«Գրանցված է»
ՀՀ արդարադատության
նախարարության կողմից
26 ապրիլի 2004 թ.
Պետական գրանցման թիվ 50704089

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՇԻՐԱԿԻ ՄԱՐԶՊԵՏ

19 սեպտեմբերի 2003 թ. ք. Գյումրի

N 272

 

Ո Ր Ո Շ ՈՒ Մ

ՀՀ ՇԻՐԱԿԻ ՄԱՐԶՊԵՏԱՐԱՆՈՒՄ ԳՈՐԾԱՎԱՐՈՒԹՅԱՆ ԿԱՐԳԻ ՀԱՍՏԱՏՄԱՆ ՄԱՍԻՆ

Ի կատարումն ՀՀ կառավարության 2002 թ. հունիսի 20-ի թիվ 890-Ն որոշման.

1. Հաստատել ՀՀ Շիրակի մարզպետարանում գործավարության կարգը (կցվում է):

2. Մարզպետարանի աշխատակազմի կառուցվածքային ստորաբաժանումների պետերին`

- մարզպետարանում գործավարությունն իրականացնել համաձայն սույն կարգի:

3. Սույն որոշման կատարման հսկողությունը դնել աշխատակազմի ղեկավար Խ. Պողոսյանի վրա:

Ռ. Մանուկյան

Հավելված ՀՀ Շիրակի մարզպետի 2003 թ. 19 սեպտեմբերի թիվ 272 որոշման

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՇԻՐԱԿԻ ՄԱՐԶՊԵՏԱՐԱՆԻ ԳՈՐԾԱՎԱՐՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է ՀՀ Շիրակի մարզպետարանի գործավարության կարգը:

2. ՀՀ Շիրակի մարզպետարանի գործավարության կազմակերպումն իրականացնում է ՀՀ Շիրակի մարզպետարանի աշխատակազմը (այսուհետ` աշխատակազմ):

3. Մարզպետարանում գործավարությունը միասնական է և պարտադիր աշխատակազմի բոլոր ստորաբաժանումների համար:

4. Աշխատակազմի կառուցվածքային և առանձնացված ստորաբաժանումներում գործավարության կազմակերպման և վարման համար պատասխանատու է ստորաբաժանման ղեկավարը:

5. Մարզպետարանի աշխատողները պատասխանատու են իրենց մոտ գտնվող փաստաթղթերի պահպանության համար, պարտավոր են խնամքով վերաբերվել դրանց հետ:

6. Չի թույլատրվում ստացված փաստաթղթերի բնագրային տեքստում կամ դրանց ֆայլի վրա որևէ նշում կատարել:

7. Արգելվում է մատիտով և ջնջումներով գրված գրությունները ընդունել և գրանցել:

8. Արգելվում է փաստաթղթերը մարզպետարանից դուրս տանել: Արձակուրդ գնալիս, երկարատև գործուղման մեկնելիս կամ այլ պատճառներով երկարատև բացակայության դեպքում, աշխատողները պարտավոր են իրենց մոտ գտնվող անավարտ գործերով փաստաթղթերը հանձնել իրենց փոխարինողին կամ անմիջական ղեկավարին:

9. Մարզպետարանի կառուցվածքային և առանձնացված ստորաբաժանումները միմյանց միջև գրագրությունը իրականացնում են ուղիղ, առանց քարտուղարությունում գրանցելու:

10. Գաղտնի գործավարությունն իրականացվում է «Պետական և ծառայողական գաղտնիքի մասին» Հայաստանի Հանրապետության օրենքի և Հայաստանի Հանրապետության կառավարության 1997 թ. դեկտեմբերի 30-ի թիվ 626 որոշմամբ հաստատված հրահանգի պահանջներին համապատասխան:

«ՀՀ Շիրակի մարզպետարան» ձևաթուղթը օգտագործվում է աշխատակազմի կառուցվածքային ստորաբաժանումների ղեկավարների, աշխատակազմի ղեկավարի տեղակալի, մարզպետի խորհրդականների և մամուլի խոսնակի կողմից:

II. ՀՀ ՇԻՐԱԿԻ ՄԱՐԶՊԵՏԱՐԱՆՈՒՄ ՍՏԱՑՎԱԾ ԹՂԹԱԿՑՈՒԹՅԱՆ ԸՆԴՈՒՆՈՒՄԸ, ԳՐԱՆՑՈՒՄՆ ՈՒ ՇԱՐԺԸ

11. Աշխատակազմում ստացված ամբողջ պաշտոնական և ոչ պաշտոնական թղթակցությունն ընդունվում և գրանցվում է աշխատակազմի քարտուղարությունում (այսուհետ` քարտուղարություն)` մատյանների օգնությամբ, զուգահեռ` նաև ապարատածրագրային միջոցներով, որտեղ արտացոլվում են փաստաթղթի համառոտ բովանդակությունը, շարժը և կատարման ընթացքը:

Գրանցված փաստաթղթի 1-ին էջի ներքևի աջ անկյունում դրվում է դրոշմակնիք, որի վրա նշվում են մտից գրանցման համարը և ամսաթիվը:

Ստացված փաստաթղթի մտից գրանցման համարը բաղկացած է քարտուղարության դասակարգիչներով թղթակցին տրված պայմանանիշից և նրա հերթական համարից:

12. Քարտուղարությունում բացվում են բոլոր ծրարները (նաև` էլեկտրոնային), բացի «Անձամբ» մակագրությամբ ծրարներից և անձնական էլեկտրոնային օրինակներից (ֆայլերից):

«Անձամբ» մակագրությամբ ծրարները (կամ ֆայլերը) չեն գրանցվում և փակ վիճակում հանձնվում են հասցեատիրոջը:

13. Քարտուղարության աշխատողները պարտավոր են ծրարը բացելիս ստուգել փաստաթղթերի առկայությունը (ներառյալ հավելվածները), առդիր թերթերի քանակը, փաստաթղթերի համարները համեմատել ծրարի վրա նշվածների հետ:

Փաստաթղթերի կամ ֆայլերի բացակայության կամ վնասված լինելու դեպքում կազմվում է ակտ` 3 օրինակից, որոնցից մեկը մնում է քարտուղարության արարողակարգի և հասարակայնության հետ կապերի բաժնում, երկրորդը կցվում է փաստաթղթին, իսկ երրորդն ուղարկվում է այն կազմակերպություն, որտեղից ստացվել է ծրարը:

Եթե ծրարում կամ ֆայլում հայտնվում են սխալմամբ դրված փաստաթղթեր, դրանք նոր ծրարներով կամ համակարգչային ցանցով ուղարկվում են ըստ պատկանելության` փաստաթղթին կցելով այն ծրարները (նաև` էլեկտրոնային), որոնցով դրանք ստացվել են, անհրաժեշտության դեպքում տեղյակ պահելով այն կազմակերպությանը` որտեղից ստացվել է ծրարը:

14. Ծրարները (նաև` էլեկտրոնային), որոնցով ստացվել են թղթակցությունները, պահպանվում և փաստաթղթերին են կցվում այն դեպքում, երբ միայն ծրարի միջոցով կարելի է պարզել ուղարկողի հասցեն կամ, եթե ծրարի վրա փոստային դրոշմակնիքի ամսաթիվը նշանակություն ունի տվյալ նյութի ուղարկման ու ստացման ժամանակը որոշելու համար:

15. Մտից փաստաթղթերը, որոնք ստացվում են Հայաստանի Հանրապետության կառավարության համակարգչային ցանցով (այսուհետ` համակարգչային ցանց) պետք է հաստատված լինեն ուղարկողի կամ համապատասխան պաշտոնատար անձի էլեկտրոնային թվային ստորագրությամբ: Ստացված էլեկտրոնային օրինակն անհրաժեշտության դեպքում վերծանվում է և տեղական լոկալ համակարգչային ցանցով, ուղարկվում հասցեատիրոջը:

16. Յուրաքանչյուր փաստաթուղթ պետք է ունենա իր էլեկտրոնային պատճենը` ֆայլի ձևով ստեղծված ապարատածրագրային միջոցներով: Այն ապահովում է դրա պատրաստող անձը կամ ստորաբաժանումը: Փաստաթղթի կամ դրա էլեկտրոնային պատճենի իսկությունն ապահովում է նույն անձը կամ ստորաբաժանումը, որը հավաստել է փաստաթուղթը համապատասխան ստորագրություններով:

17. Փաստաթղթերի այն էլեկտրոնային օրինակները, որոնք հաստատված չեն էլեկտրոնային թվային ստորագրությամբ, բացի հաստատող և պատրաստող անձանց պաշտոններից ու ազգանուններից, լրացուցիչ պետք է պարունակեն ուղարկող օպերատորի ազգանունը, բայց այդ դեպքում փաստաթուղթը կունենա միայն պատճենի կարգավիճակ:

18. Այն դեպքում, երբ փաստաթուղթն ունի գաղտնիության աստիճան, անհրաժեշտության դեպքում պետք է վերծանվի հրահանգի համաձայն և հետո հանձնվի հասցեատիրոջը:

19. Մտից փաստաթղթերը, որոնք ստացվել են թղթի կրիչի վրա, էլեկտրոնային ձևի ապարատածրագրային միջոցների օգնությամբ ենթակա են վերափոխման` հետագայում տվյալների շտեմարանում գրանցելու համար:

20. Պետական մարմինների և տեղական ինքնակառավարման մարմինների տեղեկատվական բնույթի փաստաթղթերի կամ դրանց ֆայլերի վրա, եթե դրանք ներկայացնելու անհրաժեշտությունը չի բխում որևէ հանձնարարականի կատարման պահանջներից, դրվում է դրոշմակնիք` նշելով միայն մուտքի ամսաթիվը, որից հետո դրանք ստորագրությամբ հանձնվում կամ լոկալ ցանցի միջոցով հաղորդվում են աշխատակազմի համապատասխան ստորաբաժանումներին:

21. ՀՀ Նախագահից, ՀՀ Ազգային ժողովից, ՀՀ կառավարությունից, ՀՀ վարչապետից ստացված նյութերը և «Շտապ» թղթակցություններն անհապաղ գրանցվում ու հանձնվում են զեկուցման:

Շտապ և բովանդակությամբ կարևոր հեռագրերը անհապաղ զեկուցվում են մարզպետին:

22. ՀՀ Շիրակի մարզին վերաբերող իրավական ակտերի նախագծերն աշխատակազմում քննարկելու համար աշխատակազմի ղեկավարի կողմից նշանակվում է գլխադասային ստորաբաժանում` աշխատակազմի ղեկավարի կողմից սահմանված կառուցվածքային ստորաբաժանումների գործունեության ոլորտներին համապատասխան:

23. Ստորաբաժանման աշխատողը քարտուղարությունից ստանալով ստորաբաժանում ուղարկված փաստաթուղթը կամ ֆայլը, այն գրանցում է մատյանում և համակարգչում, ստորաբաժանման ղեկավարի մակագրությամբ հանձնում անմիջական կատարողներին` մատյանում կամ համակարգչում արտացոլելով փաստաթղթաշրջանառությունն ստորաբաժանման ներսում: Ստորաբաժանումից ստորաբաժանում վերահասցեագրված փաստաթղթերը հասցեատերերին են հանձնվում քարտուղարության միջոցով` աշխատակազմի ղեկավարի համաձայնությամբ:

24. Քարտուղարությունը գործին կցելու համար փաստաթուղթն ընդունում է այն դեպքում, երբ փաստաթղթին կից կառուցվածքային ստորաբաժանման ղեկավարի կողմից ներկայացված համապատասխան հիմնավորման վրա առկա է աշխատակազմի ղեկավարի կամ քարտուղարության պետի «Գործին» մակագրությունը:

25. Աշխատակազմում փաստաթղթերի քննարկման համար սահմանվում են հետևյալ ժամկետները` ՀՀ կառավարության, ՀՀ նախարարությունների, այլ պետական մարմինների կողմից ներկայացված` ՀՀ Շիրակի մարզպետարանի քննարկմանը ենթակա հարցերի վերաբերյալ գրությունների համար սահմանված են հետևյալ ժամկետները (եթե այլ ժամկետներ նախատեսված չեն)

ա) լրացուցիչ ուսումնասիրություններ չպահանջող հարցեր` մինչև 5 օր,

բ) լրացուցիչ ուսումնասիրություններ, քննարկումներ պահանջող հարցեր` մինչև 10 օր:

26. ՀՀ Շիրակի մարզպետարանում ՀՀ կառավարության, ՀՀ վարչապետի որոշումների, ՀՀ նախարարությունների, այլ պետական մարմինների կողմից ներկայացված որոշումների, կարգադրությունների նախագծերի քննարկման համար (եթե այլ ժամկետներ նախատեսված չեն) սահմանվում են հետևյալ ժամկետները`

ա) լրացուցիչ ուսումնասիրություններ, հիմնավորումներ չպահանջող նախագծեր` մինչև 7 օր,

բ) լրացուցիչ ուսումնասիրություններ, հիմնավորումներ, խորհրդակցության հրավիրում պահանջող նախագծեր` մինչև 15 օր:

27. ՀՀ օրենքները, ՀՀ Ազգային ժողովի նորմատիվ բնույթի որոշումները, ՀՀ Նախագահի հրամանագրերն ու կարգադրությունները, ՀՀ կառավարության և ՀՀ վարչապետի որոշումները, ինչպես նաև մարզպետի որոշումներն ու կարգադրությունները, աշխատակազմի ղեկավարի հրամանները քարտուղարությունից դուրս են տրվում միայն աշխատակազմի աշխատողներին` վերադարձնելու պայմանով, կամ դրանց ֆայլերից օգտվում են միայն աշխատակազմի աշխատողները` իրենց պահանջով:

Քարտուղարությունից վերցված իրավական ակտերը ենթակա են վերադարձման 5-օրյա ժամկետում:

III. ՀՀ ՇԻՐԱԿԻ ՄԱՐԶՊԵՏԻ ՈՐՈՇՈՒՄՆԵՐԻ, ԿԱՐԳԱԴՐՈՒԹՅՈՒՆՆԵՐԻ, ԱՇԽԱՏԱԿԱԶՄԻ ՂԵԿԱՎԱՐԻ ՀՐԱՄԱՆՆԵՐԻ ՆԵՐԿԱՅԱՑՈՒՄԸ, ԽՄԲԱԳՐՈՒՄԸ ԵՎ ԸՆԴՈՒՆՈՒՄԸ

28. ՀՀ Շիրակի մարզպետի (այսուհետ` մարզպետի) որոշումների և կարգադրությունների նախագծեր ներկայացնելու իրավունք ունեն մարզպետի տեղակալները, աշխատակազմի ղեկավարը, աշխատակազմի ղեկավարի տեղակալը, աշխատակազմի կառուցվածքային ստորաբաժանումների ղեկավարները, մարզպետի խորհրդականները:

29. Աշխատակազմի ղեկավարի հրամանների նախագծեր ներկայացնելու իրավունք ունեն աշխատակազմի ղեկավարի տեղակալը և աշխատակազմի կառուցվածքային ստորաբաժանումների ղեկավարները:

30. Աշխատակազմի առանձնացված ստորաբաժանումների ղեկավարները մարզպետի որոշումների, կարգադրությունների նախագծեր, ինչպես նաև աշխատակազմի ղեկավարի հրամանների նախագծեր ներկայացնում են աշխատակազմի համապատասխան կառուցվածքային ստորաբաժանման միջոցով:

31. Մարզպետի որոշման կամ կարգադրության, աշխատակազմի ղեկավարի հրամանի նախագիծը (այսուհետ` նախագիծ) նախապատրաստող ստորաբաժանումը (անձը) (այսուհետ` պատասխանատու) պատասխանատու է նախագծի բովանդակության, արժանահավատության, այժմեականության, ձևակերպման, ինչպես նաև համաձայնեցման օպերատիվության համար:

Նախագծերը պետք է լինեն հիմնավորված, միմյանց չկրկնող և արդեն լուծում ստացած հարցերին սկզբունքորեն նոր լուծում տալու կամ նոր ընդունված իրավական ակտերին համապատասխանեցնելու նպատակով:

32. Նախագծում պետք է առանձնացված լինեն հետևյալ կետերը.

ա) նախագծի անվանումը,

բ) որոշման, կարգադրության կամ հրամանի անհրաժեշտությունը հիմնավորող դրույթները,

գ) այն քայլերը, որոնք պետք է ձեռնարկել որոշմամբ, կարգադրությամբ կամ հրամանով առաջադրված խնդիրների լուծման համար,

դ) նախագծի համար հիմք ծառայող իրավական ակտերի (եթե այդպիսիք կան) պատճենները:

33. Մարզպետի որոշման կամ կարգադրության նախագծին կցվում է համաձայնեցման թերթիկ (ձև N 1), որի վերևում նշվում է նախագծի անվանումը: Թերթիկի վրա նշվում են մարզպետի տեղակալի (տեղակալների), աշխատակազմի ղեկավարի, քարտուղարության, ֆինանսական և սոցիալ-տնտեսական զարգացման վարչության, այլ ստորաբաժանումների (ըստ անհրաժեշտության) պետերի, քարտուղարության գլխավոր մասնագետի (իրավաբանի) ազգանունները:

34. Մարզպետի որոշման կամ կարգադրության նախագծին կից ներկայացվում է նախագծի անվանումը, համաձայնություն տվողների ազգանունները պարունակող թերթիկ (ձև N 2), որտեղ նախագիծ ստացողը հաստատում է նախագծի ստացման օրը և ժամը:

35. Պատասխանատու ստորաբաժանման ղեկավարը, մարզպետի որոշման կամ կարգադրության նախագծում արծարծված հարցերին տիրապետող իր մասնագետի միջոցով ապահովում է անհրաժեշտ պարզաբանումներ և մեկնաբանություններ համաձայնություն տվող կողմերի համար: Համաձայնողի և պատասխանատուի համատեղ քննարկումների արդյունքում, տարաձայնությունները չհաղթահարելու դեպքում, համաձայնող կողմը համաձայնեցման թերթիկը նշագրում է վերապահումով` նշելով իր հատուկ կարծիքը համաձայնեցման թերթիկի համապատասխան մասում:

36. Պատասխանատուն, որպես կարգ, նշագրում է նախագիծը:

Պատասխանատուն նախապատրաստում է նաև առաքման թերթիկ, որտեղ նշվում են այն ստորաբաժանումների մարմինների անվանումները, որոնց պետք է առաքվեն տվյալ որոշումը կամ կարգադրությունը:

Պատասխանատուն, աշխատակազմի ղեկավարի հետ համաձայնեցնելով նախագծին կարող է տալ «Շտապ» վերտառություն:

37. Համաձայնող կողմը, ստանալով նախագիծը և համաձայնեցման թերթիկը, պարտավոր է տալ իր համաձայնությունը` հատուկ կարծիքով կամ առանց դրա, ոչ ավել քան.

ա) 4 ժամվա ընթացքում.

բ) 2 ժամվա ընթացքում, եթե նախագիծն ունի «Շտապ» վերտառություն.

գ) մեկ օրվա ընթացքում, եթե նախագծով հաստատվում է կանոնադրություն, կանոնակարգ կամ կարգ:

38. Քարտուղարության պետը, ստանալով մարզպետի որոշման կամ կարգադրության համաձայնեցված նախագիծը, նրան կից համաձայնեցման (ձև N 1), (ձև N 2) և առաքման (ձև N 3) թերթիկները, դրանք հանձնում է աշխատակազմի ղեկավարին: Վերջինս, այն ներկայացնում է մարզպետին` նախաստորագրման.

ա) մեկ օրվա ընթացքում,

բ) նույն օրը, եթե նախագիծն ունի «Շտապ» վերտառություն:

39. Մարզպետի որոշումների, կարգադրությունների այն նախագծերը, որոնց վերաբերյալ կան տարաձայնություններ, քննության են առնվում աշխատակազմի ղեկավարի մոտ հրավիրվող խորհրդակցությունում, որի արդյունքների մասին կատարվում է առանձին գրառում և կցվում նախագծին:

40. Նախագծի նկատմամբ մարզպետի դիտողությունների և առարկությունների առկայության դեպքում նախագիծը վերադարձվում է պատասխանատուին և համարվում է չներկայացված:

41. Մարզպետի կողմից նախագիծը նախաստորագրելու դեպքում քարտուղարությունում այն պատրաստվում է վերջնական խմբագրությամբ «մարզպետի որոշում կամ «մարզպետի կարգադրություն» ձևաթղթերի վրա և ներկայացվում է մարզպետին ստորագրության:

42. Արգելվում է մարզպետի որոշման, կարգադրության, աշխատակազմի ղեկավարի հրամանի բնօրինակի վրա կատարել խմբագրում, ուղղում կամ ջնջում:

43. Մարզպետի կողմից ստորագրված որոշումը, կարգադրությունը, աշխատակազմի ղեկավարի կողմից ստորագրված հրամանը, գրանցվում են գրանցամատյաններում, նրանց տալով հերթական համար` նշելով ամսաթիվը, ամիսը, տարեթիվը, բազմացվում են «Իսկականի հետ ճիշտ է» հետգրությամբ և հաստատվում են քարտուղարության կնիքով: Ըստ առաքման թերթիկի, մարզպետի որոշումները, կարգադրությունները և աշխատակազմի ղեկավարի հրամանները առաքվում են հասցեատերերին` մեկօրյա ժամկետում:

44. Մարզպետի որոշումների, կարգադրությունների, աշխատակազմի ղեկավարի հրամանների մեջ փոփոխություններ կամ լրացումներ կատարելու, կամ դրանք ուժը կորցրած ճանաչելու մասին կատարվում է նշում համապատասխան գրանցամատյանում, իսկ բնագրի վրա փակցվում է համապատասխանաբար նոր որոշման, կարգադրության կամ հրամանի պատճենը:

45. Յուրաքանչյուր տարվա համար մարզպետի որոշումների, կարգադրությունների, աշխատակազմի ղեկավարի հրամանների համարակալումները սկսվում են հունվար ամսվա առաջին որոշումից, կարգադրությունից, հրամանից և ավարտվում են տվյալ տարվա դեկտեմբերի վերջին որոշումով, կարգադրությամբ, հրամանով:

46. Քարտուղարությունը մարզպետի յուրաքանչյուր որոշման, կարգադրության համար կազմում է գործ, որի մեջ պետք է զետեղվեն հետևյալ փաստաթղթերը`

ա) մարզպետի կողմից նախաստորագրված մարզպետի որոշման, կարգադրության նախագիծը,

բ) մարզպետի որոշման, կարգադրության ընդունման հիմնավորման համար պահանջվող փաստաթղթերը, եթե այդպիսիք անհրաժեշտ են համարվել,

գ) տվյալ որոշման, կարգադրության նախագծին կցված ձև N 1-ը և ձև N 2-ը,

դ) մարզպետի կողմից ստորագրված որոշման, կարգադրության բնօրինակը, աշխատակազմի ղեկավարի կողմից ստորագրված հավելվածները) եթե այդպիսիք կան),

ե) այլ նյութեր:

47. Առանձին գործ է կազմվում նաև աշխատակազմի ղեկավարի յուրաքանչյուր հրամանի համար:

48. Մարզպետի որոշումների, կարգադրությունների և աշխատակազմի ղեկավարի հրամանների գործերը մեկ տարի պահվում են քարտուղարության արարողակարգի և հասարակայնության հետ կապերի բաժնում, որից հետո, սահմանված կարգով, հանձնվում է աշխատակազմի արխիվ` պահպանության:

IV. ՄԱՐԶԻ ԽՈՐՀՐԴԻ ՆԻՍՏԻ ՆԱԽԱՊԱՏՐԱՍՏՈՒՄՆ ՈՒ ՏԵԽՆԻԿԱԿԱՆ ՍՊԱՍԱՐԿՈՒՄԸ

49. Մարզի խորհրդի նիստերի հրավիրման, օրակարգի նախապատրաստման և սպասարկման աշխատանքները կազմակերպում է աշխատակազմի ղեկավարը` աշխատակազմի ՏԻ և ՀԳՄՏԾԳՀ վարչության ու քարտուղարության միջոցով:

50. Մարզի խորհրդի նիստում քննարկման համար հարցեր նախապատրաստելիս մարզպետարանի աշխատակազմի ՏԻ և ՀԳՄՏԾԳՀ վարչությունը.

ա) հետևում է, որ մարզի խորհրդի նիստին ներկայացվեն աշխատակազմի կառուցվածքային ստորաբաժանումներում նախապատրաստված կամ նրանց հետ համաձայնեցված նախագծեր,

բ) ապահովում է աշխատակազմի կառուցվածքային ստորաբաժանումների, հանրապետական գործադիր մարմինների տարածքային ծառայությունների կողմից մարզի խորհրդի քննարկմանը ներկայացված հարցերի` սահմանված ժամկետներում նախապատրաստումը,

գ) ապահովում է մարզի խորհրդի օրակարգերի նախապատրաստումն ու դրանց առաքումը:

51. Քարտուղարությունը ապահովում է մարզի խորհրդի նիստի արձանագրումը: Արձանագրությանը քարտուղարությունում տրվում է հերթական համար` միասնական համարակալման համաձայն, որը կատարվում է տարեսկզբից մինչև տարեվերջ:

52. Մարզպետի, մարզպետի տեղակալի (տեղակալների), աշխատակազմի ղեկավարի մոտ անցկացվող խորհրդակցությունների արձանագրումը ապահովում է խորհրդակցությունը նախապատրաստող ստորաբաժանումը: Խորհրդակցությունը կարող է արձանագրվել նաև քարտուղարության աշխատակցի կողմից, մարզպետի, մարզպետի տեղակալի (տեղակալների), աշխատակազմի ղեկավարի հանձնարարությամբ:

Արձանագրությունը համարակալվում է պայմանանիշով և հերթական համարով` սկսած տարեսկզբից մինչև տարեվերջ:

V. ԵԼԻՑ ԹՂԹԱԿՑՈՒԹՅԱՆ ՁԵՎԱԿԵՐՊՈՒՄԸ

53. Մարզպետարանում ելից փաստաթղթերը ստորագրվում են մարզպետի, մարզպետի տեղակալի) տեղակալների), աշխատակազմի ղեկավարի, աշխատակազմի ղեկավարի տեղակալի, կառուցվածքային ստորաբաժանումների ղեկավարների, մարզպետի խորհրդականների, մամուլի քարտուղարի կողմից:

54. Ստորագրության ներկայացվող գրությանը կցվում է նրա երկրորդ օրինակը` նախագիծը նախապատրաստող ստորաբաժանման ղեկավարի նշագրով, եթե գրությունը ներկայացվում է մարզպետի, նրա տեղակալների, աշխատակազմի ղեկավարի, նրա տեղակալի ստորագրության և նախապատրաստող ստորաբաժանման պատասխանատուի նշագրով, եթե գրությունը ստորագրվելու է ստորաբաժանման ղեկավարի կողմից:

55. Գրության տեքստի տակ, որին կցվում են լրացուցիչ նյութեր, նշվում են կցվող նյութի անվանումը, ամսաթիվը, համարը և թերթերի թիվը:

Գրություններին կցվող նյութերը պետք է ունենան անվանում, իսկ վերջում պետք է նշագրված լինեն նյութերը պատրաստող մասնագետի և համապատասխան ստորաբաժանման ղեկավարի կողմից:

56. Այն դեպքում, երբ նամակներն ուղարկվում են որպես ՀՀ կառավարությունից, նախարարություններից, այլ պետական մարմիններից ու կազմակերպություններից ստացված գրությունների պատասխաններ, հասցեատիրոջ անվան տակ, վերևի ձախ անկյունում նշվում են այդ գրության ամսաթիվը և համարը: Նույն տվյալները պետք է ունենա էլեկտրոնային օրինակը:

57. Գրության ելից համարը կազմված է պայմանանիշից և հերթական համարից: Ելից համարը դրվում է տեքստի վերջում:

58. Առաքվող թղթակցության անկերը սահմանված կարգով պահվում է քարտուղարությունում:

59. Ձևաթղթի վրա տպագրվելուց և ստորագրված գրությունները քարտուղարությունում գրանցվում են համապատասխանաբար պաշտոնական գրությունների և քաղաքացիների դիմումների ելից մատյաններում և առաքվում են հասցեատերերին:

60. Համակարգչային ցանցով ուղարկման ենթակա` համաձայնեցված և հաստատված փաստաթղթերը, որոնց տրված են ելից համարներ, և դրանց էլեկտրոնային պատճենները փոխանցվում են պատասխանատուին, որը փաստաթղթերն ուղարկում է հասցեատերերին:

61. Եթե հասցեատերն ունի համակարգչային ցանցի էլեկտրոնային փոստի հասցե, փաստաթուղթը` հաստատված էլեկտրոնային թվային ստորագրությամբ (որպես էլեկտրոնային իսկական օրինակ), համակարգչային ցանցով ուղարկվում է հասցեատիրոջը:

62. Փաստաթուղթն ուղարկվելուց առաջ դրա էլեկտրոնային օրինակը պետք է գրանցվի ուղարկողի տվյալների շտեմարանում:

63. Եթե հասցեատերը միացված չէ համակարգչային ցանցին և չունի էլեկտրոնային փոստի իր սեփական հասցե, ապա փաստաթղթի էլեկտրոնային օրինակը` հաստատված էլեկտրոնային թվային ստորագրությամբ` պետք է ուղարկվի մագնիսական սկավառակի վրա գրանցված վիճակում` սուրհանդակային կամ այլ ծառայության միջոցով:

VI. ՔԱՂԱՔԱՑԻՆԵՐԻ ԱՌԱՋԱՐԿՈՒԹՅՈՒՆՆԵՐԻ, ԴԻՄՈՒՄՆԵՐԻ ԵՎ ԲՈՂՈՔՆԵՐԻ ՔՆՆԱՐԿՈՒՄՆ ՈՒ ԸՆԹԱՑՔ ՏԱԼԸ

64. Քաղաքացիների կողմից ստացված առաջարկությունները, դիմումներն ու բողոքները ստացման օրը գրանցվում են քարտուղարությունում` դիմումների մտից մատյանում:

Առաջարկությունների, դիմումների ու բողոքների առաջին էջի ներքևի աջ անկյունում դրվում է դրոշմակնիք, որի վրա նշվում է գրանցման պայմանանիշը` հեղինակի ազգանվան առաջին տառը, հերթական համարը և ամսաթիվը:

65. Աշխատակազմի իրավասու անձի կողմից քաղաքացիների անհատական ընդունելության ժամանակ նրանց գրավոր առաջարկությունները, դիմումներն ու բողոքները նույնպես ենթակա են գրանցման` սահմանված կարգով:

66. Կոլեկտիվ առաջարկության, դիմումի և բողոքի ստացման դեպքում գրանցվում է ընդգծված ազգանունը, իսկ դրա բացակայության դեպքում առաջին ազգանունը:

67. Անանուն և անստորագիր նամակները գրանցման ենթակա չեն և ոչնչացվում են օրենքով սահմանված կարգով:

Միևնույն անձից միևնույն հարցով քննարկման համար տարբեր հասցեներով ուղարկված և նույն պետական մարմնում ստացված առաջարկությունները, դիմումներն ու բողոքները հաշվի են առնվում առաջին առաջարկության, դիմումի ու բողոքի գրանցման պայմանանիշով` ավելացնելով հերթական համարը` կոտորակի ձևով:

68. Ստացված առաջարկությունները, դիմումներն ու բողոքները աշխատակազմի ղեկավարի հանձնարարությամբ քարտուղարության կողմից կարող են ուղարկվել այն պետական մարմիններ, հիմնարկներ ու կազմակերպություններ, որոնց անմիջական իրավասությանն է պատկանում տվյալ հարցի լուծումը, կամ որոնց անմիջական ենթակայությամբ է գործում այն կազմակերպությունը կամ պաշտոնատար անձը, որի գործողությունը բողոքարկվում է` այդ մասին ծանուցելով դիմողին:

69. Աշխատակազմի ստորաբաժանումներում առաջարկությունների, դիմումների ու բողոքների քննարկման արդյունքում նախապատրաստվում է պատասխան գրություն երկու օրինակից ստորաբաժանման ղեկավարի պատասխանատվությամբ և ստորագրությամբ: Պատասխան գրությունը մարզպետի կամ աշխատակազմի ղեկավարի մակագրությամբ վերադարձվում է քարտուղարություն` հասցեատիրոջը ուղարկելու համար:

70. Ուսումնասիրությունից և վերջնական քննարկումից հետո քաղաքացիների առաջարկությունները, դիմումներն ու բողոքները` իրենց բոլոր նյութերի հետ միասին (նշելով փաստաթղթերի ցանկը), վերադարձվում են քարտուղարություն` «Գործին» մակագրությամբ, ստորագրությամբ, ամսաթվի նշումով:

71. Յուրաքանչյուր նամակի համար կազմվում է գործ` բաղկացած առաջարկության դիմումից, բողոքից և այլ փաստաթղթերից:

72. Վերահսկողության վերցված նամակների պատասխանները ենթակա են քարտուղարությունում պարտադիր գրանցման: Այդ դեպքում նամակի առաջին էջի ներքևի մասում դրվում է «Վերահսկողություն» դրոշմակնիքը, որի վրա նշվում է կատարման ժամկետը:

73. Քաղաքացիների առաջարկությունների, դիմումների ու բողոքների նկատմամբ վերահսկողությունն իրականացնում է քարտուղարությունը:

Նամակների ամբողջ շարժը գրանցվում է համակարգչում համապատասխան ծրագրի միջոցով (խափանման դեպքում մատյանների միջոցով)` քարտուղարությունում և պահպանվում տվյալների շտեմարանում:

VII. ՓԱՍՏԱԹՂԹԵՐԻ ՊԱՀՊԱՆՈՒՄԸ

74. Փաստաթղթերն աշխատակազմի արխիվ են հանձնվում դրանց` գործավարությամբ ավարտվելու տարվան հաջորդող երկրորդ տարվա ընթացքում, բացառությամբ հինգ տարի և ավելի կարճ ժամկետով պահպանության ենթակա հաշվապահական հաշվառման վերաբերյալ փաստաթղթերի, որոնք, պահպանության ժամկետը լրանալուց հետո, ոչնչացվում են Հայաստանի Հանրապետության օրենսդրությամբ սահմանված կարգով:

Փաստաթղթերի մշակումից հետո «Արխիվ» շտեմարանում ցանցային կենտրոնական համակարգում գրանցվում են նաև ֆայլերը:

75. Աշխատակազմի արխիվում փաստաթղթերի համալրումը, հաշվառումը և պահպանումն իրականացվում են «Արխիվային գործի մասին» Հայաստանի Հանրապետության օրենքի պահանջներին համապատասխան:

76. Աշխատակազմի արխիվի կամ «Արխիվ» շտեմարանի փաստաթղթերն օգտագործվում են Հայաստանի Հանրապետության արխիվային հավաքածուի` պետության սեփականությունը համարվող փաստաթղթերի օգտագործման կարգի պահանջներին համապատասխան:

77. Աշխատակազմի արխիվը պահպանության համար փաստաթղթերն ընդունում է կարգավորված վիճակում` ըստ ցուցակների (հինգ օրինակ) և գործերի նիշերի:

78. Աշխատակազմի արխիվային գործի մասնագետը (արխիվագետը) աշխատակազմի ստորաբաժանումների գործերի ընդունման ժամանակ ստուգում է դրանց առկայությունը, ստորագրում է ցուցակների բոլոր օրինակների վրա, նշում գործերի ընդունման ամսաթիվը և քանակը:

Ցուցակի մեկ օրինակը տրվում է գործերը հանձնողին, մյուսները մնում են աշխատակազմի արխիվում:

Հայաստանի Հանրապետության օրենսդրությամբ սահմանված ժամկետները լրանալուց հետո մշտական պահպանության գործերն աշխատակազմի արխիվից հանձնվում են պետական արխիվ:

(հավելվածը խմբ. 12.03.07 N 134-Ն)

ՀՀ Շիրակի մարզպետարանի աշխատակազմի ղեկավար`

Խ. Պողոսյան