«Վավերացնում եմ»
Հայաստանի Հանրապետության
Նախագահ Ռ. Քոչարյան
23 նոյեմբերի 2002 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
3 հոկտեմբերի 2002 թվականի N 1798-Ն
ՀԱՐԿԱՅԻՆ ԾԱՌԱՅՈՒԹՅԱՆ ՄՐՑՈՒԹԱՅԻՆ ԵՎ ԱՏԵՍՏԱՎՈՐՄԱՆ ՀԱՆՁՆԱԺՈՂՈՎԻ ԱՆԴԱՄՆԵՐԻ ԱՌԱՋԱԴՐՄԱՆ ՉԱՓԱՆԻՇՆԵՐԸ ՍԱՀՄԱՆԵԼՈՒ ՄԱՍԻՆ
Համաձայն «Հարկային ծառայության մասին» Հայաստանի Հանրապետության օրենքի 17-րդ հոդվածի 1-ին մասի՝ Հայաստանի Հանրապետության կառավարությունը որոշում է.
1. Սահմանել հարկային ծառայության մրցութային և ատեստավորման հանձնաժողովի անդամների առաջադրման չափանիշները՝ համաձայն հավելվածի:
2. Հայաստանի Հանրապետության պետական եկամուտների նախարարին՝ սույն որոշումն ուժի մեջ մտնելուց հետո 10-օրյա ժամկետում Հայաստանի Հանրապետության կառավարության հաստատմանը ներկայացնել հարկային ծառայության մրցութային և ատեստավորման հանձնաժողովի անհատական կազմը և աշխատակարգը:
3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։
|
|
Ա. Մարգարյան |
|
|
|
Հավելված |
Չ Ա Փ Ա Ն Ի Շ Ն Ե Ր
ՀԱՐԿԱՅԻՆ ԾԱՌԱՅՈՒԹՅԱՆ ՄՐՑՈՒԹԱՅԻՆ ԵՎ ԱՏԵՍՏԱՎՈՐՄԱՆ ՀԱՆՁՆԱԺՈՂՈՎԻ ԱՆԴԱՄՆԵՐԻ ԱՌԱՋԱԴՐՄԱՆ
1. Սույն չափանիշներով սահմանվում են հարկային ծառայության մրցութային և ատեստավորման հանձնաժողովի (այսուհետ՝ հանձնաժողով) նախագահի և անդամների առաջադրման չափանիշները:
2. Հայաստանի Հանրապետության հարկային ծառայության մարմնի (այսուհետ՝ հարկային ծառայության մարմին) ղեկավարը, ելնելով սույն չափանիշներից, Հայաստանի Հանրապետության կառավարության հաստատմանն է ներկայացնում հանձնաժողովի անհատական կազմը (նախագահի և անդամների (քարտուղարի) թեկնածուներին):
3. Հանձնաժողովի նախագահի և անդամների առաջադրման համար անհրաժեշտ են հետևյալ չափանիշները՝
ա) հարկային ծառայության աշխատանքային ստաժ
Հանձնաժողովի նախագահի թեկնածուն առաջադրման պահին պետք է ունենա հարկային ծառայության առնվազն երեք տարվա աշխատանքային ստաժ, հանձնաժողովի անդամի թեկնածուն՝ հարկային ծառայության առնվազն մեկ տարվա աշխատանքային ստաժ.
բ) ծառայողական բարձր կարգապահություն
Հանձնաժողովի նախագահ և անդամ չեն կարող լինել այն անձինք, ովքեր առաջադրման պահին նախորդող մեկ տարվա ծառայության ընթացքում ենթարկվել են կարգապահական պատասխանատվության.
գ) հարկային և այլ օրենսդրության իմացություն
Հանձնաժողովի նախագահը պետք է հմտորեն տիրապետի Հայաստանի Հանրապետության հարկային և բյուջետային օրենսդրությանը, ինչպես նաև պետական կառավարման համակարգի ընդհանուր կառուցվածքին ու պետական կառավարման մարմինների հիմնական խնդիրներին և իրավասություններին:
Հանձնաժողովի անդամը պետք է հմտորեն տիրապետի Հայաստանի Հանրապետության հարկային օրենսդրությանը, ինչպես նաև հարկային ծառայության մարմնի այն կառուցվածքային ստորաբաժանման գործառույթների և իրավասությունների առանձնահատկություններին, որը ներկայացնում է.
դ) պաշտոնական դիրք
Հանձնաժողովի անդամը պետք է զբաղեցնի հարկային ծառայության բարձրագույն կամ գլխավոր պաշտոն: Հանձնաժողովի նախագահը չի կարող լինել հանձնաժողովի անդամից ցածր պաշտոն զբաղեցնող հարկային ծառայող:
(3-րդ կետը փոփ. 06.04.06 N 446-Ն)
4. Հանձնաժողովի մեկական անդամ են ներկայացնում հարկային ծառայության մարմնի մեթոդաբանական, տեղեկատվական, իրավաբանական, օպերատիվ-հետախուզական և տարածքային հարկային տեսչությունների աշխատանքների կազմակերպական-տեսչական գործառույթներ իրականացնող ստորաբաժանումները, մեկ անդամ՝ Հայաստանի Հանրապետության ֆինանսների և էկոնոմիկայի նախարարությունը:
Հայաստանի Հանրապետության կառավարության աշխատակազմի ղեկավար-նախարար |
Մ. Թոփուզյան |