«Վավերացնում եմ» Հայաստանի Հանրապետության Նախագահ Ռ. Քոչարյան 4 փետրվարի 2006 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

19 հունվարի 2006 թվականի N 47-Ն

ԹԱՓՈՆՆԵՐԻ ԱՆՁՆԱԳՐԱՎՈՐՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

Համաձայն «Թափոնների մասին» Հայաստանի Հանրապետության օրենքի 13-րդ հոդվածի 1-ին մասի և Հայաստանի Հանրապետության վարչապետի 2005 թվականի մայիսի 30-ի «Թափոնների մասին» Հայաստանի Հանրապետության օրենքի կիրարկումն ապահովող միջոցառումների մասին» N 380-Ա որոշման հավելվածի 2-րդ կետի` Հայաստանի Հանրապետության կառավարությունը որոշում է.

1. Հաստատել`

ա) թափոնների անձնագրավորման կարգը` համաձայն N 1 հավելվածի.

բ) թափոնի անձնագրի տիտղոսաթերթի ձևը՝ համաձայն N 2 հավելվածի:

2. Հայաստանի Հանրապետության բնապահպանության նախարարին` սույն որոշման պաշտոնական հրապարակումից հետո եռամսյա ժամկետում հաստատել թափոնի անձնագրի օրինակելի ձևը:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ա. Մարգարյան
2006 թ. փետրվարի 1 Երևան

Հավելված N 1 ՀՀ կառավարության 2006 թվականի հունվարի 19-ի N 47-Ն որոշման

Կ Ա Ր Գ

ԹԱՓՈՆՆԵՐԻ ԱՆՁՆԱԳՐԱՎՈՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կանոնակարգվում են իրավաբանական անձանց և անհատ ձեռնարկատերերի կողմից (այսուհետ` թափոններ արտադրող) վտանգավոր թափոնների անձնագրի (այսուհետ` անձնագիր) կազմման, համաձայնեցման և հաստատման հետ կապված հարաբերությունները:

2. Վտանգավոր թափոնների անձնագրավորումն իրականացվում է ռեսուրսների խնայողության ու վտանգավոր թափոնների անվտանգ գործածությունն ապահովելու նպատակով և հիմք է հանդիսանում անձնագրավորվող թափոնների հետ կապված տեխնոլոգիական, տնտեսական, իրավական և այլ որոշումների ընդունման համար, մասնավորապես, կապված շրջակա միջավայրի պահպանության պահանջների կատարման, թափոնների անդրսահմանային փոխադրման կարգավորման, թափոնների տեղադրման համար բնապահպանական վճարի օբյեկտ հանդիսացող ծավալների հաշվառման և (կամ) հաշվարկման, ինչպես նաև բնապահպանական իրավախախտումների համար համապատասխան պատժամիջոցների կիրառման, արտադրանքի արտադրության համար որպես երկրորդային հումք թափոնների օգտագործման անհրաժեշտ և նպատակահարմար միջոցների ձեռնարկման, թափոնների վերամշակման նպատակահարմարության հետ և այլն:

3. Անձնագիրը պետք է նպաստի թափոնների տեղափոխման, ինչպես նաև անդրսահմանային փոխադրումների ժամանակ տեխնիկական արգելքների վերացմանը:

4. Անձնագիրը ներառում է թափոններ արտադրողի մոտ գոյացող վտանգավոր թափոնների (այսուհետ` թափոն) տեսակի, քանակի, վտանգավորության աստիճանի, դրանց կազմի և ռեսուրսային ու հումքային հիմնական հատկությունների մասին տեղեկություններ:

II. ԱՆՁՆԱԳՐԻ ԿԱԶՄՄԱՆ, ՀԱՄԱՁԱՅՆԵՑՄԱՆ ԵՎ ՀԱՍՏԱՏՄԱՆ ԸՆԹԱՑԱԿԱՐԳԸ

5. Անձնագիրը կազմում են թափոններ արտադրողները:

Անձնագիրը հաստատում է տվյալ թափոններն արտադրող իրավաբանական անձի ղեկավարը կամ անհատ ձեռնարկատերը և, համաձայն «Թափոնների մասին» Հայաստանի Հանրապետության օրենքի 8-րդ հոդվածի 1-ին մասի «թ» կետի, համաձայնեցնում Հայաստանի Հանրապետության բնապահպանության նախարարության հետ (այսուհետ` լիազոր մարմին):

6. Անձնագիրը կազմվում է յուրաքանչյուր տեսակի թափոնի համար` սույն կարգի 12-րդ կետով սահմանված բովանդակության համաձայն:

7. Անձնագիրը համաձայնեցվում է այն լիազոր մարմին մուտքագրվելուց հետո 30-օրյա ժամկետում և գրանցվում գրանցամատյանում:

8. Սույն կարգի 12-րդ կետով սահմանված անձնագրի բովանդակության թերի լինելու կամ անճշտությունների առկայության դեպքում անձնագիրը վերադարձվում է լրամշակման: Կրկնակի ներկայացված անձնագիրը համաձայնեցվում է սույն կարգի 7-րդ կետով սահմանված ժամկետում:

9. Անձնագիրը համաձայնեցվում և հաստատվում է Հայաստանի Հանրապետության կառավարության 2006 թվականի հունվարի 19-ի «Թափոնների անձնագրավորման կարգը սահմանելու մասին» N 47-Ն որոշման N 2 հավելվածով հաստատված անձնագրի տիտղոսաթերթի ձևին հանապատասխան:

10. Եթե թափոններ արտադրողն ստացել է լրացուցիչ կամ նոր տեղեկություններ տվյալ թափոնի մասին, ապա անձնագիրը ենթակա է վերահաստատման` սույն կարգով սահմանված ընթացակարգով:

11. Անձնագիրը համաձայնեցվում և հաստատվում է 2 օրինակից, որի մեկ օրինակը հաստատումից հետո ուղարկվում է լիազոր մարմին:

III. ԱՆՁՆԱԳՐԻ ԲՈՎԱՆԴԱԿՈՒԹՅՈՒՆԸ

12. Անձնագիրը պետք է ներառի հետևյալ պարտադիր տվյալները`

ա) թափոնի անվանումը,

բ) կազմակերպության անվանումը և տվյալները,

գ) թափոնի ծածկագիրը,

դ) անձնագրավորվող թափոնի քանակությունը,

ե) թափոնի վտանգավոր հատկությունների ցանկը,

զ) թափոնի ծագումը (ըստ տեխնոլոգիական կանոնակարգի),

է) թափոնի կազմը և դրա բաղադրիչների թունունակությունը,

ը) թափոնի վնասազերծման կամ վերամշակման համար առաջարկվող եղանակը,

թ) թափոնի հրդեհապայթյունավտանգությունը,

ժ) թափոնի կոռոզիոն ակտիվությունը,

ժա) թափոնի ռեակցիայի մեջ մտնելու ունակությունը,

ժբ) անհրաժեշտ նախազգուշական միջոցները թափոնի գործածության ժամանակ,

ժգ) թափոնի տեղափոխման սահմանափակումները,

ժդ) լրացուցիչ տեղեկություններ,

ժե) թափոն արտադրողի հայտարարությունը:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան

Հավելված N 2 ՀՀ կառավարության 2006 թվականի հունվարի 19-ի N 47-Ն որոշման

Ձև   ԹԱՓՈՆԻ ԱՆՁՆԱԳՐԻ ՏԻՏՂՈՍԱԹԵՐԹ   Ա Ն Ձ Ն Ա Գ Ի Ր  N _____   ______________________________ ___________    (վտանգավոր թափոնի անվանումը)                                    (ծածկագիրը) ___________________________________________________________ (թափոններ արտադրողի` իրավաբանական անձի դեպքում` անվանումը, գտնվելու վայրը, անհատ ___________________________________________________________ ձեռնարկատիրոջ դեպքում` անունը, ազգանունը և բնակության վայրը)   ՀԱՍՏԱՏՈՒՄ ԵՄ`   ___________________________ (թափոններ արտադրող իրավաբանական անձի ղեկավարի կամ անհատ ձեռնարկատիրոջ անունը, ազգանունը)   ___________________________ (ստորագրությունը) _____ _______________ 200 թ.   Կ.Տ.                         ՀԱՄԱՁԱՅՆ ԵՄ` ______________________                          (պաշտոնը) Լիազոր մարմնի ղեկավար ______________________ (ստորագրությունը) ______________________ (անունը, ազգանունը) ____ _____________ 200 թ.   Կ.Տ.

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան