«Գրանցված է»
ՀՀ արդարադատության
նախարարության կողմից
13 սեպտեմբերի 2006 թ.
Պետական գրանցման թիվ 05006287

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ

18 հուլիսի 2006 թ.                                    N 355-Ն
 
Ո Ր Ո Շ ՈՒ Մ

«ՀԱՅՈՑ ՊԵՏԱԿԱՆՈՒԹՅԱՆ 15-ԱՄՅԱԿ», «ԿՈՄԻՏԱՍ», «ԱՆԴՐԿՈՎԿԱՍՅԱՆ ԳՈՐՇ ԱՐՋ», «ԼԱՅՆԱԿԱՆՋ ՈԶՆԻ» ՀՈՒՇԱԴՐԱՄՆԵՐԸ ՇՐՋԱՆԱՌՈՒԹՅԱՆ ՄԵՋ ԴՆԵԼՈՒ ՄԱՍԻՆ

Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «է» կետը՝ Հայաստանի Հանրապետության կենտրոնական բանկի խորհուրդը որոշում է.

1. Հիմք ընդունելով Հայաստանի Հանրապետության կենտրոնական բանկի խորհրդի 2006 թվականի ապրիլի 11-ի «2006-2007 թվականների հուշադրամների թողարկման ծրագիրը և հուշադրամների չափանիշները հաստատելու մասին» թիվ 155-Ն որոշումը` 2006 թվականի սեպտեմբերի 4-ից շրջանառության մեջ դնել հետևյալ հուշադրամները.

«Հայոց պետականության 15-ամյակ» արծաթե հուշադրամ,

«Կոմիտաս» ոսկե հուշադրամ,

«Անդրկովկասյան գորշ արջ» արծաթե հուշադրամ,

«Լայնականջ ոզնի» արծաթե հուշադրամ:

Հուշադրամների նկարագրությունը տրված է, համապատասխանաբար,  հավելված 1-ում, հավելված 2-ում, հավելված 3-ում, հավելված 4-ում (կցվում են):

2. Սույն որոշումն ուժի մեջ է մտնում հրապարակման օրվան հաջորդող տասներորդ օրը:
 

ՀՀ կենտրոնական բանկի նախագահ	Տ. Սարգսյան
2006 թ. հուլիսի 24 Երևան

Հավելված 1 ՀՀ կենտրոնական բանկի խորհրդի 2006 թվականի հուլիսի 18-ի թիվ 355-Ն որոշման

Ն Կ Ա Ր Ա Գ Ր ՈՒ Թ Յ ՈՒ Ն

«Հայոց պետականության 15-ամյակ» արծաթե հուշադրամի

Հայաստանի Հանրապետության կենտրոնական բանկը թողարկել է «Հայոց պետականություն» շարքի հերթական արծաթե հուշադրամը՝ 5000 դրամ անվանական արժեքով, որը նվիրված է Հայաստանի Հանրապետության անկախության հռչակման 15-ամյակին:

Հուշադրամի դիմերեսին պատկերված է Հայաստանի Հանրապետության զինանշանը: Զինանշանի տակ մակագրված է հուշադրամի անվանական արժեքը թվերով` «5000», և «ԴՐԱՄ», «DRAM» բառերը: Զինանշանի վերևի մասում հուշադրամի թողարկման տարեթիվն է` «2006»: Հուշադրամի եզրաշրթով մակագրված են՝ «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» և «REPUBLIC OF ARMENIA» բառերը:

Հուշադրամի դարձերեսին Արարատ լեռան ֆոնի վրա պատկերված է Հայաստանի Հանրապետության Նախագահի նստավայրը: Ներքևի մասում «ՀԱՅՈՑ ՊԵՏԱԿԱՆՈՒԹՅՈՒՆ» մակագրությունն է, իսկ վերևի մասում՝ Հայաստանի Հանրապետության անկախության 15-ամյակը պատկերող խորհրդանշանը:

Թափանցիկ պատիճով հուշադրամը և իսկության հավաստագիրը տեղադրված են արհեստական կաշվից պատրաստված տուփում:

Հուշադրամի ուրվագծերը ձևավորել է Լեհաստանի դրամահատարանի դիզայներ Ուրսուլա Վալեժակը:

Հուշադրամը հատվել է Լեհաստանի դրամահատարանում:

Հուշադրամի բնութագիրը
 

Անվանական արժեքը	5000 դրամ
Մետաղը և հարգը	արծաթ, 9250
Զանգվածը	168,1 + 1% գ
Տրամագիծը	63,0 +0.25/-0.05 մմ
Դրամաշուրթը	հարթ, համարակալված
Որակը	պրուֆ
Տպաքանակը	300 հատ

Հավելված 2 ՀՀ կենտրոնական բանկի խորհրդի 2006 թվականի հուլիսի 18-ի թիվ 355-Ն որոշման

Ն Կ Ա Ր Ա Գ Ր ՈՒ Թ Յ ՈՒ Ն

«Կոմիտաս» ոսկե հուշադրամի

Հայաստանի Հանրապետության կենտրոնական բանկը թողարկել է Կոմիտասին նվիրված 10000 դրամ անվանական արժեքով ոսկե հուշադրամ:

Հուշադրամի դիմերեսին ներքին շրջանակում պատկերված են ժամանակակից և հին նոտաները` խազերը, որոնց ուսումնասիրությամբ զբաղվել է Կոմիտասը: Նոտաների ներքևում հուշադրամի անվանական արժեքի մակագրությունն է` «10000 ԴՐԱՄ»: Արտաքին շրջանակում մակագրված է՝ «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿ 2006»:

Հուշադրամի դարձերեսին պատկերված է Կոմիտասի դիմանկարը և աջ կողմում` «ԿՈՄԻՏԱՍ», «KOMITAS» բառերն ու Կոմիտասի ծննդյան և մահվան տարեթվերը:

Թափանցիկ պատիճով հուշադրամը և իսկության հավաստագիրը տեղադրված են արհեստական կաշվից պատրաստված տուփում:

Հուշադրամի ուրվագծերը ձևավորել է դիզայներ Էդուարդ Կուրղինյանը:

Հուշադրամը հատվել է Լեհաստանի դրամահատարանում:

Հուշադրամի բնութագիրը
 

Անվանական արժեքը	10000 դրամ
Մետաղը և հարգը	ոսկի, 9990
Զանգվածը	8,6 գ
Տրամագիծը	22,0 մմ
Դրամաշուրթը	ատամնավոր
Որակը	պրուֆ
Տպաքանակը	1000 հատ

Հավելված 3 ՀՀ կենտրոնական բանկի խորհրդի 2006 թվականի հուլիսի 18-ի թիվ 355-Ն որոշման

Ն Կ Ա Ր Ա Գ Ր ՈՒ Թ Յ ՈՒ Ն

«Անդրկովկասյան գորշ արջ» արծաթե հուշադրամի

Անդրկովկասյան գորշ արջ պատկերող 100 դրամ անվանական արժեքով արծաթե հուշադրամը Հայաստանի Հանրապետության կենտրոնական բանկը թողարկել է «Կովկասի կենդանական աշխարհ» միջազգային ծրագրի շրջանակներում: Ծրագրում ներառված են այն կենդանիները, որոնք ընդգրկվել են Հայաստանի Կարմիր գրքում:

Հուշադրամի դիմերեսին ներքին շրջանակում պատկերված է Հայաստանի Հանրապետության զինանշանը: Զինանշանի տակ մակագրված է հուշադրամի անվանական արժեքը թվերով` «100», և «ԴՐԱՄ», «DRAM» բառերը: Զինանշանի վերևի մասում հուշադրամի թողարկման տարեթիվն է` «2006»: Հուշադրամի եզրաշրթով մակագրված են՝ «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» և «REPUBLIC OF ARMENIA» բառերը:

Հուշադրամի դարձերեսին պատկերված է անդրկովկասյան գորշ արջը, որի վերևի մասում կենդանու անվանումն է լատիներեն լեզվով, իսկ ներքևի մասում` հայերենով: Կենդանու և գրագրությունների միջև առկա կարմիր էմալով կատարված կորերը խորհրդանշում են այս կենդանու պաշտպանված լինելը պետության կողմից:

Թափանցիկ պատիճով հուշադրամը և իսկության հավաստագիրը տեղադրված են արհեստական կաշվից պատրաստված տուփում:

Հուշադրամի ուրվագծերը ձևավորել են Լեհաստանի դրամահատարանի դիզայներներ Ռոուսանա և Անդժեյ Նովակովսցիները:

Հուշադրամը հատվել է Լեհաստանի դրամահատարանում:

Հուշադրամի բնութագիրը

Անվանական արժեքը	100 դրամ
Մետաղը և հարգը	արծաթ, 9250±50
Զանգվածը	28,28±0,25 գ
Տրամագիծը	38,61±0,15 մմ
Որակը	բրիլիանթ անսրքյուլեյթիդ
Դրամաշուրթը	հարթ
Ձևը	կլոր
Տպաքանակը	3000 հատ

Հավելված 4 ՀՀ կենտրոնական բանկի խորհրդի 2006 թվականի հուլիսի 18-ի թիվ 355-Ն որոշման

Ն Կ Ա Ր Ա Գ Ր ՈՒ Թ Յ ՈՒ Ն

«Լայնականջ ոզնի» արծաթե հուշադրամի

Լայնականջ ոզնի պատկերող 100 դրամ անվանական արժեքով արծաթե հուշադրամը Հայաստանի Հանրապետության կենտրոնական բանկը թողարկել է «Կովկասի կենդանական աշխարհ» միջազգային ծրագրի շրջանակներում: Ծրագրում ներառված են այն կենդանիները, որոնք ընդգրկվել են Հայաստանի Կարմիր գրքում:

Հուշադրամի դիմերեսին ներքին շրջանակում պատկերված է Հայաստանի Հանրապետության զինանշանը: Զինանշանի տակ մակագրված է հուշադրամի անվանական արժեքը թվերով` «100», և «ԴՐԱՄ», «DRAM» բառերը: Զինանշանի վերևի մասում հուշադրամի թողարկման տարեթիվն է` «2006»: Հուշադրամի եզրաշրթով մակագրված են՝ «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» և «REPUBLIC OF ARMENIA» բառերը:

Հուշադրամի դարձերեսին պատկերված է լայնականջ ոզնին, որի վերևի մասում կենդանու անվանումն է լատիներեն լեզվով, իսկ ներքևի մասում` հայերենով: Կենդանու և գրագրությունների միջև առկա կարմիր էմալով կատարված կորերը խորհրդանշում են այս կենդանու պաշտպանված լինելը պետության կողմից:

Թափանցիկ պատիճով հուշադրամը և իսկության հավաստագիրը տեղադրված են արհեստական կաշվից պատրաստված տուփում:

Հուշադրամի ուրվագծերը ձևավորել են Լեհաստանի դրամահատարանի դիզայներներ Ռոուսանա և Անդժեյ Նովակովսցիները:

Հուշադրամը հատվել է Լեհաստանի դրամահատարանում:

Հուշադրամի բնութագիրը 

Անվանական արժեքը	100 դրամ
Մետաղը և հարգը	արծաթ, 9250±50
Զանգվածը	28,28±0,25 գ
Տրամագիծը	38,61±0,15 մմ
Որակը	բրիլիանթ անսրքյուլեյթիդ
Դրամաշուրթը	հարթ
Ձևը	կլոր
Տպաքանակը	3000 հատ