«Վավերացնում եմ»
Հայաստանի Հանրապետության
Նախագահ Ռ. Քոչարյան
21 օգոստոսի 2006 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 օգոստոսի 2006 թվականի N 1134-Ն

ՓՈՍՏԱՅԻՆ ԿԱՊԻ ՕՊԵՐԱՏՈՐՆԵՐԻ ՄԻՋԵՎ ՓՈՍՏԱՅԻՆ ԱՌԱՔԱՆԻՆԵՐԻ ԵՎ ԴՐԱՄԱԿԱՆ ՄԻՋՈՑՆԵՐԻ ԸՆԴՈՒՆՄԱՆ ԵՎ ՀԱՆՁՆՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Համաձայն «Փոստային կապի մասին» Հայաստանի Հանրապետության օրենքի 7-րդ հոդվածի 1-ին մասի` Հայաստանի Հանրապետության կառավարությունը որոշում է.

1. Սահմանել փոստային կապի օպերատորների միջև փոստային առաքանիների և դրամական միջոցների ընդունման և հանձնման կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2006 թ. օգոստոսի 16 Երևան

Հավելված ՀՀ կառավարության 2006 թվականի օգոստոսի 3-ի N 1134-Ն որոշման

Կ Ա Ր Գ

ՓՈՍՏԱՅԻՆ ԿԱՊԻ ՕՊԵՐԱՏՈՐՆԵՐԻ ՄԻՋԵՎ ՓՈՍՏԱՅԻՆ
ԱՌԱՔԱՆԻՆԵՐԻ ԵՎ ԴՐԱՄԱԿԱՆ ՄԻՋՈՑՆԵՐԻ ԸՆԴՈՒՆՄԱՆ ԵՎ ՀԱՆՁՆՄԱՆ

1. Սույն կարգով կարգավորվում են փոստային կապի օպերատորների միջև փոստային առաքանիների և դրամական միջոցների ընդունման և հանձնման հետ կապված փոխհարաբերությունները:

2. Սույն կարգում օգտագործվող հիմնական հասկացություններն ունեն հետևյալ իմաստները`

փոխկապակցում` տարբեր փոստային կապի օպերատորների կողմից օգտագործվող փոստային կապի երկու ցանցերի կապակցում, որի արդյունքում մեկ փոստային կապի օպերատորն ապահովում է մեկ այլ փոստային կապի օպերատորի ծառայություններից օգտվողների փոստային առաքանիների և դրամական միջոցների ընդունման, մշակման, փոխադրման և հանձնման գործընթացը.

փոխկապակցման պայմանագիր` փոստային կապի օպերատորների միջև փոստային առաքանիների և դրամական միջոցների ընդունման, մշակման, փոխադրման և հանձնման գործընթացն իրականացնելու նպատակով կնքվող պայմանագիր:

3. Փոստային կապի օպերատորների միջև փոստային առաքանիների և դրամական միջոցների ընդունումն ու հանձնումն իրականացվում են պայմանագրային հիմունքներով` ապահովելով հանձնվող և ընդունվող փոստային առաքանիների և դրամական միջոցների ճշգրիտ վերջնահաշվարկը:

4. Փոստային կապի օպերատորների միջև փոխկապակցման պայմանագիրը կնքվում է փոխհարաբերությունների իրականացման և կարգավորման նպատակով:

5. Փոխկապակցման պայմանագրում ներառվում են հետևյալ դրույթները`

ա) փոխկապակցման ժամկետները և պայմանները,

բ) կողմերի իրավունքները և պարտականությունները,

գ) փոխկապակցվող փոստային կապի օպերատորների փոխադարձ պատասխանատվությունը` մատուցվող փոստային կապի ծառայությունների որակի համար,

դ) փոխկապակցման սակագները, որոնք պետք է լինեն խելամիտ, զարգացման հեռանկարով և ոչ խտրական,

ե) փոստային կապի օպերատորների միջև հարաբերությունների առանձնահատուկ պայմանները, որոնց շնորհիվ կապահովվի փոստային կապի ծառայությունների արդյունավետ և բարենպաստ շուկայական մրցակցություն,

զ) փոստային կապի օպերատորների միջև փոխհաշվարկների պայմանները` մատուցվող ծառայությունների համար,

է) փոստային կապի օպերատորների միջև փոստային առաքանիների և դրամական միջոցների ծավալների վերաբերյալ ամենօրյա պարտադիր տեղեկատվության փոխանակումը` էլեկտրոնային տարբերակով,

ը) փոստային կապի օպերատորների միջև փոխկապակցման հարցերի վերաբերյալ տարաձայնությունների լուծումը` Հայաստանի Հանրապետության օրենսդրությանը համապատասխան:

6. Փոստային կապի օպերատորների միջև փոխկապակցման պայմանագրի կնքման գործընթացն իրականացվում է Հայաստանի Հանրապետության քաղաքացիական օրենսգրքի դրույթներին համապատասխան:

7. Փոստային կապի ազգային օպերատորը փոխկապակցման պայմանագիր է կնքում ցանկացած դիմող փոստային կապի օպերատորի հետ` վերջինիս կողմից գրավոր դիմում ներկայացվելու օրվանից մեկ ամսվա ընթացքում, իսկ փոխկապակցումն իրականացվում է գրավոր դիմում ներկայացնելու օրվանից եռամսյա ժամկետում:

8. Փոխկապակցման համար դիմում ներկայացրած օպերատորին տրվող տեխնիկական պայմանները, ծառայությունների որակը, փոխկապակցման պայմանները և ժամկետը չպետք է տարբերվեն փոստային կապի ազգային օպերատորի մասնաճյուղերի համար սահմանված պայմաններից և որակից:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան