«Վավերացնում եմ»
Հայաստանի Հանրապետության
Նախագահ Ռ. Քոչարյան
24 նոյեմբերի 2005 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 նոյեմբերի 2005 թվականի N 1925-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԱՐՏԱԿԱՐԳ ԻՐԱՎԻՃԱԿՆԵՐԻ ԱՌԱՋԱՑՄԱՆ ՄԱՍԻՆ ԲՆԱԿՉՈՒԹՅԱՆ ԱԶԴԱՐԱՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Ղեկավարվելով «Արտակարգ իրավիճակներում բնակչության պաշտպանության մասին» Հայաստանի Հանրապետության օրենքի 12-րդ հոդվածի «դ» և «Քաղաքացիական պաշտպանության մասին» Հայաստանի Հանրապետության օրենքի 10-րդ հոդվածի «ը» կետերով` Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության տարածքում արտակարգ իրավիճակների առաջացման մասին բնակչության ազդարարման կարգը` համաձայն հավելվածի։

2. Ուժը կորցրած ճանաչել Հայաստանի Հանրապետության կառավարության 1994 թվականի մարտի 22-ի «Քաղաքացիական պաշտպանության` բնակչությանը կենտրոնացված ազդարարման համակարգի գործունեության կարգավորման մասին» N 122 որոշումը:

3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից։

Հայաստանի Հանրապետության վարչապետ	Ա. Մարգարյան
2005 թ. նոյեմբերի 17 Երևան

     

Հավելված ՀՀ կառավարության 2005 թվականի նոյեմբերի 3-ի N 1925-Ն որոշման

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔՈՒՄ ԱՐՏԱԿԱՐԳ ԻՐԱՎԻՃԱԿՆԵՐԻ ԱՌԱՋԱՑՄԱՆ ՄԱՍԻՆ ԲՆԱԿՉՈՒԹՅԱՆ ԱԶԴԱՐԱՐՄԱՆ

1. Սույն կարգով կանոնակարգվում է Հայաստանի Հանրապետության տարածքում արտակարգ իրավիճակների ու ռազմական դրության պայմաններում և հակառակորդի հանկարծակի հարձակման դեպքում բնակչությանն ազդարարելու գործընթացը։

2. Սույն կարգում օգտագործվում են հետևյալ հիմնական հասկացությունները`

ա) ազդարարման ազդանշան` ազդարարման համակարգով տրվող պայմանական նշան, որը հրահանգ է կառավարման մարմիններին, քաղաքացիական պաշտպանության շտաբներին, ծառայություններին, ուժերին և բնակչությանը` համապատասխան միջոցառումներ իրականացնելու համար,

բ) օդային տագնապ` տրվում է բնակչությանը նախազգուշացնելու համար` հակառակորդի կողմից տվյալ բնակավայրի (տարածքի) վրա օդային հարձակման անմիջական սպառնալիքի դեպքում,

գ) օդային տագնապի ավարտ` տրվում է բնակչությանը նախազգուշացնելու համար` հակառակորդի կողմից տվյալ բնակավայրին (տարածքին) հարձակման սպառնալիքի վերացման դեպքում,

դ) ճառագայթային վտանգ` տրվում է բնակչությանը նախազգուշացնելու համար` տվյալ բնակավայրի (տարածքի) ռադիոակտիվ աղտոտվածության անմիջական սպառնալիքի կամ այդպիսի աղտոտվածության հայտնաբերման դեպքում,

ե) քիմիական տագնապ` տրվում է բնակչությանը նախազգուշացնելու համար` տվյալ բնակավայրի (տարածքի) քիմիական, մանրէաբանական վարակման սպառնալիքի կամ այդպիսի վարակվածության հայտնաբերման դեպքում,

զ) աղետալի ջրածածկում` տրվում է բնակչությանը նախազգուշացնելու համար` տվյալ բնակավայրի (տարածքի) ջրածածկման սպառնալիքի դեպքում,

է) հակառակորդի հարձակման սպառնալիքի ազդանշան` տրվում է Հայաստանի Հանրապետության դեմ ռազմական գործողությունների սկսման կամ զենքի կիրառման ակնհայտ սպառնալիքի դեպքում:

3. Ռազմական դրության և հակառակորդի հանկարծակի հարձակման պայմաններում կիրառվում են «Օդային տագնապ», «Օդային տագնապի ավարտ», «Ճառագայթային վտանգ» և «Քիմիական տագնապ», իսկ արտակարգ իրավիճակի առաջացման սպառնալիքի կամ ծագման դեպքում` «Ճառագայթային վտանգ», «Քիմիական տագնապ» և «Աղետալի ջրածածկման վտանգ» ազդարարման ազդանշանները:

4. Ազդարարման ազդանշանները տրվում են կապի և ազդարարման բոլոր միջոցներով` շարժական բարձրախոսային սարքերի օգնությամբ, միացվում են էլեկտրաշչակները, և տրվում է անընդհատ («Օդային տագնապ» ազդանշանի դեպքում` տատանվող), երկարատև (3 րոպե տևողությամբ) ձայնային ազդանշան: Միաժամանակ ազդարարման միջոցներով` 2-3 րոպե տևողությամբ տրվում է հետևյալ բովանդակությամբ համապատասխան տեքստային հաղորդագրություն. «Ուշադրություն, ուշադրություն ... »: Անհրաժեշտության դեպքում հաղորդագրությունը լրացվում է «Վտանգ է սպառնում հետևյալ բնակավայրերին`…» բառերով:

5. Բնակչությանն ազդարարելու մասին որոշումներն ընդունում են`

ա) հատուկ, կարևորագույն նշանակության օբյեկտներում արտակարգ իրավիճակի առաջացման սպառնալիքի և ծագման դեպքում` տվյալ կազմակերպության ղեկավարը:

Հայկական ատոմային էլեկտրակայանում (այսուհետ` ՀԱԷԿ) արտակարգ իրավիճակի առաջացման սպառնալիքի և ծագման դեպքում` նախահարձակ պաշտպանական միջոցառումների գոտու (ՀԱԷԿ-ին հարակից մինչև 5 կիլոմետրանոց գոտի) նախնական ազդարարման մասին որոշումն ընդունում է ՀԱԷԿ-ի հերթափոխի պետը, շտապ պաշտպանական միջոցառումների պլանավորման գոտում (ՀԱԷԿ-ին հարակից
5-10 կիլոմետրանոց գոտի) գտնվող բնակչությանն ազդարարելու մասին որոշումը` Հայաստանի Հանրապետության վարչապետը:

Ջրամբարի պատվարի փլուզման դեպքում` ազդարարման մասին որոշումն ընդունվում է արտակարգ իրավիճակների և քաղաքացիական պաշտպանության ոլորտի լիազոր մարմնի (այսուհետ` լիազոր մարմին) օպերատիվ ծառայության կողմից.

բ) համայնքային նշանակության արտակարգ իրավիճակի առաջացման սպառնալիքի և ծագման դեպքում` տվյալ համայնքի ղեկավարը.

գ) մարզային նշանակության արտակարգ իրավիճակի առաջացման սպառնալիքի և ծագման դեպքում` տվյալ մարզպետը (Երևանում` Երևանի քաղաքապետը).

դ) հանրապետական նշանակության արտակարգ իրավիճակի առաջացման սպառնալիքի և ծագման դեպքում` Հայաստանի Հանրապետության վարչապետը.

ե) ռազմական դրության ժամանակ, հակառակորդի հանկարծակի հարձակման, հակառակորդի հարձակման սպառնալիքի դեպքում` լիազոր մարմնի օպերատիվ ծառայությունը (Հայաստանի Հանրապետության պաշտպանության նախարարության հակաօդային պաշտպանության և ավիացիայի միացյալ հրամանատարական կետից ստացված տեղեկատվության հիման վրա):

6. Բնակչության ազդարարումն իրականացնում են`

ա) հատուկ և կարևորագույն նշանակության օբյեկտներում արտակարգ իրավիճակի առաջացման սպառնալիքի և ծագման դեպքում` տվյալ կազմակերպության ղեկավարը` լիազոր մարմնի օպերատիվ ծառայության միջոցով:

ՀԱԷԿ-ում արտակարգ իրավիճակի առաջացման սպառնալիքի և ծագման դեպքում` նախահարձակ պաշտպանական միջոցառումների գոտում գտնվող բնակչության նախնական ազդարարումն իրականացնում է ՀԱԷԿ-ի հերթապահ ծառայությունը, իսկ շտապ պաշտպանական միջոցառումների պլանավորման գոտու բնակչության ազդարարումը` լիազոր մարմնի օպերատիվ ծառայությունը.

բ) համայնքային նշանակության արտակարգ իրավիճակի առաջացման սպառնալիքի և ծագման դեպքում` տվյալ համայնքի ղեկավարը.

գ) մարզային նշանակության արտակարգ իրավիճակի առաջացման սպառնալիքի և ծագման դեպքում` լիազոր մարմնի օպերատիվ ծառայությունը.

դ) հանրապետական նշանակության արտակարգ իրավիճակի առաջացման սպառնալիքի և ծագման դեպքում` լիազոր մարմնի օպերատիվ ծառայությունը.

ե) ռազմական դրության ժամանակ, հակառակորդի հանկարծակի հարձակման, հակառակորդի հարձակման սպառնալիքի դեպքում` լիազոր մարմնի օպերատիվ ծառայությունը:

7. Ազդարարման մասին որոշումների ընդունման նպատակով արտակարգ իրավիճակների դասակարգման չափանիշները սահմանվում են արտակարգ իրավիճակների և քաղաքացիական պաշտպանության բնագավառում լիազորված պետական մարմնի ղեկավարի կողմից:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան