման հիմքերը, նախագծի ընդունման կապակցությամբ ԿԸՀ-ի այլ նորմատիվ իրավական ակտերում փոփոխություններ կամ լրացումներ կատարելու անհրաժեշտության կամ բացառության մասին տեղեկանք:

2. Որոշման նախագծերը հանձնաժողովի նիստի օրակարգ ընդգրկելուց առաջ ներկայացվում են հանձնաժողովի իրավաբանական բաժին` իրավաբանական փորձաքննության:

 

Կետ 21.

 

1. Հանձնաժողովի նիստի օրակարգում ընդգրկված հարցերի որոշման նախագծերն ու անհրաժեշտ նյութերը հանձնաժողովի անդամներին հանձնում է հանձնաժողովի աշխատակազմը` ոչ ուշ, քան նիստը սկսվելուց երկու ժամ առաջ:

2. Նիստին ներկա գտնվելու իրավունք ունեցող անձանց բաժանվում է նիստի օրակարգը: Նրանք իրավունք ունեն ծանոթանալ նաև ներկայացվող որոշումների նախագծերին:

 

Գ Լ ՈՒ Խ  5

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ՆԻՍՏՈՒՄ ՀԱՐՑԵՐ ՔՆՆԱՐԿԵԼՈՒ ԵՎ ՈՐՈՇՈՒՄՆԵՐ ԸՆԴՈՒՆԵԼՈՒ ԿԱՐԳԸ

 

Կետ 22.

 

Կենտրոնական ընտրական հանձնաժողովի որոշումներն ընդունվում են հանձնաժողովի իրավազոր նիստում` բաց քվեարկությամբ: Գաղտնի քվեարկությամբ որոշում ընդունվում է միայն հանձնաժողովի որոշմամբ:

 

Կետ 23.

 

1. Հանձնաժողովի նիստը հարցերի քննարկումը սկսում է որոշման նախագիծը ներկայացնողի զեկուցումով: Զեկուցման կապակցությամբ հանձնաժողովի անդամները կարող են`

- հարակից ելույթներ ունենալ (մինչև 5 րոպե),

- տալ հարցեր,

- ներկայացնել առաջարկություններ (մինչև 3 րոպե):

2. Քննարկվող յուրաքանչյուր հարցի կապակցությամբ նիստը վարողն ունի ելույթի իրավունք մինչև 7 րոպե:

3. Նիստի ընթացքում արված նոր առաջարկությունները գրանցում է հանձնաժողովի քարտուղարը:

 

Կետ 24.

 

1. Նիստը վարողն ամփոփում է քննարկումը և քվեարկությունից առաջ ներկայացնում է որոշման նախագծի վերաբերյալ արված դիտողությունները և առաջարկությունները: Դրանք զեկուցողի կողմից ընդունվելու դեպքում քվեարկությունը հետաձգում է` որոշման նախագիծը նոր տեսքով քվեարկության ներկայացնելու համար:

2. Առաջարկությունները զեկուցողի կողմից չընդունվելու դեպքում, իսկ նոր առաջարկության հեղինակի կողմից ներկայացված տարբերակը պնդելու դեպքում` որոշում է ընդունվում առաջարկություններն առանձին-առանձին քվեարկելու մասին: Որոշումն ընդունվելուց հետո` եթե նույն հարցի վերաբերյալ իրարամերժ առաջարկություններից ոչ մեկը չի հավաքում ընդունման համար անհրաժեշտ ձայներ, ապա առավելագույն ձայներ հավաքած առաջարկությունը նորից դրվում է քվեարկության:

 

Կետ 25.

 

1. Քվեարկությունը համարվում է կայացած, եթե քվեարկությանը մասնակցել է հանձնաժողովի անդամների ընդհանուր թվի կեսից ավելին:

2. Որոշումը համարվում է ընդունված, եթե դրա օգտին քվեարկել են քվեարկության մասնակիցների կեսից ավելին: Ձայների հավասարության դեպքում հանձնաժողովի նախագահի (նիստը վարողի) ձայնը վճռորոշ է`

ա) եթե քվեարկության է դրվում երկու իրարամերժ առաջարկություն և երկուսն էլ հավաքում են հավասար և բավարար կողմ ձայներ,

բ) եթե առաջարկությանը կողմ ձայները հավասար են դեմ և ձեռնպահ ձայների գումարին:

 

Կետ 26.

 

1. Յուրաքանչյուր քվեարկությունից առաջ նիստը վարողը կրկնում է քվեարկության դրվող հարցը` ճշգրիտ ձևակերպմամբ, հաշվում և բարձրաձայն հայտարարում է կողմ տրված ձայների թիվը, այնուհետև նույն կարգով` դեմ ու ձեռնպահ ձայների թիվը:

2. Քվեարկությունը կարող է կրկնվել, եթե ինչ-որ կապակցությամբ խանգարվել է հանձնաժողովի որևէ անդամի քվեարկությունը:

3. Քվեարկության արդյունքները սղագրվում են նիստի արձանագրությունում:

 

Կետ 27.

 

1. Կենտրոնական ընտրական հանձնաժողովի նորմատիվ իրավական ակտերը հրապարակվում և ուժի մեջ են մտնում «Իրավական ակտերի մասին» ՀՀ օրենքով սահմանված կարգով:

2. Կենտրոնական ընտրական հանձնաժողովի լիազորությունների շրջանակներում ընդունված որոշումները պարտադիր են պետական և տեղական ինքնակառավարման մարմինների, հասարակական կազմակերպությունների, կուսակցությունների, հիմնարկների, կազմակերպությունների, ինչպես նաև պաշտոնատար անձանց համար:

 

Գ Լ ՈՒ Խ  6

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ԱՆԴԱՄԻ ԿԱՐԳԱՎԻՃԱԿԸ

 

Կետ 28.

 

Կենտրոնական ընտրական հանձնաժողովի անդամն իրավունք ունի`

- նախապես ծանոթանալ հանձնաժողովի քննարկմանը ներկայացվող հարցերին և փաստաթղթերին,

- ելույթներ ունենալ հանձնաժողովի նիստերում,

- ներկայացնել առաջարկություններ և պահանջել, որ այդ առթիվ անցկացվի քվեարկություն,

- նիստի մասնակիցներին տալ հարցեր և ստանալ սպառիչ պատասխաններ,

- հանձնաժողովի նախագահի հանձնարարությամբ` խորհրդակցական ձայնի իրավունքով, մասնակցել ստորադաս ընտրական հանձնաժողովների նիստերին,

- քվեարկության օրը ներկա գտնվել տեղամասային կենտրոնում,

- ներգրավվել հանձնաժողովում ստեղծված աշխատանքային խմբերում,

- ծանոթանալ ԿԸՀ-ում ստացված դիմումներին, բողոքներին, գրություններին, նամակներին և մյուս փաստաթղթերին,

- ծանոթանալ ստորադաս ընտրական հանձնաժողովների աշխատանքների կատարման գործընթացին,

- հրապարակավ ելույթներ ունենալ` միջոցառումների ժամանակ, զանգվածային լրատվության միջոցներով, հայտնելով ընտրությունների նախապատրաստման, կազմակերպման և անցկացման վերաբերյալ իր անձնական կարծիքը,

- հրավիրել մասնագետներ, ներկայացուցիչներ, քաղաքացիներ և գործով անհրաժեշտ այլ անձանց, ԿԸՀ-ում հարցերի նախապատրաստմանն աջակցելու նպատակով,

- ստանալ` ԿԸՀ-ի աշխատակազմից, մասնագիտական, խորհրդատվական, տեխնիկական և այլ բնույթի օժանդակություն, ինչպես նաև լիազորություններն իրականացնելիս կատարված անհրաժեշտ ծախսումների փոխհատուցում` օրենքով սահմանված կարգով,

- օգնել ստորադաս հանձնաժողովներին, նրանց առանձին անդամներին, ընտրությունների մասնակիցներին իրավաբանական, կազմակերպչական և մեթոդական խորհրդատվություններով:

 

Կետ 29.

 

Կենտրոնական ընտրական հանձնաժողովի անդամը պարտավոր է`

- կատարել հանձնաժողովի նախագահի կողմից իր իրավասության սահմաններում տրված հանձնարարականները,

- մասնակցել ԿԸՀ-ի նիստերին` իր անվան դիմաց ստորագրել նիստերի գործավարության մատյանում,

- հանձնաժողովի քննարկմանը ներկայացվող հարցերը ներկայացնել սույն կանոնակարգի 20 հոդվածով սահմանված կարգով,

- ուսումնասիրել և ընթացք տալ` վիճակահանության արդյունքում տեսակավորված դիմումներին, բողոքներին, համադրել ընտրատարածքային ընտրական հանձնաժողովների հետ ընթացիկ աշխատանքները,

- իր գործունեության ընթացքում պահպանել ՀՀ աշխատանքային օրենսդրությամբ սահմանված պարտականությունները:

 

Կետ 30.

 

Կենտրոնական ընտրական հանձնաժողովի անդամը`

- ազատվում է զորահավաքներից և վարժական հավաքներից, իսկ համապետական ընտրությունների ժամանակահատվածում` նաև զորակոչից,

- կարող է կալանավորվել, դատական կարգով վարչական կամ քրեական պատասխանատվության ենթարկվել միայն ԿԸՀ-ի համաձայնությամբ:

 

Կետ 31.

 

Կենտրոնական ընտրական հանձնաժողովի անդամն աշխատում է մշտական հիմունքներով և վարձատրվում է վճռաբեկ դատարանի դատավորի աշխատավարձի չափով:

 

Կետ 32.

 

Կենտրոնական ընտրական հանձնաժողովի անդամն իրավունք չունի կատարելու վճարովի այլ աշխատանք, բացի գիտական, մանկավարժական և ստեղծագործական աշխատանքից:

 

Կետ 33.

 

Կենտրոնական ընտրական հանձնաժողովի անդամն իր լիազորությունները իրականացնում է մինչև նոր Կենտրոնական ընտրական հանձնաժողովի կազմավորումը:

 

Կետ 34.

 

Կենտրոնական ընտրական հանձնաժողովի անդամի լիազորությունները դադարեցվում են, եթե ավարտվել է ԿԸՀ-ի լիազորությունների ժամկետը:

 

Կետ 35.

 

Կենտրոնական ընտրական հանձնաժողովի անդամի լիազորությունները վաղաժամկետ դադարեցվում են`

1) եթե նա կորցրել է իր ընտրական իրավունքը`

- կորցրել է ՀՀ քաղաքացիությունը,

- դատապարտվել է ազատազրկման,

- օրինական ուժի մեջ է մտել նրան անգործունակ ճանաչելու մասին դատարանի վճիռը,

2) մահացել է.

3) ԿԸՀ-ի նիստերից երեք անհարգելի բացակայության դեպքում հանձնաժողովի անդամի լիազորությունները վաղաժամկետ դադարեցնելու մասին, ԿԸՀ-ի անդամների ընդհանուր թվի ձայների մեծամասնությամբ ընդունվել է որոշում.

4) իր դիմումի համաձայն.

5) զորակոչվել է:

Լիազորությունները վաղաժամկետ դադարեցված անդամի փոխարեն նրան նշանակած մարմինը ՀՀ ԸՕ-ով սահմանված կարգով կատարում է նոր նշանակում:

(35-րդ կետը փոփ. 30.04.03 N 118-Ն)

 

Գ Լ ՈՒ Խ  7

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ՆԱԽԱԳԱՀԸ

 

Կետ 36.

 

Կենտրոնական ընտրական հանձնաժողովի նախագահը հանձնաժողովի աշխատանքը ղեկավարող, հանձնաժողովն այլ մարմիններում, ատյաններում և իրավահարաբերություններում ներկայացնող պաշտոնատար անձն է:

 

Կետ 37.

 

Կենտրոնական ընտրական հանձնաժողովի նախագահը`

- ղեկավարում է հանձնաժողովի աշխատանքները,

- սահմանում է հանձնաժողովի հերթական նիստերի ժամանակացույցը,

- հրավիրում է արտահերթ նիստ,

- վարում է հանձնաժողովի նիստերը (սույն կանոնակարգին համապատասխան),

- ելույթների համար ձայն է տալիս` ըստ հերթականության,

- զգուշացումներ անում կանոնակարգը խախտողներին, իսկ կրկնվելու դեպքում` զրկում խոսքից,

- ուղղում ելույթներում տեղ գտած փաստական սխալները,

- ձայն տալիս հրավիրված անձանց և սահմանված կարգով զրկում խոսքից, խանգարողներին` հեռացնում նիստերի դահլիճից,

- կազմակերպում և անցկացնում է քվեարկությունը, ամփոփում և հայտարարում քվեարկության արդյունքները,

- ստորագրում է նիստերի արձանագրությունները,

- ստորագրում և իր լիազորությունների շրջանակներում հրապարակում է հանձնաժողովի որոշումները,

- ՀՀ օրենսդրությամբ իրեն վերապահված լիազորությունների շրջանակում, ընդունում է անհատական որոշումներ կամ կարգադրություններ,

- հրապարակում է ՀՀ ընտրական օրենսգրքի կիրառման վերաբերյալ հրահանգներ` օրենքով սահմանված կարգով,

- վերահսկում է հանձնաժողովի կողմից ընդունված որոշումների կատարման ընթացքը,

- կազմակերպում է ընտրությունները նախապատրաստելու և անցկացնելու համար ֆինանսական միջոցների ստացումը և տնօրինում այդ դրամական միջոցները,

- ստորագրում է հանձնաժողովի ելից փաստաթղթերը,

- անցկացնում է խորհրդակցություններ,

- ապահովում է խորհրդակցությունների ժամանակ տրված հանձնարարականների ժամանակին և որակյալ կատարումը,

- ընդունում է պատվիրակություններ և հյուրեր,

- լուծում է ՀՀ ընտրական օրենսգրքով սահմանված հանձնաժողովի լիազորությունների իրականացումն ապահովող այլ հարցեր,

- կազմակերպում է մշտական հիմունքներով գործող աշխատակազմ,

- ապահովում է հանձնաժողովի աշխատակազմի բնականոն և արդյունավետ աշխատանքը` սույն կանոնակարգին համապատասխան,

- նշանակում և պաշտոնից ազատում է հանձնաժողովի աշխատակազմի ղեկավարին, հանձնաժողովի աշխատակազմի ստորաբաժանումների ղեկավարներին,

- աշխատանքի է ընդունում և ազատում աշխատակազմի աշխատակիցներին:

 

Կետ 38.

 

1. Կենտրոնական ընտրական հանձնաժողովի նախագահը` ընտրությունները նշանակվելու օրվանից հանձնաժողովին առընթեր ստեղծում է վերահսկիչ-վերստուգիչ ծառայություն:

2. Վերահսկիչ-վերստուգիչ ծառայության գործունեության կարգը սահմանում է Կենտրոնական ընտրական հանձնաժողովը:

 

Կետ 39.

 

Հանձնաժողովի նախագահը աշխատում է մշտական հիմունքներով` մինչև նոր հանձնաժողովի նախագահի ընտրությունը: Հանձնաժողովի նախագահը վարձատրվում է ՀՀ վճռաբեկ դատարանի նախագահի աշխատավարձի չափով:

 

Կետ 40.

 

Հանձնաժողովի նախագահի լիազորությունները կարող են վաղաժամկետ դադարեցվել իր դիմումի համաձայն, որը նրա կողմից ներկայացվում է հանձնաժողովի նիստին: Այն ընդունվում է ի գիտություն:

Եթե հանձնաժողովի նախագահի լիազորությունները վաղաժամկետ դադարել են հանձնաժողովի անդամի լիազորությունները դադարեցնելու օրենսգրքով նախատեսված դեպքերում, ապա նախագահի տեղակալը եռօրյա ժամկետում հրավիրում է արտահերթ նիստ հանձնաժողովի նախագահի ընտրության համար:

Նոր ընտրությունը կատարվում է ՀՀ ընտրական օրենսգրքով և սույն կանոնակարգով սահմանված կարգով:

 

Կետ 41.

 

1. Հանձնաժողովի նախագահը կարող է պաշտոնանկ արվել հանձնաժողովի անդամների ձայների ընդհանուր թվի երկու երրորդով ընդունված որոշմամբ:

2. Հանձնաժողովի նախագահը կարող է պաշտոնանկ արվել ընտրության օրվանից ոչ ուշ, քան չորս օր առաջ: Նույն նիստում կատարվում է հանձնաժողովի նախագահի նոր ընտրություն` ՀՀ ընտրական օրենսգրքով և սույն կանոնակարգով սահմանված կարգով:

 

Գ Լ ՈՒ Խ  8

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ՆԱԽԱԳԱՀԻ ՏԵՂԱԿԱԼԸ

 

Կետ 42.

 

Հանձնաժողովի նախագահի տեղակալը ընտրվում և պաշտոնանկ է արվում, կամ նրա լիազորությունները վաղաժամկետ դադարեցվում են հանձնաժողովի նախագահի համար սույն կանոնակարգով նախատեսված կարգով:

 

Կետ 43.

 

Հանձնաժողովի նախագահի տեղակալն աշխատում է մշտական հիմունքներով` վարձատրվում է ՀՀ վճռաբեկ դատարանի պալատի նախագահի աշխատավարձի չափով:

 

Կետ 44.

 

Հանձնաժողովի նախագահի տեղակալն ապահովում է ընտրությունների վերաբերյալ ստացված տեղեկությունների, դիմումների, բողոքների, պաշտոնական գրությունների հետ տարվող աշխատանքը:

 

Կետ 45.

 

Հանձնաժողովի նախագահի տեղակալը հանձնաժողովի նախագահի բացակայության ժամանակ նրան փոխարինող պաշտոնատար անձն է:

Հանձնաժողովի նախագահի տեղակալը հանձնաժողովի նախագահի հանձնարարությամբ իրականացնում է հանձնաժողովի նախագահին վերապահված լիազորությունների որոշակի մասը:

 

Գ Լ ՈՒ Խ  9

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ՔԱՐՏՈՒՂԱՐԸ

 

Կետ 46.

 

Հանձնաժողովի քարտուղարն ընտրվում և պաշտոնանկ է արվում կամ նրա լիազորությունները վաղաժամկետ դադարեցվում են հանձնաժողովի նախագահի համար սույն կանոնակարգով նախատեսված կարգով:

 

Կետ 47.

 

Հանձնաժողովի քարտուղարը աշխատում է մշտական հիմունքներով և վարձատրվում է ՀՀ վճռաբեկ դատարանի դատավորի աշխատավարձի չափով:

 

Կետ 48.

 

Հանձնաժողովի քարտուղարը`

- նախապատրաստում է հանձնաժողովների նիստերի անցկացումը,

- կազմում և ստորագրում է նիստերի օրակարգը,

- տեղեկացնում է հանձնաժողովի անդամներին օրակարգի հարցերի մասին,

- ապահովում է նիստերի հրապարակայնությունը, հրավիրված անձանց ներկայությունը,

- անհրաժեշտության դեպքում օրակարգի մասին տալիս է պարզաբանումներ,

- վերահսկում նիստը սպասարկող աշխատակազմի աշխատանքը,

- վերահսկում է նիստերի սղագրությունը,

- ստորագրում է նիստերի արձանագրությունները,

- ապահովում է հանձնաժողովի ընդունած որոշումների կատարումը,

- կազմակերպում է ընդունված որոշումների պաշտոնական հրապարակումը,

- կազմակերպում և հետևում է, որ որոշումներն ուղարկվեն ըստ պատկանելիության,

- հաստատում է սահմանված կարգով հավատարմագրված զանգվածային լրատվության միջոցների ներկայացուցիչների ցանկը, տալիս է վկայականները,

- ղեկավարում է հանձնաժողովի աշխատակազմի աշխատանքները,

- կազմակերպում է ընտրական փաստաթղթերի ստացման, պահպանման և հանձնման աշխատանքը:

 

Գ Լ ՈՒ Խ  10

 

ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎԻ ԱՇԽԱՏԱԿԱԶՄԸ

 

Կետ 49.

 

Հանձնաժողովին վերապահված լիազորությունները արդյունավետ իրականացնելու, բնականոն գործունեությունն ապահովելու համար հանձնաժողովի նախագահը կազմավորում է մշտական հիմունքներով գործող աշխատակազմ:

 

Կետ 50.

 

Հանձնաժողովի աշխատակազմի աշխատանքները ղեկավարում են հանձնաժողովի քարտուղարն ու հանձնաժողովի աշխատակազմի ղեկավարը:

 

Կետ 51.

 

Հանձնաժողովի աշխատակազմը` համապատասխան կառուցվածքային ստորաբաժանումների միջոցով ապահովում է հանձնաժողովի աշխատանքների կազմակերպումը: Աշխատակազմը`

- իրականացնում է իրավաբանական, կազմակերպչական և մեթոդական խորհրդատվություն,

- իրականացնում է աշխատակազմի գործունեության կազմակերպման հետ կապված այլ գործառույթներ:

 

Կետ 52.

 

Հանձնաժողովի աշխատակազմի կառուցվածքը, աշխատողների թվաքանակը և հաստիքացուցակը որոշում է հանձնաժողովի նախագահը:

 

Կետ 53.

 

Հանձնաժողովի աշխատակազմի աշխատակիցների վարձատրության դրույքաչափերը հաստատում է Կենտրոնական ընտրական հանձնաժողովը:

 

Կետ 54.

 

1. Կենտրոնական ընտրական հանձնաժողովի մամուլի և հասարակության հետ կապերի ծառայությունը ղեկավարում է ԿԸՀ մամուլի քարտուղարը, որն ապահովում է կապը զանգվածային լրատվության միջոցների հետ, տեղեկացնում է ԿԸՀ-ի նիստերի անցկացման մասին և ապահովում է նրանց մասնակցությունը հանձնաժողովի նիստերին:

2. Կենտրոնական ընտրական հանձնաժողովի գործունեության վերաբերյալ պաշտոնական տեղեկատվություն և մամուլի հաղորդագրություն տալու իրավունք ունի հանձնաժողովի նախագահը կամ նախագահի տեղակալը, հանձնաժողովի քարտուղարը, մամուլի քարտուղարը:

(հավելվածը փոփ. 30.04.03 N 118-Ն)