041.0521.27.08.98

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

27 օգոստոսի 1998 թվականի N 521

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԱՐԴԱՍԻՐԱԿԱՆ ՕԳՆՈՒԹՅԱՆ ԿԵՆՏՐՈՆԱԿԱՆ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության վարչապետի 1998 թվականի մայիսի 14-ի «Հայաստանի Հանրապետության կառավարության մարդասիրական օգնության կենտրոնական հանձնաժողովի մասին» N 249 որոշման 2-րդ կետի «ա» ենթակետին համապատասխան հաստատել Հայաստանի Հանրապետության կառավարության մարդասիրական օգնության կենտրոնական հանձնաժողովի կանոնադրությունը (կցվում է):

Հայաստանի Հանրապետության վարչապետ

Ա. Դարբինյան

Հաստատված է ՀՀ վարչապետի 1998 թ. օգոստոսի 27-ի N 521 որոշմամբ

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԱՐԴԱՍԻՐԱԿԱՆ ՕԳՆՈՒԹՅԱՆ ԿԵՆՏՐՈՆԱԿԱՆ ՀԱՆՁՆԱԺՈՂՈՎԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Հայաստանի Հանրապետության կառավարության մարդասիրական օգնության կենտրոնական հանձնաժողովը (այսուհետև` հանձնաժողով) իրականացնում է Հայաստանի Հանրապետություն մարդասիրական օգնության կարգով մուտք գործող ապրանքների հաշվառումը, բաշխումը, վերահսկողությունը, ինչպես նաև օգնությունը որպես մարդասիրական որակելու աշխատանքները` ապահովելով դրանց հրապարակայնությունը:

2. Հանձնաժողովն իր գործունեության ընթացքում ղեկավարվում է Հայաստանի Հանրապետության օրենսդրությամբ և սույն կանոնադրությամբ:

3. Հանձնաժողովի կազմը հաստատվում է Հայաստանի Հանրապետության վարչապետի որոշմամբ:

4. Հանձնաժողովի գործունեության հետ կապված ծախսերը ֆինանսավորվում են մարդասիրական օգնության և բարեգործական նպատակներով ստացված միջոցների կամ Հայաստանի Հանրապետության պետական բյուջեի միջոցների հաշվին:

5. Հանձնաժողովն իր առջև դրված խնդիրների կատարման համար հաշվետու է Հայաստանի Հանրապետության կառավարությանը:

6. Հանձնաժողովի անդամներն իրենց պարտականությունները կատարում են հասարակական հիմունքներով:

7. Հանձնաժողովն ունի իր անվամբ կլոր կնիք, դրոշմակնիք, ձևաթուղթ և բանկային հաշիվներ:

II. ՀԱՆՁՆԱԺՈՂՈՎԻ ԽՆԴԻՐՆԵՐ

8. Հանձնաժողովի խնդիրներն են`

ա) Հայաստանի Հանրապետության մարդասիրական օգնության կարգով մուտք գործող ապրանքների ստացման, փաստագրման և բաշխման աշխատանքների համակարգումը.

բ) Հայաստանի Հանրապետության օրենսդրությամբ սահմանված կարգով պետական գրանցում ստացած հասարակական, այդ թվում` բարեգործական, կրոնական, շահույթ ստանալու նպատակ չհետապնդող կազմակերպությունների կողմից ներմուծվող (ստացվող) ապրանքների (աշխատանքների, ծառայությունների) ստացման և բաշխման հաշվառումը, այդ աշխատանքների վերահսկումը` համաձայնեցնելով օգնությունը տրամադրող սուբյեկտների հետ.

գ) Հայաստանի Հանրապետության օրենսդրությամբ (այդ թվում` Հայաստանի Հանրապետության միջազգային պայմանագրերով) ուղղակիորեն նշված չլինելու դեպքում ծրագրի (գործունեություն) տարբերակումը` ըստ մարդասիրական օգնության և բարեգործական ու տեխնիկական (այլ) բնույթի, ինչպես նաև, «Ավելացված արժեքի հարկի մասին» Հայաստանի Հանրապետության օրենքի դրույթներին համաձայն, որոշում է ավելացված արժեքի հարկից ազատվող ապրանքների ու ծառայությունների շրջանակը.

դ) բարեգործական և մարդասիրական ճանաչված ծրագրերի իրականացման ընթացքի և դրանց կատարման վերաբերյալ հաշվետվությունների ստացումը.

ե) այլ մարմինների հետ համագործակցության միջոցով բարեգործական և մարդասիրական օգնության ստացման գերակայող ուղղությունների որոշումն ու դրանք բարեգործական և մարդասիրական կազմակերպություններ ներկայացնելը.

զ) Հայաստանի Հանրապետության ֆինանսների և էկոնոմիկայի նախարարության հետ համագործակցությունը` բյուջետային գործընթացի իրականացումն ապահովելու համար տեղեկատվության տրամադրման առումով:

(8-րդ կետը փոփ. 23.04.99 N 242)

9. Հանձնաժողովն իր առջև դրված խնդիրների իրականացման նպատակով համագործակցում է Հայաստանի Հանրապետության նախարարությունների և գերատեսչությունների հետ:

10. Հանձնաժողովը կարող է հրավիրել համաժողովներ` հանձնաժողովի կատարած աշխատանքների և Հայաստանի Հանրապետության մարդասիրական օգնության կարգով մուտք գործող ապրանքների վերաբերյալ հարցերի քննարկման նպատակով:

III. ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԿԱԶՄԱԿԵՐՊՈՒՄԸ

11. Հանձնաժողովն իր աշխատանքները կազմակերպում է նիստերի, ինչպես նաև հեռակա քվեարկությամբ որոշումների ընդունման ձևով:

12. Հանձնաժողովի նիստերը հրավիրվում են ըստ անհրաժեշտության, բայց ոչ պակաս, քան յուրաքանչյուր ամիսը մեկ անգամ:

13. Հանձնաժողովի նիստերն իրավազոր են, եթե դրանց մասնակցում է հանձնաժողովի անդամների առնվազն երեք քառորդը: Հանձնաժողովի որոշումներն ընդունվում են նիստի մասնակիցների (կամ հեռակա քվեարկությամբ) ձայների պարզ մեծամասնությամբ: Ձայների հավասարության դեպքում հանձնաժողովի նախագահը ձայնը վճռորոշ է:

14. Սույն կանոնադրության 8-րդ կետի «գ» ենթակետով նախատեսված հարցի վերաբերյալ հանձնաժողովի որոշումներն ընդունվում են համապատասխան ճյուղային նախարարության եզրակացության հիման վրա` նիստի մասնակիցների ձայների երկու երրորդով:

15. Հանձնաժողովն իր աշխատանքներում կարող է ներգրավել Հայաստանի Հանրապետության այլ նախարարությունների և գերատեսչությունների ներկայացուցիչների, ինչպես նաև մասնագետների:

16. Հանձնաժողովը Հայաստանի Հանրապետության համապատասխան պետական կառավարման հանրապետական և տարածքային մարմիններից, ձեռնարկություններից, հիմնարկներից և կազմակերպություններից Հայաստանի Հանրապետության օրենսդրությամբ սահմանված կարգով ըստ անհրաժեշտության ստանում է իր իրավասությանը պատկանող հարցերին վերաբերող վերլուծական և տեղեկատվական նյութեր, վիճակագրական տվյալներ և այլ փաստաթղթեր:

17. Հանձնաժողովն ապահովում է իր աշխատանքների հրապարակայնությունը:

18. Հանձնաժողովի նախագահը`

ա) հրավիրում է հանձնաժողովի նիստերը և նախագահում է դրանք.

բ) ստորագրում է հանձնաժողովի ընդունած որոշումները.

գ) կազմակերպում է հանձնաժողովի ղեկավարում նրա գործունեությունը, վերահսկողություն է իրականացնում հանձնաժողովի ընդունած որոշումների կատարման նկատմամբ.

դ) ներկայացնում է հանձնաժողովը Հայաստանի Հանրապետությունում, այլ պետություններում և միջազգային կազմակերպություններում.

ե) տնօրինում է հանձնաժողովի բանկային հաշիվները.

զ) հանձնաժողովի նիստերի միջև ընկած ժամանակահատվածում առանձին միջնորդագրերով կամ հանձնարարականներով կարգավորվում է հրատապ լուծում պահանջող հարցերը առանձին դեպքերում դրանք համաձայնեցնելով հանձնաժողովի անդամների հետ.

է) իրականացնում է Հայաստանի Հանրապետության օրենսդրությամբ իրեն վերապահված այլ լիազորություններ:

19. Հանձնաժողովի անդամները`

ա) պատասխանատու են հանձնաժողովի նիստում իրենց տրված հանձնարարականների և խնդիրների կատարման համար.

բ) հանձնաժողովի նիստից առնվազն երկու շաբաթ առաջ կարող են առաջադրել հարցեր` հանձնաժողովի նիստի օրակարգում ընդգրկելու նպատակով, ինչպես նաև հանձնաժողովի նիստից առնվազն մեկ շաբաթ առաջ հայտնել իրենց կարծիքն օրակարգի վերաբերյալ:

20. (կետն ուժը կորցրել է 13.09.99 N 569)

21. Հանձնաժողովի աշխատակազմը`

ա) հանձնաժողովի նիստերի միջև ընկած ժամանակահատվածում կարգավորում է հանձնաժողովի գործունեությանն առնչվող ընթացիկ հարցերը.

բ) նախապատրաստում է հանձնաժողովի նիստի օրակարգը, հրավիրում և ապահովում է հանձնաժողովի նիստին պետական կառավարման հանրապետական և տարածքային մարմինների ներկայացուցիչների, ինչպես նաև այլ անձանց մասնակցությունը:

22. Հանձնաժողովի աշխատակազմը ղեկավարում է հանձնաժողովի քարտուղարը:

(կանոնադրությունը փոփ. 23.04.99 N 242, 13.09.99 N 569)