«Վավերացնում եմ»
Հայաստանի Հանրապետության
Նախագահ Ռ. Քոչարյան
26 հուլիսի 2006 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

6 հուլիսի 2006 թվականի N 995-Ն

ԼՈՂԱՄԻՋՈՑՆԵՐԻ ՇԱՀԱԳՈՐԾՄԱՆ ԵՎ ՎԱՐՄԱՆ ԺԱՄԱՆԱԿԱՎՈՐ ԿԱՆՈՆՆԵՐԸ ՀԱՍՏԱՏԵԼՈՒ ՄԱՍԻՆ

Լողամիջոցների շահագործման և վարման հարցերը կանոնակարգելու նպատակով Հայաստանի Հանրապետության կառավարությունը որոշում է.

1. Հաստատել լողամիջոցների շահագործման և վարման ժամանակավոր կանոնները` համաձայն հավելվածի:

2. Սահմանել, որ սույն որոշման 1-ին կետով հաստատված ժամանակավոր կանոնների կատարման նկատմամբ հսկողությունը համատեղ իրականացնում են Հայաստանի Հանրապետության տարածքային կառավարման նախարարության Հայաստանի փրկարար ծառայությունը, Հայաստանի Հանրապետության կառավարությանն առընթեր Հայաստանի Հանրապետության ոստիկանությունը և Հայաստանի Հանրապետության բնապահպանության նախարարությունը:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2006 թ. հուլիսի 14 Երևան

Հավելված ՀՀ կառավարության 2006 թվականի հուլիսի 6-ի N 995-Ն որոշման

Ժ Ա Մ Ա Ն Ա Կ Ա Վ Ո Ր   Կ Ա Ն Ո Ն Ն Ե Ր

ԼՈՂԱՄԻՋՈՑՆԵՐԻ ՇԱՀԱԳՈՐԾՄԱՆ ԵՎ ՎԱՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կանոններով ժամանակավորապես կանոնակարգվում են լողամիջոցների վարման և շահագործման, լողամիջոցների վարման համար ջրային տարածքների հատկացման և այլ հարցեր, ինչպես նաև դրանց չկատարման համար վարչական ներգործության միջոցները:

2. Սույն կանոններում կիրառվող հիմնական հասկացությունը`

լողամիջոց` ինքնագնաց ու ոչ ինքնագնաց` մետաղե, փայտե, ռետինե և այլ նյութերից պատրաստված իրանով նավեր ու նավակներ, ջրացիկլեր, ջրային հեծանիվներ և այլ լողամիջոցներ:

3. Սույն կանոնների խախտման համար կիրառվում են վարչական ներգործության հետևյալ միջոցները`

ա) լողամիջոցի շահագործման արգելում.

բ) լողամիջոցը ժամանակավոր արգելանքի տակ վերցնել:

Սույն կետում նշված միջոցների կիրառման ժամանակ լրացվող ձևաթղթերը հաստատում է Հայաստանի Հանրապետության վարչապետի 2006 թվականի հունիսի 30-ի «Լողամիջոցների ձեռքբերման, օգտագործման և վարման հարցերը կանոնակարգող ու վերահսկող ժամանակավոր հանձնաժողով ստեղծելու մասին» N 495-Ա որոշմամբ ստեղծված հանձնաժողովը (այսուհետ` հանձնաժողով):

4. Սույն կանոնների 3-րդ կետով ամրագրված վարչական ներգործության միջոցները կիրառվում են հանձնաժողովի կամ այդ հանձնաժողովի կողմից լիազորված պաշտոնատար անձանց կողմից:

II. ԼՈՂԱՄԻՋՈՑՆԵՐԻ ՕԳՏԱԳՈՐԾՄԱՆ ԵՎ ՎԱՐՄԱՆ ԺԱՄԱՆԱԿԱՎՈՐ ԿԱՆՈՆՆԵՐԸ

5. Արգելվում է օրենքով և այլ իրավական ակտերով չնախատեսված կերպով վերասարքավորված լողամիջոցների շահագործումը:

6. Արգելվում է համապատասխան ռեեստրում չգրանցված, տեխնիկական անձնագիր չունեցող լողամիջոցների շահագործումը:

7. Արգելվում են հաշվառման համարներ չունեցող լողամիջոցների շահագործումը և վարումը:

8. Չի թույլատրվում լողամիջոցների շահագործումը և վարումը այն անձանց, ովքեր չեն անցել համապատասխան ուսուցում, ատեստավորում կամ հրահանգավորում:

9. Ֆիզիկական և իրավաբանական անձանց արգելվում է լողամիջոցների վարձով տրամադրումը մինչև 16 տարեկան անձանց, ինչպես նաև համապատասխան ուսուցում, ատեստավորում կամ հրահանգավորում չանցած անձանց:

10. Արգելվում է առանց փրկարարական միջոցների և համապատասխան ազդանշանային միջոցների լողամիջոցների շահագործումը:

11. Լողամիջոցի երկարությունը, լայնությունը, բարձրությունը, ջրում նստվածքը, արագությունը, շարժիչի հզորությունը, դրանով միանգամից երթևեկող մարդկանց թիվը չպետք է գերազանցի արտադրողի կողմից տրված տեխնիկական տվյալները:

12. Արգելվում են լողամիջոցի վարումը, ինչպես նաև լողամիջոցի տրամադրումը` ոչ սթափ վիճակում գտնվող անձանց:

13. Արգելվում է լողամիջոցի վարումը` դրա համար առանձնացված ջրային տարածքներից դուրս:

14. Չի թույլատրվում լողամիջոց վարելու համար առանձնացված ջրային տարածք տանող միջանցքում գերազանցել 5 կմ/ժամ արագությունը:

15. Արգելվում է լողամիջոցի վրա դյուրավառ, հրդեհապայթյունավտանգ, ինչպես նաև լողամիջոցի լողունակության և անձնակազմի անվտանգության համար վտանգավոր նյութեր, առարկաներ վերցնելը:

16. Չի թույլատրվում օրվա մութ ժամանակ, մառախուղի, մթնոլորտային տեղումների և այլ անբարենպաստ եղանակային պայմանների ժամանակ լողամիջոց վարելը:

17. Լողամիջոցի վթարի դեպքում ազդանշաններ տալու նպատակով առնվազն
4-տեղանոց լողամիջոցը պետք է հագեցված լինի ձայնային, լուսային կամ ռադիոազդանշանային միջոցներով:

18. Ջրային տարածքներում երթևեկությունն աջակողմյան է:

19. Թույլատրվում է լողամիջոց վարողին վազանց կատարել միայն վազանցվող լողամիջոցի ձախ կողմով:

20. Լողամիջոցների վարման համար հատկացված երկկողմանի երթևեկություն ունեցող տարածքում վազանցի ժամանակ լողամիջոցների միջև հեռավորությունը պետք է լինի առնվազն 50 մետր, իսկ կողային հեռավորությունը` 25 մետր:

21. Հանդիպակաց երթևեկության ժամանակ լողամիջոցների բախման վտանգի դեպքում յուրաքանչյուր լողամիջոց վարող պարտավոր է շարժման ուղղությունը շեղել դեպի իր աջ կողմը:

22. Եթե լողամիջոցների երթուղիները հատվում են, ապա առաջինն անցնում է`

ա) շարժիչ ունեցող լողամիջոցների դեպքում` աջից հարված չունեցողը.

բ) շարժիչ ունեցող և շարժիչ չունեցող լողամիջոցների դեպքում` շարժիչ չունեցողը.

գ) շարժիչ չունեցող լողամիջոցի և շարժիչ չունեցող, առագաստ ունեցող լողամիջոցի դեպքում` շարժիչ չունեցող, առագաստ ունեցող լողամիջոցը:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան