ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

31 հունվարի 1994 թ. N 57

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԵՂՐՈՒ ՇՐՋԱՆՈՒՄ ՍԱՀՄԱՆԱՄԵՐՁ ԱՌԵՎՏՐԻ ԿԱԶՄԱԿԵՐՊՄԱՆ ՄԱՍԻՆ

Հայաստանի Հանրապետության Մեղրու շրջանի և Իրանի Իսլամական Հանրապետության Մարանդի գավառի միջև սահմանամերձ առևտրի կազմակերպման նպատակով Հայաստանի Հանրապետության կառավարությունը որոշում է.

1. Հավանություն տալ Հայաստանի Հանրապետության նյութական ռեսուրսների նախարարության, էկոնոմիկայի նախարարության, արտաքին գործերի նախարարության, արդարադատության նախարարության, Հայաստանի Հանրապետության մաքսային վարչության կողմից ներկայացված և Իրանական կողմի հետ համաձայնեցված` Հայաստանի Հանրապետության կառավարության և Իրանի Իսլամական Հանրապետության կառավարության միջև Հայաստանի Հանրապետության Մեղրու շրջանի և Իրանի Իսլամական Հանրապետության Մարանդի գավառի միջև սահմանամերձ առևտրի մասին համաձայնագրի նախագծին:

2. Լիազորել պատգամավորների Մեղրու շրջանային խորհրդի գործադիր կոմիտեի նախագահ Ա. Արիստակեսյանին Հայաստանի Հանրապետության կառավարության անունից ստորագրելու Հայաստանի Հանրապետության կառավարության և Իրանի Իսլամական Հանրապետության կառավարության միջև Հայաստանի Հանրապետության Մեղրու շրջանի և Իրանի Իսլամական Հանրապետության Մարանդի գավառի միջև սահմանամերձ առևտրի մասին համաձայնագիրը:

3. (3-րդ կետն ուժը կորցրել է 11.07.00 N 379)

4. Հայաստանի Հանրապետության շինարարության նախարարությանը` Հայաստանի Հանրապետության նյութական ռեսուրսների նախարարության կողմից ներկայացված` սահմանամերձ առևտրի տարածքում կառուցվող օբյեկտների շինարարության նախագծերին համապատասխան իրականացնել նշված տարածքի կառուցապատումը:

5. Հայաստանի Հանրապետության ֆինանսների նախարարությանը` Մեղրու շրջանի սահմանամերձ առևտրի տարածքում ժամանակավոր շինությունների կառուցման համար Հայաստանի Հանրապետության նյութական ռեսուրսների նախարարությանը` տալ երկարատև` 18 ամիս ժամկետով վարկ տրամադրելու երաշխիք:

Առաջարկել Հայաստանի Հանրապետության կենտրոնական բանկին Մեղրու շրջանի սահմանամերձ առևտրի տարածքում կազմակերպել դրամափոխանակման կետ:

6. Հայաստանի Հանրապետության արտաքին գործերի նախարարությանը և Ռուսաստանի Դաշնության սահմանապահ զորքերի հրամանատարությանը` սահմանամերձ առևտրի մասնակիցների համար մշակել պետական սահմանը հատելու պարզեցված կարգ:

7. (7-րդ կետն ուժը կորցրել է 11.07.00 N 379)

Հայաստանի Հանրապետության վարչապետ