«Վավերացնում եմ»
Հայաստանի Հանրապետության
Նախագահ Ռ. Քոչարյան
7 հուլիսի 2003 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
26 հունիսի 2003 թվականի N 789-Ն
«ՀԱՄԱԿԱՐԳՉԱՅԻՆ ԿԵՆՏՐՈՆ» ՊԵՏԱԿԱՆ ՈՉ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆ ՍՏԵՂԾԵԼՈՒ ՄԱՍԻՆ
«Պետական ոչ առևտրային կազմակերպությունների մասին» Հայաստանի Հանրապետության օրենքի 9-րդ հոդվածին համապատասխան` Հայաստանի Հանրապետության կառավարությունը որոշում է.
1. Հայաստանի Հանրապետության կառավարությանն առընթեր միգրացիայի և փախստականների վարչության «Համակարգչային կենտրոն» պետական փակ բաժնետիրական ընկերությունը վերակազմավորման ձևով վերակազմակերպել «Համակարգչային կենտրոն» պետական ոչ առևտրային կազմակերպության:
«Համակարգչային կենտրոն» պետական ոչ առևտրային կազմակերպությունը Հայաստանի Հանրապետության կառավարությանն առընթեր միգրացիայի և փախստականների վարչության«Համակարգչային կենտրոն» պետական փակ բաժնետիրական ընկերության իրավահաջորդն է` փոխանցման ակտի համաձայն:
2. Սահմանել, որ`
ա) «Համակարգչային կենտրոն» պետական ոչ առևտրային կազմակերպության գործունեության հիմնական առարկան ու նպատակներն են`
Ադրբեջանի Հանրապետությունից բռնի տեղահանված ազգաբնակչության, Հայաստանի Հանրապետությունում ապաստան հայցող օտարերկրյա քաղաքացիների և քաղաքացիություն չունեցող անձանց, Հայաստանի Հանրապետության սահմանամերձ շրջաններից պատերազմական գործողությունների հետևանքով տեղահանված անձանց ու Հայաստանի Հանրապետության բնակչության այլ միգրացիոն հոսքերի մասին տվյալների հավաքագրման հիման վրա անձնավորված տեղեկություններ պարունակող քարտադարանների (արխիվների) և համակարգչային տեղեկատվական շտեմարանների (բազա) ստեղծումն ու վարումը, դրանց կառավարման համակարգչային ծրագրային միջոցների ձեռքբերումը, մշակումը, տեղայնացումը, ներդաշնակեցումն ու ներդրումը, պարբերականների, տեղեկագրերի, ժողովածուների և տեղեկատվական նյութերի հրապարակումն ու տեղեկատվության` տարբեր տեսակի կրիչների միջոցով տարածումը,
ստեղծված տեղեկատվական ռեսուրսների հիման վրա` Հայաստանի Հանրապետության օրենսդրությամբ սահմանված կարգով պետական մարմիններին, հասարակական և միջազգային կազմակերպություններին պահանջվող տեղեկությունների տրամադրումը,
տեղեկատվության փոխանակման նպատակով արտաքին տեղեկատվական ցանցերի հետ փոխգործակցության կազմակերպումը.
բ) «Համակարգչային կենտրոն» պետական ոչ առևտրային կազմակերպությունը կարող է Հայաստանի Հանրապետության օրենսդրությամբ սահմանված կարգով իրականացնել ձեռնարկատիրական գործունեության հետևյալ տեսակները`
հրատարակչական գործ (ոլորտին վերաբերող տեղեկատվական նյութերի` գրքերի, բրոշյուրների, բուկլետների և համանման հրատարակումների, քարտեզների ու ատլասների հրատարակում),
համակարգչային դասընթացների կազմակերպում,
տվյալների հիմնապահեստների (բազաների) հետ կապված գործունեություն:
3. Հայաստանի Հանրապետության կառավարությանն առընթեր միգրացիայի և փախստականների վարչության «Համակարգչային կենտրոն» պետական փակ բաժնետիրական ընկերության տնօրինության` պետական սեփականություն հանդիսացող` 5 մլն 614 հազար դրամ հաշվեկշռային արժեք ունեցող գույքը, բացառությամբ շենքերի, շինությունների, պատմամշակութային նշանակության և նվազագույն աշխատավարձի 10000-ապատիկից ավելի արժողությամբ գույքի, սեփականության իրավունքով հանձնել «Համակարգչային կենտրոն» պետական ոչ առևտրային կազմակերպությանը:
4. «Համակարգչային կենտրոն» պետական ոչ առևտրային կազմակերպության կառավարման, ինչպես նաև «Պետական ոչ առևտրային կազմակերպությունների մասին» Հայաստանի Հանրապետության օրենքի 13-րդ հոդվածի երկրորդ կետի «գ», «դ», «ե» և «է» ենթակետերով ու 14-րդ հոդվածով նախատեսված լիազորությունները վերապահել Հայաստանի Հանրապետության տարածքային կառավարման նախարարությանը:
(4-րդ կետը փոփ. 29.12.05 N 2327-Ն)
5. Հայաստանի Հանրապետության կառավարությանն առընթեր միգրացիայի և փախստականների վարչության պետին` մեկամսյա ժամկետում հաստատել`
ա) «Համակարգչային կենտրոն» պետական ոչ առևտրային կազմակերպությանը սեփականության իրավունքով հանձնվող և ամրացվող գույքի կազմը.
բ) «Համակարգչային կենտրոն» պետական ոչ առևտրային կազմակերպության կանոնադրությունը և այն սահմանված կարգով ներկայացնել պետական գրանցման:
6. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
|
|
Ա. Մարգարյան |
|
|