«Գրանցված է»
ՀՀ արդարադատության
նախարարության կողմից
23 մարտի 2005 թ.
Պետական գրանցման թիվ 60005135

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
 
ՀԱՆՐԱՅԻՆ ԾԱՌԱՅՈՒԹՅՈՒՆՆԵՐԸ ԿԱՐԳԱՎՈՐՈՂ ՀԱՆՁՆԱԺՈՂՈՎ

25 փետրվարի 2005 թ. ք. Երևան

N 15-Ն

Ո Ր Ո Շ ՈՒ Մ

«ՇԻՐԱԿ-ՋՐՄՈՒՂԿՈՅՈՒՂԻ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ԿՈՂՄԻՑ ՍՊԱՌՈՂՆԵՐԻՆ ԽՄԵԼՈՒ ՋՐԻ ՄԱՏԱԿԱՐԱՐՄԱՆ ԵՎ ՋՐԱՀԵՌԱՑՄԱՆ ԾԱՌԱՅՈՒԹՅՈՒՆՆԵՐԻ ՄԱՏՈՒՑՄԱՆ ՍԱԿԱԳՆԵՐԻ ՍԱՀՄԱՆՄԱՆ ՄԱՍԻՆ  

Հիմք ընդունելով Հայաստանի Հանրապետության ջրային օրենսգրքի 14-րդ, 79-րդ, 79¹-րդ հոդվածները և Հայաստանի Հանրապետության հանրային ծառայությունները կարգավորող հանձնաժողովի 2004 թվականի օգոստոսի 9-ի «Հայաստանի Հանրապետության ջրային համակարգում սակագների սահմանման ու վերանայման կարգը հաստատելու մասին» N 97-Ն որոշումը՝ Հայաստանի Հանրապետության հանրային ծառայությունները կարգավորող հանձնաժողովը որոշում է.

1. Սահմանել «Շիրակ-ջրմուղկոյուղի» փակ բաժնետիրական ընկերության կողմից՝

ա/ սպառողներին խմելու ջրի մատակարարման ծառայության մատուցման սակագինը՝ 64.15 դրամ՝ մատակարարված յուրաքանչյուր խորանարդ մետրի դիմաց՝ առանց ավելացված արժեքի հարկի և 76.98 դրամ՝ ներառյալ ավելացված արժեքի հարկը.

բ/ սպառողներին ջրահեռացման ծառայության մատուցման սակագինը՝ 35.97 դրամ՝ մատակարարված յուրաքանչյուր խորանարդ մետր խմելու ջրի դիմաց՝ առանց ավելացված արժեքի հարկի և 43.16 դրամ՝ ներառյալ ավելացված արժեքի հարկը։

2. Սահմանել, որ «Շիրակ-ջրմուղկոյուղի» փակ բաժնետիրական ընկերության կողմից սպառողներին խմելու ջրի մատակարարման և ջրահեռացման ծառայությունների մատուցման առաջիկա 3 տարիների սակագները հաշվարկելիս հիմք կընդունվեն.

ա/ հաշվեգրված հասույթի հավաքագրման տոկոսը՝ 2006 թվականին՝ 85 %, 2007 թվականին՝ 90 %, 2008 թվականին՝ 95%,

բ/ կորուստները՝ 2006 թվականին՝ 70 %-ի չափով, 2007 թվականին՝ 60 %-ի, 2008 թվականին՝ 50 %-ի։

3. Սույն որոշման 1-ին կետով սահմանված սակագներն ուժի մեջ են մտնում 2005 թվականի ապրիլի 1-ից:

4. «Շիրակ-ջրմուղկոյուղի» փակ բաժնետիրական ընկերությանը.

ա/ մինչև սույն թվականի հուլիսի 1-ը Հայաստանի Հանրապետության հանրային ծառայությունները կարգավորող հանձնաժողով ներկայացնել կենցաղային կարիքների համար խմելու ջրի սպասարկման որակի նվազագույն պահանջների վերաբերյալ առաջարկություններ.

բ/ մինչև սույն թվականի հոկտեմբերի 1-ը Հայաստանի Հանրապետության հանրային ծառայությունները կարգավորող հանձնաժողով ներկայացնել ջրի կորուստների նվազեցմանը, առևտրային հաշվառման ու սպառողների սպասարկման որակի բարելավմանն ուղղված ընկերության ներդրումային ծրագիրը։

5. Ընդունել ի գիտություն, որ Հայաստանի Հանրապետության հանրային ծառայությունները կարգավորող հանձնաժողովը «Շիրակ-ջրմուղկոյուղի» փակ բաժնետիրական ընկերության և այլ շահագրգիռ կողմերի հետ համատեղ մինչև սույն թվականի հոկտեմբերի 1-ը կքննարկի և սահմանված կարգով կհաստատի կենցաղային կարիքների համար խմելու ջրի մատակարարներին ներկայացվող սպասարկման որակի նվազագույն պահանջները։

6. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀՀ հանրային ծառայությունները կարգավորող հանձնաժողովի նախագահ`

Ռ. Նազարյան